Read Northwest Gbaya LUK 8 Bible Online

LUK 8 - Northwest Gbaya bible

LUK 8

¹Ɗoŋ mɔ‘i, Jesu yara nɛ̀ o gasa ye in o geɗek ye, tɔ̧ nɛ̀ De Mbe Wen Wan ko Sɔ̧ ha̧ o bíí. Ɓɛɛ o ŋgaiwi kɔ̧-a̧ ɓu-zua-yiitoo duka so in a̧,

²in o ŋma okoo n'aa ndaka so ɗaŋ-sɔ̧ tɛ-wa yinɛ, in n'aa kpasa so wa tɛ zɛɛ kɔ-wa. O wi nɔ‘i nɛ́ Marii (nɛ̀ wa sa'e Magdala), nɛ̀ ɗaŋ-sɔ̧ mɔɔrɔ-ɗoŋ-yiitoo gboo so tɛ a̧, sɛka

³Janɛ kóò ko Kuza, wi-pɛm-mbɔi ko Herod, in Suzanɛ in o ŋma nɛ̀ dɔka-a nɛ̀ gbaka so wa nɛ̀ mbɔi mbɛt.

⁴Hee mɔ'ɔ nɛ̀ gba giiwi in o bíí nɛ̀ tɛ nɛ̀ saaye nɛtɛ nɛtɛ mɔi̧a katɛ Jesu ga, a̧ tɔ̧ɔ̧ lizaŋ'ɛ ha̧ wa:

⁵«Ŋma wi-pɛ-kpar-mɔ gboo so mɛ pɛ kpar-mɔ kɔ‘i, ɓɛɛ tɛ̀ pɛɛ mɔ n'aa pɛ nɛnɛ‘i, o ŋma kpar-mɔ aa nù ká̧ war. O bíí i̧sa̧, ɓɛɛ o nɔ̧́í̧ tɛɛ nyɔŋ lɛŋ yinɛ.

⁶O ŋma tika nù zu ta, ɓɛɛ ɗoŋ nɛ̀ wa hɔɔ kaɗi, wa kora, wen yì bo na.

⁷O ŋma woyo tika nù sɛn poo tɛnmɔ, ɓɛɛ tɛnmɔ hɔ kpɔk in wa, ɓɛɛ kpe zu wa.

⁸O ŋma kpar-mɔ tika tɛ de nù. Nɛ́ mɔ'ɔ nɛ̀ wa hɔa gasi, ɓɛɛ wai gɔmŋmaa.» Ɗoŋ n'aa tɔ̧ɔ̧ wen'i ha̧ wa kaɗi ɓɛɛ a̧ tɔ̧: «Wi nɛ̀ a̧a̧ nɛ̀ zer mɛ zii wen a̧ a̧ zíí ŋgaɓo!»

⁹O ŋgaiwi kɔ̧-a̧ aka a̧ mɛ tɔ̧ gba̧a̧ lizaŋ‘i ha̧ wa.

¹⁰Ɓɛɛ a̧ tɔ̧ ha̧ wa: «K’ɛ́nɛ́, Sɔ̧ dee h’ɛ́nɛ́ mɛ iŋ mgbara o ɗukamɔ tɛ Wan kɔ‘i, ɓɛɛ ko o ŋma bíí, nɛ́ lizaŋ a̧ usi mɔ ha̧ wa, wen ha̧ wa mɛ kɛ̧i̧ mɔ, ɓɛɛ wa zɔk na; ha̧ wa mɛ yeŋ zer-wa, ɓɛɛ wa zii gba̧a̧-a̧ na.

¹¹«Gba̧a̧ lizaŋ‘i nɛ́ mɔ'ɔ: kpar-mɔ nɛ́ wen ko Sɔ̧.

¹²O kpar-mɔ nɛ̀ aa nù ká̧ war usi nɛ́ o wi nɛ zia wen ko Sɔ̧, ɓɛɛ wan-ɗaŋmɔ tɛ́ɛ̀ ba wen'i kɔ̧ see-wa yinɛ, wen ká wa tɛ kɔ̧ ɗɔaa ha̧ Sɔ̧, ká wa kpasi.

