Read Northwest Gbaya JEAN 12 Bible Online

JEAN 12 - Northwest Gbaya bible

JEAN 12

¹Oi zɛ mɔɔrɔ-ɗoŋ-kpɔk ɓɛɛ gbaŋa Paska dee, ɓɛɛ Jesu hɔ sɛn Betanii, ye ko Lazar n'aa bàá kpasi so tɛ fio.

²Wa gii nyɔŋmɔ ha̧ Jesu. Marthe duka kɛ̧ nɛ̀ nyɔŋmɔ, ɓɛɛ Lazar duk kɔ‘i mgbara o bíí nɛ̀ wa saa mɛ nyɔŋ mɔ‘i.

³Marii baa gba de nɔ̧́-nyama nɛ̀ gɛnɛ-a ɔ ŋgaya nyɛmna, tɛn a naŋ Jesu, ɓɛɛ nyiŋ nɛ̀ mui̧-zu-wi; ɓɛɛ pɛ̀r nɔ̧́-nyama'i ba kɔ̧́ tua kpi̧i̧i̧.

⁴Judas Iskariot, ŋma ŋgaiwi ko Jesu nɛ̀ tɛ e ɗɔra tɛ-a'i, tɔ̧a̧:

⁵«Wen ge sa'i ɗɔr so nɔ̧́-nyama’ɛ tɛ kɔya-sede gɔmŋmaa-taar mɛ gbak nɛ̀ o wisan na ge?»

⁶Bó nɛ́ Judas taa nɛ́ bɔnɛ ko o wisan tɔ̧ nɛ̀ wen'i na, ɓɛɛ mɛ̀ nɛ́ wen a̧ nɛ́ wi-zuzu nɛ̀ ŋgoɓo sede duk duka-a er-a, ɓɛɛ ɓan na a̧ ɓɔŋa mɔ sɛnɛ kaɗi.

⁷Ɓɛɛ Jesu tɔ̧: «Mɛ̀ é a̧ sɛ́ɛ́m, é há̧ a̧ mɛ́ kàsì oi nɔ̧́-nyama’ɛ wen wèsé nɛ̀ wa tɛ gun nɛ‘m.[13]

⁸Ko o wisan, wa tɛ duk in'nɛ̀ɛ̀ ɓɔnsɛnɛ; ɓɛɛ kɔ‘m, mi beka duk in'nɛ̀ɛ̀ ɓɔnsɛnɛ na.»

⁹Gba gíí o Juif zia'e Jesu hɔɔ hi̧i̧, ɓɛɛ wa nɛ́ tɛ a̧, bó nɛ́ wen zɔka Jesu ɓɛɛ na, ɓɛɛ mɛ̀ nɛ́ wen zɔka Lazar n'aa kpasa so tɛ fio.

¹⁰Nɛ́ mɔ'ɔ nɛ̀ o gasa wan-ɗafi-sɔ̧ baa keta, ɓɛɛ e zu-a mɛ gbɛ Lazar mbɛt,

¹¹wen mɛ̀ nɛ́ wen zu Lazar nɛ́ mɔ'ɔ nɛ̀ o dɔka Juif ee nɛ̀ wa duk ɓɛɛ kɔ̧ ɗɔaa ha̧ Jesu.

¹²Nɛ̀ mɔ sa̧a̧, o giiwi nɛ̀ gara so gbaŋa zia'e Jesu a̧ nɛ́ si Jerusalɛm'i,

¹³ɓɛɛ wa gɔn wa̧a̧ ndɛŋgɛ, we nɛ̀ ti a̧ sumburi nɛ̀ a̧‘e: «Oee! Toka-de-yoŋgo a̧ duk zu wi nɛ̀ tɛ‘i nɛ̀ nin Gasa Wan!»

