Read Northwest Gbaya WEE-ƊOŊ-HEEMBEA 4 Bible Online

WEE-ƊOŊ-HEEMBEA 4 - Northwest Gbaya bible

WEE-ƊOŊ-HEEMBEA 4

¹«Kinii, o be Israɛl, ɛ̀nɛ̀ zíí o heembea in o yuwar duka-a n'am usi ɗoŋ dea-a nɛ̀ tom h’ɛ́nɛ́‘i; hegɔ ɛnɛ tɛ ya kpasa, ɓɛɛ ɛnɛ tɛ nɛ̀ɛ́ ba nù nɛ GASA WAN Sɔ̧ ko o dáà k’ɛ́nɛ́ ha̧a̧ h’ɛ́nɛ́.

²Ɛ́nɛ́ beka e ŋma mbe mɔ zu o gba̧a̧ heembea n'am tɛ usi h’ɛ́nɛ́‘i na, in ɛnɛ beka ba ŋma mɔ yinɛ sɛnɛ na mbɛt, wen h’ɛ́nɛ́ mɛ kasi o heembea ko GASA WAN Sɔ̧ k’ɛ́nɛ́ hee mɔ'ɔ n'am tɔ̧ h’ɛ́nɛ́ ga.

³Ɛnɛ baa zɔk mɔ nɛ Sɔ̧ dee sɛn Bal-Pɛɔr nɛ yí‘nɛ́; GASA WAN Sɔ̧ k’ɛ́nɛ́ kuma o bíí lɛŋ nɛ ndaka ɗoŋ sɔ̧ Bal mɛ Pɛɔr mgbara'nɛ́;

⁴ɓɛɛ k’ɛ́nɛ́ n’ɛnɛ ndaka ɗoŋ GASA WAN Sɔ̧ k’ɛ́nɛ́, ɛ́nɛ́ yá kpasa lɛŋ hɔ sɔsɔɔ.

⁵«Ɛ̀nɛ̀ zɔk, GASA WAN ha̧a̧ nú ha̧‘m mɛ usi o heembea in o yuwar duka-a h’ɛ́nɛ́, h’ɛ́nɛ́ mɛ ba de nɛ tom tɛ nù n’ɛnɛ tɛ nɛ mɛ ba'i.

⁶Ɛnɛ tɛ zɔk wa ba nɛ wa de nɛ tom; mɔ‘i tɛ de h’ɛ́nɛ́ mɛ ya nɛ o wi-iŋ-mgbara-mɔ in o wi-iŋ-mɔ yí o bíí nɛ tɛ zii o heembea nɔ‘i lɛŋ, ɓɛɛ wa tɛ tɔ̧: ‹Gasa dukbíí'ɛ kànà nɛ́ o wi-iŋ-mgbara-mɔ in o wi-iŋ-mɔ!›

⁷«Nɛ́ ge gasa dukbíí ge a̧ a̧a̧ nɛ o sɔ̧ hee GASA WAN Sɔ̧ k’ɛɛ nɛ de mɔ h’ɛ́ɛ́, ŋgimbi lɛŋ n’ɛɛ kɔf'aa ga ge?

⁸Nɛ́ ge gasa dukbíí ge a̧ kpaa o heembea in o yuwar duka-a nɛ ya nɛ̀ yuwar-a hee o heembea nɔ'ɔ n'am usi h’ɛ́nɛ́ sɔsɔɔ'ɛ ga ge?

⁹Hegɔ ɛ̀nɛ̀ bá zu'nɛ́. Ká tɛ‘nɛ́ bi ɗoŋ o mɔ lɛŋ n’ɛnɛ zɔka nɛ yí‘nɛ́ na. Ká wa yu kɔ̧ see'nɛ́ na ŋgimbi n’ɛnɛ duk kpasa, ɓɛɛ ɛ̀nɛ̀ úsí wa ha̧ o bem k’ɛ́nɛ́ in o be-koo'nɛ́.

¹⁰Tɛ‘nɛ́ a̧ mbaŋ ɗoŋ wese n’ɛnɛ yora so nɛnɛ ti GASA WAN Sɔ̧ k’ɛ́nɛ́ sɛn Hɔrɛb, ŋgimbi nɛ GASA WAN tɔ̧ɔ̧ nɛnɛ ha̧‘m: ‹Mɛ̀ mɔ́í̧ o bíí kɔ‘m a katɛ‘m. Mi kɔ̧ɔ̧ ha̧ wa mɛ zii wen kɔ‘m, ha̧ wa mɛ ku̧ naŋ yua'm ŋgimbi nɛ wa biti kpasa, in ha̧ wa mɛ usi wen kɔ‘m ha̧ o bem kɔ-wa.›

¹¹«Wese'i ɛnɛ ɗɔŋa pii ti, ɛnɛ yora ká̧ naŋ kaya; wee dama so zu-a, ɓɛɛ wee daŋ hɔ yiwese nɛ ti tum tura-zan in tum zɛ.

