Read Northwest Gbaya WEE-ƊOŊ-HEEMBEA 30 Bible Online

WEE-ƊOŊ-HEEMBEA 30 - Northwest Gbaya bible

WEE-ƊOŊ-HEEMBEA 30

¹«Ŋgimbi nɛ de yoŋgo in fom n'am ee ti'nɛ́ tɛ hɔ zu'nɛ́ kaɗi, ɛnɛ tɛ ta mɔ zu-a kɔ̧ see'nɛ́ mgbara o tugun bíí fara nɛ GASA WAN Sɔ̧ k’ɛ́nɛ́ mgbɔ‘nɛ́ si sɛnɛ.

²Ɛnɛ tɛ pii ɗoŋ pii tɛ GASA WAN Sɔ̧ k’ɛ́nɛ́, ɛnɛ tɛ zii tiger-a, ɛnɛ in o bem k’ɛ́nɛ́ nɛ̀ see'nɛ́ lɛŋ in nɛ̀ kiitɛ‘nɛ́ lɛŋ, nyɛm nɛ ɗoŋ mɔ n'am usi h’ɛ́nɛ́ sɔsɔɔ.

³GASA WAN Sɔ̧ k’ɛ́nɛ́ tɛ kpai sɔnti'nɛ́, a̧ tɛ usi kɔ̧ɔ̧mɔ kɔ̧-a̧ h’ɛ́nɛ́, a̧ tɛ mɔi̧‘nɛ́ piinɛ ɗoŋ nɛ mgbara o dukbíí n'aa pɛsa so ɛnɛ si sɛnɛ.

⁴Kóó wa kaia so nɛ ɛnɛ si nduti nù mɛ, GASA WAN Sɔ̧ k’ɛ́nɛ́ tɛ mɔi̧ kana'nɛ́ nɛ hi̧i̧ piinɛ ɗoŋ; a̧ tɛ nɛ̀ɛ́ ba'nɛ́ hi̧i̧ piinɛ ɗoŋ.

⁵GASA WAN Sɔ̧ k’ɛ́nɛ́ tɛ mgbɔ‘nɛ́ piinɛ ɗoŋ sɛn tɛ nù nɛ o zɔmdáa k’ɛ́nɛ́ baa so; nù‘i tɛ duk nɛ́ k’ɛ́nɛ́. A̧ tɛ de h’ɛ́nɛ́ mɛ ya nɛ de-a in h’ɛ́nɛ́ mɛ dɔk gan o dáà k’ɛ́nɛ́.

⁶«GASA WAN Sɔ̧ k’ɛ́nɛ́ tɛ kpai taamɔ kɔ̧ see'nɛ́ in o bezaŋ‘nɛ́ h’ɛ́nɛ́ mɛ kɔ̧ a̧ nɛ see'nɛ́ lɛŋ in nɛ kiitɛ‘nɛ́ lɛŋ, h’ɛ́nɛ́ mɛ ya kpasa.

⁷GASA WAN Sɔ̧ k’ɛ́nɛ́ tɛ fo o fom nɔ‘i lɛŋ pi̧ zu o wisɛn k’ɛ́nɛ́ nɛ ndak ɗoŋ‘nɛ́.

⁸Ɓɛɛ k’ɛ́nɛ́, ɛnɛ tɛ zii tiger GASA WAN woyo; ɛnɛ tɛ kai o heembea kɔ̧-a̧ lɛŋ n'am ha̧‘nɛ́ sɔsɔɔ de nɛ tom.

⁹GASA WAN Sɔ̧ k’ɛ́nɛ́ tɛ de h’ɛ́nɛ́ mɛ kpa demɔ sɛn tɛ tom k’ɛ́nɛ́ lɛŋ. A̧ tɛ de ha̧ o bezaŋ‘nɛ́ mɛ dɔk, ha̧ o mɔ-dai k’ɛ́nɛ́ mɛ nyɛɓi in ha̧ nu k’ɛ́nɛ́ mɛ dɛm woyo. GASA WAN Sɔ̧ k’ɛ́nɛ́ tɛ kii de duka-a k’ɛ́nɛ́ woyo hee mɔ'ɔ n'aa dee so nɛnɛ in o dáà k’ɛ́nɛ́ ga,

¹⁰wen n’ɛnɛ tɛ zii tiger-a, kasi nɛ o heembea in o geŋa kɔ̧-a̧ nɛ yɔra zaŋ kalata heembea’ɛ, in wen n’ɛnɛ pia ɗoŋ pii tɛ a̧, nɛ see'nɛ́ in nɛ kiitɛ‘nɛ́ lɛŋ.»

