Read Northwest Gbaya JEAN 11 Bible Online

JEAN 11 - Northwest Gbaya bible

JEAN 11

¹Ŋma bíí duka so ɔ nɛ́ zɛɛ, nin wi’ɛi nɛ́ Lazar, be Betanii, ye ko Marii in nya-a̧ Marthe.

²(Nɛ́ kale kpɔk Marii'i a̧ tɛna so nɔ̧́-nyama a zu naŋ Gasa Wan ɓɛɛ nyiŋ nɛ̀ mui̧-zu. Lazar nɛ̀ ɔ zɛɛ‘i nɛ́ bu̧i̧-nya-a̧.)

³Ɓɛɛ o boko-bem nɔ‘i tom nɛnɛ ha̧ Jesu'e ndé: «Gasa Wan, gasa sɛm k’ɛ́nɛ́ ɔ nɛ́ zɛɛ.»

⁴Jesu zia wen'i ɓɛɛ tɔ̧: «Zɛɛ‘i bó nɛ́ zɛɛ-fio na. Nɛ́ tɛ́ mɔ‘i a'i tɛ zɔk nɛ̀ gasamɔ ko Sɔ̧, in nɛ́ tɛ́ mɔ‘i mbɛt a'i tɛ zɔk nɛ̀ gasamɔ ko Bem ko Sɔ̧.»

⁵Jesu kɔ̧ɔ̧ so Marthe in boko-nya-a̧ ká bá nɛ̀ Lazar batɛ.

⁶A̧ zia'e Lazar ɔ nɛ́ zɛɛ wó, ɓɛɛ a̧ mbosi zɛ yiitoo woyo sɛn fara n'aa duk sɛnɛ‘i.

⁷Ɗoŋ ŋgimbi'i ɓɛɛ a̧ tɔ̧ ha̧ o ŋgaiwi kɔ̧-a̧: «Ɛ̀ɛ̀ sí ɗoŋ Judee.»

⁸O ŋgaiwi kɔ̧-a̧ kifa nú ha̧ a̧: «Wan-usi-mɔ, o Juif tɛ̀ɛ́ yò‘nɛ́ nɛ̀ ta gbɛ ɓan na hɛ̧ɛ̧, ɓɛɛ ɛ́nɛ́ kɔ̧ɔ̧ mɛ́ si ɗoŋ hi̧i̧ woyo?»

⁹Jesu kifa nú ha̧ wa: «Bó nɛ́ wese kpɔk a̧a̧ nɛ̀ ŋgimbi ɓu-zua-yiitoo na nde? Wi nɛ̀ yar mɛ wese kɔ̧ naŋ na, wen a̧ zɔk nɛ́ sa̧a̧mɔ zaŋnu’ɛ,

¹⁰ɓɛɛ wi nɛ̀ yar mɛ zɛ, tɛ́ kɔ̧ naŋ, wen sa̧a̧mɔ bo tɛ-a na.»

¹¹Ɗoŋ wen'i, ɓɛɛ a̧ tɔ̧ woyo: «Wiyɛ k’ɛɛ Lazar ɔ nɛ́ yá, mi tɛ nɛ̀ɛ́ tun a̧.»

¹²O ŋgaiwi kɔ̧-a̧ tɔ̧a̧: «Gasa Wan, kà bó nɛ́ yá a̧ a̧ ɔ, a̧ tɛ kpasi.»

¹³Jesu tɔ̧ɔ̧ nɛ́ wen fio ko Lazar, ɓɛɛ o ŋgaiwi kɔ̧-a̧ tɔ̧ kɔ‘i'e a̧ tɔ̧ nɛ́ wen ɔɔ yá géè.

¹⁴Nɛ́ mɔ'ɔ nɛ̀ Jesu tɔ̧ɔ̧ ha̧ wa nɛ̀ sa̧a̧-a̧‘e: «Lazar fea,

¹⁵ɓɛɛ boa-a kɔ‘m hi̧i̧ na'i ha̧ nɛ́ desee ha̧‘m wen'nɛ́, kà bé de k’ɛ́nɛ́ kɔ̧ɔ̧ ɗɔaa ha̧‘m. Kaɗa, ɛ̀ɛ̀ yák sitɛ a̧ mɛ.»

