Read Northwest Gbaya WEE-ƊOŊ-HEEMBEA 2 Bible Online

WEE-ƊOŊ-HEEMBEA 2 - Northwest Gbaya bible

WEE-ƊOŊ-HEEMBEA 2

¹«Ɛɛ zika tɛ yɛ mɛ nɛ si sɛn ŋga-gbárà yuwar Gbɛ̧ gba-tɔp hee mɔ'ɔ nɛ GASA WAN tɔ̧ɔ̧ ha̧‘m ga. Ɛɛ zika nɛ ká̧ naŋ kaya Sɛir ɗoŋ-aa nyɛi̧.

²«Nɛ mɔ'ɔ nɛ GASA WAN tɔ̧ɔ̧ ha̧‘m hegɔ:

³‹Ɛ́nɛ́ zika nɛ ká̧ naŋ kaya’ɛ ɗoŋ-aa nyɛi̧; ɛ̀nɛ̀ zík tɛ‘nɛ́ si ká̧-zan-mɛ́-ŋgɔn.

⁴Mɛ̀ há̧ nú-mɛ ha̧ o bíí hee mɔ'ɔ ga: Ɛnɛ tɛ ɓir nɛ nù ko o nya'nɛ́, o bem ko Esau nɛ ɔ tɛ nú Sɛir; wa tɛ yu'nɛ́, ɓɛɛ ɛ̀nɛ̀ kásí zu'nɛ́.

⁵K’ɛ́nɛ́ kii wen in wa na wen mi beka ha̧ ŋma mɔ tɛ nù‘i h’ɛ́nɛ́ na, kóó géé be ká̧ nú nù‘i na mbɛt, wen nɛ mi a̧ ha̧a̧ kaya Sɛir ha̧ Esau ha̧ a̧ mɛ ɔ sɛnɛ.

⁶Ɛnɛ tɛ hi̧fi nyɔŋmɔ lɛŋ n’ɛnɛ tɛ nyɔŋ in yì lɛŋ n’ɛnɛ tɛ nɔ hi̧fi er-wa.›

⁷«GASA WAN Sɔ̧ k’ɛ́nɛ́ toka de yoŋgo zu'nɛ́ sɛn tɛ o tom k’ɛ́nɛ́, a̧ pɛma naŋanɔ k’ɛ́nɛ́ sɛn ŋga-gbárà'ɛ. Nɛ́ pɛ ɓu-naar kinii a̧ GASA WAN Sɔ̧ k’ɛ́nɛ́ duk nɛnɛ in'nɛ̀ɛ́. Ŋma mɔ ɓan'nɛ na.

⁸«Ɛɛ yaka nyɛi̧ nɛ̀ o nya-ɛɛ, o bem ko Esau nɛ ɔ sɛn Sɛir. Ɛɛ baa nɛ yuwar Araba nɛ daŋa nɛ Elat in Esiɔŋ-Gebɛr, ɓɛɛ ɛɛ kpai yuwar daŋ nɛnɛ si ŋga-gbárà Mɔab.

⁹Ɓɛɛ GASA WAN tɔ̧ ha̧‘m: ‹Ká mɛ kii wen in o be Mɔab na, in ká mɛ de biro in wa na mbɛt, wen ŋma mɔ n'am tɛ ha̧ tɛ nù kɔ-wa ha̧ mɛ bo na. Mi ha̧a̧ Ar ha̧ o bem ko Lot ha̧ wa mɛ ya sɛnɛ.›

¹⁰(Nɛti, o be Emit ɔɔ so hi̧i̧; wa ɔ ŋgaya, wa ɔ dɔka in wa ɔ kusa hee o bezaŋ Anak ga mbɛt.

¹¹O bíí duka so sa wa in o bezaŋ Anak'e nde, o be Refaim, ɓɛɛ o be Mɔab sa so kɔ‘i wa'e, o be Emit.

