Read Northwest Gbaya JEAN 14 Bible Online

JEAN 14 - Northwest Gbaya bible

JEAN 14

¹«Ká see'nɛ́ ɗaŋ na! Ɛ̀nɛ̀ kɔ̧́ ɗɔaa há̧ Sɔ̧,[16] ɓɛɛ ɛ̀nɛ̀ kɔ̧́ ɗɔaa ha̧‘m mbɛt.

²Fara-duk ɔ dɔka kɔ̧́ tua ko Dáà kɔ‘m; kà bó só hegɔ na, bó nɛ́ mi tɛ̀ɛ́ tɔ̧ so'e mi tɛ nɛ mɛ ɗafi fara h’ɛ́nɛ́ na.

³Ɓɛɛ ɗoŋ n'am ɗafa fara h’ɛ́nɛ́ kaɗi, mi tɛ pii ɗoŋ mɛ kai'nɛ́, wen h’ɛ́nɛ́ mɛ duk fara n'am tɛ duk sɛnɛ‘i.

⁴Ɛ́nɛ́ iŋa yuwar mɛ nɛ̀ si fara n'am nɛ́ sɛnɛ‘i mbɛt.»

⁵Tomas tɔ̧ɔ̧ ha̧ a̧: «Gasa Wan, ɛ́ɛ́ iŋ fara n’ɛnɛ nɛ́ sɛnɛ‘i na; ɛ́ɛ́ tɛ iŋ yuwar hee ge?»

⁶Jesu tɔ̧ɔ̧ ha̧ a̧: «Mi nɛ́ yuwar, mi nɛ́ kpasawen, mi nɛ́ duka-kpasa. Bíí yak sitɛ Dáà nɛ tɛ‘m ɓɛɛ.

⁷K’ɛ̀nɛ̀ iŋ so'm gáà, ɛ̀nɛ̀ tɛ̀ɛ́ iŋ Dáà kɔ‘m mbɛt. Kinii, ɛ́nɛ́ iŋa a̧, ɓɛɛ ɛ́nɛ́ zɔka a̧ kaɗi mbɛt.»

⁸Filip tɔ̧ɔ̧ ha̧ a̧: «Gasa Wan, ɛ̀nɛ̀ úsí Dáà h’ɛ́ɛ́, ɓɛɛ i̧i̧ nyɛma.»

⁹Jesu kifa nú ha̧ a̧: «Filip! Mi duka in'nɛ̀ɛ́ ɓeemɛ, ɓɛɛ mɛ́ tɛ iŋ am hɔ̧ɔ̧ na? Wi nɛ̀ zɔka'm, zɔka Dáà kaɗi. Ɓɛɛ mɛ tɔ̧ bɔɔ‘e, a̧‘m úsí Dáà ha'i wó'ɛ, wen ge?

¹⁰Mɛ́ kɔ̧́ ɗɔaa'e mi duk tɛ Dáà, ɓɛɛ Dáà duk tɛ‘m na nde? O wen n'am tɔ̧ h’ɛ́nɛ́‘i, mi tɔ̧ nɛ̀ zu'm na; nɛ́ Dáà nɛ̀ duk tɛ‘m'i a̧ de o tom kɔ‘i.

¹¹Ɛ̀nɛ̀ kɔ̧́ ɗɔɔ wen kɔ‘m! Mi duk tɛ Dáà, ɓɛɛ Dáà duk tɛ‘m mbɛt. Ɓɛɛ k’ɛ̀nɛ̀ kɔ̧́ ɗɔɔ wen kɔ‘m na, ɛ̀nɛ̀ kɔ̧́ kànà ɗɔaa wen zu o tom nɔ‘i.

¹²Nɛ́ kpasawen a̧‘m tɔ̧ h’ɛ́nɛ́, wi nɛ̀ kɔ̧ ɗɔaa ha̧‘m tɛ de o tom n'am de’ɛ, ɓɛɛ wi’ɛi tɛ de o gasa tom gan mbɛt, wen mí nɛ́ tɛ̀ Dáà.

¹³Ɓɛɛ mɔ lɛŋ n’ɛnɛ tɛ ak nɛ̀ nin-am, mi tɛ de wen ha'i mɛ zɔk gasamɔ ko Dáà wen zu Bem.

¹⁴K’ɛ̀nɛ̀ nɛ́ aka ŋma mɔ nɛ̀ nin-am, mi tɛ de ha'i mɛ zɔk gasamɔ ko Dáà.

¹⁵«K’ɛ̀nɛ̀ nɛ́ kɔ̧a̧‘m, ɛ́nɛ́ tɛ kasi o heembea kɔ‘m.

¹⁶Mi tɛ kɔfi Dáà, ɓɛɛ a̧ tɛ tom ŋma wi-ye-ɗoŋ‘nɛ́ nɛ̀ tɛ duk in'nɛ̀ɛ̀ ɓɔnsɛnɛ.

¹⁷A̧ nɛ́ Sa̧a̧ Ɔmi nɛ̀ tɛ usi kpasawen, nɛ̀ o bíí zaŋnu nyɛm mɛ kpa na, wen wa zɔk a̧ na, ɓɛɛ wa iŋ a̧ na mbɛt. K’ɛ́nɛ́, ɛ́nɛ́ iŋa a̧, wen a̧ duk in'nɛ̀ɛ́, ɓɛɛ a̧ duk tɛ‘nɛ́.

