Read Northwest Gbaya JEAN 15 Bible Online

JEAN 15 - Northwest Gbaya bible

JEAN 15

¹«Mi nɛ́ kpasa nyak-dɔ̧ɔ̧, ɓɛɛ Dáà kɔ‘m nɛ́ wi-ɗafi-gun-aa.

²Gbaa-er-nyak-dɔ̧ɔ̧ lɛŋ nɛ̀ duk tɛ‘m, nɛ̀ wai na, Dáà kɔ‘m tɛ gɔm yinɛ, ɓɛɛ a̧ tɛ ɗafi o gbaa-er-nyak-dɔ̧ɔ̧ lɛŋ nɛ̀ wai wen ha̧ wa mɛ wai nɛ̀ dɔka-a gan kuti-a.

³Ɓɛɛ k’ɛ́nɛ́, wen n'am tɔ̧ɔ̧ h’ɛ́nɛ́‘i ɗafa'nɛ́ kaɗi.

⁴Ɛ̀nɛ̀ dúk tɛ‘m hee mɔ'ɔ n'am duk tɛ‘nɛ́ ga. Gbaa-er-nyak-dɔ̧ɔ̧ nyɛm mɛ duk ɛ̀nɛ̀-wi wai nɛnɛ na. Hegɔ ɛ́nɛ́ mbɛt, k’ɛ̀nɛ̀ duk tɛ‘m na, ɛ́nɛ́ beka wai na.

⁵«Mi nɛ́ nyak-dɔ̧ɔ̧, ɓɛɛ ɛ́nɛ́ nɛ́ o gbaa-er-a. Wi nɛ̀ duk tɛ‘m, n'am duk tɛ a̧ mbɛt, wi’ɛi tɛ wai nɛ̀ dɔka-a; wen kà‘m bo na, ŋma mɔ n’ɛnɛ tɛ de bo na.

⁶Kà ŋma bíí duk tɛ‘m na, wa tɛ ba a̧ pi̧ zan ha̧ a̧ mɛ kor, hee gbaa-er-nyak-dɔ̧ɔ̧ nɛ̀‘i ba pi̧ taŋ, kà kor, ɓɛɛ wi aa tɛ wee bíí wee kór-kór’ɛ ga.

⁷K’ɛ̀nɛ̀ duk tɛ‘m, ɓɛɛ kà wen kɔ‘m duk tɛ‘nɛ́ mbɛt, ɛ́nɛ́ tɛ ak mɔ n’ɛnɛ kɔ̧a̧, ɓɛɛ ɛ́nɛ́ kpaa.

⁸Mɔ n’ɛnɛ tɛ de ha̧ o bíí mɛ zɔn Dáà kɔ‘m, nɛ́ waia-a h’ɛ́nɛ́ mɛ wai nɛ̀ dɔka-a, ɓɛɛ h’ɛ́nɛ́ mɛ ya o ŋgaiwi kɔ‘m.

⁹Mi kɔ̧ɔ̧‘nɛ́ hee mɔ'ɔ nɛ̀ Dáà kɔ̧ɔ̧ nɛ‘m ga. Ɛ̀nɛ̀ dúk zaŋ kɔ̧ɔ̧mɔ kɔ‘m.

¹⁰K’ɛ̀nɛ̀ kasi o heembea kɔ‘m, ɛ́nɛ́ tɛ duk zaŋ kɔ̧ɔ̧mɔ hee mɔ'ɔ n'am kasa nɛ̀ heembea ko Dáà kɔ‘m duk nɛnɛ zaŋ kɔ̧ɔ̧mɔ kɔ̧-a̧'ɛ ga.

¹¹«Mi tɔ̧ɔ̧ wen’ɛ h’ɛ́nɛ́, wen ha̧ desee kɔ‘m mɛ duk tɛ‘nɛ́, ɓɛɛ ha̧ desee k’ɛ́nɛ́ mɛ duk nɛ́ kpasa desee.

¹²Heembea kɔ‘m nɛ́ mɔ'ɔ: Ɛ̀nɛ̀ kɔ̧́ ŋmaa in o ŋmaa hee mɔ'ɔ n'am kɔ̧ɔ̧ nɛ̀ ɛ́nɛ́ ga.

¹³Gasa kɔ̧ɔ̧mɔ nɛ̀ gana há̧á̧ tɛ-wi mɛ fe gɔn nɛ̀ zu o sɛm kɔ‘i bo na.

¹⁴K’ɛ̀nɛ̀ nɛ́ dee mɔ n'am tɔ̧ɔ̧ h’ɛ́nɛ́'ɛ, ɓɛɛ ɛ́nɛ́ nɛ́ o sɛm kɔ‘m.

