Read Northwest Gbaya WEE-ƊOŊ-HEEMBEA 32 Bible Online

WEE-ƊOŊ-HEEMBEA 32 - Northwest Gbaya bible

WEE-ƊOŊ-HEEMBEA 32

¹Yiwese, mɛ̀ yéŋ zer-mɛ ha̧‘m tɔ̧ wen, nù, mɛ̀ zíí gba̧a̧ wen n'am tɛ tɔ̧‘i!

²O usamɔ kɔ‘m a̧ pɛsi hee kórò ga, wen kɔ‘m a̧ ai hee mbɛŋ ga, hee gasa kórò zu nuŋui ga, hee dɔmbɔrɔ tɛ zɔ̧ ga.

³Mi tɛ zɔn nin GASA WAN; ɛ̀nɛ̀ íŋ ndé Sɔ̧ k’ɛɛ ɔ gasa.

⁴A̧ nɛ́ kam-ta, deemɔ kɔ̧-a̧ ɔ dee nyɛmna, o yuwar kɔ̧-a̧ ɔ tana; a̧ nɛ́ Sɔ̧ nɛ yor ɗoŋ ha̧a̧nú kɔ‘i. Gɔɔmɔ bo sɛn tɛ-a na, a̧ nɛ́ de-wi in a̧ de mɔ nɛ yuwar-a.

⁵War kɔ̧-a̧, wa nɛ́ wi-de-mɔɔ-gɔŋ-zaŋ, hee mɔ'ɔ nɛ wa mbo zu ha̧ a̧ na ga, wa bó nɛ́ bem kɔ̧-a̧ ɓɔna, wa nɛ́ dukbíí-de-ŋgamɔ nɛ ta mɔ na mbɛt.

⁶Ɓɛɛ deemɔ k’ɛ́nɛ́ in GASA WAN a̧‘i ndé, o wi-dawa in o wi-iŋ-mgbara-mɔ na nɔ'ɔ! A̧ bó nɛ́ dáà nɛ ha̧a̧ duka-kpasa h’ɛ́nɛ́ na nde? Bó nɛ́ a̧ a̧ dee'nɛ́, ɓɛɛ a̧ ɗafi'nɛ́ e fara k’ɛ́nɛ́ na nde?

⁷Tɛ‘nɛ́ a̧ mbaŋ ɗoŋ o kuti wese, ɛ̀nɛ̀ zɔ́k mɔ sitɛ o pɛ nɛ yaka, ɛ̀nɛ̀ tɔ́r tugun'nɛ́; kóó o ndé a̧ ak dáà kɔ‘i, ɓɛɛ a̧ tɛ tɔ̧ mgbara-a ha̧ a̧; ɛ̀nɛ̀ ák o sɔkawi k’ɛ́nɛ́, ɓɛɛ wa tɛ ɓa ɗoŋ mɔ nɛ yaka h’ɛ́nɛ́.

⁸Ŋgimbi nɛ Wan nɛ duk ŋgɔn mɛ ha̧a̧ so nɛ mɔɔ-oi ha̧ zuduk bíí lɛŋ, ŋgimbi n'aa kɛ̧ɛ̧ so nɛ mgbara nù, a̧ ee o zuduk bíí nɛtɛ nɛtɛ ɗɔɔ ŋgai ko o ŋma sɔ̧,[9]

⁹ɓɛɛ war mɔ ko GASA WAN nɛ hoka mɛ̀ nɛ́ dukbíí kɔ̧-a̧, ɓɛɛ Jakob nɛ́ mɔɔ-oi kɔ̧-a̧.

¹⁰A̧ kpaa dukbíí kɔ̧-a̧ sɛn ŋga-gbárà fara hiɗi mɔ ɛ̀nɛ̀, a̧ zɔka wa nɛ de-a, a̧ usa mɔ ha̧ wa. A̧ zɔka wa hee mɔ'ɔ nɛ‘i zɔk nɛ tú̧-yí-wí ga.

¹¹A̧ duk hee zúa nɛ ha̧ ŋgai ha̧ o bem kɔ‘i ga, a̧ bu̧i nɛ zu wa nyar nɛ ɓaa-a, ɓɛɛ a̧ kaia o bem kɔ̧-a̧ a zu ɓaa-a.

