Read Northwest Gbaya WEE-ƊOŊ-HEEMBEA 6 Bible Online

WEE-ƊOŊ-HEEMBEA 6 - Northwest Gbaya bible

WEE-ƊOŊ-HEEMBEA 6

¹«O heembea in o yuwar duka-a nɛ GASA WAN Sɔ̧ k’ɛ́nɛ́ ha̧a̧ ha̧‘m mɛ usi h’ɛ́nɛ́, h’ɛ́nɛ́ mɛ ba de nɛ tom tɛ nù n’ɛnɛ tɛ ye sɛnɛ mɛ ba nɛ́ mɔɔ nɔ‘i.

²Mɛ̀ yú GASA WAN Sɔ̧ kɔ-mɛ, mɛ, o bem kɔ-mɛ in o be-koo-mɛ. Mɛ̀ kásí o heembea in o geŋa n'am ha̧ ha̧ mɛ wese lɛŋ nɛ mɛ duk kpasa, ha̧ zɛ-mɛ mɛ dɔk sɛn zaŋnu.

³Israɛl, mɛ tɛ zii o heembea nɔ‘i, ɓɛɛ mɛ kaia wa mɛ de nɛ tom ha̧ mɛ mɛ duk nɛ de-a in h’ɛ́nɛ́ mɛ dɔk gan kuti-a, hee mɔ'ɔ nɛ GASA WAN Sɔ̧ kɔ-mɛ baa ha̧ so nú ndé, wi tɛ ha̧ nù nɛ yibere in gɔrɔ fok sɛnɛ h’ɛ́nɛ́ ga.

⁴«Israɛl, mɛ zii! GASA WAN Sɔ̧ k’ɛɛ nɛ́ GASA WAN kpɔk ɓɛɛ.

⁵Mɛ tɛ kɔ̧ GASA WAN Sɔ̧ kɔ-mɛ nɛ see-mɛ lɛŋ, nɛ sɔ̧-tɛ-mɛ lɛŋ in nɛ ŋgai tɛ-mɛ lɛŋ.

⁶O heembea n'am ha̧a̧ ha̧ mɛ sɔsɔɔ tɛ duk sɛn kɔ̧ see-mɛ.

⁷Mɛ tɛ we ɗoŋ-aa ha̧ o bem kɔ-mɛ. Mɛ tɛ tɔ̧ wen-aa ha̧ wa ŋgimbi nɛ mɛ tɛ duk sɛn kɔ̧ tua kɔ-mɛ, in ŋgimbi nɛ mɛ tɛ yar, ŋgimbi nɛ mɛ tɛ ɔ nù in ŋgimbi nɛ mɛ tɛ kur.

⁸Mɛ tɛ de ŋma mɔɔ-sedaako-a kun er-mɛ, ɓɛɛ mɛ dee ŋma mɔɔ-sedaako-a ga̧i̧ sɔnti-mɛ.

⁹Mɛ tɛ yɔr wa sɛn tɛ o te-nú-tua in tɛ o kpar-nú-garo ye kɔ-mɛ.»

¹⁰«Ŋgimbi nɛ GASA WAN Sɔ̧ k’ɛ́nɛ́ tɛ de h’ɛ́nɛ́ mɛ ye sɛn tɛ nù n'aa kana mɔ sɛnɛ ha̧ a̧ mɛ ha̧ ha̧ o dáà k’ɛ́nɛ́ Abraham, Izak in Jakob, ɛnɛ tɛ kpa o de gasa ye nɛ̀ bó nɛ́ ɛnɛ a̧ mboa na.

¹¹Ɛnɛ tɛ kpa o tua nɛ duna nɛ o demɔ nɛtɛ nɛtɛ nɛ̀ bó nɛ́ ɛnɛ a̧ aa sɛnɛ na, o gɔna-yì nɛ̀ bó nɛ́ ɛnɛ a̧ za̧a̧ na, o nyak-dɔ̧ɔ̧[4] in o te-nɔ̧́ nɛ̀ bó nɛ́ ɛnɛ a̧ guna na mbɛt. Ɓɛɛ ŋgimbi n’ɛnɛ tɛ nyɔŋ mɔ zaŋ‘nɛ́ sur,

¹²tɛ‘nɛ́ a̧ mbaŋ ɗoŋ GASA WAN nɛ baa'nɛ gbonɛ kɔ̧ tua-bara nú Egiptɛ.