¹³O wan nɛ̀ aa nù zu ta usi nɛ́ o bíí nɛ̀ kpɛk wen ko Sɔ̧ nɛ̀ desee ŋgimbi nɛ̀ wa zii wen'i, ɓɛɛ wen'i ye kɔ̧́ see-wa na. Tɛ́ ŋma ŋgimbi wa kɔ̧ɔ̧ ɗɔaa ha̧ Sɔ̧, ɓɛɛ kà ŋma weamɔ kpa wa, ɓɛɛ wa ee duk.

¹⁴O wan nɛ̀ aa nù poo tɛnmɔ usi nɛ́ o bíí nɛ̀ zia wen ko Sɔ̧, ɓɛɛ taamɔ́-zaŋnu, in wɔ-mbɔi in wɔ mɔɔ-zaŋnu nɛtɛ nɛtɛ gana zu wa, ɓɛɛ wen ko Sɔ̧ nɛ̀ wa zia'i de ŋma mɔ̀ tɛ-wa na.[9]

¹⁵O wan nɛ̀ aa nù tɛ de nù usi nɛ́ o wi nɛ̀ zia wen ko Sɔ̧, ɓɛɛ kasi e kɔ̧́ see nɛ̀ yuwar-a in nɛ̀ de-a mbɛt, ɓɛɛ wen'i nɛ̀ wa zia'i waia wen wa ee see-wa sɛnɛ.»

¹⁶«Wi e wee tɛ lamba mɛ ba e ɗɔɔ kpánà, kóó ɗɔɔ gado na; wi ba lamba e zu paku ha̧ o bíí nɛ̀ ye tua mɛ zɔk sa̧a̧mɔ;

¹⁷wen ŋma mɔ nɛ bíí tɛ hu̧si nɛ̀‘i beka zɔk na bo na; ŋma hu̧sa̧mɔ nɛ̀ beka gbo zan ha̧ bíí mɛ iŋ na, bo na mbɛt.

¹⁸«Ɛ̀nɛ̀ zɔ́k tɛ̀‘nɛ́ tɛ ziamɔ k’ɛ́nɛ́! Wen nɛ́ wi nɛ̀ a̧a̧ nɛ̀ mɔ, a̧‘i tɛ e mbe-a zu-a ha̧ a̧; ɓɛɛ wi nɛ̀ bó nɛ̀ mɔ na, kóó be mɔ n'aa taa'e a̧ a̧a̧ nɛnɛ‘i, wi tɛ ba er-a yinɛ!»

¹⁹Nàà ko Jesu in o nya-a̧ tɛɛ tɛ a̧, ɓɛɛ kpa fara mɛ hɔ tɛ a̧ na, wen giiwi nyɛmna,

²⁰ɓɛɛ o bíí tɔ̧ ha̧ Jesu'e: «Nàà k’ɛ́nɛ́ in o nya'nɛ́ a̧a̧ zan'i, wa kɔ̧ɔ̧ mɛ zɔk'nɛ́.»

²¹Ɓɛɛ Jesu kifi nú ha̧ wa: «O wi nɛ̀ zii wen ko Sɔ̧, ɓɛɛ nɛ̀ de mɔ nyɛm ɗoŋ wen'i, o wi nɔ‘i nɛ́ nàà kɔ‘m in o nya'm.»

²²Ŋma wese, Jesu daŋa kombon in o ŋgaiwi kɔ‘i, ɓɛɛ a̧ tɔ̧ ha̧ wa: «Ɛ̀ɛ̀ kú tɔp si kur mɛ.» Ɓɛɛ wa ku̧ naŋ kuu yì.

