Read Northwest Gbaya LUK 18 Bible Online

LUK 18 - Northwest Gbaya bible

LUK 18

¹Jesu tɔ̧ɔ̧ lizaŋ'ɛ ha̧ wa woyo mɛ usi'e ndé, wa a̧ kɔ́fí Sɔ̧ ɓɔnsɛnɛ, ká wa mbɔi na.

²«Ŋma wi-gɔn-kita duka so ŋma gasa ye; a̧ yu kɔ̧-a̧ kíí Sɔ̧ na, a̧ tu̧ tɛ bíí na mbɛt.

³Ŋma ko-gera duka so saaye'i mbɛt, ɓɛɛ ko-gera'i tɛ́ tɛ wi-gɔn-kita'i tɔ̧ ha̧ a̧‘e: ‹Ɛ̀nɛ̀ dé ha̧ kita mɛ tik wisɛn kɔ‘m.›

⁴Ɓɛɛ ɓɔnsɛnɛ wi-gɔn-kita'i bɛ̧ bɛ̧ɛ̧, tɔ̧ nɛnɛ ha̧ a̧‘e: ‹Nɛ̀ mbetɛ, mi yu kíí Sɔ̧ na, in mi yu bíí na mbɛt,

⁵ɓɛɛ hee mɔ'ɔ nɛ̀ kóò'ɛ gba nɛ́ zu'm ga, mi tɛ gɔn kita nɛ̀ de-a ha̧ a̧ wen ká a̧ tɛ́ɛ̀ tɛ ɓɔnsɛnɛ mɛ gba zu'm.› »

⁶Ɓɛɛ Gasa Wan tɔ̧ ha̧ wa woyo: «Ɛ̀nɛ̀ zíí wen nɛ̀ ɗaŋ wi-gɔn-kita tɔ̧a̧‘i.

⁷Hegɔ, bó nɛ́ Sɔ̧ nɛ̀ dúk’ɛ yé kɔ‘i nɛ́ ɗoŋ o wi nɛ̀ hiɗi mɔ sitɛ a̧ zɛ nɛ̀ wese na nde? A̧ tɛ nik so naŋ-a tɛ gbaka wa nde?

⁸Mi tɔ̧ h’ɛ́nɛ́, a̧ tɛ ye ɗoŋ wa nɛ̀ haya-a. Ɓɛɛ ŋgimbi nɛ̀ Bem ko bíí tɛ pii ɗoŋ, a̧ tɛ kpa kɔ̧ɔ̧ɗɔɔwen zu nù'ɛ ɓɔ nde?»

⁹Jesu tɔ̧ɔ̧ lizaŋ'ɛ woyo wen zu o ŋma bíí nɛ̀ ŋmaŋ kɔ‘i nɛ́ tɛ‘e, wi nɛ́ wi-de-mɔ nɛ̀ yuwar-a, ɓɛɛ nɛ̀ zɔk kɔ‘i o ŋma bíí hee geemɔ ga.

¹⁰«O ŋma bíí yiitoo daŋa ye kɔ̧́ Tua ko Sɔ̧ mɛ kɔfi Sɔ̧; ɛ̧ɛ̧ kpɔk nɛ́ Fariziɛn, ɓii-aa nɛ́ wi-ba-garama.

¹¹Fariziɛn yor kɔ‘i yor, kɔfi nɛ̀ Sɔ̧ hee mɔ'ɔ ga: ‹Sɔ̧ kɔ‘m, osoko h’ɛ́nɛ́ wen mi duk hee o dɔka bíí nɛ̀ ya nɛ́ o wi-zuzu, o wi-ɗaŋ in o wi-de-dàlà, kóó hee wi-ba-garama’ɛ ga na.

