Read Northwest Gbaya JEAN 1 Bible Online

JEAN 1 - Northwest Gbaya bible

JEAN 1

¹Wen duka so nɛ̀ ku̧u̧naŋ-a mɛ, a̧ duka so kpɔk in Sɔ̧, ɓɛɛ Wen'i nɛ́ Sɔ̧.

²A̧ duka so in Sɔ̧ nɛ̀ ku̧u̧naŋ-a mɛ.

³Sɔ̧ dee mɔ lɛŋ nɛ̀ ɗoŋ-aa; ŋma mɔ nɛ̀ Sɔ̧ dea nɛ̀ bo nɛ̀ ɗoŋ-aa na, bo na.

⁴Duka-kpasa a̧a̧ so tɛ-a, ɓɛɛ duka-kpasa'i so nɛ́ sa̧a̧mɔ wen o bíí.

⁵Nɛ́ mɔ'ɔ nɛ̀ sa̧a̧mɔ‘i nyɛka ti tum, ɓɛɛ tum zii wen kɔ̧-a̧ na.

⁶Ɓɛɛ Sɔ̧ tom ŋma bíí, nin wi’ɛi nɛ́ Jean.

⁷A̧ nɛ́ wi-sedaako nɛ̀ tɛ̀ɛ́ wen sa̧a̧mɔ ha̧ o bíí lɛŋ mɛ kɔ̧ ɗɔaa ha̧ Sɔ̧ wen zu a̧.

⁸A̧ nɛ̀ kiitɛ-a bó nɛ́ sa̧a̧mɔ na, ɓɛɛ a̧ tɛ de nɛ́ sedaako wen sa̧a̧mɔ.

⁹Wen'i duka so nɛ́ kpasa sa̧a̧mɔ nɛ̀ tɛ̀ɛ́ zaŋnu mɛ nyɛk zu o bíí lɛŋ.

¹⁰A̧ duka so zaŋnu; Sɔ̧ dee nù nɛ̀ ɗoŋ-aa, ɓɛɛ o bíí zaŋnu iŋ a̧ na.

¹¹A̧ tɛ̀ɛ́ tɛ o mgbák bíí kɔ̧-a̧, ɓɛɛ o bíí kɔ̧-a̧‘i kpɛk a̧ na.

¹²Ɓɛɛ o wi nɛ̀ kpɛka a̧ in nɛ̀ kɔ̧ɔ̧ ɗɔaa há̧ a̧,[1] a̧ ha̧a̧ ŋgai ha̧ o wi nɔ‘i mɛ ya nɛ́ o bem ko Sɔ̧.

¹³Bó nɛ́ tɛ yuwar kóó bem ko bíí, kóó tɛ ŋgai mɛ kiitɛ-wi, kóó tɛ mɔ nɛ̀ bíí kɔ̧a̧ na; ɓɛɛ nɛ́ tɛ mɔ nɛ̀ Sɔ̧ kɔ̧a̧.

¹⁴Wen dee tɛ̀ nɛ̀ bíí, ɓɛɛ tɛ́ɛ̀ duk mgbara yɛ. Ɛɛ zɔka gasamɔ kɔ̧-a̧, ɓɛɛ gasamɔ‘i nɛ́ Dáà a̧ ha̧a̧ ha̧ a̧; a̧ nɛ́ kpɔk Bem kɔ̧-a̧ nɛ̀ duk nɛ́ wi-de-mɔ nɛ̀ ta-tɛ in wi-tɔ̧-kpasawen ɓɔnsɛnɛ.

¹⁵Ɓɛɛ Jean de sedaako wen wi’ɛi tɔ̧ nɛnɛ‘e: «Zɔ́k wi n'am tɔ̧ɔ̧ so'e tɛ tɛ ɗoŋ am’ɛ; a̧ gana'm wen a̧ duka so nɛti ha̧‘m.»

¹⁶Ɛ́ɛ́ lɛŋ nyɛma sɛnɛ nɛ̀ ɗoŋ dɔka deemɔ nɛ̀ ta-tɛ kɔ̧-a̧ h’ɛ́ɛ́ ɗoŋ ŋmaa hegɔ yaknɛ.

¹⁷Wen hee mɔ'ɔ nɛ̀ Sɔ̧ ha̧a̧ heembea h’ɛ́ɛ́ nɛ̀ ɗoŋ Moisɛ ga, hegɔ ɛɛ kpaa deemɔ nɛ̀ ta-tɛ in kpasawen mbɛt nɛ̀ ɗoŋ Jesu Krist.

¹⁸Ŋma bíí nɛ̀ zɔka Sɔ̧ bo na, kànà nɛ́ kpɔk bem kɔ̧-a̧ nɛ̀ duk kpɔk in a̧ á̧ usa a̧ h’ɛ́ɛ́ ɓɛɛ.

