Read Northwest Gbaya WEE-ƊOŊ-HEEMBEA 29 Bible Online

WEE-ƊOŊ-HEEMBEA 29 - Northwest Gbaya bible

WEE-ƊOŊ-HEEMBEA 29

¹Moisɛ saa o be Israɛl lɛŋ, ɓɛɛ tɔ̧ ha̧ wa: «Bo nɛ ɛnɛ zɔka mɔ nɛ GASA WAN dea nɛ gbaayí‘nɛ́ sɛn nú Egiptɛ in wannu ká bá nɛ̀ o wi-de-tom kɔ̧-a̧, gu nɛ nù kɔ̧-a̧ lɛŋ nɛ gbaayí‘nɛ́ na nde?

²Bo nɛ ɛnɛ zɔka o gasa bɔnɛ, o mɔɔ-usi-mɔ in o mɔɔ-gɔn-ɗɛɗɛ n'aa dea nɛ yí‘nɛ́ na nde?

³Ɓɛɛ hɔ sɔsɔɔ, GASA WAN ha̧ taamɔ h’ɛ́nɛ́ mɛ iŋ nɛ mgbara mɔ‘i na; a̧ ha̧ yí h’ɛ́nɛ́ mɛ zɔk nɛ mgbák mɔ‘i na, in zer h’ɛ́nɛ́ mɛ zii nɛ gba̧a̧-a̧ na mbɛt.

⁴Tɛ pɛ ɓu-naar, mi mgbɔɔ‘nɛ́ yar nɛ ŋga-gbárà, laa a̧k tɛ‘nɛ́ na, ndárà war naŋ‘nɛ́ na mbɛt.

⁵Bó nɛ́ brɛt ɛ́nɛ́ nyɔŋa na, bó nɛ́ dɔ̧ɔ̧ in o ŋga dɔ̧ɔ̧ ɛ́nɛ́ nɔɔ na: GASA WAN zɔka'nɛ́ nɛ de-a wen h’ɛ́nɛ́ mɛ iŋ‘e a̧ nɛ Sɔ̧ k’ɛ́nɛ́.

⁶Ɛnɛ hɔɔ hɛ̧ɛ̧ ɓɛɛ Sihɔŋ wannu Hɛsbɔŋ in Og, wannu Basaŋ wee ti ɛɛ tɛnɛ mɛ tɛɛ bi ɛɛ, ɓɛɛ nɛ́ ɛɛ a̧ bìí wa;

⁷ɛɛ baa nù kɔ-wa ha̧ ha̧ o bezaŋ Rubɛn, in o bezaŋ Gad in ha̧ reeta zuduk ko Manase nɛ mɔɔ-oi.

⁸Ɛnɛ tɛ kasi o wen nɔɔ-tɔk’ɛ, ɓɛɛ ɛnɛ tɛ kai wa de nɛ tom ha̧ mɔ n’ɛnɛ tɛ de lɛŋ mɛ hɔ gba̧a̧.»

⁹«Ɛnɛ mɔi̧a ŋmaa lɛŋ yor ti GASA WAN Sɔ̧ k’ɛ́nɛ́ sɔsɔɔ, o wan k’ɛ́nɛ́, o zuduk k’ɛ́nɛ́, o gasawi k’ɛ́nɛ́, o kapita k’ɛ́nɛ́, ɛnɛ o be Israɛl lɛŋ,

¹⁰o bem k’ɛ́nɛ́, o kóò k’ɛ́nɛ́ in o gɛnɛ nɛ a̧a̧ sɛn mgbara'nɛ́ kɔ̧ gbagari k’ɛ́nɛ́ wen kia gua, kóó wen ɗuu yi h’ɛ́nɛ́.

¹¹Ɛnɛ a̧a̧ hɛ̧ɛ̧ mɛ ye zaŋ nɔɔ-tɔk ko GASA WAN Sɔ̧ k’ɛ́nɛ́, nɔɔ-tɔk n'aa nɔ in'nɛ̀ɛ́ sɔsɔɔ, ɓɛɛ n’ɛnɛ kana mɔ kpɛk nɛnɛ,

¹²wen ha̧ a̧ mɛ e'nɛ́ hee dukbíí kɔ̧-a̧ ga in ha̧ a̧ nɛ tɛ-a mɛ duk nɛ́ Sɔ̧ k’ɛ́nɛ́, hee mɔ'ɔ n'aa ha̧a̧ so nɛ nú-a h’ɛ́nɛ́ in hee mɔ'ɔ n'aa kana so mɔ sɛnɛ ha̧ o dáà k’ɛ́nɛ́ Abraham, Izak in Jakob ga.

¹³Nɔɔ-tɔk n’ɛnɛ kana mɔ kpɛk nɛnɛ‘i bo in'nɛ̀ɛ́ ɓɛɛ na,

¹⁴ɓɛɛ in o bíí lɛŋ nɛ yor hɛ̧ɛ̧ sɔsɔɔ ti GASA WAN Sɔ̧ k’ɛɛ in o wi nɛ bo mgbara yɛ hɛ̧ɛ̧ sɔsɔɔ na mbɛt.

