Read Northwest Gbaya WEE-ƊOŊ-HEEMBEA 24 Bible Online

WEE-ƊOŊ-HEEMBEA 24 - Northwest Gbaya bible

WEE-ƊOŊ-HEEMBEA 24

¹«Kà ŋma wiwii bá kóò, kà a̧ zɔ́k mɔ tɛ kóò‘i nɛ de tɛ-a na, kà a̧ kɔ̧́ a̧ ɓɔna, a̧ tɛ yɔr kalata-gbia-a ha̧ koo'i, ndak nɛ a̧.

²Kà kóò‘i gbo yak tɛ kɔ̧-a̧ nɛ́ɛ̀ ba ŋma mbe wíì,

³kà mbe wíì‘i mbɛt kɔ̧́ kɔ‘i ɓɔna, kà a̧ yɔ́r kalata-gbia-a e er-a ndak nɛ a̧, kóó kà mbe wíì‘i nɛ́ fea,

⁴kuti wíì nɛ baa so kóò‘i beka ba a̧ nɛ kóò woyo ɓɔna. Kuti wíì‘i tɛ e a̧ hee okoo nɛ war-tɛ sa̧ na ga; kà a̧ nɛ baa a̧ siɗoŋ, ɓɛɛ mɛ̀ nɛ́ gasa ɗaŋmɔ ti GASA WAN. Mɛ beka ba nù nɛ GASA WAN Sɔ̧ kɔ-mɛ ha̧ ha̧ mɛ nɛ mɔɔ-oi pi̧ tɛ ɗaŋmɔ na.»

⁵«Kà ŋma bíí nɛ baa kóò nɛ mbe-a, a̧ beka nɛ biro na, in bíí beka tɛ tɛ-a wen ŋma mɔ na. A̧ tɛ ɔm tɛ-a tɛ pɛ kpɔk ha̧ a̧ mɛ ha̧ desee ha̧ kóò n'aa baa nɛ mbe-a.»

⁶«Bíí beka e ta-hɔ̧n-mɔ kɔ‘i, nana-a in be-a nɛ ziŋina na, wen duk hee wi e nɛ kiitɛ-wi nɛ ziŋina ga.»

⁷«Kà ŋma bíí mgbara'nɛ́ nɛ́ zu̧u̧ kìì-bíí, kà bó nɛ́ ŋma nya-a̧ be Israɛl a̧ a̧ zu̧a̧, kà a̧ nɛ́ dee ŋgamɔ in a̧ ɗɔr nɛ a̧, wi-zu̧ a̧‘i tɛ fe. Hegɔ ɛnɛ tɛ fo ɗaŋmɔ yinɛ mgbara'nɛ́.»

⁸«Ɛ̀nɛ̀ zɔ́k tɛ‘nɛ́ wen o zɛɛ nɛ hɔɔ ŋmaa in doko; ɛ̀nɛ̀ zíí mɔ ɓɛɛ ɛ̀nɛ̀ dé mɔ nyɛm nɛ ɗoŋ mɔ nɛ o wi-ɗafi-sɔ̧, o be Levii tɛ usi h’ɛ́nɛ́; ɛ̀nɛ̀ dé mɔ lɛŋ nyɛm nɛ ɗoŋ o wen n'am tɔ̧ɔ̧ ha̧ wa.

⁹Tɛ-mɛ a̧ mbaŋ ɗoŋ mɔ nɛ GASA WAN Sɔ̧ kɔ-mɛ dee so in Mariama sɛn yuwar, ŋgimbi gboa-a k’ɛ́nɛ́ nɛ nú Egiptɛ.»

¹⁰«Kà mɛ gbák ŋma mɔ ha̧ ŋma-mɛ, mɛ beka ye kɔ̧ tua kɔ̧-a̧ mɛ ba ŋma mɔ oi-aa nɛ ziŋina na.

¹¹Mɛ tɛ duk zan, ɓɛɛ nɛ́ wi nɛ mɛ gbaka mɔ ha̧ a̧‘i a̧ tɛ ba ziŋina kɔ-mɛ gbonɛ ha̧ mɛ.