¹⁶Ɓɛɛ Tomas nɛ̀ wa sa'e Be-dan[12] tɔ̧ ha̧ oi o dɔka ŋgaiwi: «Ɛ̀ɛ̀ nɛ́ in a̧; kà bó nɛ́ fio, ɓɛɛ k’ɛ́ɛ́ fee in a̧ mbɛt.»

¹⁷Jesu hɔɔ Betanii, ká wa guna Lazar dee zɛ naar kaɗi.

¹⁸Nyɛi̧a mgbara Betanii in Jerusalɛm tɛ duk hee kilomɛtrɛ taar ga, ɓɛɛ

¹⁹o Juif nɛ̀ɛ̀ so nɛ̀ dɔka-a mɛ duk in Marthe in Marii oi fio bu̧i-nya-wa.

²⁰Marthe zia'e Jesu a̧ tɛ‘i wó, ɓɛɛ kur we ti a̧, ɓɛɛ Marii duk kɔ‘i ɓɔn sɛn kɔ̧́ tua mɛ.

²¹Marthe tɔ̧ɔ̧ ha̧ Jesu: «Gasa Wan, ɛ́nɛ́'ɛ bo so hɛ̧ɛ̧ gáà, bó nɛ́ bu̧i-nya'm tɛ̀ɛ́ fe na.

²²Ɓɛɛ kóó kinii mbɛt, mi iŋa'e mɔ lɛŋ n’ɛnɛ tɛ kɔfi er Sɔ̧, Sɔ̧ tɛ ha̧ h’ɛ́nɛ́.»

²³Jesu tɔ̧ɔ̧ ha̧ a̧: «Bu̧i-nya-mɛ tɛ kpasi.»

²⁴Marthe kifa nú: «Mi iŋa'e a̧ tɛ kpasi sɔŋkur wese, ŋgimbi nɛ̀ o wi nɛ̀ fea tɛ kur tɛ fio.»

²⁵Jesu tɔ̧ɔ̧ ha̧ wa: «Mí nɛ́ kura-ŋgɔn, in duka-kpasa. Wi nɛ̀ kɔ̧ ɗɔaa ha̧‘m, kóó a̧ fee so, a̧ tɛ duk kpasa,

²⁶ɓɛɛ kóó o ndé nɛ̀ duk kpasa, nɛ̀ kɔ̧ ɗɔaa ha̧‘m, beka fe ɓɔna. Mɛ́ kɔ̧ɔ̧ ɗɔɔ wen'i nde?»

²⁷Marthe kifa nú: «Íì, Gasa Wan, mi kɔ̧ɔ̧ ɗɔaa'e ɛ́nɛ́ nɛ́ Mɛsii, Bem ko Sɔ̧ nɛ̀ tɛ́ tɛ̀ zaŋnu.»

²⁸Ɗoŋ wen'i Marthe nɛ̀ɛ̀ sa nya-a̧ Marii ɓɛɛ fu̧i̧ wen ha̧ a̧: «Wan-usi-mɔ hɔa; a̧ sa nɛ́ mɛ.»

²⁹Marii zia wen'i ɓɛɛ kur nɛ̀ haya-a nɛ́ tɛ̀ Jesu.

³⁰Ŋgimbi'i, Jesu tɛ ye saaye hɔ̧ɔ̧ na; a̧ ɓɔna sɛn fara nɛ̀ Marthe kpaa a̧ sɛnɛ.

³¹O Juif nɛ̀ nɛ̀ɛ̀ so mɛ duk in Marii oi fio zɔka'e a̧ kura nɛ̀ haya-a gbo, ɓɛɛ wa nɛ́ ɗoŋ-aa, wen wa ta kɔ-wa'e, a̧ nɛ́ mɛ hi̧i̧ kɔ̧a̧ zu pɛsi-fio mɛ.