¹²Kɔ‘m, mi zim yì war yiitoo tɛ alat kpɔk; mi ha̧ nɛ́ zú-mɔ̀[19] tɛ mɔ lɛŋ n'am kpa.›

¹³Wi-ba-garama yora kɔ‘i nɛ̀ nyɛi̧a-a, kɔ̧ kɔ‘i mɛ ɓer yí si yiwese na, ɓɛɛ mbɛr nɛ́ yí-see tɔ̧ nɛnɛ‘e: ‹Sɔ̧ kɔ‘m, ɛ̀nɛ̀ dé ko ha̧‘m wen mi nɛ́ ɗaŋwi.›

¹⁴Mi tɔ̧ h’ɛ́nɛ́, tɛ̀ síí ɗoŋ ko wi-ba-garama'i si tɛ kɔ‘i, Sɔ̧ zɔka a̧ hee wi-de-mɔ nɛ̀ yuwar-a ga, ɓɛɛ ko Fariziɛn, bo hegɔ na, wen kóó o ndé nɛ̀ kii mɛ duk si ŋgɔn, Sɔ̧ tɛ gbɔs'a si ɗɔɔ, ɓɛɛ wi nɛ̀ duk si ɗɔɔ, Sɔ̧ tɛ ba a̧ e ŋgɔn.»

¹⁵Nɛ́ mɔ'ɔ nɛ̀ wa mgbɔɔ o geɗek bem tɛnɛ ha̧ Jesu mɛ tam tɛ-wa mbɛt; o ŋgaiwi ko Jesu zɔka o wi nɔ‘i ɓɛɛ dik wen a zu wa.

¹⁶Jesu saa o bem nɔ‘i pii tɛ, ɓɛɛ tɔ̧: «Ɛ̀nɛ̀ é ha̧ o geɗek bem mɛ tɛ pii tɛ‘m, k’ɛ́nɛ́ dor wa na, wen Wan ko Sɔ̧ nɛ́ ko o wi nɛ̀ duk hee wa ga.

¹⁷Nɛ́ kpasawen a̧‘m tɔ̧ h’ɛ́nɛ́, wi nɛ̀ kpɛk Wan ko Sɔ̧ hee geɗek bem ga na, beka ye sɛnɛ na.»

¹⁸Ŋma gasawi aka Jesu: «De wan-usi-mɔ, mɔ n'am tɛ de sɛka'm kpaa duka-kpasa kpoo nɛ kpoo nɛ̀ mɔɔ-oi nɛ́ ge?»

¹⁹Ɓɛɛ Jesu ak a̧: «Mɛ́ sa'm'e de-wi wen ge? Ŋma de-wi bo na, ɓaa de-wi nɛ́ Sɔ̧ kpɔk ɓɛɛ.

²⁰Mɛ iŋa o heembea: ká mɛ de dàlà na, ká mɛ gbɛ zu na, ká mɛ zu̧ mɔ na, ká mɛ ɓir wen e nú ŋmà-mɛ na, mɛ̀ tú̧ tɛ dáà kɔ-mɛ in nàà kɔ-mɛ.»

²¹Ɓɛɛ gasawi'i kifi nú: «Heembea nɔ‘i lɛŋ mi kasa nɛ̀ bem mɛ hɔ kinii.»

²²Jesu zia hegɔ, ɓɛɛ tɔ̧ ha̧ a: «Oi mɔ kpɔk nɛ̀ ɓɔna nɛ́ mɔ'ɔ: mɛ̀ ɗɔ́r mɔ kɔ-mɛ lɛŋ a̧ mɛ̀ kɛ̧́ ha̧ o wisan, ɓɛɛ mɛ́ tɛ kpa mbɔi sɛn yiwese mɛ; ɗoŋ mɔ‘i ɓɛɛ mɛ̀ tɛ́ ɗoŋ am.»

²³Wi’ɛi zia wen'i hegɔ ɓɛɛ kpa ɗaŋsee, wen a̧ duka so nɛ́ gasa wanmbɔi.

²⁴Jesu zɔka a̧ yaka nɛ̀ tu̧u̧-see, ɓɛɛ tɔ̧: «Ɔ ŋgaya ha̧ o wanmbɔi mɛ ye tɛ Wan ko Sɔ̧!

²⁵Gboa-a ko ŋgeloba nɛ̀ kɔ̧́ woi-si̧ɔ̧ ɔ yɛ́kɛ́ɗɛ́ gan yea-a ko wanmbɔi tɛ Wan ko Sɔ̧.»

²⁶O bíí nɛ̀ zia wen'i tɔ̧ɔ̧ ha̧ Jesu: «Kà nɛ́ bòò hegɔ, ɓɛɛ nɛ́ o'o tɛ kpasi o?»

²⁷Jesu kifa nú: «Mɔ nɛ̀ gan bíí gan Sɔ̧ na.»