¹²Nɛ́ GASA WAN kpɔk ɓɛɛ a̧ duk ti ha̧ dukbíí kɔ‘i, ŋma gɔni sɔ̧ hɔ katɛ a̧ na.

¹³Nɛ́ a̧ a̧ ba wa e nɛ o gasawi zu nù ha̧ wa mɛ nyɔŋ o nyɔnɔ kpɛɛfɔ; nɛ́ a̧ a̧ de ha̧ wa mɛ nyɔŋ gɔrɔ kɔ̧ ta; nɛ́ a̧ a̧ de ha̧ waya-te-nɔ̧́ mɛ gbɛ̧ zu sɔkɔr-ta.

¹⁴Nɛ́ a̧ a̧ ha̧ nɔ̧́ ndai in yibere sami ha̧ wa, gu nɛ o ŋmaŋa be-sami, o vala sami mɛ Basaŋ, in o vala gbadua ká bá nɛ̀ de fuu alkamaari; nɛ́ a̧ a̧ ha̧ de yí-dɔ̧ɔ̧́ ha̧ wa mɛ nɔ mbɛt.

¹⁵Nɛ mɔ'ɔ nɛ Israɛl ŋmaŋa ɓɛɛ de ŋgazu; a̧ ŋmaŋa, a̧ dita, a̧ ndota. A̧ ee Sɔ̧ kɔ̧-a̧ nɛ̀ dèé a̧ duk, a̧ pi̧i̧ búù zu Kam-ta kɔ̧-a̧, mɔɔ-kpas'aa.

¹⁶Wa baa o gɔni sɔ̧ we nɛ GASA WAN, ɗaŋmɔ nɛ wa dea tu̧u̧ see-aa.

¹⁷Wa ɗafa nɛ́ o ɗaŋ-sɔ̧ ɓɛɛ bó nɛ́ kpasa Sɔ̧ na; wa ɗafa o gɔni sɔ̧ nɛ wa iŋ so na nɛ̀ gboo nɛ̀ mbe-a, nɛ̀ o dáà kɔ-wa yu so kíí-wa na.

¹⁸«Kam-ta nɛ̀ koo'nɛ́, ɛnɛ ee a̧ tɛ geemɔ, tɛ‘nɛ́ bìí ɗoŋ Sɔ̧ nɛ̀ dee'nɛ́ e zu nù.»

¹⁹Mɔɔ nɔ‘i lɛŋ nɛ̀ GASA WAN zɔka dee ha̧ see-aa mɛ nyim, o bem kɔ̧-a̧ mɛ be-wiwii-a in be-okoo-a tu̧u̧ see-aa.

²⁰A̧ tɔ̧a̧: «Mi tɛ ba yí‘m hu̧si nɛ wa, ɓɛɛ mi tɛ zɔk duka-a kɔ-wa siti. Wen mɛ̀ nɛ́ ŋma dukbíí nɛ mbo zu na, wa nɛ o ŋma o bem nɛ‘i nyɛm mɛ e nɛ ta na.

²¹Wa baa o geemɔ nɛ bó nɛ́ kpasa Sɔ̧ na we nɛ‘m; wa tu̧u̧ see-am nɛ̀ o géé-sɔ̧ kɔ-wa. Hegɔ, mi tɛ ba ŋma mɔ nɛ bó nɛ́ kpasa zuduk bíí na we nɛ wa mbɛt; mi tɛ tu̧ see-wa nɛ̀ ŋma zuduk bíí nɛ̀ iŋ mgbara mɔ na.

²²Nɛ mbetɛ, ŋma wee nyɛka kɔ̧ zɔ̧ɔ̧-am, wee'i dɔɔ mɔ hɔ nduti fara ko o fio mɛ. Wee'i dɔɔ nù gu nɛ o nyɔnɔ lɛŋ, a̧ dɔɔ ká̧ naŋ kaya bíí wee gbuɗuk.

²³Mi tɛ mɔi̧ bɔnɛ dun zu wa, mi tɛ a o góò kɔ‘m sitɛ wa.

²⁴Ŋgimbi nɛ kaɓa tɛ ziɓi wa, nɛ̀ kórò tɛ mbaŋ a zu wa, nɛ̀ ma̧a̧da̧ kɔ‘m tɛ ye tɛ-wa, mi tɛ tom o gba̧a̧-nin saɗi in ma̧a̧da̧ ko o saɗi-gbur-zaŋ nɛ nù pi̧ zu wa.

