Read Northwest Gbaya JEAN 10 Bible Online

JEAN 10 - Northwest Gbaya bible

JEAN 10

¹«Nɛ́ kpasawen a̧‘m tɔ̧ h’ɛ́nɛ́; wi nɛ̀ ye nɛ̀ nú ɓoramɔ sitɛ o sami na, ɓɛɛ nɛ̀ daŋ nɛ́ ɓoramɔ ye nɛnɛ nɛ̀ ŋma fara nɛtɛ, wi’ɛi nɛ́ wi-zuzu, a̧ nɛ́ kpɔ̧i̧-gba̧a̧-nin mbɛt.

²Ɓɛɛ wi nɛ̀ ye nɛ̀ nú ɓoramɔ nɛ́ wi-dai-sami.

³Wi-pɛm-ɓoramɔ hu̧i̧ nú ɓoramɔ ha̧ wi-dai-sami ɓɛɛ o sami zia tiger wi-dai-wa. A̧ sa o sami kɔ̧-a̧ kpɔk kpɔk nɛ̀ nin, ɓɛɛ a̧ mgbɔɔ wa gbonɛ.

⁴Ɗoŋ n'aa kaia wa gbonɛ lɛŋ kaɗi, a̧ duka ti, ɓɛɛ wa gbara nɛ́ ɗoŋ-aa, wen wa iŋa tiger-a.

⁵Wa beka nɛ́ ɗoŋ gɔni-bíí na; zu-a'i, wa tɛ yu nɛ́ a̧ ɛ̧, wen wa iŋ tiger gɔni-bíí na.»

⁶Jesu tɔ̧ɔ̧ lizaŋ‘i ha̧ o Fariziɛn, ɓɛɛ wa iŋ mgbara mɔ n'aa kɔ̧ɔ̧ mɛ tɔ̧‘i na.

⁷Nɛ́ mɔ'ɔ nɛ̀ Jesu tɔ̧ɔ̧ ha̧ wa woyo: «Nɛ́ kpasawen a̧‘m tɔ̧ h’ɛ́nɛ́; mi nɛ́ nú ɓoramɔ ko o sami.

⁸O wi nɛ̀ hɔɔ nɛti ha̧‘m lɛŋ nɛ́ o wi-zuzu, in o kpɔ̧i̧-gba̧a̧-nin mbɛt; o sami iŋ tiger-wa na.

⁹Mi nɛ́ nú tua, wi nɛ̀ ye nɛ̀ tɛ‘m, tɛ kpasi; a̧ tɛ ye, ɓɛɛ a̧ gboo pii ɗoŋ mbɛt, ɓɛɛ nyɔŋmɔ beka ɓan a̧ na.

¹⁰Wi-zuzu tɛ kɔ‘i mɛ zu̧ mɔ, gbɛ nɛ̀ mɔ, ɗaŋ nɛ̀ mɔ yinɛ, ɓɛɛ kɔ‘m, mi tɛ̀ɛ̀ ha̧ o bíí mɛ kpa duka-kpasa, ɓɛɛ ha̧ duka-kpasa kɔ-wa'i, mɛ nyɛm sɛnɛ war kpɔk.

¹¹«Mi nɛ́ de wi-dai-sami; de wi-dai-sami tɛ fe wen zu o sami kɔ‘i.

¹²Wi nɛ̀ de tom-daia-sami wen sede, nɛ̀ bó nɛ́ kpasa wi-dai-sami na, in nɛ̀ sami bó nɛ́ kɔ̧-a̧ na, zɔk gbóò fara tɛa-a, ɓɛɛ ee o sami duk, yu kɔ‘i mɔ yak; gbóò gbɛɛ o ŋma sami, ɓɛɛ pɛsi o oi-aa sót-sót.

¹³Wen wi’ɛi de kɔ‘i nɛ́ tom-sede, ɓɛɛ wen kɔ̧-a̧ bó nɛ̀ o sami na.