¹⁸«Mi beka e h’ɛ́nɛ́ mɛ ya be-oi na; mi tɛ pii ɗoŋ tɛ‘nɛ́.

¹⁹Dekpaa tikiɗi, ɓɛɛ o bíí zaŋnu beka zɔk am ɓɔna. Ɓɛɛ k’ɛ́nɛ́, ɛ́nɛ́ tɛ zɔk am, n'am tɛ duk kpasa, ɓɛɛ ɛ́nɛ́ tɛ duk kpasa mbɛt.

²⁰Wese'i, ɛ́nɛ́ tɛ iŋ‘e, mi duk tɛ Dáà kɔ‘m, ɛ́nɛ́ duk tɛ‘m, ɓɛɛ mi duk tɛ‘nɛ́ mbɛt.

²¹«Wi nɛ̀ kasi o heembea kɔ‘m, mbo nɛ̀ zu sɛnɛ mbɛt, nɛ́ wi nɛ̀ kɔ̧a̧‘m; ɓɛɛ wi nɛ̀ kɔ̧a̧‘m, Dáà kɔ‘m tɛ kɔ̧ a̧, mi tɛ kɔ̧ a̧ mbɛt, ɓɛɛ mi tɛ usi tɛ‘m ha̧ a̧.»

²²Judɛ (bó nɛ́ Judas Iskariot na) tɔ̧ɔ̧ ha̧ a̧: «Gasa Wan, hee ge ɛ̀nɛ̀ tɛ usi tɛ‘nɛ́ h’ɛ́ɛ́, ɓɛɛ bó nɛ́ ha̧ o bíí zaŋnu na ge?»

²³Jesu kifa nú ha̧ a̧: «Kà ŋma bíí nɛ́ kɔ̧a̧‘m, a̧ tɛ kasi wen kɔ‘m; Dáà kɔ‘m tɛ kɔ̧ a̧; ɛ́ɛ́ tɛ́ tɛ̀ tɛ́ a̧, ɓɛɛ ɛ́ɛ́ tɛ ɗafi fara-duk k’ɛɛ tɛ a̧.

²⁴Wi nɛ̀ kɔ̧‘m na, kasi wen kɔ‘m na, ɓɛɛ wen n'am tɔ̧ n’ɛnɛ zii’ɛ bó nɛ́ tɛ́ nɛ̀ tɛ‘m na, ɓɛɛ tɛ́ nɛ̀ tɛ̀ Dáà nɛ̀ toma'm tɛnɛ.

²⁵«Mi tɔ̧ wen’ɛ h’ɛ́nɛ́ ŋgimbi n'am biti duk in'nɛ̀ɛ́.

²⁶Ɓɛɛ wi-ye-ɗoŋ‘nɛ́, Sa̧a̧ Ɔmi nɛ̀ Dáà tɛ tom tɛnɛ nɛ̀ nin-am, tɛ usi mɔ lɛŋ h’ɛ́nɛ́; a̧ tɛ mbaŋ tɛ‘nɛ́ zu mɔ lɛŋ n'am tɔ̧ɔ̧ h’ɛ́nɛ́.

²⁷«Mi ee ga̧a̧mɔ zu'nɛ́, mi ha̧a̧ ga̧a̧mɔ kɔ‘m h’ɛ́nɛ́; mi ha̧ ga̧a̧mɔ‘i h’ɛ́nɛ́, ɓɛɛ bó nɛ́ hee mɔ'ɔ nɛ̀ o bíí zaŋnu ha̧ nɛ̀ mɔ ha̧ o ŋmaa’ɛ ga na. K’ɛ́nɛ́ kpa ɗaŋsee na, ɓɛɛ ká kíì dé‘nɛ́ na mbɛt.

²⁸Ɛ́nɛ́ zia wen n'am tɔ̧ɔ̧ h’ɛ́nɛ́‘e mi yaka, ɓɛɛ mi tɛ pii ɗoŋ pii tɛ‘nɛ́ woyo. K’ɛ̀nɛ̀ nɛ́ kɔ̧a̧‘m, n’ɛ̀nɛ̀ yá nɛ̀ desee zu naŋanɔ kɔ‘m sitɛ Dáà‘i, wen Dáà gasa gan am.

²⁹Mɛ̀ nɛ́ hegɔ mi mbaŋ nɛ́ tɛ‘nɛ́ kinii; kà ŋgimbi nɛ̀ mɔ‘i bé tɛ̀ɛ́ hɔ, ɓɛɛ k’ɛ́nɛ́ kɔ̧ɔ̧ ɗɔaa.

³⁰Mi beka tɔ̧ wen nɛ̀ dɔka-a in'nɛ̀ɛ́ ɓɔna, wen be-wan zaŋnu’ɛ a̧ tɛ‘i, ɓɛɛ mɔ kpɔk, a̧ bó nɛ̀ ŋgai zu'm na.

³¹Ɓɛɛ a̧ tɛ wen ha̧ o bíí zaŋnu mɛ iŋ‘e mi kɔ̧ɔ̧ Dáà kɔ‘m, ɓɛɛ mi de nɛ́ mɔ nyɛm ɗoŋ mɔ nɛ̀ Dáà usa ha̧‘m. Ɛ̀nɛ̀ kúr, ɛ̀ɛ̀ yák hɛ̧ɛ̧.»