Read Northwest Gbaya WEE-ƊOŊ-HEEMBEA 23 Bible Online

WEE-ƊOŊ-HEEMBEA 23 - Northwest Gbaya bible

WEE-ƊOŊ-HEEMBEA 23

¹«Bíí beka ba ŋma koo ko dáà kɔ‘i na; a̧ beka hak yí mɔ ko dáà kɔ̧-a̧ na.»

²«Wi nɛ wa too fala-a too in wi nɛ ti-a ɓira ɓir beka ye tɛ mɔi̧a-a ko o bíí ko GASA WAN na.

³«Be-dàlà mbɛt beka ye mgbara giiwi ko GASA WAN na hɔ nɛnɛ tɛ o bezaŋ-aa ɗoŋ ŋmaa ɓu.

⁴«Bezaŋ Amɔŋ in bezaŋ Mɔab beka ye mgbara giiwi ko GASA WAN na, kóó hɔ tɛ o bezaŋ-wa ɗoŋ ŋmaa ɓu mbɛt,

⁵wen bo nɛ wa baa brɛt in yì we nɛ ti'nɛ́ ŋgimbi n’ɛnɛ gboo nɛnɛ nɛ nú Egiptɛ na, in wen nɛ Mɔab yoɓa Balam, bem ko Beɔr be saaye Petɔr sɛn nú Mesopotamii, mɛ tok ɗaŋ yoŋgo a zu'nɛ́.

⁶Ɓɛɛ GASA WAN Sɔ̧ k’ɛ́nɛ́ kɔ̧ so zia wen ko Balam na; a̧ tɛɛ kpai ɗaŋ yoŋgo ko Balam nɛ̀ de yoŋgo, wen n'aa kɔ̧ɔ̧‘nɛ́.

⁷Ɛnɛ beka kii ha̧ wa mɛ kpa mɔ in ha̧ wa mɛ duk nɛ de-a na ŋgimbi n’ɛnɛ duk kpasa.

⁸«Ɛnɛ beka zɔk o be Edɔm hee o ɗaŋwi ga na, wen wa nɛ o nya'nɛ́. Ɛnɛ beka zɔk o be Egiptɛ hee o ɗaŋwi ga na, wen ɛnɛ yaa so nɛ gɛnɛ tɛ nù kɔ-wa.

⁹O taar bezaŋ-wa tɛ ye mgbara o bíí ko GASA WAN.»

¹⁰«Ŋgimbi n’ɛnɛ tɛ ba gbagari wen bíí o wisɛn k’ɛnɛ, k’ɛ́nɛ́ de ŋma ɗaŋmɔ na.

¹¹Kà war-tɛ ŋma bíí mgbara'nɛ́ nɛ́ duka nɛ sa̧a̧-a̧ na, wen nɛ ŋma ɗaŋmɔ kpaa a̧ mɛ zɛ, a̧ tɛ gbo kɔ̧ gbagari, a̧ beka si ɗoŋ si kɔ̧ a̧ na.

¹²Mɛ ga̧a̧mɔ, a̧ tɛ zui yì, ɓɛɛ tɛ yee-wese, a̧ tɛ si ɗoŋ si kɔ̧ gbagari woyo.

¹³«Ɛ́nɛ́ tɛ ɗafi ŋma fara nyɛi̧ nɛ gbagari wen nɛɛ zaŋbɛɛ sɛnɛ.

¹⁴Sɛn zaŋ tui k’ɛ́nɛ́, ɛnɛ tɛ kasi ŋma mɔɔ-za̧-mɔ; ŋgimbi n’ɛnɛ tɛ nɛ zaŋbɛɛ, ɛnɛ tɛ za̧ be kɔ̧; ɗoŋ n’ɛnɛ nɛɛ zaŋbɛɛ kaɗi, ɛnɛ tɛ tur nù a zu-a.

¹⁵Wen GASA WAN Sɔ̧ k’ɛ́nɛ́ yar yar nɛ kɔ̧ gbagari wen kpasa'nɛ́ in wen foo o wisɛn k’ɛ́nɛ́ a kɔ̧ er'nɛ́; ɔ dee ha̧ gbagari k’ɛ́nɛ́ mɛ duk nɛ sa̧a̧-a̧, wen ká GASA WAN Sɔ̧ k’ɛ́nɛ́ zɔ́k ŋma mɔɔ-foe, ɓɛɛ ká a̧ zík ɗoŋ e h’ɛ́nɛ́.»

