Read Northwest Gbaya WEE-ƊOŊ-HEEMBEA 27 Bible Online

WEE-ƊOŊ-HEEMBEA 27 - Northwest Gbaya bible

WEE-ƊOŊ-HEEMBEA 27

¹Moisɛ in o gasawi Israɛl ha̧a̧ heembea’ɛ ha̧ o be Israɛl: «Ɛ̀nɛ̀ kásí o heembea lɛŋ n'am ha̧ h’ɛ́nɛ́ sɔsɔɔ.

²Ŋgimbi n’ɛnɛ tɛ ku Jurdɛn si war nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́, ɛnɛ tɛ kai o gasa ta a ŋgɔn, ɓɛɛ ɛnɛ sɔ̧ɔ̧ ɓɔndɔ sɛnɛ.

³Ɛnɛ tɛ yɔr o gba̧a̧-wen tɛ heembea nɔ‘i lɛŋ sɛnɛ, ŋgimbi nɛ mɛ tɛ ku nɛ Jurdɛn; hegɔ ɛnɛ tɛ ye tɛ nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́, nù nɛ yibere in gɔrɔ fok sɛnɛ, nyɛm nɛ ɗoŋ ha̧a̧nú ko GASA WAN Sɔ̧ k’ɛ́nɛ́ ha̧ o dáà k’ɛ́nɛ́.

⁴Ɛnɛ be tɛ̀ɛ́ ku Jurdɛn kaɗi, ɓɛɛ ɛnɛ kaia o ta nɔ‘i a ŋgɔn nyɛm nɛ ɗoŋ ha̧a̧nú n'am ha̧‘nɛ́ sɔsɔɔ sɛn zu kaya Ebal, ɓɛɛ ɛnɛ sɔ̧ɔ̧ ɓɔndɔ sɛnɛ.

⁵Sɛn hi̧i̧, ɛnɛ tɛ mbo fara-ɗafi-sɔ̧ ha̧ GASA WAN Sɔ̧ k’ɛ́nɛ́, ɛnɛ tɛ mbo fara-ɗafi-sɔ̧‘i nɛ̀ ta nɛ̀ boi fo na.

⁶Ɛnɛ tɛ mbo a̧ nɛ o ta nɛ‘i sɛk na; nɛ́ zu mboo-mɔ‘i ɛ̀nɛ̀ tɛ dɔ kpoo-sɔ̧ ha̧ GASA WAN Sɔ̧ k’ɛ́nɛ́ sɛnɛ.

⁷Ɛnɛ tɛ ɗafi sɔ̧ gaŋmɔ, ɛnɛ tɛ nyɔŋ mɔ sɛn hi̧i̧, ɓɛɛ ɛnɛ duka nɛ desee ti GASA WAN Sɔ̧ k’ɛ́nɛ́.

⁸Ɛnɛ tɛ yɔr o gba̧a̧-wen tɛ heembea nɔ'ɔ lɛŋ zu o ta. Ɛnɛ yɔr nɛ sa̧a̧-a̧.»

⁹Moisɛ in o be Levii nɛ ya nɛ wi-ɗafi-sɔ̧ tɔ̧ɔ̧ ha̧ o be Israɛl: «O be Israɛl, ɛ̀nɛ̀ yéŋ zer'nɛ́ ɛ̀nɛ̀ zii! Sɔsɔɔ, GASA WAN Sɔ̧ k’ɛ́nɛ́ dee h’ɛ́nɛ́ mɛ ya nɛ́ dukbíí kɔ̧-a̧.

¹⁰Ɛnɛ tɛ zii tiger GASA WAN Sɔ̧ k’ɛ́nɛ́; ɛnɛ tɛ ba o heembea in o ha̧a̧nú kɔ̧-a̧ n'am ha̧ h’ɛ́nɛ́ sɔsɔɔ de nɛ tom.»

¹¹Wese'i, Moisɛ tɔ̧ɔ̧ wen’ɛ ha̧ o be Israɛl hee mɔ'ɔ ga:

¹²«O wi nɛ tɛ ya zu kaya Garizim mɛ tok de yoŋgo zu dukbíí ɗoŋ n’ɛnɛ tɛ ku Jurdɛn kaɗi, nɛ́ Simɛɔŋ, Levii, Juda, Isakar, Jozɛf in Bɛnjamin;

¹³ɓɛɛ Rubɛn in Gad, Asɛr in Zabulɔŋ ká bá nɛ̀ Dan in Nɛftalii tɛ ya kɔ‘i zu kaya Ebal mɛ fom nɛ wa.»

¹⁴«O be Levii tɛ tɔ̧ wen nɛ hee ger ha̧ o be Israɛl‘e:

¹⁵« ‹Fom a̧ ba wi nɛ mbo mɔ in nɛ sɛk mɔ mɛ gasi nɛ hu̧sa̧-a̧, wen GASA WAN sɛna o pɛrti mɔ hegɔ nɛ‘i dee nɛ er.› «Ɓɛɛ dukbíí nɛ oi-aa tɛ kɔ̧ ɗɔaa'e: ‹Aamɛn!›

¹⁶« ‹Fom a̧ ba wi nɛ e dáà kɔ‘i in nàà kɔ‘i tɛ geemɔ.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

¹⁷« ‹Fom a̧ ba wi nɛ nyɔŋ nú nù ko ŋma-wi.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

¹⁸« ‹Fom a̧ ba wi nɛ ɔr wi-boma-yí, ha̧ a̧ mɛ yɔ war.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

¹⁹« ‹Fom a̧ ba wi nɛ ɓar mɔ er gɛnɛ, koo er be-oi, kóó er ko-gera.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²⁰« ‹Fom a̧ ba wi nɛ tɛ ɔ in ŋma kóò ko dáà kɔ‘i, wen a̧ hak nɛ yí-mɔ ko dáà kɔ̧-a̧.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn.›

²¹« ‹Fom a̧ ba wi nɛ tɛ ɔ in saɗi!› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²²« ‹Fom a̧ ba wi nɛ tɛ ɔ in boko-nya-wi, kóó nɛ́ bem ko dáà kɔ̧-a̧, kóó nɛ́ bem ko nàà kɔ̧-a̧.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²³« ‹Fom a̧ ba wi nɛ tɛ ɔ in for-wi mɛ kóò.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²⁴« ‹Fom a̧ ba wi hu̧si gbɛ nɛ ŋma-wi.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²⁵« ‹Fom a̧ ba wi nɛ tɛ ba sede er bíí mɛ gbɛ wi nɛ duk zóóŋ.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!›

²⁶« ‹Fom a̧ ba wi nɛ mbo zu tɛ o heembea nɔ'ɔ mɛ ba wa de nɛ tom na.› Ɓɛɛ dukbíí nɛ oi-aa lɛŋ tɛ kɔ̧ ɗɔaa: ‹Aamɛn!› »