³²Marii hɔɔ fara nɛ̀ Jesu duk sɛnɛ‘i; n'aa bé zɔk a̧, ɓɛɛ a̧ hɔ̧fi̧ tik nù ká̧ naŋ-a, ɓɛɛ tɔ̧ ha̧ a̧: «Gasa Wan, ɛ́nɛ́'ɛ bó so hɛ̧ɛ̧ gáà, ɓɛɛ bó nɛ́ bu̧i-nya'm tɛ̀ɛ́ fe na!»

³³Jesu kpaa ɗaŋsee ɓɛɛ sakali mbɛt, ŋgimbi n'aa zɔka Marii in o Juif nɛ̀ tɛ̀ɛ̀ in a̧ fara hi̧i̧ kɔ̧a̧,

³⁴ɓɛɛ Jesu ak wa: «Ɛ́nɛ́ guna a̧ sɛn déè?» Ɓɛɛ wa tɔ̧ ha̧ a̧: «Gasa Wan, ɛ̀nɛ̀ tɛ́, ɛ̀nɛ̀ zɔ̀k.»

³⁵Ɓɛɛ Jesu hi̧i̧ kɔ̧a̧.

³⁶Ɓɛɛ o Juif tɔ̧: «Wi’ɛ kɔ̧ɔ̧ a̧ batɛ.»

³⁷O ŋma bíí mgbara wa tɔ̧a̧: «Wi’ɛ nɛ̀ hu̧i̧a̧ so yí wi-boma-yí'ɛ nyɛm so mɛ dor fio ká gbɛ Lazar na nde?»

³⁸See Jesu ɗaŋa woyo, ɓɛɛ a̧ nɛ́ si zu pɛsi mɛ. Pɛsi'i nɛ́ ŋma di̧i̧ nɛ̀ wa kpee nú-a nɛ̀ ta.

³⁹Jesu tɔ̧a̧: «Ɛ̀nɛ̀ kín ta’ɛ yinɛ!» Marthe, boko-nya wan-fio tɔ̧ɔ̧ ha̧ Jesu: «Gasa Wan, fio nɛ̀ dee zɛ naar kaɗi’ɛ, pɛr-aa nuna kaɗi.»

⁴⁰Jesu tɔ̧a̧: «Bó nɛ́ mi tɔ̧ɔ̧ so ha̧ mɛ‘e, kà mɛ nɛ́ kɔ̧ɔ̧ ɗɔaa ha̧‘m, ɓɛɛ mɛ́ tɛ́ zɔk gasamɔ ko Sɔ̧ na nde?»

⁴¹Ɗoŋ nɛ̀ wa kina ta yinɛ kaɗi, Jesu ɓera yí zɔk mɔ si yiwese, ɓɛɛ tɔ̧: «Dáà, mi de osoko h’ɛ́nɛ́ wen n’ɛnɛ zia kɔfamɔ kɔ‘m.

⁴²Nɛ̀ mbetɛ, mi iŋa'e, ɛ́nɛ́ zii kɔfamɔ kɔ‘m zii ɓɔnsɛnɛ; ɓɛɛ mi tɔ̧ wen’ɛ wen o wi nɔ'ɔ nɛ̀ ya zik am’ɛ, wen ha̧ wa mɛ kɔ̧ ɗɔaa'e nɛ́ ɛ́nɛ́'ɛ toma'm tɛnɛ.»

⁴³Ɗoŋ wen'i, ɓɛɛ a̧ hiɗi mɔ nɛ̀ ŋgaya-a, tɔ̧ nɛnɛ‘e: «Lazar, mɛ̀ gbó!»

⁴⁴Ɓɛɛ wi nɛ̀ fee so'i gbo nɛ̀ oi hɛra naŋ in er nɛ̀ wa hɛra so nɛ̀ laa, ɓɛɛ ndɔmbɔ nɛ̀ wa hɛra nɛ̀ yí-a duka ɓɔn oi-aa. Ɓɛɛ Jesu tɔ̧ ha̧ o bíí: «Ɛ̀nɛ̀ búr a̧, ha̧ a̧ yák mɔ kɔ̧-a̧.»

⁴⁵O Juif nɛ̀ dɔka-a nɛ̀ nɛ̀ɛ̀ mɛ duk in Marii zɔka mɔ nɛ̀ Jesu dea, ɓɛɛ wa kɔ̧ ɗɔaa ha̧ a̧.