²³Ɓɛɛ ŋgimbi nɛ̀ wa a̧a̧ tɛ kuu yì‘i, Jesu ɔ kɔ‘i nɛ́ yá. Nɛ́ mɔ'ɔ nɛ̀ ŋma ŋga hara-búk ku̧u̧ naŋ ɓoɓa-a zu tɔp, ɓɛɛ yì ku̧ naŋ duna kombon. Pɛr-fio nuna wa.

²⁴O ŋgaiwi ko Jesu nɛ̀ɛ̀ si katɛ a̧, ɓɛɛ tun a̧; wa tɔ̧ɔ̧ ha̧ a̧: «Wan-usi-mɔ, Wan-usi-mɔ wa, tɛ̀-ɛ́ɛ́ yɔɔ kaɗi!» Jesu tuna, gai búk in pɛŋa-yì; mɔɔ nɔ‘i kaɗa, ɓɛɛ mɔ ga̧ dezeŋ.

²⁵Hɔ-ɗoŋ-aa, ɓɛɛ Jesu tɔ̧ ha̧ wa: «Kɔ̧ɔ̧ɗɔɔwen k’ɛ́nɛ́ a̧a̧ déè?» Kíì dee wa, ɗɛɗɛ-wa gɔna mbɛt, ɓɛɛ wa tɔ̧ sitɛ o ŋmaa: «Wi’ɛ nɛ́ o sa a̧ tɔ̧ wen ha̧ búk in tɔp mbɛt ɓɛɛ mboo zu ha̧ a̧'ɛ o?»

²⁶Wa hɔɔ nù ko o wi Gerasa nɛ̀ zɔk ŋmaa in Galilee.

²⁷Jesu biti zira-a nɛ̀ kɔ̧́ kombon, ɓɛɛ ŋma bíí saaye'i, nɛ̀ o ɗaŋ-sɔ̧ a̧a̧ tɛ, we ti a̧ tɛnɛ. Zɛ ɔ dɔka wi’ɛi pi̧ laa ɓɔna in a̧ ɔ kɔ̧́ tua na mbɛt; fara-ɔɔ kɔ̧-a̧ nɛ́ kɔ̧́ pɛsi-fio.

²⁸A̧ zɔka Jesu, ɓɛɛ a̧ hɔ̧fi̧ tik nù ká̧ naŋ-a hiɗi nɛ̀ mɔ tɔ̧ nɛnɛ‘e: «Jesu, Bem ko Sɔ̧ ŋgɔn mɛ! Ge a̧ mɛ kii zu'm ge? Mi aia nú ha̧ mɛ, ká mɛ usi bɔnɛ ha̧‘m na!»

²⁹Nɛ́ mɔ'ɔ nɛ̀ Jesu tɔ̧ɔ̧ ha̧ ɗaŋ-sɔ̧ mɛ gbo tɛ-wi’ɛi yak. Zɛ ɔ dɔka nɛ̀ ɗaŋ-sɔ̧ de nɛ́ ŋmaa in a̧; kà wa hɛr a̧ nɛ̀ nyak-boi, kóó wa pi̧i̧ poka naŋ-a ha̧ a̧ mɛ duk keɗeŋ, a̧ gbina o mɔɔ nɔ‘i, ɓɛɛ ɗaŋ-sɔ̧ mgbɔɔ a̧ yaknɛ si zaŋbɛɛ mɛ.

³⁰Ɓɛɛ Jesu ak a̧: «Nin-mɛ nɛ́ o?» A̧ kifa nú ha̧ a̧: «Nin-am nɛ́ Gii wi-biro»; wen mɔ‘i, nɛ́ o ɗaŋ-sɔ̧ nɛ̀ dɔka-a á̧ duka so tɛ a̧.

³¹O ɗaŋ-sɔ̧ aia nú ha̧ Jesu, wen ká̧ a̧ tɛ de ha̧ wa mɛ yak si kɔ̧̀ ɗuka-fara.

