Read Northwest Gbaya LUK 2 Bible Online

LUK 2 - Northwest Gbaya bible

LUK 2

¹Ŋgimbi'i, Sezar Ogust ha̧a̧ heembea mɛ tɔr bíí zaŋnu lɛŋ.

²Kuti tɔra bíí‘i dee tɛ ŋgimbi nɛ̀ Kirinius duka so nɛ́ wi-duk-zu zika-nú Sirii.

³Bíí lɛŋ yaka, kóó o ndé nɛ̀ɛ̀ mɛ yɔr nin sɛn mgbák ye kɔ‘i.

⁴Ɓɛɛ Jozɛf mbɛt kur saaye Nazarɛt, nú Galilee daŋ si nú Judee, ye ko David mɛ, nin ye'i nɛ́ Bɛtlɛhɛm, wen a̧ nɛ́ bíí nutua ko David, in pɛ́r-nàm kɔ̧-a̧ mbɛt.

⁵A̧ nɛ̀ɛ̀ ha̧ wa mɛ tɔr a̧ in kóò kɔ̧-a̧ Marii nɛ̀ a̧a̧ nɛ̀ zaŋ.

⁶Ɓɛɛ hee mɔ'ɔ nɛ̀ wa yaa hi̧i̧ ga, wese nɛ̀ Marii tɛ ko bem hɔa.

⁷A̧ kòó kaya-bem kɔ̧-a̧ nɛ̀ be wiwii, a̧ kara tɛ-a nɛ̀ goe, ɓɛɛ pi̧ a̧ nù kɔ̧ fara-nyɔŋ-mɔ ko o mɔ-dai, wen wa kpa so fara sɛn kɔ̧́ tua-zir-gɛnɛ na.

⁸O wi-dai-sami yaa so sɛn zaŋbɛɛ hi̧i̧ pɛm nɛ̀ gíí sami kɔ-wa mɛ zɛ.

⁹Ŋma betom ko Gasa Wan tɛɛ yor ti wa, ɓɛɛ gasamɔ ko Gasa Wan kpe zu wa nɛ̀ sa̧a̧mɔ, ɓɛɛ kíì de wa nyɛmna.

¹⁰Nɛ́ mɔ'ɔ nɛ̀ betom ko Sɔ̧ tɔ̧ɔ̧ ha̧ wa: «K’ɛ́nɛ́ de kíì na, wen mi tɛ̀ɛ̀ mɛ tɔ̧ nɛ́ De Mbe Wen nɛ̀ tɛ ha̧ desee h’ɛ́nɛ́ in ha̧ dukbíí nɛ̀ oi-aa:

¹¹Sɔsɔɔ wa koo Wan-kpasi-wi h’ɛ́nɛ́ sɛn ye ko David, ɓɛɛ a̧ nɛ́ Krist, Gasa Wan.

¹²Ɓɛɛ mɔ nɛ̀ tɛ de h’ɛ́nɛ́ mɛ iŋ a̧ nɛ́ mɔ'ɔ: ɛnɛ tɛ kpa ŋma be zɔɗi-bem nɛ̀ wa kara tɛ-a nɛ̀ goe, nɛ̀ ɔ nù kɔ̧ fara-nyɔŋ-mɔ ko o mɔ-dai.»

¹³Soɓee, gíí betom mɛ yiwese tɛɛ kpa ŋmaa in kuti betom, ɓɛɛ bíí gima zɔn nɛ̀ Sɔ̧ tɔ̧ nɛnɛ‘e:

¹⁴«Gasi Sɔ̧ nɛ̀ a̧a̧ yiwese ŋgɔn mɛ, ɓɛɛ ga̧a̧mɔ a̧ dúk zaŋnu mgbara o bíí dua-see-aa.»

