Read Northwest Gbaya LUK 13 Bible Online

LUK 13 - Northwest Gbaya bible

LUK 13

¹Kale ŋgimbi'i, o ŋma bíí tɛɛ ɓɛɛ we ɗoŋ mɔ nɛ̀ hɔɔ zu o be Galilee ha̧ Jesu, wen Pilat gbɛɛ so wa ŋgimbi nɛ̀ wa ɗafi nɛ̀ Sɔ̧.

²Jesu kifa nú ha̧ wa: «Ɛnɛ ta k’ɛ́nɛ́‘e, wa dee mɔ hegɔ in o be Galilee nɔ‘i wen nɛ̀ wa nɛ́ o gasa wi-de-ɗaŋmɔ gan o dɔka be Galilee nde?

³Weyaa, mi'e ndé, k’ɛ̀nɛ̀ kpáí duka-a k’ɛ́nɛ́ na, ɛnɛ lɛŋ tɛ fe kànà hegɔ mbɛt.

⁴Ɓɛɛ nɛ̀ o wi nɔ'ɔ ɓu-zua-mɔɔrɔ-ɗoŋ-taar, nɛ̀ kusa tua sɛn Siloe gbina a zu wa, gbɛ wa’ɛ, ɛnɛ ta k’ɛ́nɛ́‘e wa dee ɗaŋmɔ gan o ŋma bíí Jerusalɛm nde?

⁵Weyaa, mi'e ndé, k’ɛ̀nɛ̀ kpáí duka-a k’ɛ́nɛ́ na, ɛnɛ lɛŋ tɛ fe kànà hegɔ mbɛt.»

⁶Ɓɛɛ a̧ tɔ̧ lizaŋ'ɛ: «Ŋma bíí a̧a̧ so nɛ̀ te-mbɔra kpɛɛfɔ kɔ‘i. Nɛ́ mɔ'ɔ n'aa nɛ̀ɛ̀ mɛ ɓi waya-a, ɓɛɛ a̧ kpa ŋma mɔ na.

⁷Ɓɛɛ a̧ tɔ̧ ha̧ wi-zɔk-fɔ kɔ̧-a̧: ‹Kinii, dee nɛ́ pɛ taar n'am tɛ mɛ ɓi nɛ́ waya mbɔra’ɛ ɓɛɛ mi kpa ŋma mɔ na. Mɛ̀ gɔ́m a̧ yinɛ, wen a̧ kpe nɛ́ bɛɛ-nù sɔɔ géè.›

⁸Ɓɛɛ wi-zɔk-fɔ tɔ̧ ha̧ a̧: ‹Nyaa, ɛ̀nɛ̀ é ha̧ a̧ dúk mɛ pɛ'ɛ kaŋ, ha̧‘m za̧ gun-aa, a̧‘m a ɗɔr-ndai sɛnɛ sɛ́.

⁹Ŋmafara a̧ tɛ wai nɛ̀ ɗoŋ; a̧ kà a̧ nɛ́ waia na, ɓɛɛ ɛnɛ gɔma a̧ yinɛ.› »

¹⁰Jesu duka so usi nɛ́ mɔ kɔ̧́ tua-mɔi̧a-a ŋma wese-ɔm-tɛ.

¹¹Ŋma okoo duka so hi̧i̧ nɛ̀ ɗaŋ-sɔ̧ a̧a̧ tɛ a̧; mɛ̀ nɛ́ tɛ pɛ ɓu-zua-mɔɔrɔ-ɗoŋ-taar a̧ ɗaŋ-sɔ̧‘i de nɛnɛ ha̧ kum mɛ duk tɛ a̧, ɓɛɛ ɗoŋ-aa bira, a̧ nyɛm mɛ nyafi ɓɔna.

¹²Jesu zɔka a̧ ɓɛɛ tɔ̧ ha̧ a̧: «Okoo’ɛ, kum yuu tɛ-mɛ kaɗi.»

¹³Jesu ee er zu-a, ɓɛɛ a̧ kur yor ŋgɔn kale ŋgimbi'i; ɗoŋ-aa nyafa, ɓɛɛ a̧ ku̧ naŋ gasa Sɔ̧.