³²Gba gíí ŋgɔya yaa so zu kaya'i nyɔŋ nɛ̀ mɔ, ɓɛɛ o ɗaŋ-sɔ̧ ai nú ha̧ Jesu mɛ e ha̧ wa mɛ ye tɛ o ŋgɔya nɔ‘i, ɓɛɛ a̧ e war ha̧ wa.

³³O ɗaŋ-sɔ̧ gboo tɛ wi’ɛi ye tɛ o ŋgɔya nɔ‘i, ɓɛɛ o ŋgɔya gbin nɛ̀ zu kaya a̧ ɗɔɔ tɔp, ɓɛɛ fe yì lɛŋ.

³⁴O wi-dai-ŋgɔya zɔka mɔ‘i ɓɛɛ wa yu mɔ yak mɛ nɛ̀ɛ́ tɔ̧ nyɛrɛ mɔ‘i saaye in o be ye mbɛt.

³⁵Ɓɛɛ o bíí nɛ́ mɛ́ zɔk mɔ nɛ̀ yaka'i. Wa hɔɔ katɛ Jesu, ɓɛɛ wa zɔk wi nɛ̀ ɗaŋ-sɔ̧ duka so tɛ a̧‘i fara duka nù ká̧ naŋ Jesu. Zu-a pia ɗoŋ ɓɛɛ a̧ pi̧i̧ laa kaɗi mbɛt. Kíì dee wa nyɛmna.

³⁶O wi-ya-oi mɔ‘i wee ɗoŋ mɔ nɛ̀ dee ha̧ wi nɛ̀ ɗaŋ-sɔ̧ duka so tɛ a̧‘i mɛ kpasi nɛnɛ.

³⁷Ɓɛɛ o bíí nú Gerasa lɛŋ tɔ̧ ha̧ Jesu mɛ yu tɛ nù kɔ-wa nɛ̀ nyɛi̧a-a, wen kíì dee wa nyɛmna. Jesu daŋa kombon ɓɛɛ si ɗoŋ.

³⁸Wi nɛ̀ o ɗaŋ-sɔ̧ gboo so tɛ a̧ aia nú, ɓɛɛ ak a̧ mɛ duk in a̧. Jesu foo a̧ sinɛ, ɓɛɛ tɔ̧ ha̧ a̧:

³⁹«Mɛ̀ sí ɗoŋ tɛ o bíí kɔ-mɛ, ɓɛɛ mɛ̀ wé ɗoŋ mɔ lɛŋ nɛ̀ Sɔ̧ dee in mɛ̀ɛ́.» Ɓɛɛ wi’ɛi yak tɔ̧ nɛ̀ nyɛrɛ mɔ nɛ̀ Jesu dee in a̧‘i dam saaye'i lɛŋ.

⁴⁰Jesu sii ɗoŋ Galilee, ɓɛɛ giiwi kpɛk a̧, wen wa lɛŋ duka so zɛm nɛ̀ a̧.

⁴¹Ɓɛɛ ŋma bíí tɛ, nin-a nɛ́ Jairus, a̧ nɛ́ wi-duk-zu tua-mɔi̧a-a. A̧ tika nù tibee Jesu, ɓɛɛ ai nú ha̧ a̧ mɛ́ nɛ̀ tɛ̀ kɔ̧-a̧,

⁴²wen kpɔk be-okoo kɔ̧-a̧ nɛ̀ a̧a̧ nɛ̀ pɛ hee ɓu-zua-yiitoo ga hɛɗa fio kaɗi. Jesu yaka, ɓɛɛ giiwi nɔ a̧ súm-súm nɛ́ nɛnɛ in a̧.

⁴³Ɓɛɛ ŋma okoo a̧a̧ sɛnɛ nɛ̀ tɔk gbo a̧ dee pɛ ɓu-zua-yiitoo kaɗi; a̧ ɗaŋa sede kɔ̧-a̧ lɛŋ ha̧ o wan-nyina, ɓɛɛ ŋma kpɔk nyɛm so mɛ kpasi a̧ na.

