Read Northwest Gbaya WEE-ƊOŊ-HEEMBEA 14 Bible Online

WEE-ƊOŊ-HEEMBEA 14 - Northwest Gbaya bible

WEE-ƊOŊ-HEEMBEA 14

¹«Ɛ́nɛ́ nɛ́ o bem ko GASA WAN Sɔ̧ k’ɛ́nɛ́. Ɛ́nɛ́ beka gɔn tɛ‘nɛ́ a da̧i̧ sɛnɛ na, ɛnɛ beka ba ti zu'nɛ́ wen fio na mbɛt,

²wen ɛnɛ nɛ́ bíí nɛ duk nɛtɛ wen GASA WAN Sɔ̧ k’ɛ́nɛ́. Ɓɛɛ GASA WAN Sɔ̧ hoka'nɛ h’ɛ́nɛ́ mɛ duk nɛ́ bíí kɔ̧-a̧ mgbara o bíí lɛŋ sɛn zaŋnu’ɛ.»

³«Ɛnɛ beka nyɔŋ ndiŋmɔ na.

⁴O saɗi n’ɛnɛ nyɛma mɛ nyɔŋ nɛ mɔɔ nɔ'ɔ: ndai, sami in gbadua,

⁵o saɗi nɛ hɔɔ ŋmaa in o kalamba, in o kɔɗɛ, ká bá nɛ̀ o gbadua-zaŋbɛɛ in o sami-zaŋbɛɛ.

⁶Ɛnɛ nyɛma mɛ nyɔŋ o saɗi lɛŋ nɛ a̧a̧ nɛ kɔtɔ-naŋ yiitoo in nɛ mgbuk nyɔŋmɔ mgbuk.

⁷Hegɔ, mgbara o saɗi nɛ a̧a̧ nɛ kɔtɔ-naŋ yiitoo in nɛ mgbuk nyɔŋmɔ mgbuk, o wan n’ɛnɛ beka nyɔŋ na nɛ́ mɔɔ nɔ'ɔ: ŋgeloba, dɔmɔ in kparɛ, wen wa mgbuk nyɔŋmɔ mgbuk, ɓɛɛ kɔtɔ-naŋ-wa bo na. Ɛnɛ tɛ zɔk wa hee o ndiŋ saɗi ga.

⁸Ŋgɔya tɛ duk nɛ ndiŋ saɗi wen'nɛ́ mbɛt, wen kɔtɔ-naŋ-a a̧a̧ sɛnɛ, ɓɛɛ a̧ mgbuk mɔ na. Ɛnɛ beka nyɔŋ kpoo-aa na, kóó foo wɔr-aa na mbɛt.

⁹«Mgbara o mɔɔ-ɗɔɔ-yì, wan n’ɛnɛ tɛ nyɔŋ nɛ́ mɔɔ nɔ'ɔ: zoro nɛ a̧a̧ nɛ tɛn in nɛ a̧a̧ nɛ saɗa-tɛ;

¹⁰ɓɛɛ o wan nɛ̀ bó nɛ̀ tɛn in saɗa-tɛ na, ɛnɛ beka nyɔŋ na. Wa nɛ o ndiŋmɔ wen'nɛ́.

¹¹«Ɛnɛ nyɛma mɛ nyɔŋ o de nɔ̧́í̧ lɛŋ,

¹²ɓɛɛ o nɔ̧́í̧ n’ɛnɛ beka nyɔŋ na nɛ́ mɔɔ nɔ'ɔ: zua, gbakaɗa, hi̧i̧-kɔ̧a̧-ga̧a̧,

¹³pɛfi-gbɔɗɔ, tama in o zuduk fambɛɛ nɛtɛ nɛtɛ,

¹⁴o zuduk gba-kɔra nɛtɛ nɛtɛ,

¹⁵ndao, sɔrɔrɔ, nɔ̧́í̧-ba-ká̧-ŋgere in o zuduk ndio nɛtɛ nɛtɛ,

¹⁶gba-diri, gɔtɔŋ in diri-taŋ-kɔ̧a,

¹⁷gɔm-zaŋ, kiaŋko, gbaradaa,

¹⁸nɔ̧́í̧-gba-dɔya, o zuduk gboozawaya nɛtɛ nɛtɛ, nɔi-zambɛrɛ in be-sa̧i̧ na mbɛt.

¹⁹«Ɛnɛ beka nyɔŋ o kokoɗo-mɔ nɛ a̧a̧ nɛ buma ɓaa na. Wa nɛ o ndiŋmɔ wen'nɛ́.

