Read Northwest Gbaya WEE-ƊOŊ-HEEMBEA 26 Bible Online

WEE-ƊOŊ-HEEMBEA 26 - Northwest Gbaya bible

WEE-ƊOŊ-HEEMBEA 26

¹«Ŋgimbi n’ɛnɛ tɛ hɔ tɛ nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ nɛ mɔɔ-oi, ŋgimbi n’ɛnɛ tɛ ba nù‘i kaɗi ɓɛɛ n’ɛnɛ tɛ ɔ sɛnɛ,

²ɛ́nɛ́ tɛ ba o kuti waya nyɔnɔ k’ɛ́nɛ́ n’ɛnɛ tɛ kpa lɛŋ sɛn tɛ nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́‘i, a wa kɔ̧ gɛsɛ, ɓɛɛ ɛ́nɛ́ nɛ̀ɛ́ sɛn fara nɛ GASA WAN Sɔ̧ k’ɛ́nɛ́ hoka mɛ e nin sɛnɛ‘i.

³Ɛ́nɛ́ tɛ nɛ̀ɛ́ kpa wi-ɗafi-sɔ̧ nɛ de tom wese'i, ɓɛɛ ɛ́nɛ́ tɔ̧ɔ̧ ha̧ a̧: ‹Sɔsɔɔ mi tɔ̧ ha̧ GASA WAN Sɔ̧ kɔ‘m'e, mi hɔa tɛ nù nɛ GASA WAN baa ha̧ ha̧ o dáà k’ɛɛ kan nɛ mɔ‘e wi tɛ ha̧ h’ɛ́ɛ́.›

⁴«Wi-ɗafi-sɔ̧ tɛ ba gɛsɛ er-mɛ ti fara-ɗafi-sɔ̧ ko GASA WAN Sɔ̧ kɔ-mɛ.

⁵Ɓɛɛ mɛ tɛ tɔ̧ wen’ɛ ti GASA WAN Sɔ̧ kɔ-mɛ: ‹Dáà kɔ‘m duka so nɛ be Aram nɛ yara so nɛ ŋgɔn. A̧ zira so si Egiptɛ ɓɛɛ a̧ duk hi̧i̧ hee gɛnɛ ga in o bíí tikiɗi nɛ nɛɛ so in a̧. Sɛn hi̧i̧ a̧ kifa nɛ ŋgaya gasa zuduk.

⁶Nɛ mɔ'ɔ nɛ o be Egiptɛ usa bɔnɛ h’ɛ́ɛ́; wa pi̧i̧ yɛ tɛ san in wa usa ŋga tom-bara h’ɛ́ɛ́.

⁷Ɛɛ aia nú sitɛ GASA WAN Sɔ̧ ko o dáà k’ɛɛ, ɓɛɛ a̧ zii tiger yɛ. A̧ zɔka san k’ɛɛ, kɔsa k’ɛɛ in o bɔnɛ k’ɛɛ.

⁸GASA WAN gboo yɛ nɛ nú Egiptɛ tɛ ŋgai-te-er-a in ɓaa-a n'aa guu zu yɛ tɛ zɔm mɔɔ-kíì, o mɔɔ-usi-mɔ in mɔɔ-gɔn-ɗɛɗɛ.

⁹A̧ mgbɔɔ yɛ tɛnɛ, hɔ fara’ɛ, ɓɛɛ a̧ ha̧ nù'ɛ, nɛ gɔrɔ in yibere fok sɛnɛ'ɛ h’ɛ́ɛ́.

¹⁰Ɓɛɛ kinii, GASA WAN, zu-nyɔnɔ tɛ nù n’ɛnɛ ha̧a̧ ha̧‘m nɛ́ mɔ'ɔ n'am ba tɛnɛ h’ɛ́nɛ́'ɛ.› «Mɛ tɛ ba mɔ‘i e ti GASA WAN Sɔ̧ kɔ-mɛ, ɓɛɛ mɛ guu nù ti a̧.

¹¹Hee mɔ'ɔ nɛ GASA WAN Sɔ̧ kɔ-mɛ ha̧a̧ de duka-a ha̧ mɛ in o bíí nutua kɔ-mɛ lɛŋ ga, mɛ tɛ duk nɛ desee in o be Levii ká bá nɛ̀ o gɛnɛ nɛ ya mgbara'nɛ́.»