¹⁴Jesu kpaa be tuifuu ɓɛɛ daŋ duk zu a̧, hee mɔ'ɔ nɛ̀ Yɔramɔ tɔ̧ɔ̧ so ga:

¹⁵«Boko-be Siɔŋ, ká mɛ́ de kíì na, mɛ̀ zɔ́k wannu kɔ-mɛ a̧ tɛ‘i; a̧ daŋa nɛ́ zu be-tuifuu.»

¹⁶Tɛ́ ŋgimbi'i, o ŋgaiwi kɔ̧-a̧ iŋ mgbara mɔ‘i na hɔ ŋgimbi nɛ̀ Jesu yee tɛ gasamɔ kɔ‘i kaɗi, sɛka tɛ-wa bé tɛ̀ɛ́ mbaŋ‘e, mɔ‘i bàá yɔr so zu a̧, ɓɛɛ nɛ́ mɔ‘i a̧ wa dee ha̧ a̧‘i.

¹⁷O wi nɛ̀ duka so oi sáá Lazar nɛ̀ Jesu saa gbonɛ nɛ̀ kɔ̧́ pɛsi-fio kpasi nɛ̀ a̧ tɛ fio'i, dee sedaako mɔ‘i wen a̧ mbɛt.

¹⁸Nɛ́ mɔ‘i a̧ dee ha̧ giiwi mɛ́ nɛ̀ɛ́ we ti a̧ wen wa zia nyɛrɛ mɔɔ-usi-mɔ n'aa dea'i.

¹⁹Ɓɛɛ o Fariziɛn tɔ̧ ha̧ o ŋmaa: «Gba̧a̧ mɔ n’ɛɛ de’ɛ bo ɓɔna; zɔ́k o bíí nɛ́ mɔ'ɔ nɛ̀ gbin sitɛ a̧ lɛŋ'ɛ.»

²⁰O ŋma Grɛk nɛ̀ɛ̀ so mɛ gasi Sɔ̧ tɛ ŋgimbi gbaŋa'i mbɛt.

²¹Wa nɛɛ tɔ̧ ha̧ Filip be Bɛtsaida nú Galilee'e ndé: «Nyaa, ɛ́ɛ́ kɔ̧ɔ̧ mɛ́ zɔk Jesu.»

²²Filip nɛ̀ɛ̀ tɔ̧ kɔ‘i ha̧ Andre, ɓɛɛ wa kai ŋmaa nɛ́ɛ̀ tɔ̧ ha̧ Jesu.

²³Jesu kifa nú ha̧ wa hee mɔ'ɔ ga: «Ŋgimbi ha̧ Bem ko bíí mɛ ye tɛ gasamɔ kɔ‘i hɔɔ kaɗi.

²⁴Nɛ́ kpasawen a̧‘m tɔ̧ h’ɛ́nɛ́; kpar alkamaari nɛ̀‘i gun, ká fe na, a̧ tɛ ɓɔn ɛ̀nɛ́-a; ɓɛɛ ká a̧ nɛ́ fea, a̧ tɛ wai nɛ̀ dɔka-a.

²⁵Wi nɛ̀ kɔ̧ɔ̧ duka-kpasa tɛ fe; ɓɛɛ wi nɛ̀ e kɔ‘i see tɛ duka-kpasa zaŋnu’ɛ na, tɛ kpa duka-kpasa kpoo nɛ kpoo.

²⁶Kà ŋma bíí nɛ́ kɔ̧ɔ̧ mɛ de tom ha̧‘m, a̧ a̧ tɛ́ ɗoŋ am, ɓɛɛ fara n'am duk sɛnɛ‘i, wi-de-tom kɔ‘m tɛ duk sɛnɛ mbɛt. Kà ŋma bíí de tom ha̧‘m, Dáà kɔ‘m tɛ zɔn a̧.»

²⁷«Kinii, see-am dita, ɓɛɛ a̧‘m tɔ̧ bɔɔ hee ge? A̧‘m tɔ̧‘e: ‹Dáà, ɛ̀nɛ̀ kpás'am tɛ ŋgimbi’ɛ› nde? Weyaa, mɛ̀ nɛ́ wen zu ŋgimbi’ɛ a̧‘m tɛ̀ɛ́ wen-aa.

