Read Northwest Gbaya LUK 6 Bible Online

LUK 6 - Northwest Gbaya bible

LUK 6

¹Ɓɛɛ tɛ yiitoo wese-ɔm-tɛ tɛ kuti fio-zɛ, Jesu ɓira yak nɛ̀ kpɛɛfɔ alkamaari, ɓɛɛ o ŋgaiwi kɔ̧-a̧ hik alkamaari a̧ kɔ̧̀ er-wa nyiŋ a̧ kɔ̧̀ nú-wa.

²O ŋma Fariziɛn tɔ̧a̧: «Wen ge ɛnɛ de nɛ mɔ nɛ̀ heembea dor bíí tɛ dea-a wese-ɔm-tɛ ge?»

³Ɓɛɛ Jesu kifi nú ha̧ wa: «Ɛ́nɛ́ tɔr mɔ nɛ̀ David dee so ŋgimbi nɛ̀ wɔ gbɛɛ nɛ̀ a̧ in o ŋgaiwi kɔ̧-a̧ na nde?

⁴Bo nɛ bíí lɛŋ a̧ nyɔŋ so brɛt-ɗafi-sɔ̧ na, kànà nɛ́ o wi-ɗafi-sɔ̧ ɓɛɛ. Bo nɛ David yee so kɔ̧́ tua ko Sɔ̧, ba brɛt-ɗafi-sɔ̧ nyɔŋ, ɓɛɛ ha̧ ŋma ha̧ o ŋgaiwi kɔ‘i mbɛt na nde?»

⁵Ɓɛɛ Jesu tɔ̧ ha̧ wa woyo: «Nɛ́ Bem ko bíí a̧ duk zu wese-ɔm-tɛ.»

⁶Ŋma wese-ɔm-tɛ woyo, Jesu yee kɔ̧́ tua-mɔi̧a-a, ɓɛɛ a̧ usi mɔ, ká ŋma bíí nɛ̀ wii-er mɔka a̧a̧ so hi̧i̧ mbɛt.

⁷O wi-usi-heembea in o Fariziɛn duka mbaɗi nɛ̀ mɔ sitɛ Jesu ha̧ wa mɛ zɔk kà̧ a̧ nɛ́ tɛ̀ɛ́ kpasi wan-mɔka-er'i wese-ɔm-tɛ, ha̧ wa mɛ kpa wen mɛ pi̧ zu a̧.

⁸Jesu iŋa taamɔ kɔ-wa, ɓɛɛ tɔ̧ ha̧ wan-mɔka-er'i: «Mɛ̀ kúr, mɛ̀ yór see-a hɛ̧ɛ̧.» Ɓɛɛ a̧ kur yor ŋgɔn.

⁹Ɓɛɛ Jesu tɔ̧ ha̧ wa: «Mi ak'nɛ́‘e, heembea kɔ̧ɔ̧ ha̧ bíí mɛ de demɔ wese-ɔm-tɛ, náà, kóó mɛ de nɛ́ ɗaŋmɔ nde; mɛ́ kpasi bíí náà, kóó mɛ́ gbɛ bíí nde?»

¹⁰Jesu zɔka wa zik kpa lɛŋ, ɓɛɛ tɔ̧ ha̧ wan-mɔka-er'i: «Mɛ̀ nyɛ́í̧ er-mɛ.» A̧ nyɛi̧a er-a, ɓɛɛ er-a kpasi.

¹¹See-wa nyima, ɓɛɛ wa ba keta in o ŋmaa zu mɔ nɛ̀ wa tɛ de in Jesu.

¹²Ŋgimbi'i, Jesu daŋa si zu kaya mɛ kɔfi Sɔ̧, ɓɛɛ a̧ kɔfi Sɔ̧ hegɔɔ mɔ sa̧ nɛnɛ.

¹³Mɔ sa̧a̧ kaɗi, a̧ saa o ŋgaiwi kɔ̧-a̧, hok o ŋma ɓu-zua-yiitoo mgbara wa, ɓɛɛ a nin-wa'e betom.

