Read Northwest Gbaya WEE-ƊOŊ-HEEMBEA 33 Bible Online

WEE-ƊOŊ-HEEMBEA 33 - Northwest Gbaya bible

WEE-ƊOŊ-HEEMBEA 33

¹De yoŋgo nɛ Moisɛ, bíí ko Sɔ̧ toka zu o be Israɛl nɛti ha̧ a̧ mɛ fe nɛ mɔ'ɔ:

²GASA WAN tɛa nɛ Sinai; a̧ daŋa tɛnɛ nɛ ndaa-zan nɛ Edɔm. A̧ duka zu kaya Paraŋ mɛ tok nɛnɛ tɛnɛ, a̧ tɛɛ nɛ Kadɛs pii Mɛriba, nɛ ká̧-zan-mɛ́-ɗɔɔ pii ká̧ naŋ kaya.

³K’ɛ́nɛ́, GASA WAN n’ɛnɛ kɔ̧a̧ o zuduk be Israɛl, o sa̧a̧ bíí lɛŋ a̧a̧ kɔ̧ er'nɛ́, wa guu nù sɛn ti'nɛ́, ɓɛɛ wa zii wen k’ɛ́nɛ́.

⁴Moisɛ yɔra heembea’ɛ h’ɛ́ɛ́ nɛ mɔɔ-oi ko o bem ko Jakob.

⁵Israɛl kpaa ŋma wan ŋgimbi nɛ o gasawi ko dukbíí mɔi̧a nɛnɛ kpɔk in o dùk be Israɛl.

⁶Rubɛn a̧ duk kpasa, ká a̧ fe na, ɓɛɛ o bíí kɔ̧-a̧ nɛ dɔk na'i a̧ duk siti.

⁷Ɓɛɛ war ko Juda n'aa tɔ̧a̧ nɛ mɔ'ɔ: «GASA WAN, ɛ̀nɛ̀ zíí tiger Juda, ɓɛɛ ɛ̀nɛ̀ mgbɔ́ a̧ sinɛ ɗoŋ tɛ o bíí kɔ̧-a̧. A̧ a̧ ŋgai nɛ te-er-a, ɓɛɛ ɛ̀nɛ̀ yé ɗoŋ-aa sɛn ti o wisɛn kɔ̧-a̧ mbɛt.»

⁸Mɔ n'aa tɔ̧a̧ zu Levii nɛ mɔ'ɔ: «GASA WAN, mɔɔ-tan-mɔ[10] k’ɛ́nɛ́ dúk nɛ ko wi nɛ mbo zu h’ɛ́nɛ́, n’ɛnɛ wee so sɛn Masa, in tɛ kpɛri nɛ dee so sɛn Mɛriba.

⁹Levii tɔ̧a̧ nde, wi zɔk dáà kɔ‘i in nàà kɔ‘i na, a̧ bɛ̧ɛ̧ iŋa o nya-a̧ lɛŋ, ɓɛɛ a̧ iŋ o bem kɔ̧-a̧ na mbɛt. O bezaŋ Levii kasa nɛ wen k’ɛ́nɛ́ in nɔɔ-tɔk k’ɛ́nɛ́.

¹⁰Wa usi nɛ o yuwar duka-a k’ɛ́nɛ́ ha̧ Jakob, in heembea k’ɛ́nɛ́ ha̧ Israɛl. Wa dɔ nɛ fuu-nyama h’ɛ́nɛ́, wa ɗafi nɛ sɔ̧ nɛ oi-aa lɛŋ zu fara-ɗafi'nɛ.

¹¹GASA WAN, ɛ̀nɛ̀ tók de yoŋgo zu wa ha̧ wa mɛ kpa mbe ŋgai siti; tom kɔ-wa a̧ de tɛ‘nɛ́. Ɛ̀nɛ̀ gbín gba̧a̧-tɛ o wisɛn kɔ-wa lɛŋ, k’ɛ́nɛ́ e ha̧ wa mɛ kur ti wa woyo ɓɔna.»

¹²Mɔ n'aa tɔ̧a̧ zu Bɛnjamin nɛ mɔ'ɔ: «Mɛ́ nɛ́ wi nɛ GASA WAN kɔ̧a̧ nyɛmna; a̧ ɔm nɛ tɛ-a, e nɛ ta nɛ wi-pɛm-a nɛ duk in a̧ ɓɔnsɛnɛ.»

¹³Mɔ n'aa tɔ̧a̧ zu Jozɛf nɛ mɔ'ɔ: «GASA WAN a̧ tok de yoŋgo zu nù kɔ̧-a̧. Kórò mɛ yiwese, mbɛŋ in yì mɛ ɗuka-fara,

¹⁴de waya-mɔ ko wese, in demɔ nɛ hɔ tɛ mbe yí-zɛ lɛŋ,

¹⁵o de ha̧a̧mɔ ko o kaya nɛ duk ɓeemɛ, in o de ha̧a̧mɔ ko o zu-tɔ̧́ nɛ duk kpoo nɛ kpoo,

¹⁶war demɔ lɛŋ nɛ duk tɛ nù kɔ̧-a̧, in kɔ̧ɔ̧mɔ ko Wi nɛ duka poo da̧a̧-be-te, mɔɔ nɔ‘i lɛŋ a̧ zir duk nɛ́ zu Jozɛf, wi nɛ Sɔ̧ hoka e nɛtɛ mgbara o nya-a̧.

