Read Northwest Gbaya LUK 3 Bible Online

LUK 3 - Northwest Gbaya bible

LUK 3

¹Wannu Tibɛr Sezar ɔɔ wan tɛ pɛ ɓu-zua-mɔɔrɔ kaɗi, ɓɛɛ tɛ́ kale ŋgimbi'i nɛ́ Pɔns Pilat a̧ duk nɛ́ wannu Judee. Herod duk kɔ‘i nɛ́ wannu Galilee, in Filip nya kɔ̧-a̧ duk kɔ‘i nɛ́ wannu Ituree in Trakonitid. Ŋgimbi'i mbɛt, Lisanias duka nɛ́ wannu sɛn Abilɛn.

²Ɓɛɛ ŋgimbi'i Anna in Kaif yaa so nɛ́ gasa wan-ɗafi-sɔ̧, ɓɛɛ Sɔ̧ tɔ̧ wen ha̧ Jean, bem ko Zakarii ŋga-gbárà mɛ.

³Jean yara dam zika-nú Jurdɛn lɛŋ, tɔ̧ nɛnɛ‘e o bíí a̧ kpáí duka-a kɔ-wa, ɓɛɛ wa a̧ kpɛ́k zuia wa ha̧ Sɔ̧ mɛ e ɗaŋmɔ ha̧ wa,

⁴hee mɔ'ɔ nɛ̀ yɔra zaŋ kalata ko Esaii wi-tɔ̧-wen oi nú Sɔ̧ ga: «Ŋma bíí hiɗi nɛ́ mɔ ŋga-gbárà mɛ‘e: ‹Ɛ̀nɛ̀ ɗáfí yuwar ko Gasa Wan, ɛ̀nɛ̀ ɗáfí yuwar kɔ̧-a̧ nɛ̀ tana-a!

⁵Gboŋgo lɛŋ tɛ kpe, kusa kaya in zu-tɔ̧́ lɛŋ tɛ hir; o gɔɔ war tɛ tan, o ɗaŋ war tɛ yɔk.

⁶Ɓɛɛ o bíí lɛŋ tɛ zɔk yuwar-kpasa-bíí ko Sɔ̧.› »

⁷Jean tɔ̧ɔ̧ ha̧ giiwi nɛ̀ tɛɛ ha̧ a̧ mɛ zui wa'e: «Ɛ́nɛ́, o kpar be-kóró, nɛ́ o a̧ usa ɗoŋ yuu nyimsea nɛ̀ tɛ‘i h’ɛ́nɛ́ o?

⁸Ɛ̀nɛ̀ dé tom nɛ̀ usi'e ɛ́nɛ́ kpaia duka-a k’ɛ́nɛ́, ɓɛɛ k’ɛ́nɛ́ tɔ̧‘e: ‹Dáà k’ɛɛ nɛ́ Abraham› na; wen mi tɔ̧ɔ̧ h’ɛ́nɛ́‘e, Sɔ̧ nyɛma mɛ kifi o ta nɔ'ɔ nɛ̀ o bem ha̧ Abraham.

⁹Kinii, kpi̧i̧ a̧a̧ gun te; te lɛŋ nɛ̀ wai de waya-a na, wa tɛ gɔm pi̧ tɛ wee.»

¹⁰Giiwi aka Jean: «Ɓɛɛ mɔ n’ɛɛ tɛ de nɛ́ ge mɔ ge?»

¹¹Ɓɛɛ a̧ kifi nú ha̧ wa: «Wi nɛ̀ a̧a̧ nɛ̀ laa yiitoo a̧ há̧ kpɔk ha̧ wi nɛ̀ bó nɛnɛ na. Wi nɛ̀ a̧a̧ nɛ̀ nyɔŋmɔ a̧ dé kale kpɔk mɔ‘i.»

¹²Nɛ́ mɔ'ɔ nɛ̀ o wi-ba-garama mbɛt tɛɛ tɛ a̧ ha̧ a̧ mɛ zui wa, ɓɛɛ wa ak a̧: «Wan-usi-mɔ, mɔ n’ɛɛ tɛ de nɛ́ ge mɔ ge?»

¹³A̧ kifa nú ha̧ wa: «K’ɛ́nɛ́ ba mɔ er bíí gan mɔ nɛ̀‘i gɔna h’ɛ́nɛ́ na.»

¹⁴O wi-biro mbɛt aka a̧: «K’ɛ́ɛ́, mɔ n’ɛɛ tɛ de nɛ́ ge?» A̧ kifa nú ha̧ wa: «K’ɛ́nɛ́ de mɔ nɛ̀ ŋgai in bíí na; k’ɛ́nɛ́ ɓir wen e nú bíí na; ɛ̀nɛ̀ é nɛ́ see'nɛ́ tɛ sede-tom k’ɛ́nɛ́ ɓɛɛ.»

