Read Northwest Gbaya JEAN 13 Bible Online

JEAN 13 - Northwest Gbaya bible

JEAN 13

¹Nɛti ha̧ gbaŋa Paska, Jesu iŋa'e ŋgimbi kɔ‘i hɔɔ kaɗi, ŋgimbi kura-a zaŋnu’ɛ mɛ si ɗoŋ tɛ̀ Dáà mɛ. Hee mɔ'ɔ n'aa kɔ̧ɔ̧ so o bíí kɔ̧-a̧ zaŋnu’ɛ ga, a̧ kɔ̧ɔ̧ kànà wa hɔ sɔŋkur-aa.

²Ŋgimbi nyɔŋmɔ, ɓɛɛ ká Wan-ɗaŋmɔ ee so taamɔ kɔ̧́ see Judas Iskariot bem ko Simɔŋ mɛ e ɗɔra tɛ Jesu kaɗi.

³Jesu iŋa'e, Dáà kɔ‘i ee mɔ lɛŋ er-wi, ɓɛɛ hee mɔ'ɔ n'aa gboo nɛ̀ tɛ́ Sɔ̧ ga, a̧ tɛ si kànà ɗoŋ tɛ́ Sɔ̧ mbɛt.

⁴Nɛ́ mɔ'ɔ n'aa kura ká̧ nyɔŋmɔ, kpɔ̧i̧ gasa laa tɛ-a ba e nù, ɓɛɛ ba mɔɔ-tur-tɛ yuɓuri nɛ̀ guntir.

⁵A̧ tɛna yì a kɔ̧ tasi, ku̧ naŋ fɔra naŋ o ŋgaiwi kɔ̧-a̧, ɓɛɛ tur nɛ̀ mɔɔ-tur-tɛ n'aa yuɓura nɛ̀ guntir-a'i.

⁶Jesu hɔɔ tɛ Simɔŋ Pierre, ɓɛɛ Simɔŋ Pierre tɔ̧ ha̧ a̧: «Gasa Wan, ɛ́nɛ́ tɛ fɔr naŋ-am hee ge?»

⁷Jesu kifa nú ha̧ a̧: «Mɔ n'am de'i, mɛ beka iŋ mgbara-a kinii na, ɓɛɛ mɛ́ tɛ́ iŋ nɛ̀ ɗoŋ.»

⁸Pierre tɔ̧ɔ̧ ha̧ Jesu: «Bo hegɔ na, ɛ́nɛ́ beka fɔr naŋ-am na ndó-ndó-ndó!» Jesu kifa nú ha̧ a̧: «Kà‘m fɔr naŋ-mɛ na, mɛ́ beka kpa mɔ in am na.»

⁹Ɓɛɛ Simɔŋ Pierre tɔ̧ ha̧ a̧: «Gasa Wan, kà nɛ́ bòò hegɔ, bó nɛ́ naŋ-am ɓɛɛ na, ɛ̀nɛ̀ fɔ́r er-am in zu'm mbɛt!»

¹⁰Jesu tɔ̧ɔ̧ ha̧ a̧: «Wi nɛ̀ zui yi, beka fɔr tɛ̀ ɓɔna,[14] wen tɛ-a lɛŋ sa̧a̧ kaɗi. War k’ɛ́nɛ́, tɛ‘nɛ́ sa̧a̧ kaɗi, ɓɛɛ bó nɛ́ ɛ́nɛ́ lɛŋ na.»

¹¹Wen Jesu iŋa wi nɛ̀ tɛ e ɗɔra tɛ-a; mɛ̀ nɛ́ hegɔ sa a̧ tɔ̧‘e: «Bó nɛ́ ɛ́nɛ́ lɛŋ a̧ tɛ‘nɛ́ sa̧a̧ na.»

¹²Ɗoŋ n'aa fɔra naŋ-wa kaɗi, a̧ pi̧i̧ laa kɔ̧-a̧ tɛ-a, duk nù ká̧ nyɔŋmɔ, ɓɛɛ tɔ̧ ha̧ wa: «Ɛ́nɛ́ iŋa mgbara mɔ n'am dee hɛnɛ‘i?