²⁵Nɛ war zan, gba-paa tɛ kum o bem kɔ-wa, ɓɛɛ nɛ war kɔ̧ tua, bele tɛ zar bíí. Be-ŋgaiwi tɛ zɔk kpɔk bɔnɛ in be-zɔŋa, be-zɔɗi tɛ fe kpɔk fio in wi nɛ mbui a̧a̧ zu.»

²⁶«Mi tɛɛ gbin wa nduku-nduku, mi tɛ̀ɛ́ de so ha̧ tɛ bíí mɛ bi ɗoŋ wa,

²⁷ɓɛɛ mi ta mɔ‘e, o wisɛn tɛ ŋmaŋ tɛ, ɔr nɛ tɛ tɔ̧ nɛnɛ‘e, nɛ́ wi a'i gana wa, nɛ̀ bó nɛ́ GASA WAN na.

²⁸«Mɛ nɛ ŋma zuduk bíí nɛ ee-zu-mɔ kɔ-wa yor na, wa iŋ mɔ na.

²⁹Wa a̧ bó só nɛ́ o wi-iŋ-mgbara-mɔ, wa tɛ̀ɛ́ iŋ mgbara mɔ‘i; wa tɛ̀ɛ́ iŋ mgbara duka-a kɔ-wa siti.

³⁰Hee ge bíí kpɔk tɛ ndak bíí booro, sɛka bíí yiitoo pɛsa bíí booro-ɓu, kà bó nɛ́ Kam-ta ko o bíí nɔ‘i a ɗɔɔ wa na, kà bó nɛ́ GASA WAN a̧ foo wa pi̧ er wisɛn kɔ-wa na ge nde?

³¹«Wen kam-ta ko wisɛn k’ɛɛ bo hee Kam-ta k’ɛɛ ga na; o wi nɔ‘i nɛ̀ tɛ-wa iŋa hegɔ.

³²Kpar nyak-dɔ̧ɔ̧ kɔ-wa tɛ́ nɛ̀ kpɛɛfɔ Sɔdɔm in Gɔmɔr; waya-nyak-dɔ̧ɔ̧ kɔ-wa a̧a̧ nɛ ma̧a̧da̧, sikila-a paŋ paŋ.

³³Dɔ̧ɔ̧ kɔ-wa nɛ́ ma̧a̧da̧-ndiɓa, mɛ̀ nɛ́ ŋga ma̧a̧da̧-firi.

³⁴«Mɔ nɛ mi GASA WAN ɗafa é nɛ́ mɔ‘i; mɔ n'am kasi duk nɛnɛ a̧‘i.

³⁵Kinii nɛ́ mi a̧ tɛ kifi er in nɛ́ mi a̧ tɛ gbo nyamandoi, ŋgimbi nɛ naŋ-wa tɛ yɔ kaya, wen wese bɔnɛ kɔ-wa hɛɗa kaɗi, mɔ nɛ ɗafa wen wa nyɛi̧ ɓɔna.»

³⁶GASA WAN tɛ gɔn kita zu dukbíí kɔ‘i, a̧ tɛ de ko ha̧ o wi-de-tom kɔ̧-a̧, ŋgimbi n'aa tɛ zɔk'e ŋgai kɔ-wa kaɗa kaɗi, nɛ̀ kɛ̧ɛ̧ mgbara bara in gee bíí beka bo ɓɔna.

³⁷A̧ tɛ tɔ̧: «O sɔ̧ kɔ-wa a̧a̧ dee nde? Kam-ta nɛ̀ wa hu̧si so ɗoŋ-aa a̧a̧ dee?

³⁸O wi nɛ nyɔŋ so nɔ̧́-kpoo ɗafi o sɔ̧ nɔ‘i, nɔ nɛ dɔ̧ɔ̧-zɛzɛ a̧a̧ dee? Wa à̧ kúr wa à̧ gbák'nɛ́, wa à̧ kíí fara hu̧sa̧-a̧ h’ɛ́nɛ́.

³⁹«Kinii ɛ̀nɛ̀ zɔ̀k: Nɛ́ mi, kànà nɛ́ mi kpɔk ɓɛɛ, ŋma sɔ̧ bo katɛ‘m na; nɛ́ mi a̧ de ha̧ bíí mɛ fe, nɛ́ mi a̧ de ha̧ bíí mɛ duk kpasa mbɛt; kà‘m ɗáŋ mɔ, ɓɛɛ mi a̧ ɗafi mɔ‘i. Bíí kpɔk nyɛm mɛ kpasi ŋma bíí er-am na.

