Read Northwest Gbaya WEE-ƊOŊ-HEEMBEA 3 Bible Online

WEE-ƊOŊ-HEEMBEA 3 - Northwest Gbaya bible

WEE-ƊOŊ-HEEMBEA 3

¹«Ɛɛ zika tɛ yɛ mɛ daŋ si war Basaŋ ɓɛɛ Og, wannu Basaŋ in o bíí kɔ‘i lɛŋ gbo gɔn ti yɛ mɛ bi biro in yɛɛ sɛn Edrɛi.

²GASA WAN tɔ̧ɔ̧ ha̧‘m: ‹Ká mɛ yu a̧ na, wen mi ea a̧ kɔ̧ er-mɛ in o bíí kɔ̧-a̧ lɛŋ, gu nɛ nù kɔ̧-a̧ mbɛt. Ɓɛɛ mɛ tɛ de mɔ in a̧ hee mɔ'ɔ nɛ mɛ dee so nɛnɛ in Sihɔŋ, wannu ko o be Amɔr nɛ duka so sɛn Hɛsbɔŋ ga.›

³«Nɛ mɔ'ɔ nɛ GASA WAN ee Og wannu Basaŋ in o bíí kɔ̧-a̧ lɛŋ kɔ̧ er yɛ. Ɛɛ kuma wa lɛŋ, ŋma bíí kpɔk ɓɔn na.

⁴Ɛɛ baa o gasa ye kɔ̧-a̧ lɛŋ, ŋma ye n’ɛɛ ee duk kóó kpɔk bo na. Nɛ́ gasa ye ɓu-mɔɔrɔ-ɗoŋ-kpɔk, zika-nù Argɔb tɛ nú Basaŋ fara nɛ Og ɔ wan sɛnɛ.

⁵Mɛ̀ nɛ́ o ye nɛ‘i mboo kusa garo zik nɛnɛ nɛ a̧a̧ nɛ nú-a nɛ kpar-nú-a yiitoo nɛ‘i gɔm gɔm. Wi tɔr o be ye na.

⁶Ɛɛ kuma o bíí lɛŋ hee mɔ'ɔ n’ɛɛ dee so in Sihɔŋ wannu Hɛsbɔŋ ga. Ɛɛ kuma o bíí tɛ o gasa ye lɛŋ; ɛɛ kuma o wiwii in o okoo gu nɛ o obem lɛŋ.

⁷Ɛɛ kaia o mɔ-dai in o mbɔi nɛ ɓɔna saaye nɛ̀ mɔɔ-oi-biro.

⁸«Ɛɛ baa nù er o wannu ko o be Amɔr yiitoo nɛ war kur Jurdɛn mɛ lɛŋ nɛ̀ k’ɛɛ; ku̧u̧naŋ-a nɛ kɔ̧ ɗɔŋgɔ Arnɔŋ hɔ nɛnɛ zu kaya Hɛrmɔŋ.»

⁹(O be Sidɔŋ sa kɔ‘i nin Hɛrmɔŋ‘e Siriɔŋ, ɓɛɛ o be Amɔr saa kɔ-wa'e Sɛnir.)

¹⁰Ɛɛ gbina biro zu o gasa ye nɛ yaa so sɛn bɔkɔ-nù sɛn Galad in sɛn Basaŋ lɛŋ hɔ nɛnɛ sɛn Salka in Edrɛi, o gasa ye nú Basaŋ fara nɛ Og ɔɔ so wan sɛnɛ.

¹¹(Sɔŋkur bíí kpɔk nɛ ɓɔna mgbara o be Refaim so nɛ Og, wannu Basaŋ ɓɛɛ. Gado kɔ̧-a̧ nɛ gado-boi nɛ‘i zɔk sɛn Raba ye ko o be Amɔŋ; dura gado'i nɛ mɛtrɛ naar, ɓɛɛ pɛsa-a nɛ mɛtrɛ yiitoo nyɛm nɛ ɗɔŋ mɔɔ-we-mɔ.)

¹²«Ɛɛ baa nù‘i, ɓɛɛ mi ha̧ reeta kaya Galad in o gasa ye ku̧u̧naŋ-a nɛ Arɔɛr sɛn kɔ̧ ɗɔŋgɔ Arnɔŋ ha̧ o bíí ko Rubɛn in Gad.

¹³Mi ha̧a̧ ɓii reeta Galad in nù ko Og sɛn Basaŋ lɛŋ, nù ko Argɔb in nú Basaŋ nɛ oi-aa lɛŋ ha̧ reeta zuduk ko Manase. (Nɛ́ fara nɔ‘i a̧ wa sa nde, nù ko o be Refaim.

¹⁴Yair bem ko Manase baa nù ku̧u̧naŋ-a nɛ Argɔb hɔ mgbara nù ko o be Gɛsur in o be Maka. Wa gbara nin-a ha̧ o ye nɔ‘i nɛ‘i sa sɔsɔɔ‘e gbagari ko Yair.)

¹⁵«Mi ha̧a̧ nú Galad ha̧ Makir.

