Read Northwest Gbaya WEE-ƊOŊ-HEEMBEA 25 Bible Online

WEE-ƊOŊ-HEEMBEA 25 - Northwest Gbaya bible

WEE-ƊOŊ-HEEMBEA 25

¹«Kà o ŋma bíí nɛ́ bòó nɛ̀ wen in ŋmaa, wa tɛ nɛ si fara-gɔn-kita; wi-gɔn-kita tɛ kpa wi nɛ wen tika a̧ in wi nɛ̀ bó nɛ̀ wen na.

²Kà‘i nɛ́ tɛ̀ɛ́ gusi wi nɛ wen tika a̧‘i, wi-gɔn-kita tɛ tɔ̧ ha̧ wa mɛ ba a̧ gu nù, ɓɛɛ wa tɛ gusi a̧ nyɛm nɛ ɗoŋ ɗaŋmɔ kɔ̧-a̧.

³Wa tɛ gusi a̧ nyasi ɓu-naar, ɓɛɛ beka gan zu mɔ‘i na, wen ká‘i tɛɛ e gasa da̧i̧ tɛ-a, in ká ziimɔ tɛɛ ba a̧.»

⁴«Ká mɛ hɛr nú ndai ŋgimbi n'aa duk tɛ ŋmáá gba̧a̧ alkamaari na.»

⁵«Kà o nya-wi yá in ŋmaa, ɓɛɛ kà ɓii wi fe, bem bo na, kóò ko wan-fio beka ba ŋma gɔni bíí yak zu nam ko wíì na; mɛ̀ nɛ́ nya ko wan-fio a̧ tɛ ba a̧, oi nya-a̧ nɛ fea'i.

⁶Kuti bem nɛ wa tɛ ko in ŋmaa tɛ ba nɛ nin wan-fio, wen ká nin-a tɛɛ bi sɛn nú Israɛl.

⁷Kà wi’ɛi a̧ kɔ̧ɔ̧ baa kóò ko nya-a̧ na, kóò‘i tɛ nɛ ti o gasawi, ɓɛɛ a̧ tɛ tɔ̧ ha̧ wa: ‹Nya ko wíì kɔ‘m bɛ̧ɛ̧ ha̧ nin nya-a̧ mɛ ɓɔn mgbara o be Israɛl, a̧ bɛ̧ɛ̧ baa'm oi nya-a̧.›

⁸O gasawi saaye tɛ sa nya wan-fio, wa tɛ tɔ̧ wen ha̧ a̧. Kà a̧ yór hi̧i̧, kà a̧ tɔ̧́‘e: ‹Mi kɔ̧ baa a̧ nɛ kóò na›,

⁹ɓɛɛ kóò‘i tɛ ɗɔŋ pii katɛ a̧ sɛn mgbara o gasawi, a̧ tɛ kpɔ̧i̧ ndárà naŋ nya ko wíì kɔ̧-a̧, ɓɛɛ a̧ aa sap yi-a; a̧ tɛ tɔ̧ hee mɔ'ɔ ga: ‹Mɔ nɛ‘i de in wiwii nɛ̀ kasi kira oi zɔmwi kɔ‘i na nɛ mɔ'ɔ.›

¹⁰Ɗoŋ ŋgimbi'i, wa tɛ sa nin nutua ko wi’ɛi'e: ‹Nutua ko wi nɛ kpɔ̧i̧a̧ ndárà naŋ.› »

¹¹«Kà o ŋma bíí yiitoo nɛ́ mbɛra ŋmaa, ɓɛɛ kà kóò ko ŋma kpɔk nyɛi̧ er ba zim-tɛ ɓii wi ye nɛ ɗoŋ wíì kɔ‘i,

¹²ɛnɛ tɛ ɓir er koo'i yinɛ; ko beka de'nɛ́ ha̧ a̧ na.»

¹³«Mɛ beka a mɔɔ-we-dita-mɔ in wan nɛ diti na sɛn kɔ̧ ŋgoɓo kɔ-mɛ na.

¹⁴Mɛ beka e gasa ao in geɗek-a sɛn kɔ̧ tua kɔ-mɛ na.

¹⁵Mɛ tɛ duk nɛ̀ kilo kpɔk nɛ̀ nyɛma sɛnɛ, in ao kpɔk nɛ nyɛma sɛnɛ, wen ha̧ zɛ mɛ mɛ dɔk tɛ nu nɛ GASA WAN Sɔ̧ kɔ-mɛ ha̧ ha̧ mɛ.

¹⁶Wen kóó o ndé nɛ we mɔ nyɛm sɛnɛ na, nɛ̀ de mɔ nɛ̀ yuwar-a na, duk nɛ́ ɗaŋ bíí ti GASA WAN Sɔ̧ kɔ-mɛ.»

¹⁷«Tɛ-mɛ a̧ mbaŋ ɗoŋ mɔ nɛ Amalɛk dee in'nɛ̀ɛ́ ŋgimbi gboa-a k’ɛ́nɛ́ nɛ nú Egiptɛ.

¹⁸Nɛ́ a̧ a̧ wee so ti'nɛ́, ɓɛɛ a̧ gbɛ o wi nɛ ɓɔna so ɗoŋ, ŋgimbi nɛ wa mbɔia nɛnɛ. A̧ yu so Sɔ̧ na.

¹⁹Ŋgimbi nɛ GASA WAN Sɔ̧ k’ɛ́nɛ́ tɛ ndak o wisɛn k’ɛ́nɛ́ katɛ‘nɛ́ yinɛ lɛŋ, ha̧ nɛ ɔma-tɛ h’ɛ́nɛ́ tɛ nù n'aa ea h’ɛ́nɛ́ nɛ mɔɔ-oi, ɛnɛ tɛ bi nin Amalɛk sɛn zu nù yinɛ. Ká tɛ‘nɛ́ bi ɗoŋ mɔ‘i na.»