¹²GASA WAN tɔ̧ɔ̧ wen h’ɛ́nɛ́ nɛ yí wee, ɛnɛ zia tiger-a, ɓɛɛ ɛnɛ zɔk ŋma mɔ na, kànà nɛ tiger ɓɛɛ.

¹³A̧ wee ɗoŋ nɔɔ-tɔk kɔ̧-a̧ in'nɛ̀ɛ́, tɔ̧ nɛnɛ‘e ɛnɛ tɛ kasi o heembea kɔ̧-a̧ ɓu, ɓɛɛ a̧ yɔr wa sɛn zu ta yiitoo.

¹⁴Ɓɛɛ GASA WAN tɔ̧ so ha̧‘m mɛ usi o heembea in o yuwar duka-a h’ɛ́nɛ́ mɛ ba de nɛ tom tɛ nù n’ɛnɛ tɛ nɛ̀ɛ́ ba'i.»

¹⁵«Hee mɔ'ɔ n’ɛnɛ zɔk ŋma sɔnti bíí wese nɛ GASA WAN tɔ̧ɔ̧ so nɛ wen h’ɛ́nɛ́ nɛ̀ tɛ́ wee sɛn Hɔrɛb na ga, ɛ̀nɛ̀ zɔ́k tɛ‘nɛ́.

¹⁶K’ɛ́nɛ́ ɔr tɛ‘nɛ́ tɛ mboo géé-sɔ̧, kóó ŋma mɔ nɛ hɔɔ ŋmaa in sɔ̧, kóó gi̧ɔ̧ wiwii, kóó okoo,

¹⁷kóó ŋma saɗi nɛ duk sɛn mbɔɗɔnu, kóó ŋma nɔ̧́í̧,

¹⁸kóó nɛ ŋma saɗi-gbur-zaŋ nɛ nù, kóó nɛ ŋma zoro ɗɔɔ yì na mbɛt.

¹⁹K’ɛ́nɛ́ ba yí‘nɛ́ si ŋgɔn mɛ zɔk wese, nyaŋa-zɛ, o sɔra in o mɔ mɛ yiwese lɛŋ, h’ɛ́nɛ́ mɛ gbɛ zugur'nɛ́ nù, mɛ de tom ha̧ wa na, wen wa nɛ war mɔ nɛ GASA WAN Sɔ̧ k’ɛ́nɛ́ ha̧a̧ ha̧ o bíí dam fara lɛŋ ɗɔɔ yiwese’ɛ.

²⁰Ɓɛɛ k’ɛ́nɛ́, GASA WAN kaia'nɛ́, a̧ gboo'nɛ́ sɛn tɛ wee kɔ̧ lɔk sɛn Egiptɛ wen h’ɛ́nɛ́ mɛ ya nɛ o bíí kɔ̧-a̧, mɔɔ-oi kɔ̧-a̧ hee mɔ'ɔ n’ɛnɛ ya sɔsɔɔ ga.

²¹See GASA WAN tu̧u̧ in am wen zu'nɛ́, ɓɛɛ a̧ kan mɔ‘e ndé, mi beka ku Jurdɛn na in mi beka ye sɛn tɛ de nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ nɛ mɔɔ-oi na.

²²Mi tɛ fe tɛ nù'ɛ, mi beka ku Jurdɛn na, ɓɛɛ k’ɛ́nɛ́, ɛnɛ tɛ ku, ɓɛɛ ɛnɛ baa de nù‘i.

²³Ká tɛ‘nɛ́ bi ɗoŋ nɔɔ-tɔk nɛ GASA WAN Sɔ̧ k’ɛ́nɛ́ nɔɔ in'nɛ̀ɛ́ na, in k’ɛ́nɛ́ gasi ŋma gee sɛka-mɔ nɛ hɔɔ ŋmaa in mɔ nɛtɛ nɛtɛ nɛ GASA WAN Sɔ̧ k’ɛ́nɛ́ dora'nɛ́ sɛnɛ na.

²⁴Wen GASA WAN Sɔ̧ k’ɛ́nɛ́ nɛ́ ŋga wee-dɔ-mɔ, a̧ nɛ́ Sɔ̧ nɛ de gɔya dee.

