Read Northwest Gbaya LUK 20 Bible Online

LUK 20 - Northwest Gbaya bible

LUK 20

¹Ŋma wese nɛ̀ Jesu duka kɔ̧́ Tua ko Sɔ̧ usi nɛ̀ mɔ ha̧ o bíí, tɔ̧ nɛ̀ De Mbe Wen ko Sɔ̧ ha̧ wa, o gasa wan-ɗafi-sɔ̧, o wi-usi-heembea in o gasawi saaye hɔa,

²ɓɛɛ tɔ̧ ha̧ a̧: «Mɔ nɛ̀ mɛ de’ɛ, mɛ de tɛ ŋgai ko o? Nɛ́ o'o ha̧ ŋgai'i ha̧ mɛ o?»

³Nɛ́ mɔ'ɔ nɛ̀ Jesu kifa nú ha̧ wa: «Mi a̧a̧ nɛ̀ akamɔ kɔ‘m mɛ ak nɛ̀ ɛnɛ mbɛt; ɛ̀nɛ̀ kífí nú ha̧‘m:

⁴zuia bíí nɛ̀ Jean duka so mɛ zui’ɛ tɛ̀ɛ́ nɛ̀ tɛ́ Sɔ̧ náà, kóó tɛ̀ɛ́ nɛ̀ tɛ̀ bíí nde?»

⁵Ɓɛɛ wa tɔ̧ sitɛ ŋmaa: «K’ɛ̀ɛ̀ tɔ̧‘e, zuia bíí nɛ̀ Jean duka so zui’ɛ tɛ̀ɛ́ nɛ̀ tɛ́ Sɔ̧ wó, a̧ tɛ tɔ̧ h’ɛ́ɛ́‘e, wen ge s’ɛɛ kɔ̧ ɗɔɔ wen ko Jean na ge?

⁶A̧ k’ɛɛ tɔ̧‘e tɛ̀ɛ́ nɛ̀ tɛ̀ bíí wo, o bíí lɛŋ tɛ yo ɛɛ nɛ̀ ta wen wa iŋa nɛ̀ sa̧a̧-a̧ ‘e, Jean nɛ́ wi-tɔ̧-wen oi nú Sɔ̧.»

⁷Hegɔ, wa kifa nú‘e, wa iŋ fara nɛ̀ zuia bíí nɛ̀ Jean duka so mɛ zui'i tɛɛ nɛnɛ na.

⁸Ɓɛɛ Jesu tɔ̧ ha̧ wa: «Mi mbɛt, mi beka tɔ̧ ndaa ŋgai n'am de nɛ̀ mɔɔ nɔ'ɔ h’ɛ́nɛ́ na.»

⁹Nɛ́ mɔ'ɔ nɛ̀ Jesu tɔ̧ɔ̧ lizaŋ'ɛ ha̧ o bíí: «Ŋma bíí waa fɔ-nyak-dɔ̧ɔ̧; nɛ́ mɔ'ɔ n'aa ee fɔ‘i er o wi-de-tom ɓɛɛ yak kɔ̧-a̧ gɛnɛ tɛ dɔka zɛ.

¹⁰Ŋgimbi ɓi waya-nyak-dɔ̧ɔ̧ hɔa, ɓɛɛ a̧ tom ŋma wi-de-tom kɔ̧-a̧ sitɛ o wi-zɔk-fɔ mɛ ba war waya-nyak-dɔ̧ɔ̧ kɔ̧-a̧ piinɛ ha̧ a̧. Nɛ́ mɔ'ɔ nɛ̀ wa mbɛra wi-de-tom'i, fo a̧ siɗoŋ nɛ̀ géé er.

¹¹Ɓɛɛ a̧ tom ŋma wi-de-tom kɔ̧-a̧ nɛnɛ woyo; wa mbɛra i̧i̧ mbɛt, wa da̧a̧ a̧, ɓɛɛ wa fo a̧ siɗoŋ nɛ̀ géé er mbɛt.

¹²A̧ toma taar wi-de-tom nɛnɛ woyo; wa ee da̧i̧ tɛ i̧i̧ mbɛt, ɓɛɛ wa ndak a̧.

