Read Northwest Gbaya WEE-ƊOŊ-HEEMBEA 5 Bible Online

WEE-ƊOŊ-HEEMBEA 5 - Northwest Gbaya bible

WEE-ƊOŊ-HEEMBEA 5

¹Moisɛ saa o be Israɛl lɛŋ, ɓɛɛ a̧ tɔ̧ ha̧ wa: «O be Israɛl, ɛ̀nɛ̀ zíí o heembea in o yuwar duka-a n'am tɔ̧ h’ɛ́nɛ́ sɔsɔɔ. Ɛ̀nɛ̀ yámbí wa nɛ de-a wen baa-a de nɛ̀ tom.

²GASA WAN Sɔ̧ k’ɛɛ nɔɔ tɔk in yɛɛ sɛn Hɔrɛb.

³Bo nɛ GASA WAN nɔɔ tɔk’ɛ in o dáà k’ɛɛ na, a̧ nɔɔ in yɛɛ n’ɛɛ ya kpasa lɛŋ sɔsɔɔ.

⁴GASA WAN tɔ̧ɔ̧ wen in yɛɛ nɛ yí, zu kaya, nɛ̀ tɛ́ wee.

⁵Mi duka kɔ‘m mgbara'nɛ́ in GASA WAN, ha̧‘m mɛ kifi mɔ n'aa tɔ̧ h’ɛ́nɛ́ wen kíì wee de'nɛ́ dee, ɓɛɛ ɛnɛ daŋ so si zu kaya na. «GASA WAN tɔ̧a̧:

⁶« ‹Mi nɛ GASA WAN Sɔ̧ kɔ-mɛ nɛ̀ baa mɛ gbonɛ nɛ nú Egiptɛ nɛ̀ kɔ̧ tua-bara.

⁷« ‹Mɛ beka gasi ŋma sɔ̧ gan zu'm na.

⁸« ‹Mɛ beka sɛk ŋma mɔ hee sɔ̧ ga, kóó ŋma mɔ nɛ hɔɔ ŋmaa in mɔ mɛ yiwese ŋgɔn mɛ, kóó nɛ mbɔɗɔnu hɛ̧ɛ̧ na, kóó nɛ ɗɔɔ yi na mbɛt.

⁹Mɛ beka gbɛ zugur-mɛ nù ti o sɔ̧ nɔ‘i na, in mɛ beka de tom ha̧ wa na mbɛt, wen mi nɛ GASA WAN Sɔ̧ kɔ-mɛ, mi nɛ Sɔ̧ nɛ de gɔya, nɛ kifi er ɗaŋmɔ ko o dáà ha̧ o bem hɔ tɛ o bezaŋ taar in naar kà wa nɛ́ sɛna'm;

¹⁰ɓɛɛ mi nɛ Sɔ̧ nɛ de demɔ in o bezaŋ ɗoŋ ŋmaa hegɔ hɔ tɛ booro, kà wa nɛ́ kɔ̧a̧‘m in kà wa kasi o heembea kɔ‘m.

¹¹« ‹Mɛ beka ba nin GASA WAN Sɔ̧ kɔ-mɛ nɛ ndela géè na, wen GASA WAN beka e wi nɛ ba nin-a nɛ ndela géè na.

¹²« ‹Tɛ-mɛ'ɛ mbaŋ ɗoŋ wese-ɔm-tɛ; mɛ̀ é a̧ nɛtɛ hee mɔ'ɔ nɛ GASA WAN baa tɔ̧ ha̧ mɛ ga.

¹³Mɛ tɛ de tom kɔ-mɛ lɛŋ sɛn tɛ zɛ mɔɔrɔ-ɗoŋ-kpɔk,

¹⁴ɓɛɛ mɔɔrɔ-ɗoŋ-yiitoo zɛ nɛ́ wese-ɔm-tɛ, nɛ̀ duk nɛ wese ko GASA WAN Sɔ̧ kɔ-mɛ. Mɛ beka de ŋma tom wese'i na, kóó nɛ mɛ, kóó nɛ bem kɔ-mɛ, kóó nɛ boko-bem kɔ-mɛ, kóó nɛ wi-de-tom kɔ-mɛ, kóó nɛ kó-de-tom kɔ-mɛ, kóó nɛ ŋma ndai kɔ-mɛ, kóó nɛ tuifuu kɔ-mɛ, koo nɛ ŋma saɗi kɔ-mɛ gu nɛ gɛnɛ nɛ a̧a̧ ye kɔ-mɛ, wen ha̧ wi-de-tom in kó-de-tom kɔ-mɛ mɛ ɔm tɛ-wa hee mɛ ga.

¹⁵Tɛ-mɛ'ɛ mbaŋ ɗoŋ bara nɛ mɛ dee so sɛn nú Egiptɛ, ɓɛɛ nɛ̀ GASA WAN Sɔ̧ kɔ-mɛ gboo mɛ sɛnɛ yinɛ nɛ ŋgai er-a; mɛ̀ nɛ́ wen mɔ‘i a̧ GASA WAN Sɔ̧ kɔ-mɛ kɔ̧ɔ̧ ha̧ mɛ mɛ ɔm tɛ-mɛ wese-ɔm-tɛ.