¹⁹Sedaako nɛ̀ Jean dea ŋgimbi nɛ̀ o Juif mɛ Jerusalɛm toma nɛ̀ wi-ɗafi-sɔ̧ in o be Levi nɛnɛ tɛ a̧, mɛ ak a̧‘e ndé: «Mɛ́ nɛ́ o?» wó, nɛ́ mɔ'ɔ.

²⁰Jean tɔ̧a̧, a̧ hu̧si na: «Kɔ‘m, mi bó nɛ́ Mɛsii na.»

²¹Ɓɛɛ wa ak a̧: «Mɛ́ nɛ́ o bɔɔ o? Mɛ́ nɛ́ Elii?» Ɓɛɛ a̧ kifi nú: «Weyaa, mi bó nɛ́ Elii na.» Ɓɛɛ wa ak a̧ woyo: «Mɛ́ nɛ́ wi-tɔ̧-wen oi nú Sɔ̧?» Ɓɛɛ a̧ kifi nú woyo: «Weyaa.»

²²Ɓɛɛ wa tɔ̧ ha̧ a̧: «Mɛ́ nɛ́ ge bíí ge k’ɛ̀ɛ̀ si ɗoŋ mɛ kifi nú ha̧ o wi nɛ toma yɛ tɛnɛ ge? Mɛ́ nɛ̀ tɛ̀-mɛ́, mɛ́ tɔ̧́ bɔɔ‘e mɛ́ nɛ́ o?»

²³Jean tɔ̧a̧: «Kɔ‘m, mi nɛ́ ‹bíí nɛ̀ hiɗi nɛ́ mɔ ŋga-gbárà mɛ‘e: Ɛ̀nɛ̀ ɗáfí yuwar ko Gasa Wan nɛ̀ yɔka-a!› » (Hee mɔ'ɔ nɛ̀ wi-tɔ̧-wen oi nú Sɔ̧, Esaii tɔ̧ɔ̧ so ga.)

²⁴O wi nɛ̀ wa toma so'i duka nɛ́ o Fariziɛn,

²⁵ɓɛɛ wa ak Jean siti woyo: «Mɛ́ bó nɛ́ Krist na, mɛ́ bó nɛ́ Elii na, mɛ́ bó nɛ́ Wi-tɔ̧-wen oi nú Sɔ̧ na mbɛt, ɓɛɛ sa mɛ zui bɔɔ o bíí wen ge?»

²⁶Jean kifa nú ha̧ wa: «Kɔ‘m, mi zui o bíí nɛ yì. Ɓɛɛ ŋma bíí a̧a̧ mgbara'nɛ́ n’ɛnɛ iŋ na;

²⁷wi’ɛi nɛ́ wi nɛ̀ tɛ́ ɗoŋ am, ɓɛɛ mi nyɛm mɛ bur nyak ndárà naŋ-a na.»

²⁸Mɔ‘i dea sɛn Betanii, kur Jurdɛn, fara nɛ̀ Jean duka so zui nɛ̀ o bíí sɛnɛ.

²⁹Nɛ̀ mɔ sa̧a̧, Jean zɔka Jesu tɛ tɛa-a pii tɛ-wi, ɓɛɛ tɔ̧: «Ɛ̀nɛ̀ zɔ́k Be-sami ko Sɔ̧ nɛ̀ ba ɗaŋmɔ ko bíí yinɛ.

³⁰Mɛ̀ nɛ́ wi n'am tɔ̧ɔ̧ so wen kɔ̧-a̧ h’ɛ́nɛ́‘e ndé: ‹Wi nɛ̀ tɛ́ tɛ̀ nɛ̀ ɗoŋ‘i, gana'm, wen a̧ duka so nɛti ha̧‘m.›

³¹Mi nɛ̀ tɛ‘m, mi iŋ so a̧ na; ɓɛɛ mɛ̀ nɛ́ wen ha̧ o be Israɛl mɛ iŋ a̧, a̧‘m tɛ̀ɛ́ nɛnɛ mɛ zui o bíí nɛ̀ yì.»

³²Ɓɛɛ Jean de sedaako tɔ̧ nɛnɛ‘e: «Mi zɔka Sa̧a̧ Ɔmi tɛ zira-a nɛ̀ yiwese hee gbaku̧i̧ ga duk zu a̧.

³³Mi iŋ so kɔ‘m a̧ nɛti na, ɓɛɛ wi nɛ̀ toma'm mɛ zui bíí nɛ̀ yì tɔ̧ɔ̧ ha̧‘m'e ndé: ‹Wi nɛ̀ mɛ tɛ zɔk Sa̧a̧ Ɔmi zira duk zu a̧, nɛ́ wi’ɛi a̧ zui bíí nɛ̀ Sa̧a̧ Ɔmi.›

³⁴Mi zɔka mɔ‘i ɓɛɛ s'am de sedaako'e, wi’ɛi nɛ́ Bem ko Sɔ̧.»