¹⁶«Mɛ beka fo bara nɛ yuu mɔ yak pii tɛ-mɛ sinɛ ɗoŋ ha̧ dáa-bara kɔ̧-a̧ na.

¹⁷A̧ tɛ duk in mɛɛ sɛn mgbara'nɛ́ sɛn ŋma ye n'aa hoka mgbara o ye k’ɛ́nɛ́ wen de duka-a kɔ̧-a̧; mɛ beka de ŋma ŋgamɔ in a̧ na.»

¹⁸«O ko-de-dàlà fara-ɗafi-sɔ̧ beka duk mgbara o boko be Israɛl na; wiwii-de-dàlà fara-ɗafi-sɔ̧ mbɛt beka duk mgbara o be Israɛl na.

¹⁹Ɛ́nɛ́ beka ba mbɔi ko o ko-de-dàlà fara-ɗafi-sɔ̧, kóó mbɔi ko wiwii-de-dàlà fara-ɗafi-sɔ̧ pii kɔ̧ tua ko GASA WAN Sɔ̧ k’ɛ́nɛ́ oi ha̧a̧nú k’ɛ́nɛ́ na, wen wa yiitoo lɛŋ nɛ́ gasa mɔɔ-ndiŋ yí GASA WAN Sɔ̧ k’ɛ́nɛ́.»

²⁰«Kà mɛ nɛ́ ha̧a̧ sede, kóó nyɔŋmɔ, kóó ŋma mɔ nɛtɛ ha̧ nya-mɛ nɛ nyamandoi, ká mɛ́ de ha̧ a̧ mɛ e mbe mɔ zu a̧ ba nɛnɛ pii ɗɔŋ ha̧ mɛ na.

²¹Mɛ tɛ ha̧ ha̧a̧ nyamandoi wen kpaa yí-a ha̧ gɛnɛ, ɓɛɛ bó nɛ́ ha̧ nya-mɛ na, wen ha̧ GASA WAN Sɔ̧ kɔ-mɛ mɛ tok de yoŋgo zu mɛ, zu o mɔ kɔ-mɛ lɛŋ tɛ nù nɛ mɛ nɛ mɛ ba'i.»

²²«Kà mɛ nɛ́ ha̧a̧ nú-mɛ, mɛ́ hà̧ ŋma mɔ ha̧ GASA WAN Sɔ̧ kɔ-mɛ, ká mɛ nik naŋ-mɛ sɛka mɛ dee mɔ‘i na, wen ká GASA WAN Sɔ̧ kɔ-mɛ tɛɛ ak mɛ sɛnɛ, ɓɛɛ ká mɔ‘i tɛɛ duk nɛ ɗaŋmɔ wen mɛ.

²³Kà mɛ̀ nɛ́ kɔ̧ɔ̧ mɛ ha̧ nú-mɛ wen ha̧a̧ mɔ na, ɓɛɛ bó nɛ́ ɗaŋmɔ wen mɛ na.

²⁴Ɓɛɛ kà mɛ̀ nɛ́ ha̧a̧ nú-mɛ, mɛ̀ dé kana ha̧ ha̧a̧nú kɔ-mɛ mɛ hɔ gba̧a̧, wen nɛ̀ mɛ́ ha̧a̧ nú-mɛ nɛ̀ ta-tɛ-mɛ ha̧ GASA WAN Sɔ̧ kɔ-mɛ.»

²⁵«Kà mɛ yé kpɛɛfɔ nyak-dɔ̧ɔ̧ ko ŋma-mɛ, mɛ nyɛma mɛ nyɔŋ o waya-nyak-dɔ̧ɔ̧ hee mɔ'ɔ nɛ mɛ kɔ̧ɔ̧ ga, ɓɛɛ mɛ beka kai ŋma yak nɛnɛ na.

²⁶Kà mɛ yé kpɛɛfɔ alkamaari ko ŋma-mɛ, mɛ nyɛma mɛ hik alkamaari nɛ er-mɛ, ɓɛɛ ká mɛ́ pɔi pɔi na.»