¹⁵Ŋgimbi nɛ̀ o betom ko Sɔ̧ ee o wi-dai-sami duk mɛ si ɗoŋ yiwese kaɗi, wa tɔ̧ɔ̧ sitɛ o ŋmaa: «Ɛ̀ɛ̀ nɛ́ɛ̀ hɔ́ kànà Bɛtlɛhɛm, ɛ̀ɛ̀ zɔ́k mɔ nɛ̀ hɔa, nɛ̀ Gasa Wan usa h’ɛ́ɛ́‘i.»

¹⁶Ɓɛɛ wa yak nɛ̀ haya-a, nɛ́ɛ̀ kpa Marii, in Jozɛf, sɛka be zɔɗi-bem nɛ̀ ɔ nù kɔ̧́ fara-nyɔŋ-mɔ ko o mɔ-dai.

¹⁷Wa zɔka a̧ kaɗi, ɓɛɛ wa we ɗoŋ mɔ nɛ̀ betom ko Sɔ̧ tɔ̧ɔ̧ so ha̧ wa wen Bem’ɛi.

¹⁸O bíí lɛŋ nɛ̀ zia wéé ɗoŋ wen ko o wi-dai-sami nɔ‘i yaa nɛ̀ gɔna ɗɛɗɛ.

¹⁹Marii kasa mɔɔ nɔ‘i lɛŋ e kɔ̧́ see, ta nɛ̀ mɔ sɛnɛ wese lɛŋ.

²⁰Ɓɛɛ o wi-dai-sami si ɗoŋ. Wa gasa Sɔ̧ zɔn nɛ̀ a̧ wen mɔ nɛ̀ wa zia in mɔ nɛ̀ wa zɔka lɛŋ nyɛm nɛ̀ ɗoŋ mɔ nɛ̀ betom ko Sɔ̧ bàá tɔ̧ ha̧ wa.

²¹Tɛ mɔɔrɔ-ɗoŋ-taar zɛ, wese-gɔn-bɔr bem, wa saa nin-a'e Jesu, hee mɔ'ɔ nɛ̀ betom ko Sɔ̧ bàá sa so nɛti ha̧ Marii mɛ ba zaŋ-aa ga.

²²Ɓɛɛ nɛ̀ wese ɗafa-war-tɛ hɔa, hee mɔ'ɔ nɛ̀ heembea ko Moisɛ usa so ga, wa baa bem nɛnɛ Jerusalɛm mɛ ha̧ ha̧ Gasa Wan,

²³nyɛm nɛ̀ ɗoŋ mɔ nɛ̀ yɔra zaŋ heembea ko Gasa Wan'e: «Wi tɛ ha̧ kaya be-wiwii lɛŋ ha̧ Gasa Wan mɛ duk nɛ́ kɔ̧-a̧,»

²⁴in wen ha̧ wa mɛ ha̧ mɔɔ-ɗafi-sɔ̧ nɛ̀ gbaku̧i̧ yiitoo, kóó be pola yiitoo hee mɔ'ɔ nɛ̀ yɔra zaŋ heembea ko Gasa Wan ga.

²⁵Ŋma bíí duka so Jerusalɛm, nin-a nɛ́ Simeɔŋ, a̧ nɛ́ wi-de-mɔ nɛ̀ yuwar-a nɛ̀ yu Sɔ̧. A̧ duka so zɛm nɛ̀ Wi-ga̧-see Israɛl[4], ɓɛɛ Sa̧a̧ Ɔmi duka so in a̧,

²⁶wen Sa̧a̧ Ɔmi tɔ̧ɔ̧ so ha̧ a̧ nɛti'e ndé, a̧ tɛ zɔk Mɛsii[5] nɛ̀ Gasa Wan tɛ tom tɛnɛ nɛti sɛka a̧ fea.