¹⁴Nin-wa nɛ́ mɔ'ɔ: Simɔŋ (n'aa gɔna nin-a'e Pierre), in Andre nya-a̧, Jak in Jean, Filip in Bartelemi,

¹⁵Matthieu in Tomas, Jak bem ko Alfe, Simɔŋ (nɛ wa sa'e mgbák kpasa be-nù),

¹⁶Juda bem ko Jak, in Judas Iskariot, wi nɛ tɛ e ɗɔra tɛ Jesu.

¹⁷Jesu zira in wa, nɛ̀ zu kaya pii bɔkɔ-nù in dɔka o ŋgaiwi kɔ̧-a̧, in o gba giiwi nɛ̀ tɛ̀ɛ́ nɛ̀ nú Judee lɛŋ, in nú Jerusalɛm, in o wi nɛ ɔ ká̧ yì sɛn nù Tir in Sidɔŋ mbɛt.

¹⁸Wa tɛɛ mɛ zii wen kɔ̧-a̧, in ha̧ a̧ mɛ kpasi wa tɛ zɛɛ kɔ-wa. O wi nɛ̀ ɗaŋ-sɔ̧ a̧a̧ tɛ-wa mbɛt, kpasa.

¹⁹Giiwi nɔ‘i lɛŋ kii nɛ́ war mɛ tam tɛ Jesu, wen ŋgai gbo nɛ̀ tɛ a̧ kpasi nɛ̀ wa lɛŋ.

²⁰Jesu zɔka mɔ sitɛ o ŋgaiwi kɔ‘i, ɓɛɛ tɔ̧ ha̧ wa: «O wisan, ɛ̀nɛ̀ yá nɛ̀ desee wen Wan ko Sɔ̧ nɛ́ k’ɛ́nɛ́!

²¹Ɛ́nɛ́ nɛ̀ wɔ gbɛ‘nɛ́ kinii, ɛ̀nɛ̀ yá nɛ̀ desee, wen zaŋ‘nɛ́ tɛ sur! Ɛ́nɛ́ o wi nɛ̀ hi̧i̧ kɔ̧a̧ kinii, ɛ̀nɛ̀ yá nɛ̀ desee, wen ɛ́nɛ́ tɛ mam mami!

²²«Kà o bíí nɛ́ sɛna'nɛ́, kà wa nɛ bɛ̧ɛ̧‘nɛ́, kà wa nɛ́ da̧a̧‘nɛ́, kóó kà wa nɛ́ ɗaŋa nin'nɛ́ wen zu Bem ko bíí, ɛ̀nɛ̀ yá nɛ̀ desee!

²³Wese'i, ɛ̀nɛ̀ dé nyɛŋɛ, ɛ̀nɛ̀ kpíɗí nɛ̀ desee, wen mɔɔ-oi-tom k’ɛ́nɛ́ nɛ̀ pɛm'nɛ́ yiwese mɛ ɔ gasa, wen nɛ́ pɛrti mɔ‘i a̧ o dáà kɔ-wa dee so in o wi-tɔ̧-wen oi nú Sɔ̧.

²⁴Bɔnɛ a̧a̧ zu'nɛ́, o wanmbɔi, wen nɛ́ kpaamɔ k’ɛ́nɛ́ a̧ gá̧ see'nɛ́!

²⁵Bɔnɛ a̧a̧ zu'nɛ́ o wi nɛ̀ zaŋ sura, wen wɔ tɛ gbɛ‘nɛ́! Bɔnɛ a̧a̧ zu'nɛ́, o wi-mam-mami kinii’ɛ, wen ɛ́nɛ́ tɛ zim fio, hí̧í̧ nɛ̀ kɔ̧a̧!

²⁶«Bɔnɛ a̧a̧ zu'nɛ́ ŋgimbi nɛ̀ bíí lɛŋ tɛ tɔ̧ nɛ́ de wen k’ɛ́nɛ́, wen nɛ́ pɛrti mɔ‘i a̧ o dáà kɔ-wa dee so in o wi-tɔ̧-wen oi nú Sɔ̧ ndela!»

