Read Northwest Gbaya WEE-ƊOŊ-HEEMBEA 12 Bible Online

WEE-ƊOŊ-HEEMBEA 12 - Northwest Gbaya bible

WEE-ƊOŊ-HEEMBEA 12

¹«O heembea in o yuwar duka-a n’ɛnɛ tɛ ba de nɛ tom tɛ nù nɛ GASA WAN Sɔ̧ ko o dáà k’ɛ́nɛ́ ha̧a̧ h’ɛ́nɛ́ ŋgimbi lɛŋ n’ɛnɛ duk kpasa zu nù'ɛ nɛ mɔɔ nɔ'ɔ.»

²«Ɛnɛ tɛ ɗaŋ o fara-ɗafi-sɔ̧ ko o dukbíí n’ɛnɛ tɛ ndak'i yinɛ. Fara-ɗafi o sɔ̧ nɔ‘i nɛ́ o zu gasa kaya, o geɗek kaya in o ɗɔɔ da̧a̧ wa̧a̧-te lɛŋ.

³Ɛnɛ tɛ gba o fara-ɗafi-sɔ̧ kɔ-wa, ɛnɛ tɛ gbin o ta-zu-nù, ɛnɛ tɛ kai sɛka-te nɛ wa gasi a tɛ wee. Ɛnɛ tɛ gbin o géé-sɔ̧ kɔ-wa a nù, ɓɛɛ ɛnɛ tɛ bi nin-wa yinɛ fara'i.

⁴«Ɛ́nɛ́ beka gasi GASA WAN Sɔ̧ k’ɛ́nɛ́ hee mɔ'ɔ nɛ o wi nɔ‘i gasi nɛ o sɔ̧ kɔ‘i ga na.

⁵Ɛnɛ tɛ kii GASA WAN Sɔ̧ k’ɛ́nɛ́ sɛn fara n'aa hoka mgbara o dukbíí k’ɛ́nɛ́ lɛŋ mɛ e nin-a sɛnɛ. Nɛ́ hi̧i̧ ɛ̀nɛ̀ tɛ nɛ sɛnɛ.

⁶Ɛnɛ tɛ ba dɔɔ-kpoo-sɔ̧ k’ɛ́nɛ́, o kpoo-ɗafi-sɔ̧ k’ɛ́nɛ́, o ha̧a̧mɔ k’ɛ́nɛ́, o ha̧a̧mɔ k’ɛ́nɛ́ nɛ ta-tɛ, o ha̧a̧mɔ akamɔ k’ɛ́nɛ́, o gee ha̧a̧mɔ k’ɛ́nɛ́ in o zu mɔ-dai k’ɛ́nɛ́ nɛnɛ hi̧i̧.

⁷Mɛ̀ nɛ́ sɛn hi̧i̧ ɛ̀nɛ̀ tɛ nyɔŋ mɔ sɛn ti GASA WAN Sɔ̧ k’ɛ́nɛ́ nɛ desee in o bíí kɔ̧ tua k’ɛ́nɛ́ tɛ yuwar mɔ lɛŋ nɛ GASA WAN Sɔ̧ k’ɛ́nɛ́ tɛ tok de yoŋgo zu a̧.

⁸«Ɛ́nɛ́ beka de mɔ hee mɔ'ɔ n’ɛɛ de kinii, nɛ̀ kóó o ndé de nɛ mɔ nɛ see kɔ̧a̧'ɛ ga na,

⁹wen ɛnɛ tɛ hɔ tɛ nù, fara-ɔm-tɛ nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ hɔ̧ɔ̧ na.

¹⁰Ɛnɛ tɛ ku Jurdɛn, ɓɛɛ ɛnɛ tɛ de ye sɛn tɛ nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́ nɛ mɔɔ-oi. A̧ tɛ ha̧ ɔma-tɛ h’ɛ́nɛ́, gbo nɛ ɛnɛ ɗɔɔ ŋgai ko o wisɛn k’ɛ́nɛ́, ɓɛɛ ɛnɛ tɛ ɔ hi̧i̧ tɛ ga̧a̧mɔ.