¹⁵Mi beka sa'nɛ́‘e o wi-de-tom ɓɔna, wen wi-de-tom iŋ mɔ nɛ̀ wan-tom kɔ‘i de na; ɓɛɛ mi tɛ sa'nɛ́‘e, o sɛm, wen mɔ n'am zia sɛn tɛ Dáà kɔ‘m, mi dee h’ɛ́nɛ́ mɛ iŋ lɛŋ.

¹⁶Bó nɛ́ ɛ́nɛ́'ɛ hoka'm na; nɛ́ mi'i hoka'nɛ́, ɓɛɛ mi e tom er'nɛ́ h’ɛ́nɛ́ mɛ nɛ̀ɛ́ wai, ɓɛɛ ha̧ waya-mɔ‘i mɛ duk ɓɔnsɛnɛ; hegɔ mɔ lɛŋ n’ɛnɛ tɛ ak er Dáà nɛ̀ nin-am, a̧ tɛ ha̧ h’ɛ́nɛ́.

¹⁷Ɓɛɛ mɔ n'am tɔ̧ h’ɛ́nɛ́ mɛ de, mɛ̀ nɛ́ wen h’ɛ́nɛ́ mɛ kɔ̧ ŋmaa in o ŋmaa.»

¹⁸«Kà o bíí zaŋnu sɛn'nɛ́, ɓɛɛ ɛ̀nɛ̀ íŋ‘e, wa sɛna so'm nɛti h’ɛ́nɛ́.

¹⁹K’ɛ̀nɛ̀ bo so nɛ́ o bíí zaŋnu gáà, o bíí zaŋnu tɛ̀ɛ́ kɔ̧‘nɛ́ wen ɛ́nɛ́ nɛ́ o bíí kɔ-wa, ɓɛɛ ɛ́nɛ́ bo nɛ́ o bíí zaŋnu na, wen mi hoka'nɛ́ mgbara wa yinɛ; nɛ́ mɔ‘i sa wa sɛn'nɛ́.

²⁰Tɛ‘nɛ́'ɛ mbáŋ ɗoŋ wen n'am tɔ̧ɔ̧ so h’ɛ́nɛ́‘e, wi-de-tom gan wan-tom kɔ‘i na. Kà wa nɛ́ usa so bɔnɛ ha̧‘m, wa tɛ usi bɔnɛ h’ɛ́nɛ́ mbɛt; kà wa nɛ́ kasa so wen kɔ‘m, wa tɛ kasi wen k’ɛ́nɛ́ mbɛt.

²¹Wa tɛ de o mɔɔ nɔ‘i lɛŋ in'nɛ̀ɛ́ wen zu nin-am, wen wa iŋ wi nɛ̀ toma'm tɛnɛ na.

²²Kà‘m tɛ so in kà‘m usi so mɔ ha̧ wa na, ɗaŋmɔ kɔ-wa beka bo so zu wa na; ɓɛɛ kinii, wa bó nɛ̀ ŋma nú-wen mɛ tɔ̧ zu ɗaŋmɔ kɔ-wa na.

²³Wi nɛ̀ sɛn am, sɛn nɛ́ Dáà kɔ‘m mbɛt.

²⁴Kà‘m de so tom nɛ̀ ŋma bíí tɛ de mgbara wa nɛti na, ɗaŋmɔ kɔ-wa beka bo so zu wa na; ɓɛɛ kinii, wa zɔka tom n'am dea, ɓɛɛ wa sɛn am gú nɛ̀ Dáà kɔ‘m mbɛt.

²⁵Mɔ‘i dee hegɔ ha̧ wen nɛ̀ yɔra zaŋ kalata heembea kɔ-wa mɛ hɔ gba̧a̧: ‹Wa sɛna'm sɔɔ géè!›

²⁶«Mi tɛ tom wi-ye-ɗoŋ‘nɛ́ nɛ̀ tɛ̀ Dáà mɛ tɛnɛ h’ɛ́nɛ́; a̧ nɛ́ Sa̧a̧ Ɔmi nɛ̀ tɛ usi kpasawen, ɓɛɛ a̧ tɛ́ nɛ̀ tɛ̀ Dáà. Ŋgimbi n'aa bé tɛ̀ɛ́ tɛ, a̧ tɛ́ de sedaako wen zu'm.

²⁷Ɛ́nɛ́ mbɛt, tɛ́ de sedaako wen zu'm, wen ɛ́nɛ́ duka in am nɛ̀ ku̧u̧naŋ-a mɛ tɛnɛ.»