²⁵«Ŋgimbi n’ɛnɛ tɛ kpa o bem in o be-koo'nɛ́, nɛ̀ zɛ‘nɛ́ be tɛ̀ɛ́ dɔk tɛ nù‘i, k’ɛ̀nɛ̀ ɔ́r tɛ‘nɛ́ mbo nɛ ŋma géé-sɔ̧, kóó nɛ ŋma ge mɔ ge ndé, k’ɛ̀nɛ̀ dé ŋma ɗaŋmɔ yí GASA WAN Sɔ̧ k’ɛ́nɛ́ mɛ tu̧ see-aa,

²⁶sɔsɔɔ mi baa yiwese in nù hee wi-sedaako kɔ‘m ga, ɛnɛ tɛ fe nɛ haya-a sɛn tɛ nù n’ɛnɛ tɛ ba nɛ kur Jurdɛn. Ɛnɛ beka ɔ hi̧i̧ ɗoŋ-aa nyɛi̧ na, ɓɛɛ ɛnɛ tɛ kum lɛŋ.

²⁷GASA WAN tɛ pɛsi'nɛ́ dam fara lɛŋ, ɓɛɛ kpar'nɛ́ beka dɔk sɛn mgbara o bíí nɛ GASA WAN tɛ mgbɔ‘nɛ́ si sɛnɛ‘i na.

²⁸Sɛn hi̧i̧ ɛnɛ tɛ gasi o géé-sɔ̧ nɛ bíí dee nɛ er: o te, o ta nɛ nyɛm mɛ zii mɔ, kóó nɛ zɔk mɔ na, in nɛ nyɛm mɛ nyɔŋ mɔ, kóó mɛ zii pɛr-mɔ na mbɛt.

²⁹Ɛnɛ tɛ ya fara'i kii nɛ GASA WAN Sɔ̧ k’ɛ́nɛ́; k’ɛ̀nɛ̀ nɛ́ kia a̧ nɛ see'nɛ́ lɛŋ in nɛ sɔ̧-tɛ‘nɛ lɛŋ, ɛ́nɛ́ tɛ kpa a̧.

³⁰Sɛn tɛ ɗaŋsee k’ɛ́nɛ́ ŋgimbi nɛ o mɔɔ nɔ‘i lɛŋ tɛ hɔ zu'nɛ́, ɛnɛ tɛ si ɗoŋ sitɛ GASA WAN Sɔ̧ k’ɛ́nɛ́, ɓɛɛ ɛnɛ tɛ zii tiger-a.

³¹Wen GASA WAN Sɔ̧ k’ɛ́nɛ́ nɛ́ Sɔ̧ nɛ de ko nyɛmna, a̧ beka e'nɛ́ duk na, in a̧ beka ɗaŋ‘nɛ́ yinɛ na mbɛt. Tɛ-a beka bi ɗoŋ nɔɔ-tɔk n'aa kana so mɔ sɛnɛ ha̧ o dáà k’ɛ́nɛ́ na.

³²«Ɛ̀nɛ̀ ák mɔ, h’ɛ́nɛ́ mɛ zii mɔ nɛ yaka nɛti h’ɛ́nɛ́. Ku̧u̧naŋ-a nɛ̀ Sɔ̧ dee nɛ bíí zu nù, ɛ̀nɛ̀ ák mɔ dam mgbii zan lɛŋ, pɛrti gasamɔ hegɔ hɔɔ kaɗi nde? Wa zia pɛrti mɔ hegɔ nɛti kaɗi nde?

³³Ŋma zuduk bíí zia tiger ŋma sɔ̧ hee k’ɛ́nɛ́ ga fara tɔ̧ wen nɛ yí wee, ɓɛɛ ka duk kpasa nde?

³⁴Kóó ŋma sɔ̧ wee so tɛa-a mɛ ba ŋma dukbíí mgbara o ŋma bíí nɛ̀ kɔ‘i, hee mɔ'ɔ nɛ GASA WAN Sɔ̧ k’ɛ́nɛ́ dee in'nɛ̀ɛ́ Egiptɛ mɛ ga nde? A̧ dee o ŋga weamɔ, o mɔɔ-usi-mɔ in o mɔɔ-kifi, o biro, o ŋgaŋamɔ, in o gasa mɔɔ-kíì nɛ yí‘nɛ́ kai nɛ̀ ɛnɛ gbonɛ nɛ̀ fara'i.

³⁵Ɛnɛ yaa so nɛ o wi-sedaako mɔ‘i wen h’ɛ́nɛ́ mɛ iŋ‘e, nɛ́ GASA WAN a̧ duk nɛ Sɔ̧; Sɔ̧ kpɔk kànà nɛ́ a̧ ɓɛɛ.