¹⁵Ɛnɛ iŋa yaa-a k’ɛɛ n’ɛɛ yaa so sɛn Egiptɛ mbɛt, in o dukbíí nɛtɛ nɛtɛ n’ɛnɛ ɓira nɛ mgbara wa yak nɛnɛ.

¹⁶«Ɛnɛ zɔka o ɗaŋmɔ kɔ-wa in o géé-sɔ̧ nɛ a̧a̧ tɛ kɔ-wa: mɛ̀ nɛ́ sɛka-te, sɛka-ta, bu-mbɔi in lɔr mbɛt.

¹⁷Ká ŋma wiwii, kóó ŋma okoo, kóó ŋma nú-gara, kóó ŋma dukbíí zik ɗoŋ e ha̧ GASA WAN Sɔ̧ k’ɛɛ, mɛ nɛ̀ɛ́ gasi o gee sɔ̧ kɔ-wa na; ká ŋma kunin-te-ma̧a̧da, kóó ŋma paŋ te dúk mgbara'nɛ́ na.

¹⁸Kà ŋma bíí nɛ́ zia wen ha̧a̧nú nɔ'ɔ kaɗi, ɓɛɛ kà a̧ tá‘e de yoŋgo a̧a̧ zu-wi, kà a̧ tɔ̧́, mɔ nyɛma wi kaɗi, wen wi dee mɔ nyɛm nɛ ɗoŋ o taamɔ kɔ‘i, wen nɛ‘i iŋa'e ɓɔɔ-nù de wɔ-yì ɓɔna wó,

¹⁹GASA WAN beka e ɗaŋmɔ kɔ̧-a̧ ha̧ a̧ na. Nyimsea ko GASA WAN in gɔya kɔ̧-a̧ tɛ kur zu wi’ɛi. Ɗaŋ yoŋgo nɛ a̧a̧ zaŋ kalata’ɛ lɛŋ tɛ tik zu a̧, ɓɛɛ GASA WAN tɛ bi nin-a ɗɔɔ yiwese yinɛ.

²⁰GASA WAN tɛ e a̧ nɛtɛ mgbara zuduk o be Israɛl lɛŋ ha̧ a̧ mɛ zɔk bɔnɛ nyɛm nɛ ɗoŋ fom in nɔɔ-tɔk nɛ yɔra zaŋ kalata heembea’ɛ.»

²¹«Mɔ nɛ o bezaŋ‘nɛ́ mɛ ɗoŋ, in o gɛnɛ nɛ tɛ tɛ nɛ nyɛi̧a nù tɛ tɔ̧ ŋgimbi nɛ wa tɛ zɔk nɛ o da̧i̧ tɛ nù'ɛ in o zɛɛ nɛ GASA WAN tɛ pi̧ zu o bíí nɛ́ mɔ'ɔ:

²²‹Nù kɔ-wa lɛŋ nɛ géé baraadu, tɔŋ in wee. Nyɔnɔ in te bo na; ŋma te hɔ na hee sɛn Sɔdɔm in Gɔmɔr, sɛn Adma in sɛn Seboyim mbɛt nɛ GASA WAN kifa so gu nù wen nyimsea in ŋga-see kɔ‘i’ɛ ga,›

²³ɓɛɛ o dukbíí lɛŋ tɛ ai nú‘e: ‹Wen ge sa GASA WAN dee ŋgamɔ hegɔ in nu’ɛ ge? Wen ge sa gasa tu̧u̧-see hegɔ kura ge?›

²⁴O bíí tɛ kifi nú ha̧ wa hee mɔ'ɔ ga: ‹Nɛ́ wen nɛ wa ee nɔɔ-tɔk ko GASA WAN Sɔ̧ ko o dáà kɔ-wa n'aa nɔɔ so in wa ŋgimbi n'aa mgbɔɔ nɛ wa gbonɛ nɛ nú Egiptɛ duk.

²⁵Wa nɛɛ de tom ha̧ o ŋma sɔ̧, ɓɛɛ wa gasi wa. Mɛ̀ nɛ́ o ŋma sɔ̧ nɛ wa iŋ so na in nɛ̀ GASA WAN usi so ha̧ wa na mbɛt.

²⁶Nɛ́ hegɔ sa see GASA WAN ɗaŋ zu nu’ɛ, ɓɛɛ sa a̧ fo ɗaŋ yoŋgo nɛ yɔra zaŋ kalata’ɛ lɛŋ pi̧ zu a̧.

²⁷GASA WAN ndaka wa tɛ nù kɔ-wa yinɛ tɛ ɗaŋsee, ŋga-see in gasa tu̧u̧-see kɔ̧-a̧, mɛ a wa tɛ ŋma nù hee mɔ'ɔ nɛ‘i zɔk sɔsɔɔ ga.›

²⁸«Mɔ nɛ duk nɛ hu̧sa̧-a̧, nɛ ko GASA WAN Sɔ̧ k’ɛɛ, ɓɛɛ mɔ nɛ hu̧si na, nɛ k’ɛɛ in o bem k’ɛɛ kpoo nɛ kpoo h’ɛ́ɛ́ mɛ de wa nɛ tom.»