⁴⁴A̧ ɗɔla siti nɛ̀ ɗoŋ Jesu, tam nú-laa kɔ̧-a̧, ɓɛɛ tɔk gɔn tɛ́ kale ŋgimbi'i.

⁴⁵Ɓɛɛ Jesu ak mɔ: «Nɛ́ o'o tama'm o?» Bíí lɛŋ kafa, ɓɛɛ Pierre tɔ̧: «Wan-usi-mɔ, nɛ́ o bíí a̧ nɔ ŋmaa in'nɛ̀ɛ́ ir nɛ̀ ɛnɛ!»

⁴⁶Ɓɛɛ Jesu tɔ̧ woyo: «Ŋma bíí tama'm; wen mi iŋa nɛ̀ de-a, ŋma ŋgai gboo tɛ‘m.»

⁴⁷Kóò‘i zɔka'e Jesu iŋa mɔ‘i, ɓɛɛ a̧ nɛ́ nɛ̀ naka-tɛ, tik nù ká̧ naŋ Jesu; a̧ tɔ̧ɔ̧ ndaa mɔ nɛ̀ dee ha̧ a̧ mɛ tam nɛ̀ Jesu nɛ̀ gbaayí o bíí lɛŋ, in mɔ nɛ̀ dee ha̧ zɛɛ kɔ̧-a̧ mɛ kaɗi nɛnɛ tɛ́ kale ŋgimbi'i.

⁴⁸Jesu tɔ̧ɔ̧ ha̧ a̧: «Boko-bem kɔ‘m, kɔ̧ɔ̧ɗɔɔwen kɔ-mɛ kpasa mɛ, mɛ̀ yák zaŋ ga̧a̧mɔ.»

⁴⁹Jesu biti tɔ̧ɔ̧ wen, ɓɛɛ ŋma bíí tɛ nɛ̀ tɛ̀ ko gasa wi-duk-zu tua-mɔi̧a-a, ɓɛɛ tɔ̧ ha̧ a̧: «Bem k’ɛ́nɛ́ fee kaɗi, k’ɛ́nɛ́ gba zu Wan-usi-mɔ sɔɔ géè ɓɔna.»

⁵⁰Jesu zia wen'i, ɓɛɛ tɔ̧ ha̧ a̧: «Ká mɛ de kíì na; mɛ̀ kɔ̧́ ɗɔaa ɓɛɛ, ɓɛɛ bem kɔ-mɛ tɛ kpasi.»

⁵¹Jesu hɔɔ kɔ̧́ tua ko gasa wi-duk-zu tua-mɔi̧a-a, ɓɛɛ a̧ e ha̧ ŋma bíí mɛ ye tua in a̧ na, kànà nɛ́ Pierre in Jean in Jak ká bá nɛ̀ dáà in nàá-wan-bem ɓɛɛ.

⁵²O bíí lɛŋ hi̧i̧ nɛ́ kɔ̧a̧ hiɗi nɛ̀ mɔ zu bem’ɛi, ɓɛɛ Jesu tɔ̧ ha̧ wa: «K’ɛ́nɛ́ hi̧i̧ kɔ̧a̧ hegɔ na, bem’ɛ fe na, a̧ ɔ nɛ́ yá.»

⁵³Ɓɛɛ wa zɛkɛɗi a̧, wen nɛ̀ wa iŋa'e bem’ɛi fee kaɗi.

⁵⁴Jesu kasa er bem’ɛi, ɓɛɛ sa a̧: «Bem kɔ‘m, mɛ̀ tún!»

⁵⁵Ɔmi pia ɗoŋ ɓɛɛ a̧ kur tɛ kpɔk kale ŋgimbi'i. Ɓɛɛ Jesu tɔ̧ ha̧ wa mɛ ha̧ nyɔŋmɔ ha̧ a̧.

⁵⁶Gasa kíì dee dáà in nàà kɔ̧-a̧, ɓɛɛ Jesu mbo nú-wa wen ká wa tɛɛ tɔ̧ wen'i ha̧ ŋma bíí.