²⁸Dáà, ɛ̀nɛ̀ dé ha̧ nin'nɛ́ mɛ ye zaŋ gasamɔ!» Ɓɛɛ nɛ́ mɔ'ɔ nɛ̀ wa zia ŋma tiger nɛ̀ yiwese mɛ, nɛ̀ tɔ̧a̧: «Mi baa de ha̧ nin-am mɛ́ ye zaŋ gasamɔ, ɓɛɛ mi tɛ de ha̧ a̧ mɛ́ ye zaŋ gasamɔ gan kuti-a.»

²⁹O giiwi nɛ̀ yaa so hi̧i̧, zia mɔ‘i ɓɛɛ tɔ̧: «Nɛ́ dika-kórò!» O ŋma tɔ̧ɔ̧: «Nɛ́ ŋma betom ko Sɔ̧ a̧ tɔ̧ wen ha̧ a̧.»

³⁰Jesu tɔ̧a̧: «Tiger n’ɛnɛ zia'i bó nɛ́ wen zu'm na, ɓɛɛ mɛ̀ nɛ́ wen ɛ́nɛ́.

³¹Kinii nɛ́ ŋgimbi gɔna-kita zaŋnu’ɛ; Sɔ̧ tɛ ndak wan nɛ̀ kpaa ŋgai zaŋnu’ɛ yinɛ kinii.

³²Ɓɛɛ ŋgimbi nɛ̀ wa be tɛ̀ɛ́ ba'm e ŋgɔn, mi tɛ dak o bíí lɛŋ pii tɛ‘m.»

³³(A̧ tɔ̧ɔ̧ wen'i usi nɛ̀ yuwar fio n'aa tɛ fe.)

³⁴Giiwi kifa nú ha̧ Jesu: «Ɛɛ tɔra sɛn zaŋ kalata heembea'e ndé: ‹Mɛsii tɛ duk ɓɔnsɛnɛ;› ɓɛɛ s’ɛnɛ tɔ̧ bɔɔ‘e, wa tɛ ba Bem ko bíí e ŋgɔn wó'ɛ hee ge? Bem ko bíí‘i bɔɔ nɛ́ o?»

³⁵Jesu tɔ̧ɔ̧ ha̧ wa: «Sa̧a̧mɔ ɓɔna duka-a mgbara'nɛ́ benaŋ tikiɗi; ɛ̀nɛ̀ yár ŋgimbi n’ɛnɛ a̧a̧ nɛ̀ sa̧a̧mɔ, ká tum tɛɛ tik zu'nɛ́; wen wi nɛ̀ yar ti tum, iŋ fara n'aa nɛ́ si sɛnɛ na.

³⁶Ŋgimbi nɛ̀ sa̧a̧mɔ biti in'nɛ̀ɛ́, ɛ̀nɛ̀ kɔ̧́ ɗɔaa ha̧ a̧, h’ɛ́nɛ́ mɛ kifi duk nɛ́ o bem ko sa̧a̧mɔ.» Jesu tɔ̧ɔ̧ wen'i kaɗi, ɓɛɛ dak zu nɛ́ɛ̀ duk nɛ̀ hu̧sa̧-a̧.

³⁷Zu o mɔɔ-usi-mɔ n'aa dee yí-wa nɛ̀ dɔka-a mbɛt'i, wa kɔ̧ ɗɔaa ha̧ a̧ na.

³⁸Hegɔ wen ko wi-tɔ̧-wen oi nú Sɔ̧ Esaii, hɔɔ gba̧a̧; a̧ tɔ̧ɔ̧ so'e: «Gasa Wan, nɛ́ o'o kɔ̧ɔ̧ so ɗɔɔ wen n’ɛɛ tɔ̧ɔ̧ so'i o? Nɛ́ o a̧ Gasa Wan usa so ŋgai kɔ‘i ha̧ a̧ o?»