¹¹Nɛ́ sɛn fara nɛ GASA WAN Sɔ̧ k’ɛ́nɛ́ hoka mɛ e nin sɛnɛ‘i, ɛ̀nɛ̀ tɛ kai o mɔ lɛŋ n'am ha̧a̧ nú h’ɛ́nɛ́ zu-a'i tɛnɛ: o dɔɔ-kpoo-sɔ̧ k’ɛ́nɛ́, o kpoo-ɗafi-sɔ̧ k’ɛ́nɛ́, o ha̧a̧mɔ k’ɛ́nɛ́ nɛ ta-tɛ in o mɔ lɛŋ n’ɛnɛ tɛ hok mɛ ha̧ nɛ̀ ha̧a̧mɔ akamɔ ha̧ GASA WAN.

¹²Ɛnɛ tɛ ya nɛ̀ desee ti GASA WAN Sɔ̧ k’ɛ́nɛ́, ɛnɛ, o bem k’ɛ́nɛ́, o boko-bem k’ɛ́nɛ́, o wi-de-tom k’ɛ́nɛ́, o kó-de-tom k’ɛ́nɛ́ in be Levii nɛ duk ye k’ɛ́nɛ́ wen a̧ kpa ŋma war mɔ, kóó ŋma mɔɔ-oi in'nɛ̀ɛ́ na.

¹³Ká mɛ dɔ kpoo-sɔ̧ kɔ-mɛ sɛn fara lɛŋ nɛ mɛ tɛ kpa na.

¹⁴Ɓɛɛ mɛ́ tɛ dɔ kpoo-sɔ̧ sɛn fara nɛ GASA WAN hoka mgbara ŋma dukbíí kɔ-mɛ; nɛ́ sɛn hi̧i̧ a̧ mɛ tɛ de mɔ lɛŋ n'am tɔ̧ ha̧ mɛ.

¹⁵«Mɔ kpɔk, mɛ nyɛma gbɛɛ o ŋma saɗi hee mɛ tɛ kɔ̧ ga, ɓɛɛ mɛ nyɔŋa kpoo-aa dam tɛ o ye kɔ-mɛ lɛŋ nyɛm nɛ ɗoŋ de yoŋgo nɛ GASA WAN Sɔ̧ kɔ-mɛ toka zu mɛ. Wi nɛ war-tɛ ɔ sa̧a̧ in wi-simbo tɛ nyɔŋ hee mɛ nɛ kalamba in kɔɗɛ[6] ga.

¹⁶Mɔ kpɔk, ɛnɛ beka nyɔŋ tɔk-aa na, ɛnɛ tɛ gbai tɔk'i a nù hee yì ga.

¹⁷Mɛ beka nyɔŋ zu alkamaari, kóó zu mbe dɔ̧ɔ̧, kóó zu nɔ̧́, kóó kàyà geɗek mɔ-dai in gasa mɔ-dai kɔ-mɛ, kóó o ha̧a̧mɔ akamɔ kɔ-mɛ lɛŋ nɛ mɛ tɛ ha̧, kóó o gee ha̧a̧mɔ in o ha̧a̧mɔ kɔ-mɛ nɛ ta-tɛ tɛ o ye kɔ-mɛ na.

¹⁸Mɛ̀ nɛ́ sɛn ti GASA WAN Sɔ̧ kɔ-mɛ a̧ mɛ tɛ nyɔŋ mɔɔ nɔ‘i sɛnɛ, sɛn fara n'aa hoka ɓɛɛ; mɛ tɛ nyɔŋ mɔɔ nɔ‘i in bem kɔ-mɛ be-wiwii-a in be-okoo-a, wi-de-tom kɔ-mɛ, kó-de-tom kɔ-mɛ in be Levii nɛ duk tɛ ye kɔ-mɛ. Mɛ tɛ duk nɛ desee ti GASA WAN Sɔ̧ kɔ-mɛ tɛ o mɔ kɔ-mɛ lɛŋ nɛ mɛ tɛ de.

¹⁹Tɛ duka-a kɔ-mɛ zu nù, ká mɛ er be Levii nɛ duk tɛ ye kɔ-mɛ na.

²⁰«Ŋgimbi nɛ GASA WAN Sɔ̧ kɔ-mɛ tɛ de ha̧ nù kɔ-mɛ mɛ gasi hee mɔ'ɔ n'aa ha̧a̧ so nú sɛnɛ ga, ɓɛɛ ŋgimbi nɛ mɛ tɛ tɔ̧‘e, wi kɔ̧ɔ̧ mɛ nyɔŋ kpoo, wen nɛ̀ wɔ-a tɛ gbɛ mɛ wó, mɛ tɛ nyɔŋ hee mɔ'ɔ nɛ see-mɛ kɔ̧a̧ ga.