¹⁴Mi nɛ́ de wi-dai-sami; mi iŋa o sami kɔ‘m, ɓɛɛ o sami kɔ‘m iŋa'm,

¹⁵hee mɔ'ɔ nɛ̀ Dáà iŋa nɛ‘m, ɓɛɛ ká‘m iŋ Dáà mbɛt’ɛ ga. Mi tɛ fe wen zu o sami kɔ‘m.

¹⁶Mi a̧a̧ nɛ̀ o sami nɛ̀ bo mgbara o ɛ̧ɛ̧ kɔ̧̀ ɓoramɔ'ɛ na; o i̧i̧ nɔ‘i mbɛt tɛ zii tiger-am, ɓɛɛ mi tɛ mɔi̧ kànà wa tɛnɛ a zu o ɛ̧ɛ̧ nɔ'ɔ, ha̧ dùk-sami mɛ duk kpɔk, wi-dai-wa kpɔk mbɛt.

¹⁷«Dáà kɔ̧a̧‘m, wen n'am kɔ̧ɔ̧ ɗɔaa mɛ fe, ha̧‘m mɛ kpasi nɛ̀ ɗoŋ.[10]

¹⁸Bó nɛ́ doole a'i de nɛ̀‘m na, ɓɛɛ nɛ́ mi a̧‘m kɔ̧ɔ̧ nɛ̀ ta-tɛ‘m, wen mi a̧a̧ nɛ̀ ŋgai mɛ fe, ɓɛɛ mi a̧a̧ nɛ̀ ŋgai mɛ kpasi mbɛt. Mɔ nɛ̀ Dáà kɔ‘m tɔ̧ɔ̧ ha̧‘m mɛ de nɛ́ mɔ‘i.»

¹⁹Wen'i dee ha̧ o Juif mɛ kpɛr in o ŋmaa woyo.

²⁰O dɔka bíí mgbara wa tɔ̧ɔ̧‘e: «Ɗaŋ-sɔ̧ a̧a̧ tɛ-a, wen kɔ̧-a̧ ɔ lem-le-lem géè, wi-zii-wen kɔ̧-a̧ bo a̧a̧ na.»

²¹O ŋma tɛ̀ɛ̀ tɔ̧ kɔ‘i: «Wi nɛ̀ ɗaŋ-sɔ̧ a̧a̧ tɛ-a tɔ̧ wen hegɔ na. Ɗaŋ-sɔ̧ nyɛma so mɛ de ha̧ wi-boma-yí mɛ zɔk mɔ?»

²²Wa de nɛ́ gbaŋa Tua ko Sɔ̧ sɛn Jerusalɛm, ŋgimbi'i duka so nɛ́ bɛɛ.

²³Jesu duka yar nɛ̀ ɗɔɔ zala ko Salomɔŋ nɛ̀ kɔ̧́ Tua ko Sɔ̧.

²⁴Nɛ́ mɔ'ɔ nɛ̀ o Juif mɔi̧a zik a̧ e see-a ɓɛɛ tɔ̧: «Mɛ̀ tɔ̧́ wan wen ha̧ see yɛ ga̧ na nde? Kà mɛ nɛ́ bòò nɛ́ Mɛsii nɛ̀ mbetɛ, nɛ̀ mɛ̀ tɔ̧́ h’ɛ́ɛ́ bóóŋ!»

²⁵Ɓɛɛ Jesu kifi nú ha̧ wa: «Mi tɔ̧ɔ̧ so h’ɛ́nɛ́ kaɗi, ɓɛɛ ɛ́nɛ́ kɔ̧ ɗɔaa na. O tom n'am de nɛ̀ nin Dáà kɔ‘m de nɛ́ sedaako wen am,

²⁶ɓɛɛ ɛ́nɛ́ kɔ̧ ɗɔaa ha̧‘m na, wen ɛ́nɛ́ bó nɛ́ o sami kɔ‘m na.

²⁷O sami kɔ‘m zii nɛ́ tiger-am; mi iŋa wa, ɓɛɛ wa ndak nɛ́ ɗoŋ-am.

²⁸Kɔ‘m, mi ha̧ nɛ́ duka-kpasa kpoo nɛ kpoo ha̧ wa; wa beka fe ɓɔna ndó-ndó-ndó, ɓɛɛ ŋma wi-ɓar-wa er-am yinɛ bo na.