¹²Kà wi’ɛi nɛ́ bòò nɛ́ wisan, ká mɛ dor mɔ kɔ̧-a̧ ha̧ mɛ ɔ er-mɛ na.

¹³Mɛ tɛ ba mɔ kɔ̧-a̧ sinɛ nɛti sɛka wese yea; a̧ tɛ ɔ nɛ laa kɔ̧-a̧ n'aa ha̧a̧ nɛ ziŋina'i, ɓɛɛ a̧ toka de yoŋgo zu mɛ, ɓɛɛ mɛ duka nɛ wi-de-mɔ nɛ yuwar-a yí GASA WAN Sɔ̧ kɔ-mɛ.»

¹⁴«Mɛ beka de ŋgamɔ in wisan ká bá nɛ̀ wi-kɔsa nɛ de tom-sede mgbara'nɛ́, kóó nɛ́ nya-mɛ, kóó nɛ́ gɛnɛ nɛ duk tɛ ye kɔ-mɛ, tɛ nù kɔ-mɛ na.

¹⁵Mɛ̀ há̧ sede-tom kɔ̧-a̧ ha̧ a̧ nɛti ha̧ wese mɛ ye, wen a̧ nɛ wi-bɔnɛ, ɓɛɛ nɛ́ mɔ‘i a̧ a̧ pɛm; wen kà a̧ áí nú GASA WAN, mɔ‘i tɛ duk nɛ ɗaŋmɔ wen mɛ.»

¹⁶«Dáà beka fe fio ɗaŋmɔ ko bem na, bem beka fe fio ɗaŋmɔ ko dáà na mbɛt; kóó o ndé tɛ fe nɛ fio ɗaŋmɔ kɔ‘i.»

¹⁷«Mɛ beka fo ŋma mɔ ko gɛnɛ, kóó mɔ ko be-oi na, in mɛ beka ba laa ko ko-gera nɛ ziŋina na mbɛt.

¹⁸Tɛ-mɛ'ɛ mbaŋ ɗoŋ-aa'e, mɛ duka so nɛ bara sɛn Egiptɛ. Ɓɛɛ mɛ̀ nɛ́ GASA WAN Sɔ̧ kɔ-mɛ a̧ gboo mɛ; nɛ́ hegɔ sa'm ha̧ nú ha̧ mɛ mɛ ba wen’ɛ de nɛ tom.

¹⁹«Ŋgimbi nɛ mɛ tɛ mɔi̧ nyɔnɔ kɔ-mɛ, kà tɛ-mɛ bí ɗoŋ ŋma sikila-a ɓɔn kpɛɛfɔ, mɛ beka si ɗoŋ mɛ ba na. I̧i̧ hi̧i̧ nɛ ko gɛnɛ, ko be-oi in ko ko-gera, wen ha̧ GASA WAN Sɔ̧ kɔ-mɛ mɛ tok de yoŋgo zu mɛ tɛ o tom kɔ-mɛ lɛŋ.

²⁰Ŋgimbi nɛ mɛ tɛ ɓi o waya-te-nɔ̧́, ká mɛ́ si ɗoŋ ɓi oi-aa nɛ tɛ ɓɔn kɔ̧ te na; i̧i̧ nɔ‘i tɛ duk nɛ ko gɛnɛ, ko be-oi in ko ko-gera.

²¹Kà mɛ nɛ́ɛ̀ ɓi waya-nyak-dɔ̧ɔ̧ kɔ-mɛ, ká mɛ́ si ɗoŋ mɛ ɓi oi-aa na, wen oi-aa nɛ tɛ ɓɔn nɛ ko gɛnɛ, ko be-oi in ko ko-gera.

²²Tɛ-mɛ'ɛ mbaŋ ɗoŋ-aa'e, mɛ duka so nɛ bara sɛn Egiptɛ; nɛ́ hegɔ sa'm ha̧ nú‘m ha̧ mɛ mɛ ba wen’ɛ de nɛ tom.»