³⁹Kale kpɔk Esaii'i tɔ̧ɔ̧ gba̧a̧ mɔ nɛ̀ wa nyɛm so mɛ kɔ̧ nɛ̀ ɗɔaa na'i:

⁴⁰«A̧ boma yí-wa, ká wa tɛɛ zɔk mɔ; a̧ dee ha̧ see-wa mɛ ŋgai, ká wa tɛɛ zii mgbara mɔ, ká wa tɛɛ kpa mbe ta, ɓɛɛ ká‘m tɛɛ kpasi wa.»

⁴¹Tɛ́ mɔ‘i Esaii tɔ̧ wen hegɔ, wen n'aa zɔka gasamɔ kɔ̧-a̧, ɓɛɛ sa a̧ tɔ̧ wen-aa.

⁴²Kóó hegɔ mbɛt, o ŋma mgbara o gasawi nɛ̀ dɔka-a kɔ̧ɔ̧ ɗɔaa ha̧ Jesu, ɓɛɛ wa kɔ̧ mɛ ba ger-wa nɛ̀ ŋgɔn na, ká o Fariziɛn tɛɛ ndak wa yinɛ kɔ̧́ tua-mɔi̧a-a,

⁴³wen wa kɔ̧ɔ̧ nɛ́ zɔnamɔ nɛ̀ tɛ́ nɛ̀ tɛ̀ bíí gan wan nɛ̀ tɛ́ nɛ̀ tɛ́ Sɔ̧.

⁴⁴Ɓɛɛ nɛ́ mɔ'ɔ nɛ̀ Jesu tɔ̧ɔ̧ wen nɛ̀ hee-ger'e: «Wi nɛ̀ kɔ̧ ɗɔaa ha̧‘m, bó nɛ́ mi a̧ a̧ kɔ̧ ɗɔaa ha̧ a̧ na, ɓɛɛ nɛ́ wi nɛ̀ toma'm tɛnɛ a̧ a̧ kɔ̧ɔ̧ ɗɔaa ha̧ a̧.

⁴⁵Ɓɛɛ wi nɛ̀ zɔka'm, zɔka wi nɛ̀ toma'm tɛnɛ‘i kaɗi.

⁴⁶Mi nɛ́ sa̧a̧mɔ nɛ̀ tɛ̀ɛ́ zaŋnu; mi tɛa wen ká o ndé nɛ̀ kɔ̧ ɗɔaa ha̧‘m tɛɛ ɓɔn ti tum.

⁴⁷Kà ŋma bíí zii wen kɔ‘m, ɓɛɛ kà a̧ kasi na, bó nɛ́ mi'i tɛ gɔn kita zu a̧ na, wen bó nɛ́ mi tɛ̀ɛ̀ mɛ gɔn kita zaŋnu’ɛ na, ɓɛɛ mi tɛ̀ɛ̀ mɛ kpasi nɛ́ o bíí nù.

⁴⁸Wi-gɔn-kita zu wi nɛ̀ bɛ̧‘m, nɛ̀ kɔ̧ ɗɔɔ wen kɔ‘m na mbɛt'i a̧a̧ sɛnɛ; nɛ́ wen n'am tɔ̧a̧ a̧ tɛ gɔn kita zu a̧ sɔŋkur wese.

⁴⁹Wen bó nɛ́ mi tɔ̧ wen nɛ̀ zu'm na, ɓɛɛ nɛ́ Dáà nɛ̀ toma'm tɛnɛ a̧ usa mɔ n'am tɛ tɔ̧ in mɔ n'am tɛ usi.

⁵⁰Ɓɛɛ mi iŋa'e, heembea kɔ̧-a̧‘i mɛ̀ nɛ́ duka-kpasa kpoo nɛ kpoo. Wen n'am tɔ̧‘i, mi tɔ̧ nyɛm nɛ̀ ɗoŋ mɔ nɛ̀ Dáà tɔ̧ɔ̧ ha̧‘m.»