Read Northwest Gbaya WEE-ƊOŊ-HEEMBEA 28 Bible Online

WEE-ƊOŊ-HEEMBEA 28 - Northwest Gbaya bible

WEE-ƊOŊ-HEEMBEA 28

¹«K’ɛ̀nɛ̀ zíí tiger GASA WAN Sɔ̧ k’ɛ́nɛ́ nɛ mbetɛ ba nɛ o heembea kɔ̧-a̧ n'am ha̧‘nɛ́ sɔsɔɔ de nɛ tom, GASA WAN Sɔ̧ k’ɛ́nɛ́ tɛ de h’ɛ́nɛ́ mɛ duk ti ha̧ o dɔka tugun bíí tɛ nù'ɛ.

²O de yoŋgo lɛŋ nɛ tɛ duk zu'nɛ́, k’ɛ̀nɛ̀ nɛ́ mboo zu tɛ zia tiger GASA WAN Sɔ̧ k’ɛ́nɛ́ nɛ mɔ'ɔ:

³«De yoŋgo tɛ duk zu'nɛ́ sɛn saaye in sɛn zaŋbɛɛ mbɛt.

⁴«De yoŋgo tɛ duk zu o bezaŋ‘nɛ́, zu o nyɔnɔ k’ɛ́nɛ́, zu o mɔ-dai k’ɛ́nɛ́, zu o nana-ndai in o nana-sami k’ɛ́nɛ́.

⁵«De yoŋgo tɛ duk zu gɛsɛ k’ɛ́nɛ́ in o bɔtɔ k’ɛ́nɛ́.

⁶«De yoŋgo tɛ duk zu yari k’ɛ́nɛ́.

⁷«GASA WAN tɛ de h’ɛ́nɛ́ mɛ kpa ŋgai zu o wisɛn k’ɛ́nɛ́ nɛ tɛ ba zu nɛ ŋgɔn in'nɛ̀ɛ́. Wa tɛ gbo pii tɛ‘nɛ́ nɛ kpɔk yuwar, ɓɛɛ wa tɛ pɛsi ti'nɛ́ yak nɛ yuwar mɔɔrɔ-ɗoŋ-yiitoo.

⁸«GASA WAN tɛ ha̧ nú ha̧ de yoŋgo mɛ duk zu'nɛ́, zu dam k’ɛ́nɛ́ in zu tom k’ɛ́nɛ́ lɛŋ. A̧ tɛ tok de yoŋgo zu nù n'aa ha̧ h’ɛ́nɛ́.

⁹«GASA WAN tɛ de h’ɛ́nɛ́ mɛ ya nɛtɛ wen-aa, hee mɔ'ɔ n'aa kana so nɛ mɔ h’ɛ́nɛ́ ga, wen n’ɛnɛ kasa o heembea kɔ̧-a̧, in n’ɛnɛ nɛɛ nɔ̀ sɛn tɛ o yuwar kɔ̧-a̧ mbɛt.

¹⁰O dukbíí nù lɛŋ tɛ zɔk'e ɛ́nɛ́ nɛ́ dukbíí ko GASA WAN, ɓɛɛ wa tɛ yu'nɛ́.

¹¹GASA WAN tɛ ha̧ de duka-a h’ɛ́nɛ́ de nɛnɛ ha̧ o bezaŋ‘nɛ́ mɛ dɔk, ha̧ o mɔ-dai k’ɛ́nɛ́ mɛ nyɛɓi in ha̧ o nyɔnɔ k’ɛ́nɛ́ mɛ dɛm, tɛ nù nɛ GASA WAN kana mɔ ha̧ o dáà k’ɛ́nɛ́‘e, wi tɛ ha̧ h’ɛ́nɛ́.

¹²GASA WAN tɛ hú̧í̧ yiwese ha̧ kórò mɛ hɔ zu nù k’ɛ́nɛ́ dam ɗoŋ ŋgimbi-a, in ha̧ a̧ mɛ tok de yoŋgo zu o tom k’ɛ́nɛ́. O ŋma dukbíí nɛ dɔka-a tɛ gbak mɔ er'nɛ́, ɓɛɛ ɛnɛ beka gbak mɔ na.

