Read Northwest Gbaya LUK 19 Bible Online

LUK 19 - Northwest Gbaya bible

LUK 19

¹Jesu yee saaye Jeriko, ɓɛɛ ɓir ɓir yak.

²Ɓɛɛ ŋma bíí, nin-a'e Zachee hɔ. Wi’ɛi nɛ́ ŋma gasawi ko o wi-ba-garama in a̧ nɛ́ wanmbɔi mbɛt.

³A̧ kia war mɛ zɔk Jesu wen a̧ iŋ so ti Jesu na, ɓɛɛ a̧ nyɛm mɛ zɔk a̧ na wen giiwi in wen a̧ duka so nɛ́ dɔ̧-wi mbɛt.

⁴A̧ maa yì siti, ɓɛɛ a̧ daŋ ŋma gasa te-mbɔra wen ha̧ a̧ mɛ zɔk Jesu nɛ̀ tɛ ɓir nɛ̀ hi̧i̧ yak'i.

⁵Nɛ́ mɔ'ɔ nɛ̀ Jesu hɔɔ ɗɔɔ te'i, ba yí nɛ̀ ŋgɔn, ɓɛɛ tɔ̧ ha̧ a̧: «Zachee, mɛ̀ zír bee, wen sɔsɔɔ mi tɛ zir tɛ̀ kɔ-mɛ.»

⁶Zachee zira nɛ̀ haya-a, ɓɛɛ kpɛk Jesu nɛ̀ desee.

⁷Zɔka-a nɛ̀ o bíí zɔka hegɔ, wa lɛŋ ku̧i̧a mɔ, tɔ̧ nɛnɛ‘e: «A̧ nɛ̀ɛ̀ zir tɛ̀ ko wi-de-ɗaŋmɔ.»

⁸Ɓɛɛ Zachee tɛ́ɛ̀ yor ti Gasa Wan, ɓɛɛ tɔ̧: «Gasa Wan, mi tɛ ha̧ reeta mbɔi kɔ‘m ha̧ o wisan, ɓɛɛ kà‘m nɛ̀ baa mɔ er ŋma bíí nɛ̀ yuwar-a na, mi hà̧á̧ mɔ‘i si ɗoŋ ha̧ a̧ war naar.»

⁹Ɓɛɛ Jesu tɔ̧ɔ̧ ha̧ a̧: «Yuwar kpasa-a yee kɔ̧́ tua’ɛ sɔsɔɔ, wen wi’ɛ mbɛt, nɛ́ ŋma bem ko Abraham.

¹⁰Wen Bem ko bíí tɛɛ mɛ kii in mɛ kpasi mɔ̀ nɛ̀ yɔ̀á[20].»

¹¹Hee mɔ'ɔ nɛ̀ o bíí ya zii nɛ̀ wen'i ga, Jesu tɔ̧ ŋma lizaŋ woyo ha̧ wa, wen n'aa hɛɗa nɛ̀ saaye Jerusalɛm kaɗi, in wen o bíí ta kɔ‘i'e Wan ko Sɔ̧ tɛ hɔ tɛ kale ŋgimbi'i.

¹²Ɓɛɛ a̧ tɔ̧: «Bem ko ŋma gasawi yaka si ŋma nù nɛ̀ nyɛi̧a-a ha̧ wa mɛ de wan ha̧ a̧ sɛka a̧ pia ɗoŋ woyo.

¹³Nɛ́ mɔ'ɔ n'aa saa o wi-de-tom kɔ̧-a̧, ɓɛɛ ha̧ kɔya-lɔr kpɔk kpɔk ha̧ wa, ɓɛɛ tɔ̧: ‹Ɛ̀nɛ̀ bá, ɛ̀nɛ̀ dé nɛ̀ gɛnɛ hɔ ŋgimbi n'am tɛ pii ɗoŋ.›

¹⁴O bíí kɔ̧-a̧ sɛn so nɛ́ a̧, ɓɛɛ wa tom ŋma betom nɛnɛ ɗoŋ-aa mɛ tɔ̧ ha̧ a̧‘e: ‹Ɛ́ɛ́ kɔ̧́ h’ɛ́nɛ́ mɛ ɔ wan zu yɛ na.›

¹⁵«Wa dee wan ha̧ a̧ kaɗi, ɓɛɛ a̧ pii ɗoŋ sa o wi-de-tom n'aa ha̧a̧ so sede ha̧ wa'i ha̧ a̧ mɛ zɔk mɔ nɛ̀ wa kpɔk kpɔk kpaa e zu sede'i.