²⁸Ɓɛɛ Pierre tɔ̧ ha̧ a̧: «K’ɛ́ɛ́, ɛ́ɛ́ ee mɔ k’ɛɛ lɛŋ duk mɛ nɛ̀ ɗoŋ‘nɛ́.»

²⁹Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, wi nɛ̀ tɛ e tua kɔ‘i, kóò kɔ‘i, o nya-wi, o dáà in nàà kɔ‘i, kóó o bem kɔ‘i duk wen Wan ko Sɔ̧,

³⁰wi’ɛi tɛ kpa mɔ nɛ̀ dɔka-a gan tɛ ŋgimbi’ɛ, ɓɛɛ tɛ́ ŋgimbi nɛ̀ tɛ‘i, a̧ tɛ kpa duka-kpasa kpoo nɛ kpoo.»

³¹Hɔ-ɗoŋ-aa, Jesu mgbɔɔ o ŋgaiwi kɔ‘i ɓu-zua-yiitoo, ɓɛɛ tɔ̧ ha̧ wa: «Zɔ́k, kinii, ɛɛ a̧ daŋ si Jerusalɛm’ɛ, ɓɛɛ mɔ lɛŋ nɛ̀ o wi-tɔ̧-wen oi nú Sɔ̧ bàá yɔr so wen Bem ko bíí tɛ hɔ gba̧a̧.

³²Wa tɛ de ha̧ Bem ko bíí mɛ ye er o wi nɛ̀ iŋ kpasa Sɔ̧ na, wa tɛ zɛkɛɗ‘a, wa tɛ da̧ a̧, wa tɛ a sap yí-a mbɛt.

³³Ɓɛɛ ɗoŋ nɛ̀ wa tɛ gus'a kaɗi, wa tɛ gbɛ a̧, ɓɛɛ ɗoŋ zɛ yiitoo taar-a a̧ kpasa.»

³⁴Ɓɛɛ wa zii gba̧a̧ wen'i na; wen'i duka nɛ̀ hu̧sa̧-a̧, ɓɛɛ wa iŋ géé iŋa gba̧a̧ wen nɛ̀ Jesu tɔ̧a̧‘i na.

³⁵Hee mɔ'ɔ n'aa hɛɗa saaye Jeriko ga, ŋma wi-boma-yí duka nù ká̧ war kɔfi nɛ̀ mɔ.

³⁶A̧ zia gítí giiwi nɛ̀ ɓir, ɓɛɛ a̧ ak mɔ nɛ̀ yak,

³⁷ɓɛɛ wa tɔ̧ ha̧ a̧‘e, nɛ́ Jesu be Nazarɛt a̧ ɓir yak.

³⁸Ɓɛɛ a̧ hiɗi mɔ tɔ̧ nɛnɛ‘e: «Jesu, Bem ko David, ɛ̀nɛ̀ dé ko ha̧‘m.»

³⁹Ɓɛɛ o wi-ya-ti dik wen a zu a̧‘e, a̧ a̧ kpé nú, ɓɛɛ a̧ hiɗi mɔ nɛ̀ ŋgaya-a gan kuti-a'e: «Bem ko David, ɛ̀nɛ̀ dé ko ha̧‘m.»

⁴⁰Jesu yora, ɓɛɛ tɔ̧ ha̧ wa mɛ mgbɔ wi’ɛi tɛnɛ ha̧ a̧. Wi-boma-yí‘i hɛɗa katɛ a̧, ɓɛɛ Jesu ak a̧:

⁴¹«Mɛ́ kɔ̧ɔ̧ a̧‘m dé nɛ́ ge mɔ ge ha̧ mɛ ge?» A̧ kifa nú: «Gasa Wan, ɛ̀nɛ̀ dé ha̧‘m zɔk mɔ woyo!»

⁴²Jesu tɔ̧ɔ̧ ha̧ a̧: «Mɛ̀ zɔ́k mɔ, kɔ̧ɔ̧ɗɔɔwen kɔ-mɛ kpasa mɛ.»

⁴³Soɓee, yí-a hu̧i̧a̧, a̧ zɔka mɔ, ɓɛɛ a̧ nɛ́ ɗoŋ Jesu gasi nɛ̀ Sɔ̧. O bíí lɛŋ zɔka mɔ‘i ɓɛɛ zɔn Sɔ̧.