²¹Kà fara nɛ̀ GASA WAN Sɔ̧ kɔ-mɛ hoka mɛ e nin-a sɛnɛ nɛ́ nyɛi̧a nɛ tɛ kɔ-mɛ, mɛ nyɛma mɛ gbɛ ŋma ndai, kóó sami kɔ-mɛ, wan nɛ GASA WAN Sɔ̧ kɔ-mɛ ha̧a̧ ha̧ mɛ de nɛnɛ hee mɔ'ɔ n'am tɔ̧ɔ̧ ha̧ mɛ ga, ɓɛɛ mɛ tɛ nyɔŋ sɛn kɔ̧ tua kɔ-mɛ hee mɔ'ɔ nɛ mɛ tɛ kɔ̧ ga.

²²Mɛ tɛ nyɔŋ hee mɛ kɔ̧ɔ̧ ga, hee mɔ nɛ‘i nyɔŋ nɛ kalamba in kɔɗɛ ga. Wi-simbo in wi nɛ war-tɛ ɔ sa̧a̧ tɛ nyɔŋ mɔ‘i in ŋmaa.

²³Mɔ kpɔk, mɛ beka nyɔŋ tɔk-aa na, wen tɔk nɛ́ duka-kpasa; ɓɛɛ mɛ beka nyɔŋ duka-kpasa in kpoo-aa na.

²⁴Mɛ beka nyɔŋ tɔk na; mɛ tɛ gbai gbai a nù hee mɛ nɛ yì ga.

²⁵Mɛ beka nyɔŋ tɔk'i na; hegɔ mɛ tɛ duk nɛ de-a, mɛ́ nɛ̀ zu mɛ in o bezaŋ-mɛ lɛŋ, wen nɛ mɛ dee mɔ nɛ yuwar-a sɛn yí GASA WAN.

²⁶Ɓaa mɔ nɛ mɛ tɛ kai si fara nɛ GASA WAN hoka'i nɛ́ o wan nɛ mɛ tɛ e nɛtɛ in o ha̧a̧mɔ akamɔ kɔ-mɛ.

²⁷Mɛ tɛ dɔ o kpoo-sɔ̧ kɔ-mɛ, mur-aa in tɔk-aa zu fara-ɗafi GASA WAN Sɔ̧ kɔ-mɛ; mɛ tɛ gbai tɔk kpoo-sɔ̧ kɔ-mɛ a zu fara-ɗafi GASA WAN Sɔ̧ kɔ-mɛ, ɓɛɛ mɛ nyɔŋa kpoo-aa.

²⁸Mɛ̀ zɔ́k in mɛ̀ mbó zu tɛ o gba̧a̧ heembea lɛŋ n'am ha̧ mɛ'ɛ; hegɔ mɛ tɛ duk nɛ de-a, mɛ in o bezaŋ-mɛ mɛ ɗoŋ ɓɔnsɛnɛ, wen nɛ mɛ dee mɔ nɛ ɔ dee in nɛ duk nɛ yuwar-a yí GASA WAN Sɔ̧ kɔ-mɛ.»

²⁹«Ŋgimbi nɛ GASA WAN Sɔ̧ kɔ-mɛ be tɛ̀ɛ́ ɗaŋ o tugun bíí nɛ mɛ tɛ ye tɛ kɔ-wa mɛ ba nù kɔ-wa,

³⁰ká mɛ zɔk ɗoŋ mɔ kɔ-wa na, ká mɛ tɛɛ tik sak ɗoŋ nɛ wa kuma lɛŋ ti mɛ kaɗi. Ká mɛ kii o sɔ̧ kɔ-wa tɔ̧ nɛnɛ‘e: ‹O tugun bíí nɔ'ɔ gasa so bɔɔ o sɔ̧ kɔ‘i hee ge, ha̧‘m zɔk ɗoŋ-aa náà ge nde› na.

³¹Mɛ beka ba yuwar deemɔ kɔ-wa, gasi nɛ GASA WAN Sɔ̧ kɔ-mɛ na, wen mɔ nɛ duk nɛ gasa ɗaŋmɔ ti GASA WAN, mɔ n'aa sɛn, nɛ́ mɔ‘i a̧ wa dee ha̧ o sɔ̧ kɔ-wa: wa dɔɔ o bem kɔ-wa be-wiwii-a in be-okoo-a ha̧ o sɔ̧ kɔ-wa.»