¹²«Tɛ taar pɛ nɛ duk nɛ pɛ-ha̧a̧mɔ, ŋgimbi nɛ mɛ tɛ ndɛm zu-nyɔnɔ kɔ-mɛ lɛŋ, nɛ̀ mɛ́ ha̧a̧ ŋma ha̧ be Levii, ha̧ ɔ gɛnɛ, ha̧ be-oi in ko-gera tɛ ye kɔ-mɛ kaɗi, ɓɛɛ nɛ̀ wa nyɔŋa mɔ zaŋ-wa sur,

¹³mɛ tɛ tɔ̧ ti GASA WAN Sɔ̧ kɔ-mɛ‘e: ‹Mi baa war mɔ ko Sɔ̧ kɔ̧ tua kɔ‘m yinɛ kaɗi, ɓɛɛ mi ha̧ ha̧ be Levii, gɛnɛ, be-oi in ko-gera nyɛm nɛ ɗoŋ heembea n’ɛnɛ ha̧a̧ ha̧‘m. Mi yak zu heembea'i na, mi er ŋma mɔ sɛnɛ na mbɛt.

¹⁴Mi nyɔŋ ŋma zu-mɔ‘i ŋgimbi nɛ fio fee er-am na, mi ba ŋma mɔ‘i ŋgimbi nɛ yuwar tɛ‘m sa̧ nɛnɛ na, na; mi ba ŋma mɔ zaŋ-aa ha̧ ha̧ sɔ̧-fio na mbɛt. Mi zia nɛ́ mɔ nɛ GASA WAN Sɔ̧ kɔ‘m tɔ̧a̧ ha̧‘m, mi dee mɔ nyɛm nɛ ɗoŋ mɔ lɛŋ n’ɛnɛ tɔ̧a̧ ha̧‘m.

¹⁵Ɛ̀nɛ̀ zɔ́k mɔ tɛnɛ nɛ kɔ̧ sa̧a̧ tua k’ɛ́nɛ́ sɛn yiwese mɛ; ɛ̀nɛ̀ tók de yoŋgo zu o be Israɛl bíí k’ɛ́nɛ́ in nù n’ɛnɛ ha̧a̧ h’ɛ́ɛ́ nyɛm nɛ ɗoŋ kanamɔ n’ɛnɛ kana so ha̧ o dáà k’ɛɛ, nù nɛ yibere in gɔrɔ fok sɛnɛ.› »

¹⁶«Sɔsɔɔ GASA WAN Sɔ̧ k’ɛ́nɛ́ ha̧ nɛ nú h’ɛ́nɛ́ mɛ ba o heembea in yuwar duka-a n'aa usi h’ɛ́nɛ́ de nɛ tom. Ɛnɛ tɛ kasi wa de nɛ tom nɛ see'nɛ́ lɛŋ in nɛ kiitɛ‘nɛ́ lɛŋ.

¹⁷Sɔsɔɔ GASA WAN ha̧a̧ nú h’ɛ́nɛ́: k’ɛ̀nɛ̀ dé mɔ nɛ see-aa kɔ̧a̧, k’ɛ̀nɛ̀ mbó zu ha̧ a̧ nyɛm nɛ ɗoŋ o heembea in o geŋa kɔ̧-a̧, a̧ tɛ duk nɛ́ Sɔ̧ k’ɛ́nɛ́.

¹⁸Sɔsɔɔ mbɛt, ɛnɛ ha̧a̧ nú h’ɛ́nɛ́ mɛ duk nɛ́ dukbíí kɔ̧-a̧ nɛtɛ hee mɔ n'aa tɔ̧a̧ so ga, h’ɛ́nɛ́ mɛ kasi o heembea kɔ̧-a̧ lɛŋ.

¹⁹A̧ tɛ de ha̧ nin'nɛ́ mɛ hur in h’ɛ́nɛ́ mɛ kpa tu̧u̧-tɛ-mɔ, in zɔnamɔ gan o dukbíí lɛŋ n'aa dea, ɓɛɛ ɛnɛ tɛ ya nɛ́ sa̧a̧ dukbíí ko GASA WAN Sɔ̧ k’ɛ́nɛ́ hee mɔ'ɔ n'aa baa ha̧ so nú-a sɛnɛ ga.»