Read Northwest Gbaya LUK 4 Bible Online

LUK 4 - Northwest Gbaya bible

LUK 4

¹Jesu kpaa ŋgai ko Sa̧a̧ Ɔmi; nɛ́ mɔ'ɔ n'aa pia ɗoŋ nɛ̀ ɗɔɔ Jurdɛn, ɓɛɛ Sa̧a̧ Ɔmi mgbɔ a̧ si ŋga-gbárà mɛ.

²A̧ duka hi̧i̧ zɛ ɓu-naar, ɓɛɛ Satan we a̧. Ŋgimbi'i a̧ nyɔŋ géé nyɔŋa mɔ na. Ɗoŋ nɛ̀ zɛ ɓu-naar dama kaɗi, wɔ gbɛɛ a̧.

³Ɓɛɛ Wan-ɗaŋmɔ tɔ̧ ha̧ a̧: «Kà mɛ nɛ́ bòò nɛ́ Bem ko Sɔ̧, ɓɛɛ nɛ̀ mɛ̀ tɔ̧́ ha̧ ta’ɛ mɛ kifi brɛt.»

⁴Ɓɛɛ Jesu kifi nú ha̧ a̧: «Yɔramɔ tɔ̧a̧‘e: ‹Bó nɛ́ brɛt ɓɛɛ a̧ tɛ de ha'i mɛ duk kpasa na.› »

⁵Nɛ́ mɔ'ɔ nɛ̀ Wan-ɗaŋmɔ baa a̧ si ŋgɔn mɛ, ɓɛɛ hee gɔma-yí ga usi o wan lɛŋ sɛn zu nù ha̧ a̧.

⁶Ɓɛɛ Wan-ɗaŋmɔ tɔ̧ ha̧ a̧: «Mi tɛ ha̧ ŋgai in gasa mɔɔ-wan zaŋnu’ɛ lɛŋ ha̧ mɛ, wen wa ee mɔ‘i er-am, ɓɛɛ mi nyɛma mɛ ha̧ ha̧ bíí n'am kɔ̧.

⁷Ɓɛɛ kà mɛ gas'am, mɔ‘i nɛ̀ oi-aa lɛŋ tɛ zii nɛ̀ mɛ.»

⁸Ɓɛɛ Jesu kifi nú ha̧ a̧: «Yɔramɔ tɔ̧a̧‘e: ‹Mɛ tɛ gasi nɛ́ Gasa Wan Sɔ̧ kɔ-mɛ, ɓɛɛ mɛ ɗafa nɛ́ a̧ kpɔk ɓɛɛ.› »

⁹Hɔ-ɗoŋ-aa, a̧ mgbɔɔ Jesu si sɛn Jerusalɛm, ba a̧ e kɔ̧ ger Tua ko Sɔ̧, ɓɛɛ tɔ̧ ha̧ a̧: «Kà mɛ nɛ́ bòò nɛ́ Bem ko Sɔ̧, nɛ̀ mɛ̀ kpíɗí nɛ̀ kɔ̧́ ger tua’ɛ tik nù;

¹⁰wen Yɔramɔ tɔ̧ɔ̧ so'e: ‹A̧ tɛ tɔ̧ ha̧ o betom kɔ̧-a̧ mɛ pɛm mɛ.›

¹¹Ɓɛɛ Yɔramɔ tɔ̧ɔ̧ woyo'e: ‹Wa tɛ tɔi mɛ nɛ̀ ŋgɔn, wen ká mɛ tɛɛ kɔ̧ naŋ-mɛ nɛ̀ ta.› »

¹²Ɓɛɛ Jesu kifi nú ha̧ a̧: «Yɔramɔ tɔ̧a̧‘e: ‹Mɛ beka we Gasa Wan Sɔ̧ kɔ-mɛ na.› »

¹³Wan-ɗaŋmɔ wee a̧ tɛ mɔ lɛŋ takaɗi, ɓɛɛ yak e a̧ duk mɛ pii ɗoŋ tɛ ŋma ŋgimbi.

¹⁴Jesu pia ɗoŋ nú Galilee, ká ŋgai ko Sa̧a̧ Ɔmi a̧a̧ tɛ a̧. Nyɛrɛmɔ kɔ̧-a̧ pɛsa dam zika-nù‘i lɛŋ.

¹⁵A̧ duka usi nɛ̀ mɔ kɔ̧́ tua-mɔi̧a-a kɔ-wa, ɓɛɛ o bíí lɛŋ zɔn a̧.

¹⁶A̧ nɛɛ Nazarɛt fara n'aa gasa sɛnɛ. A̧ yee kɔ̧́ tua-mɔi̧a-a wese-ɔm-tɛ, hee mɔ'ɔ n'aa duka so mɛ de ɓɔnsɛnɛ ga, ɓɛɛ a̧ kur mɛ tɔr mɔ.