¹⁶« ‹Mɛ̀ tú̧ tɛ dáà kɔ-mɛ in nàà kɔ-mɛ, hee mɔ'ɔ nɛ GASA WAN Sɔ̧ kɔ-mɛ baa tɔ̧ so ha̧ mɛ ga, wen ha̧ mɛ mɛ duk nɛ de-a in ha̧ zɛ-mɛ mɛ dɔk sɛn zaŋnu nɛ GASA WAN Sɔ̧ kɔ-mɛ ha̧a̧ ha̧ mɛ.

¹⁷« ‹Ká mɛ gbɛ zu na.

¹⁸« ‹Ká mɛ de dàlà na.

¹⁹« ‹Ká mɛ zu̧ mɔ na.

²⁰« ‹Ká mɛ ɓir wen ndela e nú ŋma-mɛ na.

²¹« ‹Ká mɛ a see kóò ko ŋma-mɛ. Ká mɛ a see tua ko ŋma-mɛ na, in fɔ kɔ̧-a̧ in wi-de-tom kɔ̧-a̧, in kó-de-tom kɔ̧-a̧, in ndai kɔ̧-a̧, in tuifuu kɔ̧-a̧ in o mɔ kɔ̧-a̧ lɛŋ na.›

²²«O wen nɔ‘i, GASA WAN tɔ̧ɔ̧ h’ɛ́nɛ́ lɛŋ sɛn zu kaya, nɛ̀ tɛ́ wee nɛ mgbara tura-zan in tɛ tum nɛ hee ger, ɓɛɛ a̧ e ŋma mɔ zu-a na. A̧ yɔra wa zu sɛka-ta yiitoo n'aa ha̧a̧ ha̧‘m.»

²³«Ŋgimbi n’ɛnɛ zia nɛ̀ tiger bíí sɛn tɛ gasa tum in ŋgimbi nɛ̀ gasa kaya lɛŋ baa nɛ wee, o wan k’ɛ́nɛ́ in o gasawi mgbara'nɛ́ ɗɔla pii katɛ‘m,

²⁴ɓɛɛ wa tɔ̧: ‹GASA WAN Sɔ̧ k’ɛɛ usa gasamɔ kɔ‘i in ŋgai kɔ‘i h’ɛ́ɛ́, ɓɛɛ ɛɛ zii tiger-a tɛ wee. Sɔsɔɔ ɛɛ zɔka'e Sɔ̧ nyɛma tɔ̧ɔ̧ wen in bíí, ɓɛɛ ea a̧ ɓɔn kpasa.

²⁵Ɓɛɛ kinii ɛɛ tɛ e ha̧ gasa wee’ɛ mɛ dɔ yɛ gbɛ nde? K’ɛ̀ɛ̀ ɓɔ́n tɛ zia tiger GASA WAN Sɔ̧ k’ɛɛ, ɛɛ tɛ fe.

²⁶Nɛ́ ge bíí ge a̧ zia tiger kpasa Sɔ̧ fara tɔ̧ wen nɛ yí wee, ɓɛɛ ká ɓɔn kpasa hee ɛɛ ga kaɗi o?

²⁷Nɛ́ mɛ'ɛ tɛ duk ti; ha̧ mɛ mɛ zii wen lɛŋ nɛ GASA WAN Sɔ̧ k’ɛɛ tɛ tɔ̧; ɓɛɛ mɛ wee ɗoŋ mɔ lɛŋ nɛ GASA WAN Sɔ̧ k’ɛɛ tɛ tɔ̧ ha̧ mɛ. Ɛɛ tɛ zii, ɓɛɛ ɛɛ baa de nɛ tom.›

²⁸«GASA WAN Sɔ̧ zia wen lɛŋ n’ɛnɛ tɔ̧ɔ̧ ha̧‘m, ɓɛɛ a̧ tɔ̧ ha̧‘m'e, wi zia wen nɛ dukbíí'ɛ tɔ̧ɔ̧ ha̧‘m'i ɔ dee nyɛmna.

²⁹A̧ tɔ̧a̧: ‹Kà see-wa lɛŋ duk so kpɔk mɛ yu'm in mɛ zii heembea kɔ‘m dam ɗoŋ wese lɛŋ, wa tɛ̀ɛ́ ya nɛ de-a in o bem kɔ-wa mbɛt.

³⁰Mɛ̀ nɛ́, mɛ̀ tɔ̧́ ha̧ wa, wa a̧ si ɗoŋ kɔ̧ tua-laa kɔ-wa.

³¹Ɓɛɛ kɔ-mɛ, mɛ̀ dúk hɛ̧ɛ̧ in am, mi tɛ tɔ̧ o heembea in o yuwar duka-a lɛŋ ha̧ mɛ, wen ha̧ mɛ mɛ usi ha̧ wa mɛ de nɛ tom tɛ nù n'am ha̧a̧ ha̧ wa mɛ ba nɛ kɔ-wa.

³²« ‹Ɛnɛ tɛ de mɔ lɛŋ nɛ GASA WAN Sɔ̧ k’ɛ́nɛ́ tɔ̧ɔ̧ h’ɛ́nɛ́ nɛ yuwar-a; ɛnɛ beka a̧r si wiiko, kóó si gale na.

³³Ɛnɛ tɛ de mɔ hee mɔ nɛ GASA WAN Sɔ̧ k’ɛ́nɛ́ tɔ̧ɔ̧ h’ɛ́nɛ́ ga, wen h’ɛ́nɛ́ mɛ duk nɛ de-a, in ha̧ zɛ‘nɛ́ mɛ dɔk zu nù n’ɛnɛ tɛ ya sɛnɛ.› »