¹⁶Mi ha̧a̧ nú ku̧u̧naŋ sɛn Galad hɔ nɛnɛ tɛ be-zer ko Arnɔŋ, mgbara be-zer nɛ duk nɛ gbisi ɓir tik Yabɔk hɔ nɛnɛ tɛ be-zer nɛ gbisi ko o bem ko Amɔŋ ha̧ o bíí ko Rubɛn in Gad.

¹⁷Araba in Jurdɛn duk nɛ gbisi ku̧u̧naŋ-a nɛ Kinɛrɛt hɔ nɛnɛ tɛ gba-tɔp Araba, mɛ̀ nɛ́ gba-tɔp Tɔŋ sɛn ká̧ naŋ kaya Pisga nɛ war daŋa-wese.

¹⁸«Ɓɛɛ mi ha̧ nú‘m h’ɛ́nɛ́: ‹Nɛ́ GASA WAN Sɔ̧ k’ɛ́nɛ́ a̧ ha̧a̧ nù'ɛ h’ɛ́nɛ́. Ɛnɛ o wi-biro, ɛ̀nɛ̀ pí̧ laa-biro k’ɛ́nɛ́ ku nɛ yí Jurdɛn ɓir nɛnɛ nɛ ti o nya'nɛ́ o be Israɛl.

¹⁹Kànà nɛ́ o kóò k’ɛ́nɛ́, o bem k’ɛ́nɛ́ in o dɔka mɔ-dai k’ɛ́nɛ́ a̧ tɛ ya sɛn saaye n'am ha̧a̧ so h’ɛ́nɛ́ ɓɛɛ, wen mi iŋa, ɛnɛ a̧a̧ nɛ mɔ-dai nɛ dɔka-a.

²⁰Wa tɛ ya saaye hɔ ŋgimbi nɛ GASA WAN tɛ ha̧ nɛ ɔma-tɛ ha̧ o nya'nɛ́ hee mɔ'ɔ n'aa ha̧a̧ h’ɛ́nɛ́ ga, in ha̧ wa mɛ ba nù nɛ GASA WAN Sɔ̧ k’ɛ́nɛ́ ha̧a̧ ha̧ wa nɛ kur Jurdɛn, ɓɛɛ o ndé tɛ si ɗoŋ sitɛ nù kɔ‘i, sitɛ nù n'am ha̧a̧ h’ɛ́nɛ́.›

²¹«Ɓɛɛ mi ha̧ nú‘m ha̧ Josue tɔ̧ nɛnɛ‘e: ‹Bo nɛ mɛ zɔka mɔ nɛ GASA WAN Sɔ̧ k’ɛ́nɛ́ dee in o wannu nɔ‘i yiitoo'i na nde? GASA WAN tɛ de hegɔ in o zika-nù lɛŋ nɛ mɛ tɛ kpa nɛ war kur ɓi mɛ.

²²K’ɛ́nɛ́ yu wa na, wen nɛ́ GASA WAN Sɔ̧ k’ɛ́nɛ́ nɛ tɛ a̧ de biro oi nú‘nɛ́.› »

²³«Nɛ mɔ'ɔ n'am aia nú ha̧ GASA WAN:

²⁴‹GASA WAN Sɔ̧, ɛ́nɛ́ ku̧u̧ naŋ usa gasamɔ in ŋgai k’ɛ́nɛ́ ha̧ wi-de-tom k’ɛ́nɛ́. Ŋma sɔ̧ yiwese in mbɔɗɔnu’ɛ nɛ gana'nɛ́ nɛ̀ deemɔ in ŋgai bo na.

²⁵Ɛ̀nɛ̀ é war ha̧‘m ku yì a̧‘m nɛ́ɛ̀ zɔk de nù sɛn kur Jurdɛn nɛ duk nɛ́ de kaya, ká bá nɛ̀ Libaŋ!›

²⁶«Ɓɛɛ see GASA WAN ɗaŋa in am wen zu'nɛ́, ɓɛɛ a̧ zii wen kɔ‘m na; a̧ tɔ̧a̧: ‹Nyɛma hegɔ, ká mɛ tɔ̧ wen mɔ‘i ha̧‘m ɓɔna.

²⁷Mɛ̀ dáŋ zu kaya Pisga, mɛ̀ zɔ́k mɔ si war yee-wese, si ká̧-zan-mɛ́-ŋgɔn, si ká̧-zan-mɛ́-ɗɔɔ, in si war daŋa-wese. Mɛ̀ zɔ́k nɛ de-a, wen mɛ beka ku Jurdɛn nɛ duk ti mɛ'ɛ na.

²⁸Mɛ̀ há̧ nú mɛ ha̧ Josue, mɛ̀ há̧ nɔɔ-ŋgiɗi in ŋgai ha̧ a̧, wen mɛ̀ nɛ́ a̧ a̧ tɛ duk ti ha̧ o bíí ku nɛ Jurdɛn, in mɛ̀ nɛ́ a̧ a̧ tɛ de ha̧ wa mɛ ba nù nɛ mɛ zɔk’ɛ.›

²⁹«Ɓɛɛ nɛ́ hegɔ ɛ́ɛ́ ɓɔna nɛnɛ kɔ̧ ɗɔŋgɔ mgbák ti Bɛt-Pɛɔr.»