⁴⁶Ɓɛɛ o ŋma nɛ́ kɔ‘i tɛ o Fariziɛn mɛ we ɗoŋ mɔ nɛ̀ Jesu dea'i ha̧ wa.

⁴⁷Nɛ́ mɔ'ɔ nɛ̀ o gasa wan-ɗafi-sɔ̧ in o Fariziɛn saa gasa gɔna-kita, ɓɛɛ tɔ̧: «Ɛ́ɛ́ tɛ́ de héé ge? Wi’ɛ nɛ́ mɔ'ɔ nɛ̀ de nɛ́ mɔɔ-usi-mɔ nɛ̀ dɔka-a nɛnɛ'ɛ;

⁴⁸k’ɛ̀ɛ̀ é a̧ hegɔ siti, o bíí lɛŋ tɛ kɔ̧ ɗɔaa ha̧ a̧, ɓɛɛ o bíí Rɔm tɛ pi̧ nú tɛ wen'i, ɓɛɛ yaia Sa̧a̧-fara in tugun bíí k’ɛɛ yinɛ!»

⁴⁹Ŋma bíí mgbara wa, nin-a nɛ́ Kaif, nɛ̀ duka nɛ́ gasa wan-ɗafi-sɔ̧ tɛ pɛ‘i, tɔ̧ɔ̧ ha̧ wa: «Ɛ́nɛ́ zii mgbara mɔ na.

⁵⁰Ɛ́nɛ́ iŋ‘e ndé, dee so gan wen'nɛ́, ha̧ bíí kpɔk mɛ fe gɔn nɛ̀ zu dukbíí, wen ká tugun bíí tɛ́ɛ̀ kum lɛŋ nɛ̀ oi-aa na nde?»

⁵¹(Bó nɛ́ Kaif tɔ̧ɔ̧ wen'i nɛ̀ zu-wi na; mɛ̀ nɛ́ wen a̧ nɛ́ gasa wan-ɗafi-sɔ̧ tɛ pɛ‘i, sa a̧ tɔ̧ wen oi nú Sɔ̧‘e Jesu tɛ fe kànà gɔn nɛ̀ zu tugun be Juif,

⁵²bó nɛ́ tugun be Juif ɛ̀nɛ̀ ɓɛɛ na, ɓɛɛ mɛ̀ nɛ́ ha̧ Jesu mɛ mɔi̧ o bem ko Sɔ̧ nɛ̀ pɛsa so mbɛt mɛ duk kpɔk.)

⁵³Nɛ́ kale wese'i a̧ wa ee nɛ̀ nú in o ŋmaa mɛ gbɛ Jesu.

⁵⁴Ɗoŋ-aa'i, Jesu kɔ̧ yara-a nɛ̀ gbaayí o Juif ɓɔna, ɓɛɛ a̧ kur yak si ŋma fara nɛ̀‘i sa'e Efraim nɛ̀ nyɛi̧ nɛ̀ ŋga-gbárà na; ɓɛɛ a̧ duk hi̧i̧ in o ŋgaiwi kɔ̧-a̧.

⁵⁵Ŋgimbi gbaŋa Paska ko o Juif hɛɗa so kaɗi, ɓɛɛ o bíí nɛ̀ dɔka-a daŋ nɛ̀ tɛ o be ye si Jerusalɛm wen ɗafa war-tɛ-wa.

⁵⁶Wa kia Jesu, ak nɛ̀ o ŋmaa kɔ̧́ Tua ko Sɔ̧ nɛ̀ wa yaa sɛnɛ‘i'e: «Ɛ́nɛ́ ta bɔɔ k’ɛ́nɛ́ hee ge? A̧ tɛ́ tɛ gbaŋa’ɛ náà, kóó a̧ beka tɛ na nde?»

⁵⁷O gasa wan-ɗafi-sɔ̧ in o Fariziɛn tɔ̧ɔ̧ so ha̧ o bíí‘e, kà ŋma bíí nɛ́ iŋa fara n'aa duk sɛnɛ, nɛ̀ wi’ɛi a̧ úsí oi-aa ha'i mɛ ba a̧.