¹³Nɛ́ GASA WAN Sɔ̧ kɔ-mɛ a̧ mɛ tɛ yu, nɛ́ a̧ a̧ mɛ tɛ de tom ha̧ a̧, in nɛ́ nin-a a̧ mɛ tɛ kan nɛ mɔ.

¹⁴Ɛnɛ beka ndak ɗoŋ o ŋma sɔ̧ mgbara o sɔ̧ ko o bíí nɛ ya katɛ‘nɛ́ na,

¹⁵wen GASA WAN Sɔ̧ k’ɛ́nɛ́ nɛ de gɔya zu'nɛ́ a̧a̧ sɛn mgbara'nɛ́. Ɛnɛ zɔk tɛ‘nɛ́ wen ká nyimsea kɔ̧-a̧ tɛɛ tik zu'nɛ́, ɓɛɛ ká a̧ gbɛ‘nɛ́ zu nù yinɛ.

¹⁶«Ɛnɛ beka we GASA WAN Sɔ̧ k’ɛ́nɛ́ hee mɔ'ɔ n’ɛnɛ wee so nɛ a̧ sɛn Masa’ɛ ga na.

¹⁷Ɛnɛ tɛ kasi o wen o geŋa in o heembea ko GASA WAN Sɔ̧ k’ɛ́nɛ́ nɛ̀ de-a; nɛ́ mɔ n'aa yɔra h’ɛ́nɛ́.

¹⁸Ɛnɛ tɛ de mɔ nɛ ɔ tana in mɔ nɛ ɔ dee sɛn yí GASA WAN, h’ɛ́nɛ́ mɛ ya nɛ de-a, in h’ɛ́nɛ́ mɛ ba de nù nɛ GASA WAN Sɔ̧ k’ɛ́nɛ́ kana so mɔ sɛnɛ ha̧ o dáà k’ɛ́nɛ́,

¹⁹ndak nɛ o wisɛn k’ɛ́nɛ́ nyɛi̧ nɛ ɛnɛ hee mɔ'ɔ nɛ GASA WAN ha̧a̧ so nú ga.

²⁰«Ɓɛɛ sa̧a̧mɔ, ŋgimbi nɛ bem kɔ-mɛ be tɛ̀ɛ́ ak mɛ: ‹Wen ge sa GASA WAN Sɔ̧ k’ɛɛ yɔra o geŋa, o heembea in o yuwar duka-a nɔ'ɔ ge nde?›

²¹Mɛ tɛ tɔ̧ ha̧ bem kɔ-mɛ‘e: ‹Ɛɛ yaa so nɛ bara ko wannu Egiptɛ, ɓɛɛ GASA WAN gbo yɛ nɛ nú Egiptɛ nɛ ŋgai kɔ‘i.

²²GASA WAN dee so mɔɔ-usi-mɔ in o mɔɔ-kifi nɛ yí yɛ ha̧ ŋgamɔ mɛ tik zu Egiptɛ, zu wannu in o bíí kɔ̧ tua kɔ̧-a̧ lɛŋ.

²³Ɓɛɛ k’ɛɛ, a̧ gboo yɛ nɛ̀ hi̧i̧ ha̧ a̧ mɛ mgbɔ ɛɛ ye nɛ nu n'aa ha̧a̧ so nú-a ha̧ o dáà k’ɛɛ ndé, wi tɛ ha̧ h’ɛ́ɛ́.

²⁴GASA WAN tɔ̧ɔ̧ h’ɛ́ɛ́ mɛ kasi o heembea kɔ̧-a̧ lɛŋ de nɛ tom, in h’ɛ́ɛ́ mɛ yu GASA WAN Sɔ̧ k’ɛɛ, wen h’ɛ́ɛ́ mɛ ya nɛ de-a dam ɗoŋ wese lɛŋ in h’ɛ́ɛ́ mɛ ya kpasa hee mɔ'ɔ n’ɛɛ ya sɔsɔɔ ga.

²⁵Ɛɛ tɛ ya nɛ́ o wi-de-mɔ nɛ yuwar-a, k’ɛ̀ɛ̀ nɛ́ baa heembea'i lɛŋ de nɛ tom ti GASA WAN Sɔ̧ hee mɔ'ɔ n'aa ha̧a̧ nɛ nú-a ga.› »