¹⁴Ɓɛɛ see wi-duk-zu tua-mɔi̧a-a ɗaŋ wen Jesu kpasa bíí wese-ɔm-tɛ, ɓɛɛ a̧ tɔ̧ ha̧ giiwi: «Zɛ tom mɔɔrɔ-ɗoŋ-kpɔk. Nɛ́ tɛ̀ zɛ́ nɔ‘i ɛ̀nɛ̀ tɛ́ tɛ̀ nɛnɛ ha̧ wa mɛ kpasi'nɛ́, nɛ̀ bó nɛ́ tɛ́ wese-ɔm-tɛ na!»

¹⁵Ɓɛɛ Gasa Wan kifi nú ha̧ wi’ɛi: «Ɛnɛ o wi nɛ a̧a̧ nɛ̀ see yiitoo, bó nɛ́ ɛnɛ lɛŋ bur nɛ́ ndai k’ɛ́nɛ́, kóó nɛ́ tuifuu k’ɛ́nɛ́ fara-nyɔŋ-mɔ mɛ mgbɔ wa nɛnɛ mɛ nɔ yì wese-ɔm-tɛ na nde?

¹⁶Kóò'ɛ nɛ́ boko-bem ko Abraham nɛ̀ Satan hɛra dee pɛ ɓu-zua-mɔɔrɔ-ɗoŋ-taar, bó nɛ́ gana so ha'i mɛ bur nyak yinɛ tɛ a̧ wese-ɔm-tɛ na nde?»

¹⁷Tɛ́ wen'i, foe dee o wi-kur-zu a̧ lɛŋ, ɓɛɛ giiwi nɛ̀ oi-aa de nɛ́ tortɛ wen zu o dɔka mɔɔ-gɔn-ɗɛɗɛ-wi nɛ̀ Jesu duka so de'i.

¹⁸[16] Ɓɛɛ Jesu tɔ̧: «Wan ko Sɔ̧ hɔɔ ŋmaa in ge? Mi nyɛma mɛ we nɛ̀ ge?

¹⁹Wan ko Sɔ̧ hɔɔ ŋmaa in ŋma be kpar-mɔ tikiɗi nɛ̀ ŋma bíí baa gun kpɛɛfɔ kɔ‘i; nɛ́ mɔ'ɔ nɛ̀ hɔɔ ɓɛɛ gasi hee te ga, ɓɛɛ o nɔ̧́í̧ tɛ́ɛ̀ de yáá kɔ‘i kɔ̧̀ gbaa-er-a.»

²⁰Ɓɛɛ a̧ tɔ̧ woyo: «Mi nyɛma mɛ we Wan ko Sɔ̧ nɛ̀ ge?

²¹Wan ko Sɔ̧ hɔɔ ŋmaa in hao nɛ̀ ŋma okoo aa záŋ nɛ̀ ŋmaa in ao-fuu taar vati nɛnɛ e hɔ ŋgimbi nɛ̀ mbɔɗa-a lɛŋ kura.»

²²Jesu ɓira nɛ̀ o gasa ye in o geɗek ye usi nɛ̀ mɔ ba nɛ̀ war si Jerusalɛm.

²³Ŋma bíí aka a̧: «Gasa Wan, nɛ́ o bíí tikiɗi ɓɛɛ a̧ tɛ kpasi nde?» Jesu kifa nú ha̧ wa:

²⁴«Ɛ̀nɛ̀ kíí mɛ ye nɛ̀ geɗek nú garo, wen mi'e, o bíí nɛ̀ dɔka-a tɛ kii mɛ ye nɛ̀ geɗek nú garo, ɓɛɛ wa nyɛm mɛ ye na.»