¹³GASA WAN tɛ e'nɛ́ siti, a̧ beka e'nɛ́ si ɗoŋ na. Ɛnɛ tɛ duk nɛ̀ ŋgɔn, ɓɛɛ ɛnɛ beka duk si ɗɔɔ na, wen n’ɛnɛ zia o heembea ko GASA WAN Sɔ̧ k’ɛ́nɛ́ n'am ha̧ h’ɛ́nɛ́ sɔsɔɔ h’ɛ́nɛ́ mɛ kasi de nɛ tom,

¹⁴ɓɛɛ ɛ́nɛ́ a̧r si war wiiko kóó si war gale tɛ o yuwar n'am ha̧‘nɛ́ sɔsɔɔ'ɛ na, in ɛ́nɛ́ ndak ɗoŋ o ŋma sɔ̧ de nɛ tom ha̧ wa na mbɛt.»

¹⁵«Ɓɛɛ k’ɛ̀nɛ̀ zii tiger GASA WAN Sɔ̧ k’ɛ́nɛ́, ba nɛ o heembea in o geŋa kɔ̧-a̧ n'am ha̧‘nɛ́ sɔsɔɔ de nɛ tom na, o fom nɛ tɛ ba'nɛ́ nɛ mɔɔ nɔ'ɔ:

¹⁶«Fom tɛ ba'nɛ́ sɛn saaye in sɛn zaŋbɛɛ mbɛt.

¹⁷«Fom tɛ ba gɛsɛ in bɔtɔ k’ɛ́nɛ́.

¹⁸«Fom tɛ ba o bezaŋ‘nɛ́, o nyɔnɔ k’ɛ́nɛ́, o mɔ-dai k’ɛ́nɛ́, o nana-ndai k’ɛ́nɛ́ in o nana-sami k’ɛ́nɛ́ mbɛt.

¹⁹«Fom tɛ ba'nɛ́ tɛ o yari k’ɛ́nɛ́.

²⁰«GASA WAN tɛ pi̧ ziimɔ, bele in ŋgamɔ zu'nɛ́ tɛ o tom k’ɛ́nɛ́ hɔ ŋgimbi n’ɛnɛ tɛ kum nɛ haya-a lɛŋ, wen zu ɗaŋmɔ n’ɛnɛ dea e nɛ‘m duk.

²¹GASA WAN tɛ tom ŋga-zɛɛ-geŋa pi̧ zu'nɛ́ gbɛ nɛ ɛnɛ zu nù n’ɛnɛ nɛ́ mɛ ba'i yinɛ.

²²GASA WAN tɛ tom o zɛɛ-ɔ̧ki, zɛɛ-gɛ̧ɛ̧ in mbɔ-yí pi̧ zu'nɛ́; a̧ tɛ tom gbɛ̧ŋmɔ, ŋga-kaara, gbɛɛ-dua-mɔ in laambam pi̧ zu o nyɔnɔ k’ɛ́nɛ́. O ŋgamɔ nɔ‘i tɛ ndak ɗoŋ‘nɛ́ hɔ ŋgimbi n’ɛnɛ tɛ kum.

²³Yiwese zu'nɛ́ tɛ kifi nɛ ndɛrɛ, ɓɛɛ nù ɗɔɔ naŋ‘nɛ́ kifa nɛ boi.

²⁴GASA WAN tɛ kpai kórò nɛ fuunu in bùk. Mɔɔ nɔ‘i tɛ zir nɛ yiwese pii zu'nɛ́ hɔ ŋgimbi n’ɛnɛ tɛ kum.

²⁵«GASA WAN tɛ de ha̧ o wisɛn mɛ gan'nɛ; ɛ́nɛ́ tɛ gbo si ti wa nɛ yuwar kpɔk, ɓɛɛ ɛnɛ tɛ yu mɔ ti wa nɛ yuwar mɔɔrɔ-ɗoŋ-yiitoo. Mɔ nɛ tɛ kpa'nɛ́ tɛ pi̧ kíì tɛ o bíí nù lɛŋ.

