Read Northwest Gbaya WEE-ƊOŊ-HEEMBEA 31 Bible Online

WEE-ƊOŊ-HEEMBEA 31 - Northwest Gbaya bible

WEE-ƊOŊ-HEEMBEA 31

¹Moisɛ tɛɛ tɔ̧ wen ha̧ o be Israɛl.

²A̧ tɔ̧a̧: «Sɔsɔɔ, mi a̧a̧ nɛ pɛ 120, mi nyɛm mɛ de tom kɔ‘m nɛ de-a ɓɔna, ɓɛɛ GASA WAN tɔ̧ ha̧‘m: ‹Mɛ beka ku Jurdɛn nɛ duk’ɛ na.›

³Nɛ́ GASA WAN Sɔ̧ k’ɛ́nɛ́ a̧ tɛ duk ti h’ɛ́nɛ́, nɛ́ a̧ a̧ tɛ kum o tugun bíí nɔ‘i lɛŋ yinɛ ti'nɛ́, ɓɛɛ a̧ ndaka wa. Nɛ́ Josue a̧ tɛ duk ti h’ɛ́nɛ́ hee mɔ'ɔ nɛ GASA WAN tɔ̧ɔ̧ ga.

⁴GASA WAN tɛ de mɔ in o tugun bíí nɔ‘i hee mɔ'ɔ n'aa dee so nɛnɛ in Sihɔŋ ba nɛ Og, o wannu ko o be Amɔr in nù kɔ-wa ga. A̧ kuma wa yinɛ.

⁵GASA WAN tɛ e wa kɔ̧ er'nɛ́, ɓɛɛ ɛ́nɛ́ tɛ de mɔ in wa nyɛm nɛ ɗoŋ mɔ n'am tɔ̧ɔ̧ h’ɛ́nɛ́.

⁶Ɛ̀nɛ̀ nɔ́ ŋgiɗi, ɛ̀nɛ̀ yór nɛ nɔa-a, k’ɛ́nɛ́ de kíì na, ká tɛ‘nɛ́ nak ti wa na, wen nɛ́ GASA WAN Sɔ̧ k’ɛ́nɛ́ a̧ nɛ nɔ in'nɛ̀ɛ́; a̧ beka ɗai er tɛ‘nɛ́ na, a̧ beka e'nɛ́ duk na mbɛt.»

⁷Nɛ mɔ'ɔ nɛ Moisɛ saa Josue e ti o be Israɛl lɛŋ, ɓɛɛ tɔ̧ ha̧ a̧: «Mɛ̀ nɔ́ ŋgiɗi a̧ mɛ̀ yór nɛ nɔa-a wen nɛ́ mɛ́ a̧ tɛ mgbɔ o wi nɔ'ɔ ye nɛnɛ tɛ nù nɛ GASA WAN kana so mɔ mɛ ha̧ ha̧ o dáà kɔ-wa. Nɛ́ mɛ́ a̧ tɛ de ha̧ wa mɛ ba nù‘i nɛ mɔɔ-oi.

⁸Nɛ́ GASA WAN a̧ tɛ duk ti ha̧ mɛ, nɛ́ a̧ a̧ tɛ duk in mɛɛ. A̧ beka ɗai er tɛ-mɛ na, a̧ beka e mɛ duk na mbɛt. Ká mɛ́ de kíì na in ká mɛ́ e ha̧ tɛ-mɛ mɛ gbin na mbɛt.»

⁹Moisɛ yɔra heembea’ɛ, ɓɛɛ ha̧ ha̧ o bezaŋ Levii nɛ ya nɛ o wi-ɗafi-sɔ̧, nɛ tui kɔ-wa nɛ Kuɓa nɔɔ-tɔk ko GASA WAN; a̧ ha̧a̧ ha̧ o gasawi Israɛl lɛŋ mbɛt.

¹⁰A̧ tɔ̧ɔ̧ ha̧ wa: «Ɛ̀nɛ̀ tɔ́r heembea’ɛ tɛ kaɗa mɔɔrɔ-ɗoŋ-yiitoo pɛ, ŋgimbi gbɛɛ nyamandoi ha̧ ŋmaa, tɛ gbaŋa tua-laa.

