Read Northwest Gbaya JEAN 17 Bible Online

JEAN 17 - Northwest Gbaya bible

JEAN 17

¹Ɗoŋ tɔ̧ɔ̧ wen'i Jesu ɓera yí si yiwese, ɓɛɛ tɔ̧: «Dáà, ŋgimbi hɔɔ kaɗi, ɛ̀nɛ̀ dé ha'i mɛ zɔk gasamɔ ko Bem k’ɛ́nɛ́, wen ha̧ Bem k’ɛ́nɛ́ mɛ de ha'i mɛ zɔk gasamɔ k’ɛ́nɛ́,

²in wen ha̧ a̧ mɛ ha̧ duka-kpasa kpoo nɛ kpoo ha̧ o bíí n’ɛnɛ ha̧a̧ ha̧ a̧ lɛŋ, nyɛm nɛ̀ ɗoŋ ŋgai n’ɛnɛ ha̧a̧ ha̧ a̧ zu o bíí lɛŋ.

³Ɓɛɛ duka-kpasa kpoo nɛ kpoo mɛ̀ nɛ́ wen ha̧ wa mɛ iŋ‘nɛ́, kpasa Sɔ̧ kpɔk, in Jesu Krist, wi n’ɛnɛ toma tɛnɛ.

⁴Mi dee ha'i mɛ zɔk gasamɔ k’ɛ́nɛ́ zaŋnu’ɛ; tom n’ɛ́nɛ́ usa ha̧‘m mɛ́ de'i, mi dee kaɗi.

⁵Ɓɛɛ kinii, Dáà, ɛ̀nɛ̀ dé ha̧‘m mɛ duk tɛ gasamɔ katɛ‘nɛ́, gasamɔ n'am duka so sɛnɛ katɛ‘nɛ́ nɛti sɛka'i bé tɛ̀ɛ́ dè nù.

⁶«Mi usa nin'nɛ́ ha̧ o bíí n’ɛnɛ ha̧a̧ ha̧‘m mgbara o bíí zaŋnu’ɛ; wa duka so nɛ́ k’ɛ́nɛ́, ɓɛɛ ɛ́nɛ́ ha̧ wa ha̧‘m, nɛ́ mɔ'ɔ nɛ̀ wa kasa wen k’ɛ́nɛ́.

⁷Kinii, wa iŋa'e mɔ lɛŋ n’ɛnɛ ha̧a̧ ha̧‘m tɛ̀ɛ́ nɛ̀ tɛ‘nɛ́;

⁸wa iŋa'e wen n'am tɔ̧ɔ̧ ha̧ wa nɛ́ wen n’ɛnɛ tɔ̧ɔ̧ ha̧‘m. Wa kpɛka, ɓɛɛ wa iŋ nɛ̀ mbetɛ‘e mi gboo nɛ̀ tɛ‘nɛ́, ɓɛɛ wa kɔ̧ ɗɔaa'e nɛ́ ɛ́nɛ́'ɛ toma'm tɛnɛ.

⁹«Mi kɔfi'nɛ́ wen zu wa; bó nɛ́ mi kɔfi'nɛ́ wen zu o bíí zaŋnu na, ɓɛɛ mi kɔfi'nɛ́ wen zu o bíí n’ɛnɛ ha̧a̧ ha̧‘m, wen wa nɛ́ k’ɛ́nɛ́.

¹⁰Wen mɔ kɔ‘m lɛŋ nɛ́ k’ɛ́nɛ́, hee mɔ'ɔ nɛ̀ mɔ k’ɛ́nɛ́ lɛŋ nɛ́ kɔ‘m ga, ɓɛɛ nɛ́ tɛ-wa a'i zɔk nɛ̀ gasamɔ kɔ‘m.

¹¹Mi bo zaŋnu siti ɓɔna, ɓɛɛ kɔ-wa, wa biti zaŋnu. Mi nɛ́ kɔ‘m sitɛ‘nɛ́, Dáà Sa̧a̧ Wi; ɛ̀nɛ̀ zɔ́k wa nɛ̀ de-a nɛ̀ nin'nɛ́ n’ɛnɛ ha̧a̧ ha̧‘m, wen ha̧ wa mɛ́ duk kpɔk hee ɛ́ɛ́ duk kpɔk ga.

¹²Ŋgimbi n'am duka so nɛnɛ in wa, mi zɔka wa nɛ̀ de-a nɛ̀ nin'nɛ́ n’ɛnɛ ha̧a̧ ha̧‘m; mi duu wee zɔk nɛ̀ wa, ɓɛɛ ŋma bíí mgbara wa yɔ kpɔk na, kànà nɛ́ wi nɛ tɛ̀ɛ́ yɔ so'i a̧ yɔɔ ɓɛɛ, wen ha̧ Yɔramɔ mɛ hɔ gba̧a̧.

