Read Northwest Gbaya WEE-ƊOŊ-HEEMBEA 9 Bible Online

WEE-ƊOŊ-HEEMBEA 9 - Northwest Gbaya bible

WEE-ƊOŊ-HEEMBEA 9

¹«Israɛl mɛ zii! Mɛ tɛ ku Jurdɛn sɔsɔɔ, ha̧ mɛ mɛ bi o dukbíí nɛ gasa gan mɛ in nɛ ŋgaia gan mɛ ká bá nɛ̀ o gasa ye kɔ-wa nɛ wa mboo kusa garo zik nɛnɛ e ŋgɔn mɛ.

²Mɛ tɛ bi o bezaŋ Anak nɛ duk nɛ ŋma dukbíí nɛ kpar-wa ɔ kusa. Mɛ zia nyɛrɛ mɔ ko o bezaŋ Anak, mɛ iŋa wa mbɛt. Nɛ́ o'o nyɛma so mɛ yor ti wa o nde?

³Mɛ̀ íŋ sɔsɔɔ ndé, nɛ́ GASA WAN Sɔ̧ kɔ-mɛ a̧ duk ti mɛ ku nɛ Jurdɛn hee wee a̧ ndar mɔ ga. Nɛ́ a̧ a̧ tɛ kum wa, nɛ́ a̧ a̧ tɛ gbin gba̧a̧ tɛ-wa ti mɛ. Mɛ tɛ ndak wa, ɓɛɛ mɛ kuma wa nɛ haya-a hee mɔ'ɔ nɛ GASA WAN ha̧a̧ nɛ nú ha̧ mɛ ga.

⁴«Ŋgimbi nɛ GASA WAN Sɔ̧ kɔ-mɛ tɛ ndak wa yinɛ ti mɛ, ká mɛ ta nɛ kɔ̧ see-mɛ‘e, mɛ̀ nɛ́ wen deemɔ kɔ-mɛ nɛ yuwar-a a̧ GASA WAN ha̧a̧ nɛ nù‘i ha̧ mɛ na, ɓɛɛ mɛ̀ nɛ́ wen ɗaŋmɔ kɔ-wa a̧ Sɔ̧ ndaka nɛ wa yinɛ ti mɛ.

⁵Bo nɛ wen nɛ̀ mɛ́ nɛ́ wi-de-mɔ nɛ yuwar-a in see-mɛ ɔ tana a̧ mɛ tɛ ye nɛ nù kɔ-wa ba nɛnɛ na, ɓɛɛ mɛ̀ nɛ́ wen nɛ deemɔ kɔ-wa de na a̧ GASA WAN ndaka nɛ wa yinɛ, wen ha̧ ha̧a̧nú n'aa ha̧a̧ so ha̧ o dáà kɔ-mɛ Abraham, Izak in Jakob mɛ hɔ gba̧a̧.

⁶Mɛ̀ íŋ‘e ndé, bo nɛ wen deemɔ kɔ-mɛ nɛ yuwar-a a̧ GASA WAN Sɔ̧ kɔ-mɛ ha̧a̧ nɛ de nù'ɛ ha̧ mɛ na, wen ɛnɛ nɛ zuduk bíí nɛ a̧a̧ nɛ ŋgazu.

⁷«Tɛ-mɛ a̧ mbaŋ ɗoŋ ɗaŋsee nɛ Sɔ̧ kpaa zu mɛ sɛn ŋga-gbárà mɛ‘i. Ká tɛ-mɛ bi na. Ku̧u̧naŋ-a wese nɛ mɛ kura gbo nɛ nù Egiptɛ mɛ hɔ nɛnɛ sɔsɔɔ, mɛ́ é déé ŋgazu in GASA WAN duk na. Ɛnɛ yaa so de nɛ ŋgazu in GASA WAN.

⁸Sɛn Hɔrɛb, ɛnɛ tu̧u̧ see GASA WAN; see-aa ɗaŋa zu'nɛ́, ɓɛɛ a̧ ta mɔ mɛ kum'nɛ́ yinɛ.

⁹Ŋgimbi n'am daŋa nɛnɛ si zu kaya mɛ nɛ̀ɛ́ kai o sɛka-ta nɛ‘i yɔra o heembea nɔɔ-tɔk ko GASA WAN in'nɛ̀ɛ́ sɛnɛ, mi duka zu kaya zɛ in wese ɓu-naar, nyɔŋ mɔ na, nɔ yì na.

¹⁰GASA WAN ha̧a̧ o sɛka-ta yiitoo n'aa yɔra o heembea sɛnɛ nɛ̀ ta-tɛ-a in o wen n'aa tɔ̧ɔ̧ zu kaya nɛ̀ tɛ́ wee h’ɛ́nɛ́ wese mɔi̧a-a nɛ er-a ha̧‘m.

¹¹Nɛ́ ɗoŋ zɛ in wese ɓu-naar a̧ GASA WAN ha̧a̧ nɛ o sɛka-ta heembea nɔɔ-tɔk yiitoo ha̧‘m.

¹²«Ɓɛɛ GASA WAN tɔ̧ ha̧‘m: ‹Mɛ̀ kúr, mɛ̀ zír nɛ haya-a wen o bíí kɔ-mɛ nɛ mɛ mgbɔɔ gbonɛ nɛ Egiptɛ ɗaŋa kaɗi. Wa ee yuwar n'am usa ha̧ wa duk, wa nɔi̧a boi dui nɛ ŋma gee sɔ̧.›

¹³«Ɓɛɛ GASA WAN tɔ̧ ha̧‘m woyo: ‹Mi zɔka o wi nɔ'ɔ nɛ́ o wi-ŋgazu.