²⁰Saɗi lɛŋ nɛ a̧a̧ nɛ wor ɓaa, ɓɛɛ nɛ ɔ sa̧a̧, ɛnɛ nyɛma nyɔŋa-a.

²¹«K’ɛ́nɛ́ nyɔŋ wɔr saɗi na, ɛ̀nɛ̀ há̧ ha̧ ŋma gɔni bíí nɛ ɔ tɛ ye k’ɛ́nɛ́ mɛ nyɔŋ, kóó ɛ̀nɛ̀ ɗɔ́r ɗɔ̀r ha̧ a̧, wen ɛnɛ nɛ́ o bíí nɛ duk nɛtɛ wen GASA WAN Sɔ̧ k’ɛ́nɛ́. Ɛnɛ beka ba yibere nana-gbadua gi nɛ kpoo be-a na.»

²²«Mɔ lɛŋ nɛ mɛ tɛ gun kpɛɛfɔ kɔ-mɛ, mɛ tɛ ha̧ zu-a ha̧ Sɔ̧ dam ɗoŋ pɛ kpɔk kpɔk.

²³Mɛ tɛ nyɔŋ zu-mɔ kɔ-mɛ nɛ mɛ ha̧a̧ ha̧ Sɔ̧ sɛn ti GASA WAN sɛn fara nɛ GASA WAN Sɔ̧ kɔ-mɛ hoka ha̧ nin-a mɛ duk sɛnɛ. Mɛ tɛ nyɔŋ nɛ zu alkamaari kɔ-mɛ, zu mbe dɔ̧ɔ̧ in nɔ̧́ kɔ-mɛ ba nɛ kaya gasa mɔ-dai in kaya geɗek mɔ-dai kɔ-mɛ, wen ha̧ mɛ mɛ yu GASA WAN Sɔ̧ kɔ-mɛ ɓɔnsɛnɛ.

²⁴Kà yuwar nɛ́ ɔɔ nyɛi̧a ha̧ mɛ mɛ ba zu-mɔ kɔ-mɛ nɛnɛ, kà fara nɛ̀ GASA WAN Sɔ̧ kɔ-mɛ hoka mɛ e nin-a sɛnɛ nɛ́ ɔɔ nyɛi̧a nɛ tɛ kɔ-mɛ, ɓɛɛ kà GASA WAN Sɔ̧ kɔ-mɛ nɛ́ toka de yoŋgo zu mɛ,

²⁵mɛ tɛ kpai o zu-mɔ nɛ mɛ mɔi̧a'i nɛ sede; mɛ tɛ ɓur sede'i nɛ ŋgaya-a sɛn kɔ̧ er-mɛ, ɓɛɛ mɛ yaka si fara nɛ GASA WAN Sɔ̧ kɔ-mɛ hoka.

²⁶Sɛn hi̧i̧ mɛ tɛ hi̧fi mɔ nɛ mɛ kɔ̧a̧ nɛ sede'i: o ndai in o sami, o dɔ̧ɔ̧ in o mɔ lɛŋ nɛ see-mɛ kɔ̧a̧. Mɛ tɛ nyɔŋ mɔɔ nɔ‘i sɛn ti GASA WAN Sɔ̧ kɔ-mɛ, ɓɛɛ mɛ tɛ duk nɛ desee, mɛ in o bíí kɔ̧ tua kɔ-mɛ lɛŋ.

²⁷«Ɓɛɛ nɛ war ko be Levii nɛ duk tɛ kɔ-mɛ, nɛ̀ bó nɛ̀ war mɔ in ŋma mɔɔ-oi in mɛɛ na, mɛ beka er a̧ na.

²⁸Ɗoŋ pɛ taar, mɛ tɛ mɔi̧ zu o nyɔnɔ kɔ-mɛ lɛŋ, ɓɛɛ tɛ taar pɛ‘i, mɛ aa wa tɛ ye kɔ-mɛ.

²⁹Hegɔ be Levii nɛ̀ bó nɛ̀ war mɔ, kóó mɔɔ-oi in mɛɛ na, tɛ tɛ; o gɛnɛ, o be-oi, o ko-gera nɛ ɔ ye kɔ-mɛ tɛ tɛ mbɛt, ɓɛɛ wa tɛ nyɔŋ mɔ zaŋ-wa sur wen ha̧ GASA WAN Sɔ̧ kɔ-mɛ mɛ tok de yoŋgo zu mɛ tɛ o tom kɔ-mɛ lɛŋ.»