¹³Kinii mi si ɗoŋ tɛ‘nɛ́, ɓɛɛ s'am tɔ̧ wen'i ɓɔn zaŋnu’ɛ wen ha̧ wa mɛ kpa kpasa desee kɔ‘m.

¹⁴Mi usa wen k’ɛ́nɛ́ ha̧ wa, ɓɛɛ o bíí zaŋnu sɛna wa wen wa bó nɛ́ o bíí zaŋnu na, hee mɔ'ɔ nɛ‘m bó nɛ́ bíí zaŋnu mbɛt na ga.

¹⁵Bó nɛ́ mi kɔfi'nɛ́ mɛ kai wa yinɛ zaŋnu na, ɓɛɛ h’ɛ́nɛ́ mɛ́ pɛm wa yu nɛ̀ Wan-ɗaŋmɔ.

¹⁶Wa bó nɛ́ o bíí zaŋnu na, hee mɔ'ɔ nɛ‘m bó nɛ́ bíí zaŋnu na’ɛ ga.

¹⁷Ɛ̀nɛ̀ dé ha̧ kpasawen mɛ́ de ha̧ wa mɛ́ duk nɛ́ bíí k’ɛ́nɛ́: wen k’ɛ́nɛ́ nɛ́ kpasawen.

¹⁸Hee ɛ́nɛ́ toma'm tɛnɛ zaŋnu ga, mi tom wa nɛnɛ zaŋnu mbɛt.

¹⁹Ɓɛɛ mi ha̧a̧ tɛ‘m wen zu wa, wen ha̧ kpasawen mɛ de wa nɛ̀ bíí k’ɛ́nɛ́ mbɛt.

²⁰«Bó nɛ́ mi kɔfi'nɛ́ wen zu wa ɓɛɛ na; mi kɔfi'nɛ́ wen zu o bíí nɛ̀ tɛ kɔ̧ ɗɔaa ha̧‘m wen zu usamɔ kɔ-wa,

²¹wen ha̧ wa lɛŋ mɛ́ duk kpɔk, hee mɔ'ɔ nɛ̀ ɛ́nɛ́, Dáà, duk tɛ‘m, ɓɛɛ mi duk tɛ‘nɛ́'ɛ ga, ha̧ wa mɛ duk tɛ yɛ mbɛt, wen ha̧ o bíí zaŋnu mɛ iŋ‘e, nɛ́ ɛ́nɛ́'ɛ toma'm tɛnɛ nɛ̀ mbetɛ.

²²Gasamɔ n’ɛnɛ ha̧a̧ ha̧‘m, mi ha̧a̧ ha̧ wa, wen ha̧ wa mɛ́ duk kpɔk hee ɛ́ɛ́ ga.

²³Mi tɛ duk tɛ-wa, hee mɔ'ɔ n’ɛnɛ duk nɛnɛ tɛ‘m’ɛ ga, wen ha̧ wa mɛ duk kpɔk nɛ̀ mbetɛ; hegɔ, ɓɛɛ o bíí zaŋnu tɛ iŋ‘e nɛ́ ɛ́nɛ́'ɛ toma'm tɛnɛ, ɓɛɛ ɛ́nɛ́ kɔ̧ɔ̧ wa hee mɔ'ɔ n’ɛnɛ kɔ̧ɔ̧ nɛ‘m’ɛ ga.

²⁴«Dáà, mi kɔ̧ɔ̧ ha̧ o bíí n’ɛnɛ ha̧a̧ ha̧‘m mɛ duk in am sɛn fara n'am duk sɛnɛ, wen ha̧ wa mɛ zɔk gasamɔ n’ɛnɛ ha̧a̧ ha̧‘m, wen ɛ́nɛ́ kɔ̧a̧‘m nɛ̀ ku̧u̧naŋ-a sɛka nù biti de.

²⁵Dáà wi-de-mɔ nɛ̀ yuwar-a, o bíí zaŋnu iŋ‘nɛ́ na, ɓɛɛ kɔ‘m, mi iŋa'nɛ́; o wi nɔ'ɔ mbɛt iŋa'e nɛ́ ɛ́nɛ́'ɛ toma'm tɛnɛ.

²⁶Mi dee ha̧ wa mɛ́ iŋ nin'nɛ́, ɓɛɛ mi tɛ de ha̧ wa mɛ́ iŋ siti mbɛt, wen ha̧ kɔ̧ɔ̧mɔ n’ɛnɛ kɔ̧ɔ̧ nɛ‘m'i mɛ́ duk tɛ-wa in ha̧‘m mɛ́ duk tɛ-wa mbɛt.»