²⁶Wɔr'nɛ́ tɛ duk nɛ́ nyɔŋmɔ ko o nɔ̧́í̧ in o saɗi tɛ nù k’ɛ́nɛ́; ŋma bíí nɛ̀ tɛ́ tɛ̀ mɛ́ ndak wa yinɛ beka bo na.

²⁷GASA WAN tɛ pi̧ gba-da̧i̧ in kore Egiptɛ tɛ‘nɛ́, a̧ tɛ pi̧ tara, in tárá-tɛ nɛ beka kaɗi na ɓɔnsɛnɛ tɛ‘nɛ́.

²⁸GASA WAN tɛ pi̧ dawa zu'nɛ́, ɛnɛ beka zɔk mɔ na, zu'nɛ́ tɛ zik mbɛt.

²⁹Ɛnɛ tɛ tam nɛ́ mɔ nɛ er'nɛ́ nɛ bu wese hee wi nɛ zɔk mɔ na ga, ɓɛɛ ɛnɛ beka kpa yuwar na; o bíí tɛ ɔr'nɛ́ kai nɛ mɔ er'nɛ́, zu̧ nɛ ɛnɛ mbɛt, ɓɛɛ ŋma bíí nɛ tɛ ye ɗoŋ‘nɛ́ beka bo na.

³⁰«Kóò nɛ mɛ tɛ har, ŋma mbe bíí tɛ ɔ in a̧; tua nɛ mɛ tɛ de, mɛ beka ɔ kɔ̧ a̧ na; nyak-dɔ̧ɔ̧ nɛ mɛ tɛ gun, mɛ beka ɓi waya-a na.

³¹Bíí tɛ gɔn ndai kɔ-mɛ nɛ yí-mɛ, ɓɛɛ mɛ beka nyɔŋ kpoo-aa na. Wa tɛ ɓar tuifuu kɔ-mɛ er-mɛ, ɓɛɛ wa beka ba a̧ piinɛ ɗoŋ na. Wa tɛ ha̧ o sami kɔ-mɛ ha̧ o wisɛn kɔ-mɛ, ɓɛɛ ŋma bíí nɛ tɛ tɛ̀ɛ́ gbak mɛ beka bo na.

³²Ŋma dukbíí tɛ kai o bem kɔ-mɛ mɛ be-wiwii-a in be-okoo-a; yí-mɛ tɛ mbɔi tɛ zɔka mɔ, pɛm nɛ pia ɗoŋ kɔ-wa.

³³Ŋma dukbíí nɛ mɛ iŋ na tɛ nyɔŋ o nyɔnɔ in o mɔɔ-oi-tom kɔ-mɛ; mɛ tɛ duk nɛ bíí nɛ wa ɔr kai nɛ mɔ er-a, in wi-bɔnɛ.

³⁴Dawa tɛ de zu-mɛ sɛn tɛ bɔnɛ nɛ mɛ tɛ zɔk.

³⁵GASA WAN tɛ pi̧ gba kore nɛ beka kaɗi na zugur-mɛ in ku-mɛ, kore tɛ ya tɛ-mɛ, tɛ naŋ-mɛ hɔ zu-mɛ.

³⁶«GASA WAN tɛ tom'nɛ́ in wannu n’ɛnɛ baa e zu'nɛ́ nɛnɛ sitɛ ŋma tugun bíí n’ɛnɛ iŋ so in o dáà k’ɛ́nɛ́ na. Nɛ́ hi̧i̧ ɛ̀nɛ̀ tɛ́ gasi nɛ o ŋma sɔ̧: mɛ̀ nɛ́ o sɛka-te in o sɛka-ta.

³⁷Ɛnɛ tɛ kifi nɛ mɔɔ-nyɛr, in mɔɔ-tɔ̧-tua-wen ko o dukbíí; wa tɛ mam'nɛ́ fara lɛŋ nɛ GASA WAN Sɔ̧ k’ɛ́nɛ́ tɛ ba'nɛ́ si sɛnɛ.