²⁷Hegɔ, Sa̧a̧ Ɔmi dee ha̧ a̧ mɛ nɛ kɔ̧́ Tua ko Sɔ̧, ɓɛɛ hee mɔ'ɔ nɛ̀ dáà in nàà ko be-zɔɗi Jesu baa a̧ nɛnɛ mɛ de mɔ wen a̧ hee mɔ'ɔ nɛ̀ heembea usa ga,

²⁸Simeɔŋ baa a̧, de osoko ha̧ Sɔ̧, ɓɛɛ tɔ̧:

²⁹«Gasa Wan, kinii, ɛ̀nɛ̀ é ha̧ wi-de-tom k’ɛ́nɛ́ mɛ si zaŋ ga̧a̧mɔ, hee mɔ'ɔ n’ɛnɛ bàá tɔ̧ ga.

³⁰Wen yí‘m zɔka yuwar-kpasa-bíí k’ɛ́nɛ́

³¹n’ɛnɛ ɗafa sɛn ti o bíí lɛŋ.

³²Mɔ‘i nɛ́ sa̧a̧mɔ nɛ̀ tɛ usi mɔ ha̧ o bíí zaŋnu, ɓɛɛ tɛ duk nɛ́ gasamɔ ha̧ dukbíí k’ɛ́nɛ́ Israɛl mbɛt.»

³³Ɓɛɛ dáà in nàà ko Jesu duka nɛ̀ gɔna ɗɛɗɛ tɛ wen nɛ̀ wa tɔ̧ɔ̧ zu a̧.

³⁴Simeɔŋ toka de yoŋgo zu wa, ɓɛɛ tɔ̧ ha̧ Marii, nàà ko Jesu: «Mɛ̀ zìì, o bíí Israɛl nɛ̀ dɔka-a tɛ tik wen zu bem’ɛ, ɓɛɛ o ŋma nɛ̀ dɔka-a mbɛt tɛ kur; a̧ tɛ duk nɛ́ mɔɔ-usi-mɔ ko Sɔ̧ nɛ̀ o bíí tɛ si kafɛ sɛnɛ.

³⁵Ɓɛɛ nɛ̀ war kɔ-mɛ, gba-paa tɛ tok see-mɛ sar; nɛ́ hegɔ a'i tɛ iŋ nɛ̀ taamɔ ko o dɔka bíí.»

³⁶Ŋma ko-tɔ̧-wen oi nú Sɔ̧ duka so mbɛt, nin-a nɛ́ Anna, bem ko Fanuɛl, zuduk ko Asɛr. Pɛ kɔ̧-a̧ dɔka so nyɛmna mbɛt. A̧ baa so wíì, ɓɛɛ a̧ duka in wíì tɛ pɛ mɔɔrɔ-ɗoŋ-yiitoo.

³⁷Nɛ́ mɔ'ɔ nɛ̀ wii kɔ̧-a̧ fea, ɓɛɛ a̧ duk nɛ́ ko-gera, ɓɛɛ sɛn tɛ pɛ ɓu-mɔɔrɔ-ɗoŋ-taar-zua-naar n'aa a̧a̧ nɛnɛ‘i, a̧ mbosi tɛa-a kɔ̧́ Tua ko Sɔ̧ na. A̧ de nɛ tom ha̧ Sɔ̧ zɛ nɛ wese, zim nɛ̀ yì, wor nɛ̀ Sɔ̧.

³⁸Nɛ́ mɔ'ɔ n'aa hɔɔ nyɛm nɛ̀ ŋgimbi báá Jesu nɛnɛ kɔ̧́ Tua ko Sɔ̧, ɓɛɛ a̧ ku̧ naŋ dee osoko ha̧ Sɔ̧, tɔ̧ nɛ̀ wen zu bem’ɛi ha̧ bíí lɛŋ nɛ̀ zɛm nɛ̀ mɔ ha̧ Sɔ̧ mɛ gbo Jerusalɛm tɛ bara.

³⁹Ɗoŋ nɛ̀ wa dee mɔ lɛŋ nɛ̀ yɔra zaŋ heembea ko Gasa Wan kaɗi, wa sii ɗoŋ si Nazarɛt ye kɔ-wa, nú Galilee mɛ.