¹²O be Hɔr ɔɔ so ɓeemɛ sɛn Sɛir nɛti. O bem ko Esau ndaka wa gbɛ wa yinɛ lɛŋ, ɓɛɛ ba fara kɔ-wa hee mɔ'ɔ nɛ o be Israɛl dee so tɛ nù nɛ GASA WAN ha̧a̧ so ha̧ wa ga.)

¹³«GASA WAN tɔ̧a̧: ‹Kinii ɛ̀nɛ̀ kúr, ɛ̀nɛ̀ kú yí Zɛrɛd!› Ɓɛɛ ɛɛ kur ku yí Zɛrɛd.

¹⁴Ɗoŋ nɔ̀ k’ɛɛ nyɛi̧a batɛ. Kura-a k’ɛɛ sɛn Kadɛs-Barnɛa hɔ nú yí Zɛrɛd dee nɛ pɛ ɓu-taar-zua-mɔɔrɔ-ɗoŋ-taar, hɔ ŋgimbi nɛ kuti o wi-biro kuma lɛŋ, hee mɔ'ɔ nɛ GASA WAN baa kan so nɛ mɔ sɛn ti wa ga.

¹⁵GASA WAN dee ŋmaa in wa kum nɛ wa lɛŋ.

¹⁶«Ŋgimbi nɛ fio gbɛɛ o kuti wi-biro lɛŋ yinɛ kaɗi,

¹⁷GASA WAN tɔ̧ɔ̧ ha̧‘m hee mɔ'ɔ ga:

¹⁸‹Sɔsɔɔ mɛ̀ nɛ́ɛ̀ ɓír nɛ Ar, nɛ nú Mɔab.

¹⁹Mɛ tɛ hɔ ti o be Amɔŋ. Ká mɛ kii wen in wa na, in ká mɛ de biro in wa na mbɛt, wen mi beka ha̧ ŋma nù kɔ-wa ha̧ mɛ na; mi ha̧a̧ nù‘i ha̧ o bem ko Lot mɛ de ye sɛnɛ.› »

²⁰(O bíí tɔ̧ɔ̧ so'e nù‘i duka so nɛ ko o be Refaim nɛti. Nɛ́ o be Refaim a̧ ɔɔ so hi̧i̧. O bem ko Amɔŋ sa so wa'e Zamzumim.

²¹Wa ɔ dɔka, mɛ̀ nɛ́ o bíí nɛ a̧a̧ nɛ kpoo-tɛ in wa ɔ kusa hee o bezaŋ Anak ga. GASA WAN kuma wa yinɛ ti o be Amɔŋ, ɓɛɛ o be Amɔŋ ndak wa ɓɛɛ ba fara oi wa.

²²Mɛ̀ nɛ́ hegɔ a̧ GASA WAN dee so in o bem ko Esau nɛ ɔɔ so Sɛir, ŋgimbi n'aa kuma so nɛ o be Hɔr. O bem ko Esau ndaka o be Hɔr, ɓɛɛ ba fara kɔ-wa hɔ sɔsɔɔ.

²³Ɓɛɛ nɛ̀ ko o be Av nɛ ɔɔ so ye hɔ Gaza, nɛ́ o bíí nɛ̀ tɛ̀ɛ́ nɛ̀ Kaftɔr[2] a̧ wa kuma lɛŋ ɓɛɛ ba fara kɔ-wa.)

²⁴GASA WAN tɔ̧a̧: «Ɛ̀nɛ̀ kúr, ɛ̀nɛ̀ yák, ɛ̀nɛ̀ kú yí Arnɔŋ wen mi e nɛ Sihɔŋ, wannu Hɛsbɔŋ be Amɔr in nu kɔ̧-a̧ sɛn er-mɛ. Ɛ̀nɛ̀ bá biro duk nɛ̀ a̧, ɛ̀nɛ̀ kú̧ naŋ baa nù‘i.

²⁵Sɔsɔɔ, mi tɛ de ha̧ o bíí nɛ ya zu nù lɛŋ mɛ yu'nɛ́. Ŋgimbi nɛ wa tɛ zii nyɛrɛmɔ k’ɛ́nɛ́, tɛ-wa tɛ nak in gasa kíì tɛ de wa wen zu'nɛ́.»