²⁹Dáà kɔ‘m nɛ̀ ha̧a̧ wa ha̧‘m gana mɔ lɛŋ,[11] ɓɛɛ ŋma bíí nɛ̀ nyɛma mɛ ɓar mɔ yinɛ kɔ̧̀ er Dáà bo na.

³⁰Mi in Dáà, ɛ́ɛ́ kpɔk.»

³¹O Juif kaia ta woyo mɛ yo nɛ̀ a̧.

³²Ɓɛɛ Jesu tɔ̧ ha̧ wa: «Ɛ́nɛ́ zɔka dɔka de tom nɛ̀ tɛ́ nɛ̀ tɛ̀ Dáà n'am dee nɛ̀ gbaayí‘nɛ́, ɓɛɛ sɛn mgbara o tom nɔ‘i, nɛ́ ge-aa ge ɛ́nɛ́ kɔ̧ɔ̧ mɛ yo'm wen-aa ge?»

³³O Juif kifa nú ha̧ a̧: «Bó nɛ́ ɛ́ɛ́ kɔ̧ɔ̧ mɛ yo mɛ wen zu ŋma de tom na; ɓɛɛ mɛ̀ nɛ́ wen nɛ̀ mɛ ɗaŋ nɛ́ nin Sɔ̧. Mɛ́ nɛ́ bíí sɔɔ géè, ɓɛɛ mɛ‘e wi nɛ́ Sɔ̧.»

³⁴Jesu kifa nú ha̧ wa: «Bó nɛ́ wa yɔra zaŋ kalata heembea k’ɛ́nɛ́‘e: ‹Mi'e, ɛ́nɛ́ nɛ́ o sɔ̧,› na nde?

³⁵Kalata heembea sa o wi nɛ̀ Sɔ̧ tɔ̧ wen kɔ‘i ha̧ wa'e o sɔ̧, ɓɛɛ wi nyɛm mɛ kpai mɔ nɛ̀ Yɔramɔ tɔ̧a̧ na.

³⁶Ɛ́nɛ́ tɔ̧ bɔɔ ha̧‘m, wi nɛ̀ Dáà hoka tom tɛnɛ zaŋnu'e, mi ɗaŋ nɛ́ nin Sɔ̧ wen n'am tɔ̧‘e mi nɛ́ Bem ko Sɔ̧ wó'ɛ, wen ge?

³⁷Tom n'am de'i nɛ́ bòò nɛ́ tom ko Dáà kɔ‘m na, ɓɛɛ k’ɛ́nɛ́ kɔ̧ ɗɔaa ha̧‘m na.

³⁸Kà nɛ́ bòò nɛ́ tom ko Dáà a̧‘m de'i, kóó ɛ̀nɛ̀ kɔ̧ ɗɔaa ha̧‘m na, n’ɛ̀nɛ̀ kɔ̧́ ɗɔɔ o tom nɔ‘i, ɓɛɛ ɛ̀nɛ̀ íŋ nɛ̀ sa̧a̧-a̧‘e, Dáà duk tɛ‘m, ɓɛɛ mi duk tɛ Dáà.»

³⁹Wa kia mɛ ba a̧ woyo, ɓɛɛ a̧ gbo er-wa yak.

⁴⁰Jesu sii ɗoŋ woyo si kur Jurdɛn, fara nɛ̀ Jean duka so sɛnɛ zui nɛ̀ o bíí, ɓɛɛ a̧ duk ɓɔn hi̧i̧.

⁴¹O bíí nɛ̀ dɔka-a nɛ̀ɛ̀ tɛ-a, ɓɛɛ wa tɔ̧: «Nɛ́ mbetɛ, Jean de ŋma mɔɔ-usi-mɔ kpɔk na; ɓɛɛ mɔ lɛŋ n'aa tɔ̧ɔ̧ zu wi’ɛ nɛ́ kpasawen.»

⁴²Ɓɛɛ o bíí nɛ̀ dɔka-a kɔ̧ ɗɔaa ha̧ Jesu fara'i.