¹⁶Kuti wi-de-tom tɛɛ tɔ̧: ‹Gasa Wan, mi kpaa mbe kɔya-lɔr ɓu a zu wan n’ɛnɛ ha̧a̧ ha̧‘m.›

¹⁷Ɓɛɛ wannu'i tɔ̧ ha̧ a̧: ‹Mɛ́ nɛ́ de wi-de-tom, ɓɛɛ hee mɔ'ɔ nɛ̀ mɛ mboo zu tɛ geɗek mɔ ga, mi ha̧a̧ ye ɓu ha̧ mɛ mɛ ɔ wan zu wa.›

¹⁸Yiitoo wi-de-tom tɛa ɓɛɛ tɔ̧: ‹Gasa Wan, mi kpaa mbe kɔya-lɔr mɔɔrɔ a zu wan n’ɛnɛ ha̧a̧ ha̧‘m.›

¹⁹Ɓɛɛ wannu'i tɔ̧ ha̧ a̧ mbɛt: ‹Mi ha̧a̧ ye mɔɔrɔ ha̧ mɛ mɛ ɔ wan zu wa.›

²⁰Ŋma woyo tɛa, ɓɛɛ tɔ̧: ‹Gasa Wan, kɔya-lɔr k’ɛ́nɛ́ n'am kpoo so nú laa, bá é'ɛ, nɛ́ mɔ'ɔ.

²¹Kíì dea'm wen ɛ́nɛ́ de ko ha̧ bíí na; ɛ́nɛ́ ba mɔ fara n’ɛnɛ e mɔ sɛnɛ na, ɛ́nɛ́ mɔi̧ nyɔnɔ fara n’ɛnɛ gun mɔ sɛnɛ na mbɛt.›

²²Ɓɛɛ wannu tɔ̧ ha̧ wi-de-tom'i: ‹Mɛ́ nɛ́ ɗaŋ wi-de-tom. Mi tɛ gɔn kita zu mɛ nyɛm nɛ̀ ɗoŋ wen kɔ-mɛ. Mɛ iŋa'e mi de ko na, mi ba mɔ fara n'am e mɔ sɛnɛ na, in mi mɔi̧ nyɔnɔ fara n'am gun mɔ sɛnɛ na mbɛt.

²³Wen ge sa mɛ e sede kɔ‘m fara-e-sede, ɓɛɛ tɛ pia ɗoŋ kɔ‘m, mi tɛ̀ɛ́ kpa so mbe-a tikiɗi zu-a na ge?›

²⁴Ɓɛɛ a̧ tɔ̧ ha̧ o bíí nɛ̀ ya hi̧i̧: ‹Ɛ̀nɛ̀ bá kɔya-lɔr'i er-a yinɛ, ɓɛɛ ɛ̀nɛ̀ há̧ ha̧ wi nɛ̀ a̧a̧ nɛ̀ kɔya-lɔr ɓu.› [

²⁵Ɓɛɛ wa kifa nú ha̧ a̧: ‹Gasa Wan, a̧ a̧a̧ nɛ̀ kɔya-lɔr ɓu nɛti kaɗi!›]

²⁶Wannu tɔ̧ɔ̧ ha̧ wa: ‹Mi tɔ̧ h’ɛ́nɛ́, kóó o ndé nɛ̀ a̧a̧ nɛ̀ mɔ, wi tɛ e mbe-a zu-a ha̧ a̧, ɓɛɛ wi nɛ bó nɛ̀ mɔ na, wi tɛ ba kànà be mɔ nɛ̀ a̧a̧ er-a'i yinɛ.

²⁷Ɓɛɛ nɛ̀ ko o wisɛn kɔ‘m nɛ̀ kɔ̧ so ha̧‘m mɛ ɔ wan zu wa na, ɛ̀nɛ̀ káí wa tɛnɛ, ɛ̀nɛ̀ gɔ́n ger-wa nɛ̀ yí‘m.› »

²⁸Ɗoŋ wen'i, Jesu duka ti mɛ daŋ si Jerusalɛm, in o giiwi.

²⁹Wa hɛɗa ká̧ Bɛtfage in Betanii, ká̧ kaya nɛ̀‘i sa'e Kaya Te-nɔ̧́; nɛ́ mɔ'ɔ nɛ̀ Jesu toma o ŋma ŋgaiwi kɔ‘i yiitoo, ɓɛɛ tɔ̧ ha̧ wa:

³⁰«Ɛ̀nɛ̀ nɛ́ tɛ be ye nɛ̀ a̧a̧ ti'nɛ́‘i; hɔa-a k’ɛ́nɛ́ hegɔ, ɛ́nɛ́ tɛ́ kpa ŋma be tuifuu nɛ̀ wa kuna, nɛ̀ ŋma bíí tɛ daŋ zu a̧ nɛti hɔ̧ɔ̧ na; ɛ̀nɛ̀ búr a̧, ɛ̀nɛ̀ fó a̧ tɛnɛ ha̧‘m.