²⁶«Mi toma o betom nɛ ŋga-gbárà Kɛdɛmɔt ha̧ Sihɔŋ wannu Hɛsbɔŋ ha̧ wa mɛ tɔ̧ o ga̧a̧ wen ha̧ a̧:

²⁷‹Ɛ̀nɛ̀ é h’ɛ́ɛ́ ɓir yak nɛ tɛ nù k’ɛ́nɛ́; ɛɛ tɛ ba nɛ gasa yuwar yak nɛnɛ, ɛɛ beka nɛ si war wiiko, kóó si war gale na mbɛt.

²⁸Ɛɛ tɛ hi̧fi nyɔŋmɔ n’ɛɛ tɛ nyɔŋ in yì n’ɛɛ tɛ nɔ hi̧fi er'nɛ́. Ɛ̀nɛ̀ é h’ɛ́ɛ́ ɓir ɓir yak,

²⁹hee mɔ'ɔ nɛ o bem ko Esau nɛ ɔ sɛn Sɛir in o be Mɔab nɛ ɔ sɛn Ar dee in yɛɛ ga. Ɛ̀nɛ̀ é h’ɛ́ɛ́ mɛ ku Jurdɛn mɛ nɛ si fara nɛ GASA WAN Sɔ̧ k’ɛɛ ha̧a̧ h’ɛ́ɛ́.›

³⁰«Ɓɛɛ Sihɔŋ wannu Hɛsbɔŋ kpɛk h’ɛ́ɛ́ mɛ ɓir nɛ tɛ nù kɔ̧-a̧ na; wen GASA WAN Sɔ̧ k’ɛ́nɛ́ dee ha̧ see-aa mɛ ŋgai in ha̧ a̧ mɛ de ŋgazu, ha̧ a̧ mɛ e a̧ kɔ̧ er'nɛ́ wese'i.

³¹«GASA WAN tɔ̧ɔ̧ ha̧‘m: ‹Mɛ̀ zɔk, mi ku̧u̧ naŋ ee Sihɔŋ in nù kɔ̧-a̧ sɛn kɔ̧ er-mɛ, mɛ̀ kú̧ biro in a̧, ha̧ mɛ mɛ ba nù kɔ̧-a̧.›

³²Ɓɛɛ Sihɔŋ gbo in o bíí kɔ‘i lɛŋ gɔn ti yɛ mɛ tɛ̀ɛ́ bi yɛ sɛn Yahas.

³³GASA WAN Sɔ̧ k’ɛɛ ea a̧ kɔ̧ er yɛ, ɓɛɛ ɛɛ bi a̧, o bem kɔ̧-a̧ in o bíí kɔ̧-a̧ lɛŋ.

³⁴Ɛɛ baa o ye kɔ̧-a̧ lɛŋ, ɓɛɛ ɛɛ kum o bíí saaye lɛŋ: o wiwii in o okoo gu nɛ o obem; ŋma bíí kpɔk ɓɔn na.

³⁵Ɛɛ ee o mɔ-dai nɛ̀ mɔɔ-oi-biro ɓɛɛ ɛɛ kai o mbɔi tɛ ye nɔ‘i mbɛt.

³⁶Ku̧u̧naŋ nɛ̀ Arɔɛr sɛn kur yí Arnɔŋ in ye nɛ a̧a̧ sɛn kɔ̧ gboŋgo hɔ sɛn Galad, ŋma ye n’ɛɛ baa na bo na. GASA WAN Sɔ̧ k’ɛɛ ee so mɔ lɛŋ kɔ̧ er yɛ.

³⁷Kana nɛ nù ko o bem ko Amɔŋ ɛ̀ɛ̀ hɔ sɛnɛ na ɓɛɛ in kɔ̧ ɗɔŋgɔ Yabɔk, ká bá nɛ̀ o ye zu kaya in o fara lɛŋ nɛ GASA WAN dora er yɛ.»