⁴⁰Kà‘m nyɛ́í̧ er-am si yiwese, ɓɛɛ mi tɔ̧a̧: ‹Mi duk kpasa kpoo nɛ kpoo!

⁴¹Kà‘m bɛ́ŋ nú toka gba-paa kɔ‘m, kà‘m bá er-am nɛ ŋgɔn, ɓɛɛ mi kifa er-ɗaŋmɔ ha̧ wisɛn kɔ‘m; mi tɛ kifi er ha̧ o wi-sɛn-am.

⁴²Gba-paa kɔ‘m be tɛ̀ɛ́ ye tɛ mur-tɛ-wa, ɓɛɛ o góò kɔ‘m tɛ kpe nɛ̀ tɔk o wɔr in o bara-biro, gu nɛ o gasa wi-biro kɔ-wa.› »

⁴³O tugun bíí, ɛ̀nɛ̀ mbɛ́r er zu dukbíí kɔ̧-a̧, wen a̧ tɛ kifi er oi tɔk-tɛ o wi-de-tom kɔ̧-a̧. A̧ tɛ kifi er ha̧ o wisɛn kɔ̧-a̧; a̧ tɛ e ɗaŋmɔ ko o bíí kɔ̧-a̧ ha̧ wa, ɓɛɛ a̧ baa nù kɔ̧-a̧ e ŋgɔn.

⁴⁴Moisɛ in Josue bem ko Nun tɛɛ we ɗoŋ gba̧a̧ gima'i, ɓɛɛ o bíí lɛŋ zii.

⁴⁵Ŋgimbi nɛ Moisɛ kaɗa tɔ̧ɔ̧ wen nɔ‘i ha̧ o be Israɛl lɛŋ kaɗi,

⁴⁶a̧ tɔ̧ɔ̧ ha̧ wa: «Ɛ̀nɛ̀ kásí o wen lɛŋ n'am de nɛ sedaako h’ɛ́nɛ́ sɔsɔɔ e kɔ̧ see'nɛ́, ɓɛɛ ɛ̀nɛ̀ tɔ̧́ ha̧ o bem k’ɛ́nɛ́ mɛ ba o wen nɔ‘i de nɛ tom.

⁴⁷Bó nɛ́ géé wen a̧‘m tɔ̧ h’ɛ́nɛ́ na; wen'i nɛ́ duka-kpasa k’ɛ́nɛ́, ɓɛɛ nɛ́ kpɔk wen'i a̧ tɛ de ha̧ zɛ‘nɛ́ mɛ dɔk sɛn tɛ nù n’ɛnɛ tɛ ba nɛ kur Jurdɛn.»

⁴⁸Kpɔk kale wese'i, GASA WAN tɔ̧ɔ̧ ha̧ Moisɛ:

⁴⁹«Mɛ̀ dáŋ zu kaya Abarim, zu kaya Nɛbo nɛ duk nú Mɔab, nɛ̀ zɔk ŋmaa in Jeriko, a̧ mɛ̀ zɔ́k nú Kanaŋ n'am ha̧ ha̧ o be Israɛl nɛ̀ kɔ-wa.

⁵⁰Mɛ̀ nɛ́ɛ̀ fé zu kaya nɛ mɛ tɛ daŋ‘i, mɛ̀ ndák ɗoŋ o nam kɔ-mɛ hee mɔ'ɔ nɛ nya-mɛ Arɔŋ fee nɛnɛ zu kaya Ɔr, ɓɛɛ ka a̧ si nɛnɛ ɗoŋ o nam kɔ̧-a̧ ga,

⁵¹wen ɛnɛ dee ŋgazu in am sɛn ti o be Israɛl, sɛn ká̧ yí Mɛriba, sɛn Kadɛs, sɛn ŋga-gbárà Sin, ŋgimbi n’ɛnɛ iŋ nɛ duka-a kɔ‘m nɛ sa̧a̧-a̧ mgbara o be Israɛl na.

⁵²Mɛ tɛ zɔk nù‘i ti mɛ, ɓɛɛ mɛ beka ye tɛ nù n'am ha̧ ha̧ o be Israɛl‘i na.»