⁴⁰Bem’ɛi gasi gasi nɛnɛ, kpa nɛ̀ ŋgai; iŋa-mgbara-mɔ kɔ̧-a̧ dɔk dɔk siti, ɓɛɛ Sɔ̧ tok nɛ́ de yoŋgo zu a̧ mbɛt.

⁴¹Dam ɗoŋ pɛ kpɔk kpɔk, dáà in nàà ko Jesu nɛ́ nɛ́ gbaŋa Paska sɛn Jerusalɛm mɛ.

⁴²Jesu kpaa pɛ ɓu-zua-yiitoo kaɗi, ɓɛɛ dáà in nàà kɔ̧-a̧ daŋ si Jerusalɛm, hee mɔ'ɔ nɛ̀ wa duka so mɛ de ɓɔnsɛnɛ tɛ́ gbaŋa Paska ga.

⁴³Ɗoŋ nɛ̀ gbaŋa kaɗa kaɗi, wa sia, ɓɛɛ Jesu ɓɔn kɔ‘i Jerusalɛm mɛ; dáà in nàà kɔ̧-a̧ iŋ kɔ‘i na.

⁴⁴Wa taa kɔ-wa'e ŋmafara a̧ a̧a̧ mgbara o dɔka bíí, ɓɛɛ kɔ-wa kànà nɛ́ nɔ̀ hegɔ, mɔ ga̧ nɛnɛ. Nɛ́ mɔ'ɔ nɛ̀ wa ku̧u̧ naŋ kia a̧ mgbara o nàm kɔ-wa in o bíí nɛ̀ wa iŋa.

⁴⁵Hee mɔ'ɔ nɛ̀ wa kpa a̧ na ga, wa pia ɗoŋ Jerusalɛm mɛ kii a̧.

⁴⁶Nɛ́ ɗoŋ zɛ taar a̧ wa kpaa nɛ̀ a̧ kɔ̧́ Tua ko Sɔ̧, fara duk nù mgbara o wi-usi-mɔ, zii nɛ̀ wen kɔ-wa, ak nɛ̀ wa mbɛt.

⁴⁷Ɓɛɛ ɗɛɗɛ o bíí lɛŋ nɛ̀ zia wen kɔ̧-a̧ gɔn gɔn wen iŋamɔ in kifa-nú kɔ̧-a̧.

⁴⁸Tɛ̀ zɔka a̧, ɗɛɗɛ Jozɛf in nàà kɔ̧-a̧ gɔna, ɓɛɛ nàà kɔ̧-a̧ tɔ̧ ha̧ a̧: «Bem kɔ‘m, mɛ́ dee in yɛɛ hegɔ wen ge? Mɛ̀ zɔ́k dáà kɔ-mɛ in am, ɛɛ kii nɛ́ mɛ nɛ̀ ɗaŋsee.»

⁴⁹Ɓɛɛ a̧ kifi nú ha̧ wa: «Ɛnɛ kii am wen ge? Ɛnɛ iŋ‘e ndé, gana so ha̧‘m mɛ duk kɔ̧́ tua ko Dáà kɔ‘m na nde?»

⁵⁰Ɓɛɛ Jozɛf in Marii iŋ mgbara wen n'aa tɔ̧ɔ̧ ha̧ wa'i na.

⁵¹Ɓɛɛ Jesu si ɗoŋ in wa si Nazarɛt. A̧ mboo zu ha̧ wa, ɓɛɛ nàà kɔ̧-a̧ kasi o mɔɔ nɔ‘i lɛŋ e kɔ̧ see.

⁵²Iŋa-mgbara-mɔ ko Jesu dɔk dɔk siti, a̧ kusi kusi nɛ̀ haya-a, ɓɛɛ Sɔ̧ in o bíí a̧a̧ nɛ̀ desee zu a̧ mbɛt.