²⁵«Ŋgimbi nɛ̀ wan-tua bé tɛ̀ɛ́ kur mɛ kpe nú tua kɔ‘i kaɗi, ɛnɛ n’ɛnɛ ɓɔna so zan tɛ ku̧ naŋ kɔna nú tua sa nɛ̀ mɔ‘e: ‹Gasa Wan! Ɛ̀nɛ̀ hú̧í̧ nú tua h’ɛ́ɛ́!› Ɓɛɛ a̧ tɛ kifi nú h’ɛ́nɛ́‘e: ‹Mi iŋ fara n’ɛnɛ tɛ nɛnɛ na.›

²⁶Ɓɛɛ ɛnɛ tɛ tɔ̧: ‹Ɛɛ yaa so nyɔŋ nɛ̀ mɔ, nɔ nɛ̀ mɔ nɛ̀ gbaayí‘nɛ́ ɓɛɛ ɛnɛ duka so bee-gara k’ɛɛ usi nɛ̀ mɔ.›

²⁷Ɓɛɛ a̧ tɛ kifi nú h’ɛ́nɛ́: ‹Mi iŋ fara n’ɛnɛ tɛ nɛnɛ na, ɛ̀nɛ̀ yú síɓí katɛ‘m, ɛnɛ o bíí lɛŋ nɛ̀ de ɗaŋmɔ.›

²⁸Ɛnɛ tɛ hi̧i̧ kɔ̧a̧ gɔfi nɛ̀ mɔ ŋgimbi n’ɛnɛ tɛ zɔk Abraham in Izak ká bá nɛ̀ Jakob in o wi-tɔ̧-wen oi nú Sɔ̧ lɛŋ tɛ Wan ko Sɔ̧, ɓɛɛ ɛnɛ yaa k’ɛ́nɛ́ zan.

²⁹O bíí tɛ́ tɛ̀ nɛ̀ daŋa-wese in yee-wese, nɛ̀ ká̧-zan-mɛ́-ŋgɔn in ká̧-zan-mɛ́-ɗɔɔ, ɓɛɛ wa tɛ ya ká̧ nyɔŋmɔ tɛ Wan ko Sɔ̧.

³⁰Hegɔ, o ŋma sɔŋkur-wi tɛ ya nɛ́ o kuti-wi, ɓɛɛ o ŋma kuti-wi tɛ ya nɛ́ o sɔŋkur-wi.»

³¹Kale ŋgimbi'i, o ŋma Fariziɛn tɛɛ tɔ̧ ha̧ a̧: «Mɛ̀ yák hɛ̧ɛ̧ si ŋma fara wen Herod kɔ̧ɔ̧ mɛ gbɛ mɛ.»

³²A̧ kifa nú ha̧ wa: «Ɛ̀nɛ̀ nɛ́ɛ̀ tɔ̧ ha̧ gba-toyo'i'e ndé, mi ndak nɛ́ o ɗaŋ-sɔ̧ in mi kpasi nɛ́ o bíí sɔsɔɔ in mɛ sa̧a̧mɔ, ɓɛɛ ɗoŋ zɛ taar mɔ kɔ‘m kaɗa!

³³Ɓɛɛ sɔsɔɔ, sa̧a̧mɔ in sa̧a̧mɔ oi-aa, mi tɛ nɛ̀ kànà nɛ́ nɔ̀ kɔ‘m siti, wen wi-tɔ̧-wen oi nú Sɔ̧ beka fe ŋma fara nɛ̀ zan na, kànà nɛ́ Jerusalɛm ɓɛɛ.

³⁴«Jerusalɛm, Jerusalɛm, ho! Mɛ́ nɛ̀ gbɛ o wi-tɔ̧-wen oi nú Sɔ̧ gbɛ̀ɛ́, ɓɛɛ mɛ́ yoo o betom nɛ̀ Sɔ̧ toma tɛnɛ ha̧ mɛ́ gbɛ nɛ̀ ta’ɛ, war ɔ dɔka mi kɔ̧ɔ̧ só nyɛmna ha̧‘m mɛ mɔi̧ o bem kɔ-mɛ hee mɔ'ɔ nɛ̀ nana-kɔra mɔi̧ nɛ o bem kɔ‘i a̧ ɗɔɔ ɓaa’ɛ ga wó, ɓɛɛ ɛ́nɛ́ kɔ̧ na.

³⁵Mi tɛ́ bɛ̧ tua k’ɛ́nɛ́ h’ɛ́nɛ́; mi'e ndé, ɛ́nɛ́ beka zɔk am ɓɔna hɔ ŋgimbi n’ɛnɛ tɛ tɔ̧‘e: ‹Tok- d- yoŋgo a̧ dúk zu wi nɛ̀ tɛ‘i nɛ̀ nin Gasa Wan!› »