²⁷«Ɛ́nɛ́ o wi nɛ̀ zii wen kɔ‘m’ɛ, mi'e ndé, ɛ̀nɛ̀ kɔ̧́ o wisɛn k’ɛ́nɛ́, ɛ̀nɛ̀ dé demɔ in o wi-sɛn'nɛ́,

²⁸ɛ̀nɛ̀ tók de yoŋgo zu bíí nɛ̀ fom'nɛ́, ɓɛɛ ɛ̀nɛ̀ kɔ́fí Sɔ̧ wen o bíí nɛ̀ de ɗaŋmɔ in'nɛ̀ɛ́.

²⁹Kà bíí nɛ́ mbɛra ká̧ yí-mɛ́ kpɔk, ɓɛɛ nɛ̀ mɛ̀ é ɓii-aa ha̧ a̧ mbɛ́r; kà ŋma bíí nɛ́ baa gasa laa kɔ-mɛ, ká mɛ dor geɗek-a er-a na.

³⁰Kóó o ndé nɛ kɔfi mɔ er mɛ, mɛ̀ há̧ ha̧ a̧, ɓɛɛ kà ŋma bíí nɛ́ baa mɔ kɔ-mɛ, ká mɛ ak mɔ‘i woyo na.

³¹Mɔ n’ɛnɛ kɔ̧ɔ̧ ha̧ bíí mɛ de h’ɛ́nɛ́, ɛ̀nɛ̀ dé kale mɔ‘i ha̧ wa mbɛt.

³²«K’ɛ̀nɛ̀ nɛ́ kɔ̧ɔ̧ nɛ́ o bíí nɛ kɔ̧‘nɛ́, ɓɛɛ nɛ̀ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ kɔ̧ nɛ́ o bíí nɛ̀ kɔ̧ wa mbɛt.

³³K’ɛ̀nɛ̀ nɛ́ dee nɛ́ demɔ in o bíí nɛ̀ de demɔ in'nɛ̀ɛ́, ɓɛɛ nɛ́ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ de nɛ́ kale mɔ‘i mbɛt.

³⁴Ɓɛɛ k’ɛ̀nɛ̀ nɛ́ gbaka mɔ ha̧ o bíí n’ɛnɛ taa'e tɛ ha̧ mɔ‘i pii ɗoŋ h’ɛ́nɛ́, nɛ́ ge ɛ̀nɛ̀ tɛ kpa oi-aa ge? Wen o wi-de-ɗaŋmɔ mbɛt ha̧ nɛ́ nyamandoi ha̧ o ŋmaa ha̧ wa mɛ kpa kpɔk mɔ‘i si ɗoŋ.

³⁵Ɓɛɛ k’ɛ́nɛ́, ɛ̀nɛ̀ kɔ̧́ wisɛn k’ɛ́nɛ́, ɛ̀nɛ̀ dé demɔ, ɛ̀nɛ̀ há̧ mɔ ha̧ o bíí, ɓɛɛ k’ɛ́nɛ́ zɛm mɔɔ-oi-aa na. Mɔɔ-oi-tom k’ɛ́nɛ́ ɔ gasa, ɓɛɛ ɛnɛ tɛ ya nɛ́ o bem ko Wan nɛ̀ a̧a̧ si ŋgɔn mɛ, wen kɔ̧-a̧, a̧ de nɛ́ demɔ in o wi nɛ̀ de osoko na in o ɗaŋwi mbɛt.»

³⁶«Ɛ̀nɛ̀ dé ko ha̧ o bíí hee mɔ'ɔ nɛ̀ Dáà k’ɛ́nɛ́ de nɛ̀ ko ha̧ o bíí'ɛ ga.

³⁷K’ɛ́nɛ́ ɓa wen in bíí na, ɓɛɛ Sɔ̧ beka ɓa wen in'nɛ̀ɛ́ na; k’ɛ́nɛ́ gɔn kita zu bíí na, hegɔ Sɔ̧ beka gɔn kita zu'nɛ́ na; ɛ̀nɛ̀ é ɗaŋmɔ ha̧ bíí, ɓɛɛ Sɔ̧ tɛ e ɗaŋmɔ h’ɛ́nɛ́ mbɛt.

³⁸Ɛ̀nɛ̀ há̧ mɔ ha̧ bíí, ɓɛɛ Sɔ̧ tɛ ha̧ mɔ h’ɛ́nɛ́: Sɔ̧ tɛ a mɔ dun ao gbol, i̧si̧ gbai a kɔ̧́ laa k’ɛ́nɛ́, wen nɛ́ ao n’ɛnɛ tɛ we nɛ̀ mɔ ha̧ bíí, a̧ Sɔ̧ tɛ we nɛ̀ mɔ h’ɛ́nɛ́ mbɛt.»