¹³Ɓɛɛ wan-fɔ‘i tɔ̧: ‹A̧‘m dé hee ge? Mi tɛ tom nɛ́ bem kɔ‘m, dua-see-am nɛnɛ; war kɔ̧-a̧, wa tɛ tu̧ tɛ a̧.›

¹⁴Zɔka bem ko wan-fɔ nɛ̀ o wi-zɔk-fɔ zɔka hegɔ, ɓɛɛ wa tɔ̧ ha̧ o ŋmaa: ‹Zɔ́k wi-duk-oi-dáa kɔ‘i nɛ̀ tɛ mɛ‘i. Ɛ̀ɛ̀ gbɛ́ a̧ wen ha̧ mɔɔ-oi-dáà kɔ̧-a̧ mɛ duk nɛ́ k’ɛɛ.›

¹⁵Nɛ́ mɔ'ɔ nɛ̀ wa gbura a̧ si ká̧ nú fɔ, ɓɛɛ wa gbɛ a̧. «Wan-fɔ nyak-dɔ̧ɔ̧‘i tɛ de nɛ́ ge in wa ge nde?

¹⁶A̧ tɛ nɛ̀ɛ́ gbɛ o wi-zɔk-fɔ‘i nɔ‘i lɛŋ, ɓɛɛ a̧ ee fɔ‘i er o ŋma mbe wi-zɔk-fɔ woyo.» Zia wen'i nɛ̀ wa zia hegɔ, ɓɛɛ wa tɔ̧: «Weyaa, ká pɛrti mɔ hegɔ de na ndó-ndó-ndó!»

¹⁷Jesu mbaɗa wa ɓɛɛ tɔ̧ ha̧ wa: «Gba̧a̧ Yɔramɔ'ɛ hee ge? ‹Nɛ́ ta nɛ̀ o wi-mbo-tua pi̧i̧ so taŋ‘i, a̧ kifa duk nɛ́ de kina-ta-e mgbii-tua.›

¹⁸Wi nɛ̀ tɛ yo nù zu ta'i, tɛ gbin, ɓɛɛ wi nɛ̀ ta'i tɛ tik zu a̧, ta'i tɛ mbɔl'a.»

¹⁹Nɛ́ mɔ'ɔ nɛ̀ o wi-usi-heembea in o gasa wan-ɗafi-sɔ̧ kia war mɛ ba Jesu tɛ kale ŋgimbi'i, wen wa iŋa'e Jesu tɔ̧ lizaŋ‘i wen zu wi, ɓɛɛ wa yu nɛ́ o bíí.

²⁰Nɛ́ mɔ'ɔ nɛ̀ wa ku̧u̧ naŋ pɛma Jesu, ɓɛɛ wa ye o ŋma bíí mɛ duk hee o wi-de-mɔ nɛ̀ yuwar-a ga mɛ ba wen zaŋ-aa, gbak na, wa pi̧i̧ a̧ er gasawi zu zika-nù‘i mɛ kpa ŋgai zu a̧.

²¹Wa aka Jesu: «Wan-usi-mɔ, ɛɛ iŋa ɛnɛ tɔ̧ wen, usi nɛ̀ mɔ nɛ̀ yuwar-a, ɛnɛ usi nɛ́ yuwar ko Sɔ̧ nyɛm nɛ̀ ɗoŋ kpasawen, ɛnɛ kɛ̧ mgbara bíí na.

²²Heembea k’ɛɛ ee h’ɛ́ɛ́ mɛ gbo garama ha̧ Sezar náà, kóó weyaa nde?»

²³Jesu iŋa mɔɔ-gɔn-zaŋ kɔ-wa'i, ɓɛɛ tɔ̧ ha̧ wa:

²⁴«Ɛ̀nɛ̀ bá ŋma kɔya-sede tɛnɛ ha̧‘m zɔk. Zu bíí in yɔramɔ nɛ̀ duk sɛnɛ'ɛ nɛ́ ko o?» Wa kifa nú: «Nɛ́ ko Sezar.»

²⁵Ɓɛɛ Jesu tɔ̧ ha̧ wa: «Hegɔ‘i, ɛ̀nɛ̀ há̧ mɔ ko Sezar ha̧ Sezar, ɓɛɛ ɛ̀nɛ̀ há̧ mɔ ko Sɔ̧ ha̧ Sɔ̧.»

²⁶Ɓɛɛ wa nyɛm mɛ ba wen nú-a ti o bíí tɛ wen kɔ̧-a̧ na. Ɗɛɗɛ-wa gɔna tɛ kifa nú n'aa kifa ha̧ wa'i, ɓɛɛ wa ya nɛ̀ oi nú.