¹⁷Wa ha̧a̧ kalata ko wi-tɔ̧-wen oi nú Sɔ̧ Esaii ha̧ a̧, ɓɛɛ a̧ bur nyɛm nɛ̀ fara nɛ̀ wa yɔra wen’ɛ sɛnɛ:

¹⁸«Ɔmi ko Gasa Wan a̧a̧ zu'm wen a̧ tɛna nɔ̧́ a zu'm, A̧ toma'm ha̧‘m mɛ́ tɔ̧ De Mbe Wen ha̧ o wi-kɔsa, ha̧‘m mɛ́ tɔ̧ ha̧ o bara'e, wa tɛ́ kpa zu, ha̧‘m mɛ́ tɔ̧ ha̧ o wi-boma-yí‘e, wa tɛ́ zɔk mɔ, ha̧‘m mɛ́ gbo o wi-bɔnɛ yinɛ,

¹⁹ha̧‘m mɛ́ tɔ̧ pɛ nɛ̀ Sɔ̧ tɛ́ de nɛ̀ kó ha̧ o bíí.»

²⁰Nɛ́ mɔ'ɔ n'aa kara kalata'i ha̧ ha̧ wi-de-tom, ɓɛɛ duk nù. O bíí lɛŋ kɔ̧́ tua-mɔi̧a-a aa yí sitɛ a̧.

²¹Ɓɛɛ a̧ tɔ̧ ha̧ wa: «Sɔsɔɔ, yɔra mɔ'ɔ hɔɔ gba̧a̧ wen ɛ́nɛ́ n’ɛ̀nɛ́ zia’ɛ.»

²²O bíí lɛŋ zɔna a̧. Ɗɛɗɛ-wa gɔna wen zu gba de wen[7] nɛ̀ gboo nɛ̀ kɔ̧̀ nú-a, ɓɛɛ wa ak mɔ: «Mɔ'ɔ, wi’ɛ bo nɛ bem ko Jozɛf na nde?»

²³A̧ tɔ̧ɔ̧ ha̧ wa: «Nɛ́ kpasawen, ɛ́nɛ́ tɛ́ tɔ̧ tua-wen’ɛ ha̧‘m: ‹Wan-nyina, mɛ̀ kpásí tɛ-mɛ nɛ̀ tɛ-mɛ,› wen ɛ́nɛ́ tɛ́ tɔ̧‘e ndé: ɛ́ɛ́ zia mɔ lɛŋ nɛ yaka sɛn Kafarnaum, ɓɛɛ mɛ̀ dé kale mɔɔ nɔ‘i tɛ ye kɔ-mɛ hɛ̧ɛ̧ mbɛt.»

²⁴Ɓɛɛ a̧ tɔ̧ woyo: «Nɛ́ kpasawen a̧‘m tɔ̧ h’ɛ́nɛ́; bíí yu wi-tɔ̧-wen oi nú Sɔ̧ ye kɔ‘i na.

²⁵Nɛ̀ mbetɛ, mi tɔ̧ h’ɛ́nɛ́, ŋgimbi ko Elii, o ko-gera yaa so nɛ̀ dɔka-a sɛn Israɛl. Ŋgimbi'i kórò hɔ na tɛ pɛ taar nɛ̀ fio-zɛ mɔɔrɔ-ɗoŋ-kpɔk, ɓɛɛ gasa kaɓa tik nú Israɛl lɛŋ.

²⁶Bo nɛ Sɔ̧ toma Elii ha̧ ŋma ko-gera kpɔk mgbara wa na, ɓɛɛ a̧ toma toma a̧ ha̧ ŋma ko-gera sɛn saaye Sarɛpta, nú Sidɔŋ mɛ.

²⁷O wi-doko mbɛt yaa so nɛ̀ dɔka-a nú Israɛl ŋgimbi ko Elisee, ɓɛɛ bo nɛ wa lɛŋ a̧ tɛ-wa sa̧a̧ na; kànà nɛ́ tɛ Naaman wi Sirii kpɔk ɓɛɛ.»

²⁸O bíí lɛŋ nɛ̀ yaa kɔ̧́ tua-mɔi̧a-a‘i zia wen'i, ɓɛɛ see-wa nyim.

²⁹Wa kura, ɓɛɛ wa fo a̧ gbonɛ si ɗoŋ ye. Nɛ́ mɔ'ɔ nɛ̀ wa mgbɔɔ a̧ si tiger kaya fara nɛ̀ wa dee ye kɔ-wa sɛnɛ wen ha̧ wa mɛ ir a̧ pi̧ kɔ̧̀ gboŋgo.