¹⁴Mɛ̀ é ha̧‘m kum wa yinɛ, ha̧‘m bi nin-wa sɛn zaŋnu yinɛ, ɓɛɛ mi tɛ de mɛ nɛ̀ zuduk nɛ̀ ɔ ŋgaya in nɛ̀ dɔka gan wa.›

¹⁵«Mi zika tɛ‘m mɛ zir nɛ zu kaya nɛ̀ wee dama zu-a lɛŋ‘i kasi nɛ sɛka-ta nɔɔ-tɔk yiitoo nɛ er-am yiitoo lɛŋ.

¹⁶Mi zɔka ɛnɛ dee ɗaŋmɔ in GASA WAN Sɔ̧ k’ɛ́nɛ́, ɛnɛ ee tana war nɛ GASA WAN usa so h’ɛ́nɛ́ duk, ɓɛɛ ɛnɛ nɔ̧́í̧ boi dui nɛ̀ be ndai.

¹⁷Ɓɛɛ mi kai o sɛka-ta heembea yiitoo, yo nɛ nù nɛ er-am yiitoo; mi gbaa wa nɛ yí‘nɛ́.

¹⁸Nɛ mɔ'ɔ n'am hɔ̧fa̧ woyo tik nù ti GASA WAN, tɛ zɛ in wese ɓu-naar, mi nyɔŋ mɔ na, mi nɔ yì na, wen zu ɗaŋmɔ n’ɛnɛ dea. Ɛnɛ ee tana war ko GASA WAN duk, de nɛ mɔɔ-ɗaŋ-see-aa.

¹⁹Mi dee kíì nyimsea in tu̧u̧-see ko GASA WAN nɛ see kura zu'nɛ́ ɓɛɛ nɛ kɔ̧ɔ̧ mɛ kum'nɛ́ lɛŋ. Ɓɛɛ nɛ mɔ'ɔ nɛ GASA WAN dee ko ha̧‘m woyo.

²⁰See GASA WAN ɗaŋa nyɛmna zu Arɔŋ mɛ gbɛ a̧ gbɛɛ; mi kɔfa mɔ in a̧ mbɛt wen Arɔŋ.

²¹Ɗaŋmɔ n’ɛnɛ dea'i, be ndai n’ɛnɛ mboa, mi baa pi̧ tɛ wee, mi gbina nduku-nduku, hɔ̧n lɛŋ kifi gee fuunu, ɓɛɛ mi kai a ɗɔɔ be-zer nɛ zir nɛ zu kaya.

²²«Ɛnɛ tu̧u̧ see GASA WAN sɛn Tabera, sɛn Masa in sɛn Kibrot-Taawa.

²³Ŋgimbi nɛ GASA WAN toma nɛ ɛnɛ nɛ Kadɛs-Barnɛa tɔ̧ nɛnɛ‘e: ‹Ɛ̀nɛ̀ nɛ́ɛ̀ bá nù n'am ha̧a̧ h’ɛ́nɛ́›, ɛ́nɛ́ dee ŋgazu tɛ wen ko GASA WAN Sɔ̧ k’ɛ́nɛ́; ɛ́nɛ́ kɔ̧ ɗɔaa ha̧ a̧ na, ɛnɛ mbo zu tɛ wen kɔ̧-a̧ na mbɛt.

²⁴Ɛnɛ dee ŋgazu in GASA WAN ku̧u̧naŋ-a nɛ̀ wese n'am iŋa nɛ ɛnɛ.

²⁵«Mi hɔ̧fa̧ tik nù ti GASA WAN tɛ zɛ in wese ɓu-naar wen n'aa tɔ̧ɔ̧ so'e, wi tɛ kum'nɛ́.

²⁶Mi kɔfa GASA WAN hee mɔ'ɔ ga: ‹GASA WAN Sɔ̧, k’ɛ́nɛ́ kum dukbíí k’ɛ́nɛ́, nɛ̀ duk nɛ mɔɔ-oi k’ɛ́nɛ́ na. Nɛ́ ɛnɛ a̧ baa gɔn zu wa tɛ gasamɔ k’ɛ́nɛ́, gbo nɛ wa nɛ nú Egiptɛ nɛ ŋgai-te-er'nɛ́.

²⁷Tɛ‘nɛ́ a̧ mbaŋ ɗoŋ o wi-de-tom k’ɛ́nɛ́ Abraham, Izak in Jakob. K’ɛ́nɛ́ pɛm nɛ ŋgazu, ɗaŋ in ɗaŋmɔ ko o wi nɔ'ɔ na,

²⁸wen ká o bíí nù n’ɛnɛ mgbɔɔ ɛɛ gbonɛ sɛn er wa tɛɛ tɔ̧‘e, GASA WAN bo so nɛ̀ ŋgai mɛ mgbɔ ɛɛ hɔ tɛ nù n'aa ha̧a̧ so nú-a sɛnɛ h’ɛ́ɛ́ na. Wa tɛ tɔ̧ mbɛt'e, mɛ̀ nɛ́ wen nɛ GASA WAN sɛna so ɛɛ nyɛmna sa a̧ mgbɔ ɛɛ gbonɛ ha̧ a̧ mɛ gbɛ ɛɛ sɛn gee ŋga-gbárà.

²⁹Bo nɛ wi nɔ'ɔ nɛ dukbíí k’ɛ́nɛ́ in mɔɔ-oi k’ɛ́nɛ́, n’ɛnɛ mgbɔɔ so gbonɛ nɛ nú Egiptɛ nɛ gasa ŋgai k’ɛ́nɛ́ in ŋgai te-er'nɛ́ na nde?› »