¹⁷A̧ a̧a̧ nɛ ŋgai hee kuti be wiwii-ndai kɔ̧-a̧ ga, o zak-a nɛ́ o zak nam; a̧ tɛ gbɛ o wisɛn kɔ̧-a̧ nɛ zak-a hɔ sɛn nduti nù war kpɔk. O be gii ko Efraim nɛ́ mɔ'ɔ nɔ‘i, o be gii ko Manase nɛ́ mɔ'ɔ nɔ‘i.»

¹⁸Mɔ n'aa tɔ̧a̧ zu Zabulɔŋ nɛ mɔ'ɔ: «Zabulɔŋ, mɛ̀ kpá desee tɛ o yari kɔ-mɛ, ɓɛɛ kɔ-mɛ Isakar, mɛ̀ kpá desee kɔ̧ tua kɔ-mɛ.

¹⁹Wa sa nɛ o bíí si zu kaya mɛ ɗafi sɔ̧ nɛ yuwar-a; wa kpaa nɛ demɔ ɗɔɔ gba-tɔp in o demɔ nɛ̀ hu̧sa̧ ɗɔɔ nyɛmɛ.»

²⁰Mɔ n'aa tɔ̧a̧ zu Gad nɛ mɔ'ɔ: «De yoŋgo tɛ duk zu wi nɛ tɛ ndak Gad; a̧ baa fara hee dila fara a̧k ɓaa saɗi, kóó zu saɗi kɔ‘i ga.

²¹A̧ baa o kuti de nù er o wan e nɛ war nù kɔ̧-a̧, a̧ yee poo o gasawi. A̧ dee mɔ nyɛm nɛ ɗoŋ ɗafamɔ hee gasawi zu o wi-biro ko GASA WAN zu o be Israɛl ga.»

²²Mɔ n'aa tɔ̧a̧ zu Dan nɛ mɔ'ɔ: «Dan nɛ ŋma be dila nɛ kpíɗí tɛnɛ nɛ Basaŋ.»

²³Mɔ n'aa tɔ̧a̧ zu Nɛftalii nɛ mɔ'ɔ: «Nɛftalii a̧a̧ nɛ̀ de sɔnti nyɛmna, a̧ duna nɛ de yoŋgo ko GASA WAN; a̧ a̧ bá kɔ̧-a̧ nɛ yee-wese in ká̧-zan-mɛ́-ɗɔɔ.»

²⁴Mɔ n'aa tɔ̧a̧ zu Asɛr nɛ mɔ'ɔ: «Asɛr a̧ dúk nɛ wi nɛ kpaa de yoŋgo mgbara wa lɛŋ, a̧ a̧ kpá demɔ mgbara o nya-a̧ in a̧ a̧ pí̧ naŋ-a ɗɔɔ nɔ.

²⁵Mɔɔ-man-nú tua kɔ-mɛ a̧ dúk nɛ boi in ndɛrɛ, mɛ̀ dúk nɛ oi ŋgai kɔ-mɛ hɔ wese fio kɔ-mɛ.

²⁶«Israɛl, ŋma wi nɛ hɔɔ ŋmaa in Sɔ̧ bo na. A̧ ŋgan nɛ mɔ nɛ yiwese nɛ mgbara o tura-zan tɛ́ɛ̀ gbak nɛ mɛ nɛ ŋgai kɔ̧-a̧.

²⁷Sɔ̧ duka so kànà nɛ́ fara hu̧sa̧-a̧ kɔ-mɛ ɓɔnsɛnɛ, er-a nɛ duk kpoo nɛ kpoo nɛ mɔɔ-e-nɛ-ta kɔ-mɛ. A̧ ndaka o wisɛn kɔ-mɛ sɛn ti mɛ ɓɛɛ a̧ tɔ̧: ‹Mɛ̀ kúm wa lɛŋ!›

²⁸«Israɛl ɔm nɛ tɛ ɗɔɔ ga̧a̧mɔ; kpút-kpút ko Jakob fok ɛ̀nɛ̀ sitɛ nù nɛ alkamaari in mbe dɔ̧ɔ̧ a̧a̧ sɛnɛ, ɓɛɛ yiwese hɔ kórò hɔɔ hi̧i̧.

²⁹«Israɛl dúk nɛ desee! Mɛ́, nɛ̀ GASA WAN gbak’ɛ, nɛ́ o'o tɛ nyɛm ŋmaa in mɛɛ o? A̧ nɛ ŋgee-gui-mɔ kɔ-mɛ; gba-paa-de-ŋgai kɔ-mɛ nɛ a̧. O wisɛn kɔ-mɛ tɛ nasi mɛ takaɗi, mɛ tɛ i̧si̧ kànà nɛ kusi kɔ-wa nɛ naŋ-mɛ.»