¹⁵O bíí yaa pɛm nɛ̀ mɔ, ɓɛɛ kóó o ndé ta nɛ́ mɔ kɔ̧́ see zu mɔ ko Jean'e ndé: mɔ'ɔ wi’ɛ bo nɛ́ Mɛsii na nde?

¹⁶Ɓɛɛ Jean tɔ̧ ha̧ wa lɛŋ: «Kɔ‘m, mi zui nɛ́ ɛ́nɛ́ nɛ̀ yì, ɓɛɛ ŋma bíí nɛ̀ gana'm nɛ̀ ŋgai a̧ tɛ‘i, mi nyɛm mɛ bur nyak ndárà kɔ̧-a̧ na; kɔ̧-a̧, a̧ tɛ zui'nɛ́ nɛ̀ Sa̧a̧ Ɔmi in wee.

¹⁷A̧ a̧a̧ nɛ̀ mɔɔ-pɛfi-mɔ kɔ̧̀ er-a, wen pɛfa-a nɛ̀ fara-gusi-alkamaari, ha̧ a̧ mɛ mɔi̧ nɛ́ gba̧a̧-a̧ a kɔ̧́ dam kɔ̧-a̧, ɓɛɛ a̧ dɔɔ pumyulu-a tɛ wee nɛ̀ bi na ɓɔnsɛnɛ.»

¹⁸Jean tɔ̧ɔ̧ o ŋma mbɔrɔ nɛ̀ dɔka-a mbɛt ha̧ wa, tɔ̧ nɛ̀ De Mbe Wen ha̧ wa.

¹⁹Jean tɔ̧ɔ̧ wen nɛ̀ ŋgaya-a zu Herod wen Herodiad, kóò ko nya Herod in wen dɔka ɗaŋmɔ n'aa duka so de.

²⁰Herod dee mbe ɗaŋmɔ e zu o kuti-a nɔ‘i wen n'aa baa Jean pi̧ zɔɓɔ.

²¹Ɗoŋ nɛ̀ Jean zuia bíí lɛŋ kaɗi, a̧ zuia Jesu mbɛt, ɓɛɛ ŋgimbi nɛ̀ Jesu ɓɔna fara kɔfa Sɔ̧, yiwese hu̧i̧a̧,

²²ɓɛɛ Sa̧a̧ Ɔmi nɛ̀ tɛ-a duk hee gbaku̧i ga zir pii zu Jesu. Ɓɛɛ ŋma tiger tɔ̧ wen nɛ̀ yiwese mɛ tɛnɛ‘e: «Mɛ́ nɛ́ Bem kɔ‘m n'am kɔ̧ɔ̧ nyɛmna; see-am lɛŋ a̧a̧ zu mɛ.»[6]

²³Ŋgimbi nɛ̀ Jesu ku̧u̧ nɛ̀ naŋ dee tom kɔ‘i, a̧ a̧a̧ nɛ̀ pɛ hee ɓu-taar ga, ɓɛɛ o bíí ta kɔ‘i'e ndé, a̧ nɛ́ bem ko Jozɛf, bem ko Heli,

²⁴bem ko Matat, ko Levii, ko Mɛlki, ko Janai, ko Jozɛf,

²⁵bem ko Matatias, ko Amɔs, ko Nahum, ko Hɛsli, ko Nagai,

²⁶bem ko Maat, ko Matatias, ko Semein, ko Jozɛk, ko Joda,

²⁷bem ko Joanam, ko Resa, ko Zorobabɛl, ko Salatiɛl, ko Nɛri

²⁸bem ko Mɛlki, ko Adi, ko Kosam, ko Ɛlmadam, ko Ɛr,

²⁹bem ko Jesu, ko Eliɛzɛr, ko Jorim, ko Matat, ko Levii,

³⁰bem ko Simeɔŋ, ko Juda, ko Jozɛf, ko Jonam, ko Eliakim,

³¹bem ko Mɛlea, ko Mɛna, ko Matata, ko Nataŋ, ko David,

³²bem ko Jɛse, ko Jobɛd, ko Boaz, ko Sala, ko Nasɔŋ,

³³bem ko Aminadab, ko Admin, ko Arni, ko Ɛsrɔm, ko Farɛs, ko Juda,

³⁴bem ko Jakob, ko Izak, ko Abraham, ko Tara, ko Nakɔr,

³⁵bem ko Seruk, ko Ragau, ko Falɛk, ko Ebɛr, ko Sala,

³⁶bem ko Kainam, ko Arfaksad, ko Sɛm, ko Nɔe, ko Lamɛk,

³⁷bem ko Matusala, ko Enɔk, ko Iarɛt, ko Maleleɛl, ko Kainam,

³⁸bem ko Enɔs, ko Sɛt, ko Adam, bem ko Sɔ̧.