³⁸«Ɛnɛ tɛ gun nyɔnɔ nɛ dɔka-a, ɓɛɛ beka dɛm na, wen o gba-dɔya tɛ nyɔŋ yinɛ lɛŋ.

³⁹Ɛnɛ tɛ gun o nyak-dɔ̧ɔ̧, ɛnɛ tɛ de zao-a, ɓɛɛ ɛnɛ beka nɔ dɔ̧ɔ̧-a̧a̧ na in ɛnɛ beka ɓi waya-a na, wen dɔk tɛ nyɔŋ yinɛ lɛŋ.

⁴⁰O te-nɔ̧́ tɛ dɔk sɛn nù k’ɛ́nɛ́, ɓɛɛ ɛnɛ beka kpa nɔ̧́-sɔ̧-tɛ‘nɛ́ na, wen o waya-a tɛ ai a nù.

⁴¹Ɛnɛ tɛ ko o be-wiwii in o be-okoo, ɓɛɛ wa beka ya in'nɛ̀ɛ́ na, wen bíí tɛ kai wa yaknɛ nɛ̀ bara-biro.

⁴²O gba-dɔya tɛ dor te in nù k’ɛ́nɛ́ e nɛ kɔ‘i.

⁴³«Gɛnɛ nɛ tɛ duk mgbara'nɛ́ tɛ kpa nɛ́ gásì, ɓɛɛ k’ɛ́nɛ́, ɛnɛ tɛ duk si ɗoŋ.

⁴⁴A̧ tɛ gbak mɔ h’ɛ́nɛ́, ɓɛɛ ɛnɛ beka kpa k’ɛ́nɛ́ mɛ gbak ha̧ a̧ na. A̧ tɛ duk zu'nɛ́, ɓɛɛ ɛnɛ yaa k’ɛ́nɛ́ ɗɔɔ-aa.

⁴⁵«O fom nɔ'ɔ lɛŋ tɛ ndak ɗoŋ‘nɛ́ hɔ ŋgimbi n’ɛnɛ tɛ kum lɛŋ, wen n’ɛnɛ zii tiger GASA WAN Sɔ̧ k’ɛ́nɛ́ kasi nɛ o heembea in o geŋa kɔ̧-a̧ n'aa ha̧a̧ h’ɛ́nɛ́ na.

⁴⁶Mɔ‘i tɛ hɔ zu'nɛ́ in o bezaŋ‘nɛ́ hee mɔɔ-usi-mɔ in mɔɔ-kifi ga ɓɔnsɛnɛ.

⁴⁷Ɓɛɛ hee mɔ'ɔ n’ɛnɛ kɔ̧ so dee tom ha̧ GASA WAN Sɔ̧ k’ɛ́nɛ́ nɛ tortɛ in nɛ gasa desee ŋgimbi n’ɛnɛ duk so nɛnɛ tɛ bɔtɛ na ga,

⁴⁸ɛnɛ tɛ de nɛ tom ha̧ o wisɛn k’ɛ́nɛ́ nɛ GASA WAN tɛ tom pi̧ zu'nɛ́. Ɛnɛ tɛ zɔk bɔnɛ-wɔ in wɔ-yì, ɛnɛ tɛ ya nɛ mgbii, ɓɛɛ mɔ lɛŋ tɛ ɓan'nɛ. GASA WAN tɛ pi̧ kpáŋá-boi ger'nɛ́ hɔ ŋgimbi n'aa tɛ kum'nɛ́ lɛŋ.

⁴⁹A̧ tɛ tom ŋma tugun bíí nɛ bu̧i hee zua ga, nɛ mgbii-zan mɛ, nɛ mɛ iŋ nú kɔ-wa na, pii zu'nɛ́.

⁵⁰Nɛ́ ŋma ŋga tugun bíí de saka-yí nɛ tu̧ tɛ sɔkawi na, in nɛ de ko ha̧ obem na.