²⁷O Saduseɛn sii kafɛ‘e kura ŋgɔn tɛ fio bo na; nɛ́ mɔ'ɔ nɛ̀ o ŋma ɗɔŋa si katɛ Jesu ɓɛɛ ak a̧:

²⁸«Wan-usi-mɔ, Moisɛ bàá yɔr h’ɛ́ɛ́‘e: ‹Kà ŋma bíí nɛ̀ a̧a̧ nɛ̀ nya ɗoŋ fe, bem bo na, nya-a̧‘i a̧ bá ko-oi-aa mɛ ko nɛ̀ bem nɛ̀ tɛ ba nin wan-fio e ŋgɔn.›

²⁹O ŋma nya-wi yaa so mɔɔrɔ-ɗoŋ-yiitoo, nɛ́ mɔ'ɔ nɛ̀ kaya-wi baa kóò, ko bem na, ɓɛɛ fe.

³⁰Yiitoo-aa

³¹in taar-a baa kóò‘i, ko bem na mbɛt, ɓɛɛ wa fe. Wa mɔɔrɔ-ɗoŋ-yiitoo lɛŋ fea, wa ko bem na.

³²Sɔŋkur-aa nɛ́ kóò‘i nɛ̀ zu á̧ fea.

³³Wese-kura-ŋgɔn tɛ fio, kóò‘i tɛ duk nɛ́ ko o nde? Wen wa mɔɔrɔ-ɗoŋ-yiitoo lɛŋ baa so a̧ nɛ̀ kóò!»

³⁴Ɓɛɛ Jesu kifi nú ha̧ wa: «O bíí zaŋnu’ɛ ba nɛ́ kóò in wíì,

³⁵ɓɛɛ o bíí nɛ̀ nyɛma mɛ kur ŋgɔn tɛ fio in mɛ duk kpasa tɛ ŋgimbi wan mɛ siti beka ba kóò in wíì na.

³⁶Wa beka fe ɓɔna wen wa tɛ duk hee o betom ko Sɔ̧ ga. Wa nɛ́ o bem ko Sɔ̧ wen wa kura ŋgɔn tɛ fio.

³⁷O fio tɛ kur ŋgɔn, wen Moisɛ tɔ̧ɔ̧ so wen'i wese n'aa zɔka so nɛ̀ be te fara nyɛka-a, ŋgimbi n'aa saa nɛ̀ Gasa Wan'e: ‹Sɔ̧ ko Abraham, Sɔ̧ ko Izak, in Sɔ̧ ko Jakob.›

³⁸Wen Sɔ̧ bó nɛ́ Sɔ̧ ko o fio na, Sɔ̧ nɛ́ Sɔ̧ ko o bíí nɛ̀ duk kpasa; ɓɛɛ o bíí lɛŋ duk kpasa wen zu a̧.»

³⁹Ɓɛɛ o ŋma wi-usi-heembea tɔ̧: «Wan-usi-mɔ, ɛ́nɛ́ tɔ̧ wen nɛ̀ de-a!»

⁴⁰Ɓɛɛ kíì de wa tɛ aka mbe mɔ in a̧.

⁴¹Jesu tɔ̧ɔ̧ ha̧ wa: «Héé ge wi nyɛma mɛ tɔ̧‘e Mɛsii nɛ́ Bem ko David ge nde?

⁴²Wen David nɛ̀ zu tɔ̧ɔ̧ so zaŋ Gima'e ndé: ‹Gasa Wan tɔ̧ɔ̧ ha̧ Gasa Wan kɔ‘m: Mɛ̀ dúk nɛ̀ war wii-er-am,

⁴³hɔ ŋgimbi n'am tɛ de ha̧ mɛ mɛ gan o wisɛn kɔ-mɛ.›

⁴⁴«David nɛ́ mɔ'ɔ nɛ̀ saa a̧‘e Gasa Wan, ɓɛɛ a̧ tɛ duk nɛ́ Bem ko David hee ge?»

⁴⁵Hee mɔ'ɔ nɛ̀ gba gíí bíí zii nɛ́ wen kɔ̧-a̧ ga, a̧ tɔ̧ɔ̧ ha̧ o ŋgaiwi kɔ̧-a̧:

⁴⁶«Ɛ̀nɛ̀ zɔ́k tɛ‘nɛ́ wen o wi-usi-heembea nɛ̀ kɔ̧ɔ̧ nɛ́ pi̧i̧ gasa laa yar nɛnɛ in nɛ̀ kɔ̧ɔ̧ ha̧ o bíí mɛ fan wa bee-gara; wa kɔ̧ɔ̧ nɛ́ yaa-a tɛ̀ o kuti fara sɛn kɔ̧́ tua-mɔi̧a-a in ká̧ nyɔŋmɔ.

⁴⁷Wa nyɔŋ nɛ́ mbɔi ko o ko-gera, in wa kɔfi nɛ́ Sɔ̧ nɛ̀ ɗoŋ nyɛi̧a-a wen yí bíí. Kita nɛ̀ tɛ tik wa ɔ ŋgaya nyɛmna.»