³⁵Nɛ̀ mɔ sa̧a̧, Jean duka kpɔk fara'i woyo in o ŋma ŋgaiwi kɔ‘i yiitoo;

³⁶a̧ mbaɗa Jesu fara ɓira-a yak hi̧i̧, ɓɛɛ a̧ tɔ̧: «Ɛ̀nɛ̀ zɔ́k Be-sami ko Sɔ̧!»

³⁷O ŋgaiwi kɔ̧-a̧ yiitoo'i zia wen'i, ɓɛɛ nɛ́ ɗoŋ Jesu.

³⁸Jesu zika tɛ, zɔk wa fara tɛa-a ɗoŋ a̧, ɓɛɛ ak wa: «Ɛnɛ kii nɛ́ ge?» Wa kifa nú ha̧ a̧: «Wan-usi-mɔ,[2] ɛ́nɛ́ ɔ bɔɔ de?»

³⁹Jesu tɔ̧ɔ̧ ha̧ wa: «Ɛ̀nɛ̀ tɛ́, ɛ̀nɛ̀ zɔ̀k.» Wa nɛ̀ɛ̀ zɔk fara n'aa duk sɛnɛ, ɓɛɛ wa ya in a̧ wese'i. (Ŋgimbi'i duka nɛ́ tɔ̧ŋɔ̧nyɔŋɔ̧ wese.)

⁴⁰Andre nya Simɔŋ-Pierre nɛ́ ɓii wi nɛ̀ zia wen ko Jean, ká nɛ́ ɗoŋ Jesu.

⁴¹Andre nɛ̀ɛ̀ kpa nya kɔ‘i Simɔŋ nɛti, ɓɛɛ tɔ̧ ha̧ a̧: «Ɛ́ɛ́ kpaa Mɛsii.» (Mɛ̀ nɛ́ wen nɛ̀ tɔ̧: «Krist».)

⁴²Ɓɛɛ Andre mgbɔ Simɔŋ sitɛ Jesu. Jesu mbaɗa Simɔŋ, ɓɛɛ tɔ̧: «Mɛ́ nɛ́ Simɔŋ bem ko Jean; wi tɛ sa mɛ‘e Sefas.[3] (Mɛ̀ nɛ́ wen nɛ tɔ̧‘e ‹Ta›).»

⁴³Nɛ̀ mɔ sa̧a̧, Jesu kɔ̧ɔ̧ mɛ nɛ si Galilee mɛ; nɛ́ mɔ'ɔ n'aa kpaa Filip, ɓɛɛ tɔ̧ ha̧ a̧: «Mɛ̀ tɛ́ ɗoŋ-am!»

⁴⁴Filip nɛ́ bíí Bɛtsaida, ye ko Andre in Pierre.

⁴⁵Filip nɛ̀ɛ̀ kpa Natanaɛl, ɓɛɛ tɔ̧ ha̧ a̧: «Ɛ́ɛ́ kpaa wi nɛ̀ wa yɔra so wen kɔ̧-a̧ zaŋ kalata heembea ko Moisɛ in zaŋ kalata ko o wi-tɔ̧-wen oi nú Sɔ̧. Wi’ɛi nɛ́ Jesu, bem ko Jozɛf, a̧ nɛ́ be Nazarɛt.»

⁴⁶Ɓɛɛ Natanaɛl kifi nú ha̧ Filip: «Ŋma demɔ tɛ̀ɛ́ tɛ̀ so nɛ̀ Nazarɛt nde?» Ɓɛɛ Filip tɔ̧: «Mɛ̀ tɛ́ mɛ̀ zɔ̀k.»

⁴⁷Jesu zɔka Natanaɛl fara tɛa-a pii tɛ, ɓɛɛ tɔ̧: «Wi’ɛ nɛ́ kpasa be Israɛl, nɛ̀ ɔramɔ bo tɛ-a na.»

⁴⁸Natanaɛl aka Jesu: «Ɛ́nɛ́ iŋa'm sɛn de?» Ɓɛɛ Jesu tɔ̧: «Mi zɔka mɛ ɗɔɔ te-mbɔra nɛti sɛka Filip bé tɛ̀ɛ́ sa mɛ.»

⁴⁹Natanaɛl kifa nú ha̧ a̧: «Wan-usi-mɔ, ɛ́nɛ́ nɛ́ Bem ko Sɔ̧, ɛ́nɛ́ nɛ́ wannu Israɛl!»

⁵⁰Jesu kifa nú: «Mɛ kɔ̧ɔ̧ ɗɔaa ha̧‘m wen n'am tɔ̧ɔ̧ ha̧ mɛ‘e, mi zɔka mɛ ɗɔɔ te-mbɔra. Ɓɛɛ mɛ tɛ zɔk o mbe gasamɔ nɛ̀ tɛ gan i̧i̧ woyo!

⁵¹Nɛ́ kpasawen a̧‘m tɔ̧ h’ɛ́nɛ́, yiwese tɛ hú̧í̧, ɓɛɛ ɛ́nɛ́ tɛ zɔk o betom ko Sɔ̧ fara daŋa-a in zira-a zu Bem ko bíí.»