⁵¹Tugun bíí‘i tɛ nyɔŋ o mɔ-dai k’ɛ́nɛ́ in o nyɔnɔ k’ɛ́nɛ́ lɛŋ hɔ ŋgimbi n’ɛnɛ tɛ kum nɛnɛ lɛŋ. Wa beka e alkamaari k’ɛ́nɛ́, mbe dɔ̧ɔ̧ k’ɛ́nɛ́ in nɔ̧́ k’ɛ́nɛ́, o nana-ndai in o nana-sami k’ɛ́nɛ́ h’ɛ́nɛ́ na hɔ ŋgimbi nɛ wa tɛ gbɛ‘nɛ́.

⁵²Wa tɛ kɛr o ye k’ɛ́nɛ́ lɛŋ hɔ ŋgimbi nɛ o gasa garo n’ɛnɛ e nɛ ta'nɛ‘i tɛ gbin a nù. Wa tɛ kɛr ye k’ɛ́nɛ́ lɛŋ sɛn tɛ nù nɛ GASA WAN Sɔ̧ k’ɛ́nɛ́ ha̧ h’ɛ́nɛ́.

⁵³«Zaŋ bɔnɛ in ɗaŋsee nɛ wisɛn k’ɛ́nɛ́ e'nɛ́ sɛnɛ‘i, ɛnɛ tɛ nyɔŋ o mɔ nɛ gboo nɛ̀ tɛ‘nɛ́; ɛnɛ tɛ nyɔŋ mur-tɛ o bem k’ɛ́nɛ́, o be-wiwii in o be-okoo nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́.

⁵⁴Wi nɛ duk so mgbara'nɛ́ hee de bíí ga, nɛ̀ duka so nɛ wi-bɔtɛ, tɛ zɔk o nya kɔ‘i, kóò kɔ‘i in o bem kɔ‘i nɛ̀ ɗaŋ yí,

⁵⁵wen ká a̧ tɛɛ ha̧ ŋma mur-tɛ o bem kɔ̧-a̧ n'aa tɛ gbɛ nyɔŋ lɛŋ ha̧ ŋma bíí. Mɔ‘i tɛ hɔ ŋgimbi nɛ wisɛn k’ɛ́nɛ́ tɛ kɛr nɛ o ye k’ɛ́nɛ́ lɛŋ pi̧ nɛ ŋga bɔnɛ zu'nɛ́.

⁵⁶Okoo tɛ̀ k’ɛ́nɛ́ nɛ duk so hee de okoo ga, nɛ̀ duka so nɛ́ ko-bɔtɛ, wan nɛ fuunu ba so naŋ-a na, tɛ zɔk wíì n'aa hɛr so nɔ yí-see-aa in o bem kɔ̧-a̧ mɛ be-wiwii-a in be-okoo-a,

⁵⁷mɔ nɛ gboo nɛ sara-ku-a, tɛ zɔk a̧ nɛ ɗaŋ yí. Ŋgimbi nɛ nyɔŋmɔ tɛ ɓan nɛnɛ, a̧ tɛ nyɔŋ wa nɛ hu̧sa̧-a̧. Mɔ‘i tɛ hɔ ŋgimbi nɛ wisɛn k’ɛ́nɛ́ tɛ kɛr nɛ o ye k’ɛ́nɛ́, pi̧ nɛ ŋga bɔnɛ zu'nɛ́.

⁵⁸«K’ɛ̀nɛ̀ bá o gba̧a̧-wen tɛ heembea nɔ'ɔ nɛ yɔra zaŋ kalata lɛŋ de nɛ tom, yu nɛ gasa hura-nin GASA WAN Sɔ̧ k’ɛ́nɛ́ na,

⁵⁹GASA WAN tɛ tom o ŋga da̧i̧ in o ŋga-zɛɛ nɛtɛ nɛtɛ nɛ beka kaɗi na pi̧ zu'nɛ́ in o bezaŋ‘nɛ́.

