Read Northwest Gbaya JEAN 16 Bible Online

JEAN 16 - Northwest Gbaya bible

JEAN 16

¹«Mi tɔ̧ɔ̧ wen’ɛ lɛŋ h’ɛ́nɛ́ nɛti wen k’ɛ́nɛ́ tɛɛ sakali.

²Ŋgimbi tɛ hɔ nɛ̀ wa tɛ ndak'nɛ́ gbonɛ kɔ̧́ tua-mɔi̧a-a; bó nɛ́ i̧i̧ ɓɛɛ na, wa tɛ gbɛ‘nɛ́ mbɛt, ɓɛɛ wa taa'e mɔ nɛ̀‘i de'i nɛ́ ɗafa-sɔ̧.

³Wa tɛ de mɔ hegɔ wen wa iŋ Dáà na, ɓɛɛ wa iŋ am na mbɛt.

⁴Mi tɔ̧ɔ̧ mɔ‘i h’ɛ́nɛ́, kà ŋgimbi-a nɛ́ hɔa, ɓɛɛ ká tɛ‘nɛ́ mbaŋa ɗoŋ-aa'e, mi bàá tɔ̧ so wen'i ha'i kaɗi.

⁵«Mi tɔ̧ so wen-aa h’ɛ́nɛ́ nɛ̀ ku̧u̧naŋ-a mɛ na, wen mi biti so in'nɛ̀ɛ́. Ɓɛɛ kinii, mi si ɗoŋ tɛ wi nɛ̀ toma'm tɛnɛ, ɓɛɛ ŋma bíí mgbara'nɛ́ mɛ ak am'e: ‹Ɛ́nɛ́ nɛ́ déè nde?› bo na.

⁶Ɛ́nɛ́ duk nɛ dita-see wen n'am tɔ̧ɔ̧ mɔ‘i h’ɛ́nɛ́!

⁷Ɓɛɛ nɛ́ kpasawen a̧‘m tɔ̧ h’ɛ́nɛ́, yaka-a kɔ‘m tɛ duk nɛ́ mɔ nɛ̀ tɛ gbak'nɛ́, wen kà‘m yak na, wi-ye-ɗoŋ‘nɛ́ beka tɛ na, ɓɛɛ kà‘m nɛ́ yaka, mi tɛ tom a̧ tɛnɛ h’ɛ́nɛ́.

⁸Ɓɛɛ ŋgimbi n'aa tɛ tɛ, a̧ tɛ usi yɔɔ-kaya ko o bíí zaŋnu ha̧ wa zu mɔ ko ɗaŋmɔ, deemɔ nɛ̀ yuwar-a in kita.

⁹Tɛ́ mɔ ko ɗaŋmɔ, a̧ tɛ usi'e wa kɔ̧ ɗɔaa ha̧‘m na.

¹⁰Tɛ́ mɔ ko deemɔ nɛ̀ yuwar-a, a̧ tɛ usi'e mi nɛ́ tɛ̀ Dáà, ɓɛɛ ɛ́nɛ́ beka zɔk am ɓɔna.

¹¹Tɛ́ mɔ ko kita mbɛt, a̧ tɛ usi'e kita baa be-wan zaŋnu’ɛ kaɗi.

¹²«Mi a̧a̧ nɛ̀ dɔka mɔ woyo mɛ tɔ̧ h’ɛ́nɛ́; ɓɛɛ kinii tui-a tɛ gan'nɛ́.

¹³Ŋgimbi nɛ̀ Sa̧a̧ Ɔmi, wi-usi-kpasawen tɛ hɔ, a̧ tɛ mgbɔ‘nɛ́ ye nɛ̀ tɛ́ kpasawen lɛŋ. A̧ beka tɔ̧ wen nɛ̀ zu-a na; a̧ tɛ tɔ̧ nɛ́ mɔ n'aa tɛ zii, ɓɛɛ a̧ tɛ tɔ̧ mɔ lɛŋ nɛ̀ tɛ hɔ h’ɛ́nɛ́ mbɛt.

¹⁴A̧ tɛ gas'am, wen a̧ tɛ kpa mɔ tɛ mɔ nɛ̀ duk nɛ́ kɔ‘m, ɓɛɛ a̧ wee ɗoŋ-aa h’ɛ́nɛ́.

¹⁵Mɔ ko Dáà kɔ‘m lɛŋ nɛ́ kɔ‘m; mɛ̀ nɛ́ wen mɔ‘i a̧‘m tɔ̧a̧‘e, a̧ tɛ we nɛ́ ɗoŋ mɔ n'aa kpa tɛ‘m h’ɛ́nɛ́.

¹⁶«Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am.»

¹⁷Ɓɛɛ o ŋma ŋgaiwi kɔ̧-a̧ tɔ̧ sitɛ o ŋmaa: «Nɛ́ ge wen ge n'aa tɔ̧‘e: ‹Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am,› in n'aa tɔ̧‘e: ‹Mi tɛ́ nɛ̀ sitɛ Dáà,› wo’ɛ ge? »

¹⁸Ɓɛɛ wa tɔ̧: «Dekpaa tikiɗi'i bɔɔ nɛ́ ge, ɛ́ɛ́ iŋ k’ɛɛ gba̧a̧ wen n'aa tɔ̧'ɛ na.»

¹⁹Jesu iŋa'e wa kɔ̧ɔ̧ mɛ ak wi, ɓɛɛ tɔ̧ ha̧ wa: «Ɛ́nɛ́ ak ŋmaa zu wen n'am tɔ̧ h’ɛ́nɛ́‘e: ‹Dekpaa tikiɗi, ɛ́nɛ́ beka zɔk am ɓɔna, ɓɛɛ nɛ̀ ɗoŋ tikiɗi woyo, ɛ́nɛ́ tɛ zɔk am’ɛ,› nde?