³⁰Ɓɛɛ Jesu gbo mgbara wa ɓɛlɛm yak.

³¹Nɛ́ mɔ'ɔ nɛ̀ Jesu zira si Kafarnaum, gasa ye nú Galilee, ɓɛɛ a̧ usi mɔ ha̧ o bíí wese-ɔm-tɛ.

³²Ɗɛɗɛ o bíí gɔna nyɛmna zu usa mɔ kɔ̧-a̧, wen tɔ̧ɔ̧-wen kɔ̧-a̧ ɔ dita.

³³Ŋma bíí nɛ̀ ɗaŋ-sɔ̧ a̧a̧ tɛ̀ duka kɔ̧́ tua-mɔi̧a-a‘i mbɛt, ɓɛɛ ɗaŋ-sɔ̧‘i hiɗi mɔ nɛ̀ ŋgaya-a tɔ̧ nɛnɛ‘e:

³⁴«Jesu, be Nazarɛt, ge a̧ mɛ kii zu yɛ ge? Mɛ tɛɛ mɛ ɗaŋ yɛ yinɛ nde? Mi iŋa mɛ, mɛ́ nɛ́ Sa̧a̧ Bíí ko Sɔ̧.»

³⁵Jesu dee ŋmaa in a̧ nɛ̀ ŋgaya-a ɓɛɛ tɔ̧: «Mɛ̀ kpé nú-mɛ́, mɛ̀ gbó tɛ wi’ɛ yak.» Ɗaŋ-sɔ̧ zara wi’ɛi pi̧ nù, gbo tɛ a̧ yak, ɓɛɛ de ŋma ɗaŋmɔ in a̧ na.

³⁶Gasa kíì baa o bíí lɛŋ, ɓɛɛ wa tɔ̧ sitɛ ŋmaa: «Ɛ̧ɛ̧ nɛ́ ge wen ge? Ŋgai a̧a̧ tɛ wen kɔ̧-a̧ in ɔ dita; a̧ tɔ̧ wen ha̧ o ɗaŋ-sɔ̧ nɛ̀ ŋgai ɓɛɛ wa gboo yak!»

³⁷Ɓɛɛ nin-a hur dam zika-nù‘i lɛŋ.

³⁸A̧ gboo kɔ̧́ tua-mɔi̧a-a kaɗi, ɓɛɛ a̧ ye tɛ̀ ko Simɔŋ. Tɛ́ for Simɔŋ mɛ kóò hai na, tɛ́ a̧ ba nɛ wee, ɓɛɛ wa ai nú ha̧ Jesu mɛ gbak a̧.

³⁹Jesu yora zu for Simɔŋ, a̧ dee ŋmaa in zɛɛ‘i, ɓɛɛ zɛɛ‘i e a̧ duk. For Simɔŋ kura nɛ̀ haya-a, ɓɛɛ ku̧ naŋ gbaka wa.

⁴⁰Mɛ ga̧a̧mɔ, o ndé lɛŋ mgbɔɔ o wi-zɛɛ kɔ‘i nɛtɛ nɛtɛ tɛnɛ ha̧ Jesu. A̧ ee er zu wa kpɔk kpɔk, kpasi nɛ̀ wa.

⁴¹O ɗaŋ-sɔ̧ mbɛt gboo tɛ o bíí nɛ̀ dɔka-a hiɗi nɛ̀ mɔ‘e: «Mɛ́ nɛ́ Bem ko Sɔ̧!» Ɓɛɛ Jesu de ŋmaa in wa, dor nɛ̀ wa tɛ tɔ̧ɔ̧ wen wen wa iŋa'e, a̧ nɛ́ Mɛsii.

⁴²Mɔ sa̧a̧ kaɗi, ɓɛɛ Jesu gbo saaye Kafarnaum yak si ŋma fara nɛ̀ bíí bo sɛnɛ na, ɓɛɛ giiwi ku̧ naŋ kia a̧. Ɗoŋ nɛ̀ wa kpaa a̧ kaɗi, wa kɔ̧ɔ̧ mɛ dor a̧ wen ká a̧ tɛɛ yak nyɛi̧ nɛ̀ wa na.

⁴³Ɓɛɛ a̧ tɔ̧ ha̧ wa: «Mi tɛ tɔ̧ kànà De Mbe Wen Wan ko Sɔ̧ ha̧ o ŋma dɔka ye mbɛt, wen nɛ́ wen mɔ‘i a̧ Sɔ̧ toma nɛ‘m tɛnɛ.»

⁴⁴Ɓɛɛ a̧ duk usi nɛ̀ mɔ kɔ̧́ tua-mɔi̧a-a nú Judee mɛ.