³⁶Nɛ̀ yiwese, a̧ dee h’ɛ́nɛ́ mɛ zii tiger-a wen h’ɛ́nɛ́ mɛ iŋ mɔ; sɛn mbɔɗɔnu, a̧ dee h’ɛ́nɛ́ mɛ zɔk leɓe-wee, ɓɛɛ ɛnɛ zia wen kɔ̧-a̧ tɛ wee.

³⁷Nɛ́ wen n'aa kɔ̧ɔ̧ so o dáà k’ɛ́nɛ́ sa a̧ hok o bezaŋ-wa, ɓɛɛ a̧ mgbɔ‘nɛ́ gbonɛ nɛ nú Egiptɛ nɛ gasa ŋgai kɔ̧-a̧,

³⁸ha̧ a̧ mɛ fo o gasa dukbíí in o ŋga dukbíí sɛn ti'nɛ́ yinɛ, ha̧ a̧ mɛ fo'nɛ́ ye nɛ nù kɔ-wa in ha̧ a̧ mɛ ha̧ nù kɔ-wa h’ɛ́nɛ́ nɛ mɔɔ-oi;

³⁹ɛ̀nɛ̀ kásí e kɔ̧ see'nɛ́: nɛ́ GASA WAN a̧ duk nɛ Sɔ̧ sɛn yiwese in sɛn mbɔɗɔnu, Sɔ̧ kpɔk kànà nɛ́ a̧ ɓɛɛ.

⁴⁰Ɛ̀nɛ̀ kásí o heembea in o geŋa kɔ̧-a̧ n'am ha̧‘nɛ́ sɔsɔɔ, wen h’ɛ́nɛ́ mɛ duk nɛ de-a, ɛnɛ in o bezaŋ‘nɛ́, h’ɛ́nɛ́ mɛ duk zu nù nɛ GASA WAN Sɔ̧ k’ɛ́nɛ́ ha̧a̧ h’ɛ́nɛ́ ɗoŋ-aa nyɛi̧.»

⁴¹Ɓɛɛ Moisɛ hok gasa ye taar nɛ kur Jurdɛn nɛ war daŋa-wese,

⁴²hee fara-hu̧si-tɛ ko wi nɛ gbɛ nya kɔ‘i nɛ̀ hɔɔ-kɔ-mɔ ga, nɛ̀ bó nɛ́ a̧ sɛna so a̧ nɛti na. Kà a̧ hu̧si tɛ ŋma ye nɔ‘i, a̧ tɛ kpasi.

⁴³Ko o bíí ko Rubɛn nɛ́ Bɛsɛr sɛn ŋga-gbárà tɛ tɔyɛɛ-gɔn-see-nù, ko o bíí ko Gad nɛ́ Ramot sɛn nú Galad, ɓɛɛ ko o bíí ko Manase nɛ́ Golaŋ sɛn nú Basaŋ.

⁴⁴Heembea nɛ Moisɛ usa ha̧ o be Israɛl nɛ́ mɔ'ɔ.

⁴⁵O usamɔ, o heembea in o yuwar duka-a nɛ Moisɛ usa ha̧ o be Israɛl ŋgimbi gboa-a kɔ-wa nɛ nú Egiptɛ,

⁴⁶sɛn kur Jurdɛn mgbara kaya mgbák ká̧ Bɛt-Pɛɔr nɛ́ mɔɔ nɔ'ɔ. Fara'i duka so nɛ nù ko Sihɔŋ, wannu ko o be Amɔr nɛ ɔ so sɛn Hɛsbɔŋ. Moisɛ in o be Israɛl baa bi so a̧ ɗoŋ nɛ wa gboo so nɛnɛ nɛ nú Egiptɛ.

⁴⁷Wa baa nù kɔ̧-a̧ in nù ko Og, wannu Basaŋ. O wi nɔ‘i yiitoo lɛŋ nɛ o wannu ko o be Amɔr nɛ kur Jurdɛn, nɛ war daŋa-wese,

⁴⁸ku̧u̧naŋ-a nɛ Arɔɛr nɛ duk kɔ̧ ɗɔŋgɔ Arnɔŋ hɔ nɛnɛ zu kaya Siɔŋ nɛ wa sa'e Hɛrmɔŋ,

⁴⁹gu nɛ Araba nɛ kur Jurdɛn, nɛ war daŋa-wese hɔ nɛnɛ tɛ gba-tɔp Araba[3] ká̧ naŋ kaya Pisga.