⁶⁰A̧ tɛ tom o zɛɛ-geŋa lɛŋ nɛ dee so kíì pi̧ tɛ‘nɛ́ sɛn nú Egiptɛ pi̧ zu'nɛ́, ɓɛɛ wa ndaɗa ɗoŋ‘nɛ́.

⁶¹Kóó o ŋma ŋga-zɛɛ lɛŋ in o da̧i̧ lɛŋ nɛ‘i yɔr zaŋ kalata heembea’ɛ na mbɛt, GASA WAN tɛ tom wa pi̧ zu'nɛ́ gbɛ nɛ ɛnɛ yinɛ.

⁶²Ɛnɛ dɔka so hee sɔra ga, ɓɛɛ ɛnɛ tɛ pii ɗoŋ tikiɗi ɓɛɛ, wen ɛnɛ zii so wen nú GASA WAN Sɔ̧ k’ɛ́nɛ́ na.

⁶³Nɛ́ kpɔk desee nɛ GASA WAN kpaa so de nɛnɛ h’ɛ́nɛ́ mɛ ya nɛ de-a dɔk nɛnɛ‘i, a̧ a̧ tɛ kpa de nɛnɛ h’ɛ́nɛ́ mɛ kum, ɓɛɛ ɛnɛ tɛ yu tɛ nù n’ɛnɛ ye sɛnɛ mɛ ba'i.

⁶⁴«GASA WAN tɛ pɛsi'nɛ́ dam mgbara o dukbíí zu nù lɛŋ. Sɛn hi̧i̧, ɛnɛ tɛ gasi nɛ́ o ŋma sɔ̧ n’ɛnɛ iŋ so na, in o dáà k’ɛ́nɛ́ iŋ so na: mɛ̀ nɛ́ o sɛka-te in o sɛka-ta.

⁶⁵Mgbara o tugun bíí nɔ‘i, ɛnɛ beka ya nɛ de-a na, in ɛnɛ beka kpa fara-duk na. GASA WAN tɛ de h’ɛ́nɛ́ mɛ ta nɛ́ mɔ, ha̧ gba̧a̧-tɛ‘nɛ́ mɛ gbin; mɔɔ-e-nɛ-ta k’ɛ́nɛ́ beka bo ɓɔna.

⁶⁶Ɛnɛ beka iŋ zu duka-a k’ɛ́nɛ́ ɓɔna; tɛ‘nɛ́ tɛ nak zɛ nɛ wese. Ŋma mɔɔ-e-nɛ-ta k’ɛ́nɛ́ zu nù beka bo ɓɔna.

⁶⁷Mɛ tutuyɛ, ɛnɛ tɛ tɔ̧‘e: ‹Mɔ tɛ ga̧ mɛ gese ge?› Ɓɛɛ mɛ ga̧a̧mɔ ɛnɛ tɔ̧ɔ̧‘e: ‹Mɔ tɛ sa̧ mɛ gese ge?› Wen ɗɛɗɛ‘nɛ́ tɛ gɔn tɛ mɔ n’ɛnɛ tɛ zɔk.

⁶⁸GASA WAN tɛ ba'nɛ́ sinɛ ɗoŋ nɛ̀ kombon si sɛn Egiptɛ mɛ, sitɛ nù n'am baa tɔ̧ so h’ɛ́nɛ́‘e, ɛnɛ beka zɔk ɓɔna. Sɛn hi̧i̧ ɛ́nɛ́ tɛ ɗɔr tɛ‘nɛ́ ha̧ o wisɛn k’ɛ́nɛ́ nɛ bara, ɓɛɛ ŋma bíí nɛ tɛ hi̧fi'nɛ́ beka bo na.»

⁶⁹Gba̧a̧-wen nɔɔ-tɔk nɛ GASA WAN ha̧a̧ nú ha̧ Moisɛ mɛ nɔ in o be Israɛl sɛn nu Mɔab e zu nɔɔ-tɔk n'aa nɔɔ so in wa sɛn zu kaya Hɔrɛb nɛ mɔ‘i.