²⁰Nɛ́ kpasawen a̧‘m tɔ̧ h’ɛ́nɛ́; ɛ́nɛ́ tɛ hi̧i̧ kɔ̧a̧, ai nɛ̀ nú, ɓɛɛ o bíí zaŋnu tɛ duk kɔ‘i nɛ́ desee; ɛ́nɛ́ tɛ ya nɛ̀ ɗaŋsee, ɓɛɛ ɗaŋsee k’ɛ́nɛ́ tɛ kpai nɛ̀ desee.

²¹Ŋgimbi nɛ̀ okoo ko bem, a̧ duk nɛ̀ ɗaŋsee wen ŋgimbi bɔnɛ hɔɔ kaɗi, ɓɛɛ ɗoŋ n'aa koo bem kaɗi, a̧ iŋ oi nyima zaŋ ɓɔna; a̧ duk nɛ̀ desee nyɛmna wen n'aa koo mbe bíí pi̧ zaŋnu.

²²Ɛ́nɛ́ mbɛt, kinii ɛ́nɛ́ ya nɛ̀ ɗaŋsee; ŋgimbi n'am tɛ pii ɗoŋ, ɛ́nɛ́ tɛ kpa desee, ɓɛɛ ŋma bíí nɛ̀ tɛ ba desee'i tɛ‘nɛ́ yinɛ bo na.

²³«Ɓɛɛ tɛ ŋgimbi'i, ɛ́nɛ́ beka ak am nɛ̀ ŋma mɔ ɓɔna. Nɛ́ kpasawen a̧‘m tɔ̧ h’ɛ́nɛ́; k’ɛ̀nɛ̀ ak ŋma mɔ er Dáà kɔ‘m nɛ̀ nin-am, a̧ tɛ ha̧ h’ɛ́nɛ́.

²⁴Hɔ kinii, ɛ́nɛ́ tɛ ak ŋma mɔ nɛ̀ nin-am hɔ̧ɔ̧ na. Ɛ̀nɛ̀ ák, ɓɛɛ ɛ́nɛ́ tɛ kpa, hegɔ ɓɛɛ ɛ́nɛ́ tɛ kpa kpasa desee.

²⁵«Mi tɔ̧ mɔ‘i h’ɛ́nɛ́ lɛŋ nɛ̀ lizaŋ, ɓɛɛ ŋgimbi tɛ hɔ n'am beka tɔ̧ wen h’ɛ́nɛ́ nɛ̀ lizaŋ ɓɔna; mi tɛ tɔ̧ wen mɔ ko Dáà h’ɛ́nɛ́ nɛ̀ sa̧a̧-a̧.

²⁶Ŋgimbi'i, ɛ́nɛ́ tɛ ak mɔ er Dáà nɛ̀ nin-am, ɓɛɛ bó nɛ́ mi tɔ̧ h’ɛ́nɛ́‘e nɛ́ mi'i tɛ kɔfi kɔfa mɔ er Dáà oi nú‘nɛ́ na,

²⁷wen Dáà kɔ̧ɔ̧‘nɛ́ wen n’ɛnɛ kɔ̧a̧‘m, ɓɛɛ k’ɛ́nɛ́ kɔ̧ ɗɔaa'e, mi gboo nɛ̀ tɛ́ Sɔ̧.

²⁸Mi gboo nɛ̀ tɛ̀ Dáà tɛ́ nɛnɛ pii zaŋnu, ɓɛɛ kinii, mi tɛ́ kur zaŋnu mɛ si ɗoŋ tɛ Dáà mɛ.»

²⁹O ŋgaiwi kɔ̧-a̧ tɔ̧a̧: «Kinii, ɛ̀nɛ̀ tɔ̧́ wen h’ɛ́ɛ́ nɛ̀ sa̧a̧-a̧, nɛ̀ bó nɛ́ lizaŋ ɓɔna.

³⁰Kinii ɛ́ɛ́ zɔka ɛ́nɛ́ iŋa mɔ lɛŋ; ŋma mɔ nɛ̀ bíí tɛ ak'nɛ́ zu-a ɓɛɛ ká gbaka'nɛ́ bo na. Nɛ́ hegɔ s’ɛ́ɛ́ kɔ̧ ɗɔaa'e ɛ́nɛ́ tɛ̀ɛ́ nɛ̀ tɛ́ Sɔ̧.»

³¹Jesu kifa nú ha̧ wa: «Ɛ́nɛ́ kɔ̧ɔ̧ ɗɔaa kinii nde?

³²Ŋgimbi a̧ tɛ‘i, ɓɛɛ ŋgimbi'i nɛ́ mɔ‘i nɛ̀ hɔɔ kaɗi’ɛ, n’ɛnɛ tɛ pɛsi kpɔk kpɔk e'm ɛ̀n'am, ɓɛɛ mi bo ɛ̀n'am na, Dáà a̧a̧ in am.

³³Mi tɔ̧ɔ̧ mɔ‘i h’ɛ́nɛ́, wen h’ɛ́nɛ́ mɛ kpa ga̧a̧mɔ tɛ duka-a tɛ‘m. Ɛ́nɛ́ tɛ zɔk bɔnɛ sɛn zaŋnu, ɓɛɛ ɛ̀nɛ̀ nɔ́ ŋgiɗi! Mi gana zu mɔɔ-zaŋnu.»