¹¹Ŋgimbi nɛ Israɛl lɛŋ tɛ mɔi̧ tɛnɛ mɛ zɔk sɔnti GASA WAN Sɔ̧ kɔ‘i sɛn fara n'aa hoka, ɛ́nɛ́ tɛ tɔr heembea’ɛ lɛŋ ti wa ha̧ wa mɛ zii.

¹²Ɛnɛ tɛ mɔi̧ o bíí lɛŋ, o wiwii, o okoo, o obem, o gɛnɛ nɛ a̧a̧ saaye k’ɛ́nɛ́ ha̧ wa mɛ zii ha̧ wa mɛ yambii heembea'i, ha̧ wa mɛ yu kíí GASA WAN Sɔ̧ k’ɛ́nɛ́, in ha̧ wa mɛ kasi o gba̧a̧-wen tɛ heembea nɔ‘i lɛŋ.

¹³Ɓɛɛ o bezaŋ‘nɛ́ nɛ iŋ kɔ-wa o heembea nɔ‘i na tɛ zii nyɛrɛ-a, ɓɛɛ wa tɛ yu GASA WAN Sɔ̧ k’ɛ́nɛ́ wese lɛŋ n’ɛnɛ ya kpasa tɛ nù n’ɛnɛ tɛ ba nɛ kur Jurdɛn.»

¹⁴GASA WAN tɔ̧ɔ̧ ha̧ Moisɛ: «Ŋgimbi fio kɔ-mɛ hɛɗa kaɗi. Mɛ̀ sá Josue, ɛ̀nɛ̀ tɛ́ pii kɔ̧ Tua-kpa-ŋmaa, ɓɛɛ mi tɛ ha̧ o heembea kɔ‘m ha̧ a̧.» Nɛ mɔ'ɔ nɛ Moisɛ in Josue kaia ŋmaa si kɔ̧ tua-kpa-ŋmaa.

¹⁵GASA WAN usa tɛ kɔ̧ Tua-kpa-ŋmaa nɛ mgbara tura-zan; tura-zan'i yora nú tua.

¹⁶GASA WAN tɔ̧ɔ̧ ha̧ Moisɛ: «Zɔk, mɛ hɛɗa mɛ nɛ ɗoŋ o dáà kɔ-mɛ kaɗi. Dukbíí'ɛ tɛ ye tɛ gasa o sɔ̧ ko o gɔni-duk tɛ nù nɛ wa tɛ ba'i; wa tɛ e'm duk, ɓɛɛ wa tɛ ɗaŋ nɔɔ-tɔk k’ɛɛ in ŋmaa.

¹⁷Mɛ̀ nɛ́ wese'i a̧ see-am tɛ ɗaŋ in wa; mi tɛ e wa duk, ɓɛɛ mi tɛ hu̧si yí‘m nɛ wa. O bíí tɛ kum wa, o ŋgamɔ in o bɔnɛ tɛ tik zu wa, ɓɛɛ wese'i wa tɛ tɔ̧: ‹Ŋgamɔ nɛ kpaa ɛɛ'ɛ, mɛ̀ nɛ́ wen nɛ Sɔ̧ k’ɛɛ bo mgbara yɛ ɓɔna gɔ.›

¹⁸Ɓɛɛ kɔ‘m, wese'i mi tɛ hu̧si kànà kɔ‘m nɛ yí‘m nɛ̀ wa, wen zu ɗaŋmɔ lɛŋ nɛ wa dea tɛ zika tɛ-wa sitɛ o ŋma sɔ̧.

¹⁹«Kinii, mɛ̀ yɔ́r gima’ɛ mɛ̀ úsí ha̧ o be Israɛl, mɛ̀ dé ha̧ nú-wa mɛ ɓɔn tɛ gima'i, ha̧ gima'i mɛ duk nɛ mɔɔ-sedaako kɔ‘m ti wa.