¹¹«Nɛ mbetɛ, heembea n'am ha̧‘nɛ́ sɔsɔɔ ŋgai gan ŋgai k’ɛ́nɛ́ na; ɛ́nɛ́ nyɛma mɛ kasi a̧.

¹²Bo nɛ heembea'i duk yiwese mɛ kà de ká‘i tɔ̧ɔ̧‘e: ‹Nɛ́ o'o tɛ daŋ si yiwese mɛ nɛ̀ɛ́ ba a piinɛ ɗoŋ h’ɛ́ɛ́, k’ɛ̀ɛ̀ zíí k’ɛ́ɛ́ dèé nɛ tom o nde›, na.

¹³Heembea'i bó nɛ́ kur gba-tɔp mɛ kà‘i dé ká‘i tɔ̧ɔ̧‘e: ‹Nɛ́ o'o tɛ ku gba-tɔp si kur mɛ nɛ̀ɛ́ ba a̧ piinɛ ɗoŋ h’ɛ́ɛ́ k’ɛ̀ɛ̀ zíí k’ɛ́ɛ́ bàà de nɛ tom o nde›, na mbɛt.

¹⁴Nɛ mbetɛ, wen ko Sɔ̧ a̧a̧ mgbák katɛ‘nɛ́; wen'i a̧a̧ kɔ̧ nú‘nɛ́ in kɔ̧ see'nɛ́ h’ɛ́nɛ́ mɛ ba de nɛ tom.»

¹⁵«Ɛ̀nɛ̀ zɔk, mi ee duka-kpasa in bɔtɛ, fio in bɔnɛ ti'nɛ́ sɔsɔɔ,

¹⁶mi ha̧a̧ nú‘m h’ɛ́nɛ́ mɛ kɔ̧ GASA WAN Sɔ̧ k’ɛ́nɛ́, ɛ̀nɛ̀ nɛ́ nɔ̀ tɛ o yuwar kɔ̧-a̧, ɛ̀nɛ̀ kásí o heembea, o geŋa in o yuwar duka-a kɔ̧-a̧. Ɓɛɛ hegɔ, ɛ́nɛ́ tɛ ya kpasa, ɛ́nɛ́ tɛ dɔk mbɛt, ɓɛɛ GASA WAN Sɔ̧ k’ɛ́nɛ́ tɛ tok de yoŋgo zu'nɛ́ tɛ nù n’ɛnɛ ye sɛnɛ mɛ ba'i.

¹⁷Ɓɛɛ k’ɛ̀nɛ̀ zík ɗoŋ‘nɛ́ e ha̧ a̧, k’ɛ̀nɛ̀ de ŋgazu in a̧, k’ɛ̀nɛ̀ gasi o ŋma sɔ̧ de nɛ tom ha̧ wa,

¹⁸mi tɔ̧ h’ɛ́nɛ́ sɔsɔɔ, ɛnɛ tɛ kum lɛŋ; zɛ‘nɛ́ beka dɔk zu nù n’ɛnɛ ye sɛnɛ mɛ ba nɛ kur Jurdɛn'i na.

¹⁹«Nù in yiwese nɛ sedaako kɔ‘m sɔsɔɔ. Mi ee duka-kpasa in fio, sɛka de yoŋgo in fom ti'nɛ́. Ɛ̀nɛ̀ hók nɛ́ duka-kpasa h’ɛ́nɛ́ mɛ ya kpasa in o bezaŋ‘nɛ́;

²⁰ɛ́nɛ́ tɛ kɔ̧ nɛ GASA WAN Sɔ̧ k’ɛ́nɛ́, zii nɛ̀ tiger-a, ndaɗi nɛnɛ in a̧. Nɛ́ hegɔ ɛ̀nɛ̀ tɛ ya nɛnɛ kpasa, ɓɛɛ zɛ‘nɛ́ dɔka nɛnɛ tɛ nù nɛ GASA WAN kana so mɔ ha̧ nɛnɛ ha̧ o dáà k’ɛ́nɛ́ Abraham, Izak in Jakob.»