¹³Saa'm n’ɛnɛ sa'e ‹Wan-usi-mɔ›, kóó ‹Gasa Wan'i›, ɛ́nɛ́ sa nɛ̀ yuwar-a; mi nɛ́ mɔ‘i.

¹⁴Mi Gasa Wan in Wan-usi-mɔ k’ɛ́nɛ́, mi fɔra naŋ‘nɛ́, h’ɛ́nɛ́ mbɛt, mɛ fɔr naŋ ŋmaa in o ŋmaa.

¹⁵Mi usa nɛ́ ɗoŋ mɔ h’ɛ́nɛ́, wen h’ɛ́nɛ́ mɛ de mɔ hee mɔ'ɔ n'am dee h’ɛ́nɛ́ ga mbɛt.

¹⁶Nɛ́ kpasawen a̧‘m tɔ̧ h’ɛ́nɛ́; wi-de-tom gan wan-tom kɔ‘i na, betom gan wi nɛ̀ toma a̧ na mbɛt.

¹⁷Hee ɛnɛ iŋa mɔ‘i kaɗi ga, k’ɛ̀nɛ̀ de hegɔ, ɓɛɛ ɛ́nɛ́ tɛ ya nɛ̀ desee.

¹⁸«Bó nɛ́ mi tɔ̧ wen’ɛ h’ɛ́nɛ́ lɛŋ na; wen mi iŋa o wi n'am hoka, ha̧ mɔ nɛ̀ Yɔramɔ tɔ̧a̧‘e: ‹Wi nɛ̀ nyɔŋa mɔ kpɔk in am, ŋmaa'm nɛ̀ dukui naŋ‘i› mɛ hɔɔ gba̧a̧.

¹⁹Mi mbaŋ nɛ́ gɔni tɛ‘nɛ́ kinii ŋgaɓo, kà mɔ‘i nɛ́ hɔa, ɓɛɛ k’ɛ́nɛ́ kɔ̧ɔ̧ ɗɔaa'e, mi nɛ́ mɔ‘i.

²⁰Nɛ́ kpasawen a̧‘m tɔ̧ h’ɛ́nɛ́; wi nɛ̀ kpɛk wi n'am toma, kpɛk nɛ‘m, ɓɛɛ wi nɛ̀ kpɛk am, kpɛk nɛ́ wi nɛ̀ toma'm tɛnɛ mbɛt.»

²¹See Jesu ɗaŋa ɗoŋ wen'i, ɓɛɛ tɔ̧: «Nɛ́ kpasawen a̧‘m tɔ̧ h’ɛ́nɛ́; ŋma bíí mgbara'nɛ́'ɛ tɛ e ɗɔra tɛ‘m.»

²²O ŋgaiwi zɔka yí ŋmaa dam, wen wa iŋ wi nɛ̀ Jesu tɔ̧ wen'i zu a̧ na.

²³Sɛn ká̧ nyɔŋmɔ‘i, ŋgaiwi wan nɛ̀ Jesu kɔ̧ɔ̧ nyɛmna duka mgbák katɛ a̧.

²⁴Simɔŋ Pierre nyɔŋa yí ha̧ ŋgaiwi'i mɛ ak Jesu'e, wi n'aa tɔ̧ nɛnɛ‘i nɛ o?

²⁵Ŋgaiwi'i oŋga si yí-ŋguɗi Jesu, ɓɛɛ ak a̧: «Gasa Wan, wi’ɛi nɛ́ o?»

²⁶Jesu kifa nú: «Wi n'am tɛ gbin brɛt duɓi nɛ̀ yí-kpoo ha̧ a̧‘i, nɛ́ wi’ɛi a̧ tɛ e ɗɔra tɛ‘m.» Ɓɛɛ Jesu duɓi yí-kpoo nɛ̀ brɛt,[15] nyɛi̧ ha̧ Judas Iskariot, bem ko Simɔŋ.

