Read Northwest Gbaya WEE-ƊOŊ-HEEMBEA 18 Bible Online

WEE-ƊOŊ-HEEMBEA 18 - Northwest Gbaya bible

WEE-ƊOŊ-HEEMBEA 18

¹«O be Levii nɛ ya nɛ o wi-ɗafi-sɔ̧, dùk kɔ-wa nɛ oi zu lɛŋ beka bó nɛ̀ ŋma war mɔ, kóó ŋma war nù kɔ-wa nɛ̀ mɔɔ-oi in o dɔka be Israɛl na. Wa tɛ nyɔŋ nɛ́ mɔ nɛ o bíí ɗafi nɛ GASA WAN in o mɔ nɛ wa ha̧ ha̧ a̧.

²O be Levii bó nɛ̀ mɔɔ-oi mgbara o nya-wa na; GASA WAN nɛ́ mɔɔ-oi kɔ-wa hee mɔ'ɔ n'aa baa tɔ̧ so ha̧ wa ga.

³«War mɔ nɛ wi-ɗafi-sɔ̧ tɛ kpa er o bíí, kóó er o wi nɛ gɔn ndai, kóó sami ɗafi nɛ sɔ̧ nɛ́: ɓaa-a, yaŋgo-a in gbazaŋ-aa.

⁴Ɛnɛ tɛ ha̧ zu alkamaari k’ɛ́nɛ́, zu mbe dɔ̧ɔ̧ k’ɛ́nɛ́, zu nɔ̧́ k’ɛ́nɛ́ in kuti buma-tɛ geɗek mɔ-dai k’ɛ́nɛ́ ha̧ a̧ mbɛt,

⁵wen nɛ́ a̧ in o bem kɔ̧-a̧ a̧ GASA WAN Sɔ̧ k’ɛ́nɛ́ hoka mgbara o zuduk mɛ yor hi̧i̧ wese lɛŋ, de nɛ tom nɛ nin GASA WAN.

⁶«Kà ŋma be Levii tɛ nɛ tɛ ŋma ye nù Israɛl, kóó nɛ́ ge ye ge, a̧ a̧ nɛ́ hee mɔ'ɔ n'aa kɔ̧ɔ̧ ga si fara nɛ GASA WAN hoka.

⁷A̧ tɛ de tom nɛ nin GASA WAN Sɔ̧ kɔ̧-a̧ hee mɔ'ɔ nɛ o nya-a̧ be Levii ya nɛnɛ hi̧i̧ ti GASA WAN ga.

⁸Nyɔŋmɔ kɔ-wa nɛ wa tɛ kpa, wa tɛ kɛ̧ nyɛm ŋmaa; mɔ kpɔk, mɔɔ-oi dáà kɔ-wa nɛ wa tɛ ɗɔr kpɔk beka ye zaŋ-aa na.»

⁹«Ŋgimbi n’ɛnɛ tɛ ye tɛ nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́, k’ɛ́nɛ́ zɔk ɗoŋ dee ɗaŋmɔ ko o dukbíí nù‘i na.

¹⁰Ŋma bíí tɛ k’ɛ́nɛ́ beka dɔ bem kɔ‘i mɛ́ be-wiwii-a kóó okoo-a ɗafi nɛ sɔ̧ na; wi beka nɛ́ɛ̀ zɔk wan-gbana, wi-a-ŋgala, wi-pi̧-tani, wi-de-mɔɔ-kifi,

¹¹kóó wi-de-nyina-ba-see na; wi beka sa sɔ̧-tɛ-bíí na, wi beka kii sɔ̧-fio na mbɛt.

¹²Wen bíí lɛŋ nɛ̀ de mɔɔ nɔ‘i duk nɛ gasa ɗaŋmɔ ti GASA WAN, ɓɛɛ mɛ̀ nɛ́ wen o pɛrti gasa ɗaŋmɔ nɔ‘i a̧ GASA WAN Sɔ̧ k’ɛ́nɛ́ ndak nɛ o tugun bíí yinɛ ti'nɛ́.

¹³Ɛnɛ tɛ ndaɗi kànà in GASA WAN Sɔ̧ k’ɛ́nɛ́ ɓɛɛ.

¹⁴«O tugun bíí nɔ‘i n’ɛnɛ tɛ ndak'i zɔk nɛ o wi-a-ŋgala in o wan-gbana; ɓɛɛ k’ɛ́nɛ́, GASA WAN Sɔ̧ k’ɛ́nɛ́ kɔ̧ h’ɛ́nɛ́ mɛ de pɛrti mɔ‘i na.

¹⁵Nɛ́ ŋma wi-tɔ̧-wen oi nú Sɔ̧ hee mi ga a̧ GASA WAN Sɔ̧ k’ɛ́nɛ́ tɛ ba e ŋgɔn mgbara'nɛ́, mgbara o nya'nɛ́. Nɛ́ wen nú-a ɛ̀nɛ̀ tɛ zii ɓɛɛ.

¹⁶«Nɛ́ mɔ‘i ɛ́nɛ́ aka so er GASA WAN Sɔ̧ k’ɛ́nɛ́ sɛn Hɔrɛb wese mɔi̧a-a ŋgimbi n’ɛnɛ tɔ̧ɔ̧ nɛnɛ‘e, wi kɔ̧ mɛ zii tiger GASA WAN Sɔ̧ kɔ‘i ɓɔna, wi kɔ̧ mɛ zɔk gasa wee ɓɔna, wi kɔ̧ mɛ fe na mbɛt.

¹⁷GASA WAN tɔ̧a̧ ha̧‘m: ‹Daden nɛ̀ wa tɔ̧ɔ̧ hegɔ.

¹⁸Nɛ́ ŋma wi-tɔ̧-wen oi nú Sɔ̧ hee mɛ ga a̧‘m tɛ ba e ŋgɔn mgbara o nya-wa; mi tɛ e wen kɔ‘m nú-a, ɓɛɛ a̧ tɛ dali mɔ lɛŋ n'am tɛ tɔ̧ ha̧ wa.

¹⁹Ɓɛɛ kà ŋma bíí zíí o wen kɔ‘m nɛ wi-tɔ̧-wen oi nú Sɔ̧ tɛ tɔ̧ nɛ nin-am na, mi nɛ tɛ‘m, mi tɛ ak a̧ tɛ mɔ‘i.

²⁰Ɓɛɛ kà wi-tɔ̧-wen oi nú Sɔ̧ gɔ́n tɛ tɔ̧ nɛ wen n'am tɔ̧ ha̧ a̧ na, koo a̧ tɔ̧ɔ̧ nɛ wen nɛ nin o ŋma sɔ̧, a̧ tɛ fe.›

²¹«Ŋmafara ɛnɛ tɛ ak mɔ: ‹Ɛɛ tɛ iŋ‘e ɛ̧ɛ̧ wen’ɛ bó nɛ́ GASA WAN a̧ tɔ̧a̧ na hee ge?›

²²Kà mɔ nɛ wi-tɔ̧-wen oi nú Sɔ̧ tɔ̧́ nɛ̀ nin GASA WAN'i nɛ́ hɔɔ gba̧a̧ na, kà mɔ‘i nɛ́ dee na, ɓɛɛ nɛ́ gɔna tɛ ko wi-tɔ̧-wen oi nú Sɔ̧. Ká kíì mɔ‘i de'nɛ́ na.»