³¹Ɓɛɛ kà ŋma bíí ak'nɛ́‘e, ɛ́nɛ́ bur a̧ wen ge nde? Ɛ̀nɛ̀ kífí nú ha̧ wi’ɛi'e: ‹Nɛ́ Gasa Wan a̧ kɔ̧ɔ̧ a̧.› »

³²Nɛ́ mɔ'ɔ nɛ̀ o betom nɔ‘i yaka, ɓɛɛ wa kpa mɔ hee mɔ'ɔ nɛ̀ Jesu bàá tɔ̧ ha̧ wa ga.

³³Wa ɓɔna fara bura tuifuu, ɓɛɛ o wan-aa ak wa: «Ɛ́nɛ́ bur be tuifuu’ɛ wen ge?»

³⁴Wa kifa nú: «Nɛ́ Gasa Wan a̧ kɔ̧ɔ̧ a̧.»

³⁵Nɛ́ mɔ'ɔ nɛ̀ wa mgbɔɔ be tuifuu'i nɛnɛ ha̧ Jesu, wa tata laa kɔ-wa ɗoŋ-aa, ɓɛɛ wa ba Jesu e zu a̧.

³⁶Wa a̧ nɛ́ nɔ̀‘i, ɓɛɛ o bíí a̧ tati laa kɔ‘i yuwar'i.

³⁷A̧ hɛɗa zira Kaya Te-nɔ̧́ kaɗi, ɓɛɛ o ŋgaiwi lɛŋ kpa desee, ɓɛɛ wa ku̧ naŋ zɔna Sɔ̧ nɛ̀ hee ger wen o mɔɔ-kifi lɛŋ nɛ̀ wa zɔka.

³⁸Wa gaia mɔ: «Toka-de-yoŋgo a̧ dúk zu wi nɛ̀ tɛ‘i nɛ̀ nin Gasa Wan, a̧ nɛ́ wannu! Ga̧a̧mɔ a̧ dúk yiwese, ɓɛɛ gasamɔ a̧ dúk si yiwese ŋgɔn mɛ!»

³⁹O ŋma Fariziɛn nɛ̀ yaa so mgbara giiwi tɔ̧ɔ̧ ha̧ Jesu: «Wan-usi-mɔ, ɛ̀nɛ̀ gáí o ŋgaiwi k’ɛ́nɛ́.»

⁴⁰Ɓɛɛ Jesu kifi nú: «Mi tɔ̧ h’ɛ́nɛ́, kà wa nɛ́ kpee nú-wa, ɓɛɛ nɛ́ o ta a̧ tɛ hiɗi mɔ!»

⁴¹Ŋgimbi nɛ̀ Jesu hɛɗa nɛ̀ Jerusalɛm, a̧ zɔka ye, ɓɛɛ a̧ hi̧i̧ kɔ̧a̧ wen zu ye'i.

⁴²A̧ tɔ̧a̧: «Ho, Jerusalɛm! Sɔsɔɔ kà bó so ha̧ mɛ mɛ iŋ yuwar nɛ̀ mɛ tɛ de mɛ kpa nɛ̀ ga̧a̧mɔ gáà, mɛ tɛ̀ɛ́ kpa. Mɔ kpɔk, mɔ‘i ɔ hu̧sa̧ wen mɛ.

⁴³Ŋma wese tɛ hɔ nɛ̀ o wisɛn kɔ-mɛ tɛ mbo garo zik mɛ, wa tɛ kɛr mɛ, ɓɛɛ wa kpee yuwar kɔ-mɛ lɛŋ.

⁴⁴Wa tɛ mbɔli mɛ in o bem kɔ-mɛ nɛ̀ ya kɔ̧́ tua kɔ-mɛ, wa beka e ŋma ta tɛ-mɛ ɓɔn zu ŋmaa na mbɛt, wen mɛ iŋ ŋgimbi nɛ̀ Sɔ̧ tɛ̀ɛ́ nɛnɛ tɛ mɛ na.»

⁴⁵Nɛ́ mɔ'ɔ nɛ̀ Jesu yee kɔ̧́ Tua ko Sɔ̧, ɓɛɛ a̧ ku̧ naŋ ndaka o wi-ɗɔr-mɔ gbonɛ,

⁴⁶tɔ̧ nɛnɛ ha̧ wa'e: «Yɔramɔ tɔ̧a̧‘e: ‹Tua kɔ‘m tɛ duk nɛ́ tua-kɔfi-sɔ̧.› Ɓɛɛ k’ɛ́nɛ́, ɛnɛ zika e nɛ̀ di̧i̧ ko o kpɔ̧i̧-gba̧a̧-nin!»

⁴⁷Jesu duka so usi nɛ̀ mɔ kɔ̧́ Tua ko Sɔ̧ wese kpɔk kpɔk, ɓɛɛ o gasa wan-ɗafi-sɔ̧ in o wi-usi-heembea in o gasawi kii war mɛ gbɛ a̧.

⁴⁸Ɓɛɛ wa kpa yuwar-a na, wen bíí lɛŋ duka so zii nɛ̀ wen kɔ̧-a̧, yeŋ nɛ̀ zer sɛnɛ.