²⁷Há̧á̧ brɛt nɛ̀ Jesu ha̧a̧ ha̧ Judas hegɔ, ɓɛɛ Wan-ɗaŋmɔ ye kɔ̧́ see-aa. Ɓɛɛ Jesu tɔ̧ ha̧ a̧: «Mɔ nɛ̀ mɛ ta mɛ de'i, mɛ̀ dé bee!»

²⁸Ɓɛɛ ŋma bíí mgbara wa lɛŋ kóó kpɔk nɛ̀ yaa ká̧ nyɔŋmɔ‘i zii mgbara mɔ nɛ̀ Jesu tɔ̧ɔ̧ ha̧ Judas na.

²⁹Hee mɔ'ɔ nɛ̀ ŋgoɓo sede duk er Judas ga, o ŋma bíí taa kɔ‘i'e, Jesu tɔ̧ɔ̧ ha̧ a̧ mɛ nɛ̀ɛ́ hi̧fi nyɔŋmɔ gbaŋa, kóó Jesu tɔ̧ɔ̧ ha̧ a̧ mɛ ha̧ ŋma mɔ ha̧ o wisan.

³⁰Judas baa brɛt'i, ɓɛɛ gbo zan, ká zɛ dee so kaɗi.

³¹Ɗoŋ nɛ̀ Judas gboo kaɗi, Jesu tɔ̧a̧: «Kinii Bem ko bíí yee tɛ gasamɔ kaɗi, ɓɛɛ wi zɔk nɛ́ gasamɔ ko Sɔ̧ wen zu a̧.

³²Hee mɔ'ɔ nɛ̀‘i zɔk nɛ̀ gasamɔ ko Sɔ̧ sɛn tɛ Bem ga, Sɔ̧ tɛ de ha'i mɛ zɔk gasamɔ ko Bem sɛn tɛ Sɔ̧ nɛ̀ tɛ-wi; ɓɛɛ mɔ‘i tɛ de kinii.

³³O bem kɔ‘m, duka-a kɔ‘m in'nɛ̀ɛ̀ kinii, ɗoŋ-aa beka nyɛi̧ ɓɔna. Ɛ́nɛ́ tɛ́ kii am; nɛ́ kale wen n'am tɔ̧ɔ̧ so ha̧ o Juif'i nɛ́ mɔ'ɔ n'am tɔ̧ h’ɛ́nɛ́ kinii’ɛ: fara n'am nɛ́ sɛnɛ‘i, ɛ́nɛ́ nyɛm mɛ hɔ sɛnɛ na.

³⁴Mi ha̧ nɛ mbe heembea h’ɛ́nɛ́: ɛ̀nɛ̀ kɔ̧́ ŋmaa in o ŋmaa. Hee mɔ'ɔ n'am kɔ̧ɔ̧ nɛ ɛ́nɛ́ ga, ɛ́nɛ́ mbɛt, ɛ̀nɛ̀ kɔ̧ ŋmaa in o ŋmaa.

³⁵K’ɛ̀nɛ̀ nɛ́ kɔ̧ɔ̧ ŋmaa, ɓɛɛ o bíí lɛŋ tɛ iŋ‘e, ɛ́nɛ́ nɛ́ o ŋgaiwi kɔ‘m.»

³⁶Ɓɛɛ Simɔŋ Pierre ak a̧: «Gasa Wan, ɛ́nɛ́ nɛ́ bɔɔ si déè?» Jesu kifa nú ha̧ a̧: «Kinii mɛ nyɛm mɛ nɛ̀ ɗoŋ-am si fara n'am nɛ́ sɛnɛ‘i na, ɓɛɛ mɛ tɛ ndak pata'm nɛ̀ ɗoŋ.»

³⁷Pierre tɔ̧ɔ̧ ha̧ a̧: «Mi nyɛm mɛ nɛ̀ ɗoŋ‘nɛ́ kinii na bɔɔ wen ge? Mi tɛ kpɛk ha̧‘m mɛ fe wen zu'nɛ́.»

³⁸Jesu kifa nú: «Mɛ tɛ kpɛk mɛ fe wen zu'm nde? Nɛ́ kpasawen a̧‘m tɔ̧ ha̧ mɛ; mɛ tɛ kaf'am war taar sɛka gata-kɔra hee mɔ.»