³⁹Ɓɛɛ a̧ tɔ̧ ŋma lizaŋ ha̧ wa mbɛt: «O wi-boma-yí nyɛma so mɛ usi war ha̧ ŋmaa nde? Bo nɛ wa yiitoo lɛŋ tɛ tik kɔ̧̀ na nde?

⁴⁰Betom gan wan kɔ‘i na; ɓɛɛ betom nɛ̀ yamba mɔ nɛ̀ de-a tɛ duk hee wan kɔ‘i ga.

⁴¹«Wen ge mɛ zɔk be mbulumɔ nɛ̀ a̧a̧ yí nya-mɛ, ɓɛɛ mɛ zɔk kpíŋgíí-te nɛ̀ a̧a̧ yí-mɛ́ na ge?

⁴²Hee ge mɛ tɛ tɔ̧ ha̧ nya-mɛ‘e: ‹Nya'm, mɛ̀ é ha̧‘m ba be mbulumɔ yí-mɛ́ yinɛ,› ɓɛɛ kɔ-mɛ, mɛ zɔk kpíŋgíí-te nɛ̀ a̧a̧ yí-mɛ́ na ge? Wi nɛ̀ a̧a̧ nɛ̀ see yiitoo, mɛ̀ bá kpíŋgíí-te yí-mɛ́ yinɛ, sɛka mɛ zɔka mɔ nɛ̀ sa̧a̧-a̧ mɛ ba be mbulumɔ nɛ̀ a̧a̧ yí nya-mɛ yinɛ.»

⁴³«De te wai ɗaŋ waya-a na, ɓɛɛ ɗaŋ te wai de waya-a na mbɛt.

⁴⁴Wi iŋ ti te nɛ̀ waya-a; wi ɓi mbɔra tɛ mgboi-gata na, kóó waya-nyak-dɔ̧ɔ̧ tɛ tɛn-dara na mbɛt.

⁴⁵Wi-de-demɔ de nɛ demɔ nyɛm nɛ̀ ɗoŋ demɔ nɛ̀ a̧a̧ kɔ̧́ see-aa; ɓɛɛ ɗaŋwi de nɛ́ ɗaŋmɔ nyɛm nɛ̀ ɗoŋ ɗaŋmɔ kɔ̧́ see-aa; wen nɛ́ mɔ nɛ̀ duk kɔ̧́ see-wi a̧ nú-wi tɔ̧.

⁴⁶«Wen ge s’ɛnɛ sa'm'e ‹Gasa Wan›, ɓɛɛ ɛnɛ de mɔ n'am tɔ̧ h’ɛ́nɛ́ mɛ de na ge?

⁴⁷Kóó o ndé nɛ̀ tɛ tɛ‘m, nɛ̀ zii wen kɔ‘m, ɓɛɛ dee mɔ nyɛm ɗoŋ wen'i mbɛt, mi tɛ tɔ̧ wi n'aa hɔɔ ŋmaa in a̧ h’ɛ́nɛ́.

⁴⁸A̧ hɔɔ ŋmaa in ŋma bíí nɛ̀ dee tua. Wi’ɛi za̧a̧ kɔ̧̀ naŋ-tua nɛ̀ ɗuka-a, ɓɛɛ a̧ e naŋ-tua'i nɛ̀ ta. Yì ha̧a̧, kin-yì yoo tua'i, ɓɛɛ tua fo tɛ na, wen wa mboo tua'i nɛ̀ nɔa-a.

⁴⁹Ɓɛɛ wi nɛ̀ zii wen kɔ‘m, ɓɛɛ nɛ̀ de mɔ nyɛm ɗoŋ wen'i na, hɔɔ ŋmaa in wi nɛ̀ dee tua zu nù, ɓɛɛ e naŋ-tua'i na. Nɛ́ mɔ'ɔ nɛ̀ kin-yì yoo tua'i, ɓɛɛ tua'i gbin a nù nɛ oi-aa lɛŋ mútú-mútú.»