²⁰Nɛ mbetɛ, mi tɛ mgbɔ dukbíí'ɛ nɛnɛ tɛ nù n'am kana mɔ ha̧ nɛnɛ ha̧ o dáà kɔ-wa; mɛ̀ nɛ́ nù nɛ yibere in gɔrɔ fok sɛnɛ. Wa tɛ nyɔŋ mɔ zaŋ-wa sur, wa tɛ ŋmaŋ, ɓɛɛ wa tɛ zik tɛ-wa sitɛ o ŋma sɔ̧ mɛ de tom ha̧ wa; wa tɛ e'm tɛ geemɔ, wa tɛ ɗaŋ nɔɔ-tɔk kɔ‘m.

²¹Ɓɛɛ ŋgimbi nɛ o ŋgamɔ in o bɔnɛ tɛ tik zu wa kaɗi, gima’ɛ tɛ usi ɗaŋmɔ kɔ-wa ha̧ wa nɛ̀ mɔɔ-sedaako, wen tɛ o bezaŋ-wa beka bi ɗoŋ wee ɗoŋ-aa na. Nɛ mbetɛ, mi iŋa mɔ nɛ wa e zu-a sɔsɔɔ nɛti ha̧‘m mɛ mgbɔ wa ye nɛ nù n'am kana mɔ mɛ ha̧ ha̧ wa.»

²²Wese'i Moisɛ yɔra gima'i, ɓɛɛ a̧ yambii ha̧ o be Israɛl lɛŋ.

²³GASA WAN tɔ̧ɔ̧ ha̧ Josue bem ko Nun: «Mɛ̀ nɔ́ ŋgiɗi in mɛ̀ yór nɛ nɔa-a, wen nɛ́ mɛ́ a̧ tɛ mgbɔ o be Israɛl sitɛ nù n'am kana mɔ mɛ ha̧ ha̧ wa, ɓɛɛ mi tɛ duk in mɛɛ.»

²⁴Ɗoŋ nɛ Moisɛ yɔra o gba̧a̧-wen tɛ heembea'i lɛŋ zaŋ kalata kaɗi,

²⁵a̧ tɔ̧ɔ̧ ha̧ o be Levii nɛ tui Kuɓa nɔɔ-tɔk ko GASA WAN hee mɔ'ɔ ga:

²⁶«Ɛ̀nɛ̀ bá kalata heembea’ɛ e sɛn ká̧ Kuɓa nɔɔ-tɔk ko GASA WAN Sɔ̧ k’ɛ́nɛ́, a̧ tɛ duk hi̧i̧ hee mɔɔ-sedaako ga zu'nɛ́.

²⁷Wen kɔ‘m, mi iŋa ɗaŋ taamɔ in ŋgazu k’ɛ́nɛ́ lɛŋ. Ɛ́nɛ́ nɛ mɔ'ɔ n’ɛnɛ de ŋgazu in GASA WAN ŋgimbi n'am tɛ fe na’ɛ, ɓɛɛ ɗoŋ fio kɔ‘m ɛnɛ tɛ de hee ge?

²⁸Ɛ̀nɛ̀ mɔ́í̧ o gasawi zuduk k’ɛ́nɛ́ in o kapita k’ɛ́nɛ́ a katɛ‘m. Mi tɛ tɔ̧ o wen nɔ'ɔ zer-wa, ɓɛɛ o wi-sedaako kɔ‘m tɛ duk nɛ́ yiwese in nù.

²⁹Mi iŋa'e, ɗoŋ fio kɔ‘m, ɛnɛ tɛ tik tɛ ɗaŋmɔ, ɓɛɛ ɛnɛ ee yuwar n'am usa h’ɛ́nɛ́ duk. Ɗoŋ-aa beka nyɛi̧ na, ɓɛɛ bɔnɛ tika zu'nɛ́ wen zu ɗaŋmɔ n’ɛnɛ tɛ de yí GASA WAN in o ɗaŋ tom k’ɛ́nɛ́ nɛ tɛ tu̧ see-aa.»

³⁰Moisɛ wee ɗoŋ gba̧a̧-wen tɛ gima’ɛ lɛŋ zer o be Israɛl lɛŋ nɛ mɔi̧a.