Read Northwest Gbaya WEE-ƊOŊ-HEEMBEA 10 Bible Online

WEE-ƊOŊ-HEEMBEA 10 - Northwest Gbaya bible

WEE-ƊOŊ-HEEMBEA 10

¹«GASA WAN tɔ̧ɔ̧ ha̧‘m: ‹Mɛ̀ sɛ́k o ta yiitoo hee o kuti-a ga, ɓɛɛ mɛ̀ dáŋ pii tɛ‘m zu kaya’ɛ; mɛ̀ sɛ́k kuɓa-te mbɛt.

²Mi tɛ yɔr wen n'am yɔra so zu o kuti sɛka-ta nɛ mɛ gbaa a nù‘i, ɓɛɛ mɛ tɛ a o mbe sɛka-ta nɔ‘i kɔ̧ kuɓa'i.›

³«Mi sɛka ŋma kuɓa nɛ te-akasia, mi sɛka ta yiitoo hee o kuti-a ga, ɓɛɛ mi kai o sɛka-ta nɔ‘i yiitoo'i daŋ nɛnɛ si zu kaya.

⁴GASA WAN yɔra mɔ sɛn zu o sɛka-ta nɔ‘i hee mɔ'ɔ n'aa yɔra so zu o kuti-a ga; mɛ̀ nɛ́ o wen ɓu n'aa baa tɔ̧ so sɛn zu kaya nɛ tɛ wee, wese mɔi̧a-a. GASA WAN ha̧a̧ o sɛka-ta nɔ‘i ha̧‘m.

⁵Mi zika tɛ‘m ɓɛɛ mi zir nɛ̀ zu kaya; mi kaia o sɛka-ta nɔ‘i a kɔ̧ kuɓa n'am sɛka so, hee mɔ'ɔ nɛ GASA WAN tɔ̧ɔ̧ so ha̧‘m ga, ɓɛɛ wa ɓɔn kɔ̧ kuɓa hi̧i̧.»

⁶(O be Israɛl gbina nɛ ká̧ o gɔna-yì Bɛnɛ-Yakan yak si Mɔsɛra mɛ; nɛ́ sɛn hi̧i̧ a̧ Arɔŋ fea, ɓɛɛ wa gun a̧ hi̧i̧ mbɛt. Eleazar bem kɔ̧-a̧ duka wi-ɗafi-sɔ̧ oi-aa.

⁷Wa kura hi̧i̧ si Gudgɔda; nɛ̀ Gudgɔda wa nɛɛ si sɛn Yotbata, nù nɛ be-zer ɔ dɔka sɛnɛ.

⁸GASA WAN ee duk ko Levii nɛtɛ wen tuia Kuɓa nɔɔ-tɔk ko GASA WAN ha̧ wa mɛ yor ti a̧, ha̧ wa mɛ de tom ha̧ a̧, in ha̧ wa mɛ tok de yoŋgo nɛ̀ nin-a hee mɔ'ɔ nɛ de hɔ sɔsɔɔ ga.

⁹Nɛ́ hegɔ sa o bezaŋ Levii bó nɛ̀ mɔɔ-oi, kóó nù hee o nya-wa ga na. Mɔɔ-oi kɔ-wa nɛ́ GASA WAN, hee mɔ'ɔ nɛ GASA WAN Sɔ̧ ha̧a̧ so nɛ nú ha̧ wa ga.)

¹⁰«Mi duka zu kaya hee mɔ'ɔ n'am de so nɛti ga, tɛ zɛ ɓu-naar. GASA WAN zia kɔfamɔ kɔ‘m woyo, ɓɛɛ a̧ kɔ̧ mɛ kum'nɛ́ na.

¹¹GASA WAN tɔ̧ɔ̧ ha̧‘m: ‹Mɛ̀ kúr, mɛ̀ dúk ti ha̧ dukbíí, ɓɛɛ mɛ̀ há̧ nú wen yaka-a, wa a̧ nɛ́ɛ̀ bá nù n'am kana mɔ ha̧ o dáà kɔ-wa'e nde, mi tɛ ha̧ ha̧ wa.› »

¹²«Kinii, Israɛl, nɛ́ ge a̧ GASA WAN Sɔ̧ kɔ-mɛ pɛm ha̧ mɛ mɛ de ha̧ a̧ ge? A̧ pɛm nɛ yuu a̧, ndaka ɗoŋ o yuwar kɔ̧-a̧ lɛŋ, kɔ̧ɔ̧ a̧, dee tom ha̧ a̧ nɛ see-mɛ in kiitɛ-mɛ lɛŋ,

¹³in kasa o heembea kɔ̧-a̧ in o ha̧a̧nú kɔ̧-a̧ n'am ha̧ mɛ sɔsɔɔ wen de duka-a kɔ-mɛ.

¹⁴Mɛ̀ zɔ́k yiwese nɛ́ ko GASA WAN Sɔ̧ kɔ-mɛ, nù in mɔ nɛ a̧a̧ sɛnɛ lɛŋ nɛ́ ko Sɔ̧.

¹⁵GASA WAN ndaɗa in o dáà kɔ-mɛ, ha̧ a̧ mɛ kɔ̧ wa; oi wa, nɛ́ o bezaŋ-wa, mɛ̀ nɛ́ wen nɛ tɔ̧, ɛnɛ n'aa hoka mgbara o dɔka dukbíí lɛŋ hee mɔ'ɔ nɛ‘i zɔk sɔsɔɔ ga.

¹⁶Ɛnɛ tɛ kpai see'nɛ́, ɛnɛ beka de ŋgazu ɓɔna,

¹⁷wen GASA WAN Sɔ̧ k’ɛ́nɛ́ nɛ́ Sɔ̧ nɛ̀ gana o sɔ̧ lɛŋ. A̧ nɛ GASA WAN Sɔ̧ ko o wan, Sɔ̧ nɛ ɔ gasa nyɛmna, nɛ a̧a̧ nɛ ŋgai, nɛ‘i yu yuu, a̧ ye ɗoŋ bíí tɛ kita na, wi ɔr a̧ na.

¹⁸A̧ gɔn kita gɔn nɛ yuwar-a ha̧ be-oi in ko-gera, a̧ kɔ̧ gɛnɛ kɔ̧ɔ̧, ɓɛɛ a̧ ha̧a̧ nyɔŋmɔ in laa ha̧ a̧.

¹⁹Ɛnɛ tɛ kɔ̧ gɛnɛ, wen ɛnɛ yaa so nɛ gɛnɛ sɛn nú Egiptɛ.

²⁰Ɛnɛ tɛ yu nɛ́ GASA WAN Sɔ̧ k’ɛ́nɛ́, ɓɛɛ ɛnɛ dee tom ha̧ a̧; nɛ̀ a̧ ɛ̀nɛ̀ tɛ ndaɗi in a̧, ɛnɛ tɛ kan mɔ nɛ nin-a.

²¹A̧ nɛ zɔnamɔ k’ɛ́nɛ́, a̧ nɛ Sɔ̧ k’ɛ́nɛ́, nɛ́ a̧ a̧ dee o gasa mɔɔ-kifi nɔ'ɔ n’ɛnɛ zɔka nɛ yí‘nɛ́'ɛ.

²²O dáà k’ɛ́nɛ́ zira si nú Egiptɛ, ká wa lɛŋ nɛ́ bíí ɓu-mɔɔrɔ-ɗoŋ-yiitoo ɓɛɛ. Kinii GASA WAN Sɔ̧ k’ɛ́nɛ́ dee h’ɛ́nɛ́ mɛ dɔk hee o sɔra sɛn yiwese ga.»