Read Northwest Gbaya JEAN 18 Bible Online

JEAN 18 - Northwest Gbaya bible

JEAN 18

¹Jesu tɔ̧ɔ̧ wen'i kaɗi, ɓɛɛ yak in o ŋgaiwi kɔ‘i si kur Sɛdrɔŋ mɛ. Ŋma fɔ a̧a̧ so hi̧i̧, ɓɛɛ Jesu ye kpɛɛfɔ‘i in o ŋgaiwi kɔ‘i.

²Judas, wi-e-ɗɔra tɛ Jesu iŋa fara'i nɛ̀ de-a, wen ɓɔnsɛnɛ Jesu duka so mɔi̧ in o ŋgaiwi kɔ‘i sɛn hi̧i̧.

³Ɓɛɛ nɛ́ mɔ'ɔ nɛ̀ Judas kaia o gíí wi-biro in o dogari nɛ̀ o gasa wan-ɗafi-sɔ̧ in o Fariziɛn toma, ɓɛɛ mgbɔ wa nɛ̀ wèé-kan in lamba ká bá nɛ̀ o boi-biro si kpɛɛfɔ‘i.

⁴Jesu iŋa mɔ lɛŋ nɛ̀ tɛ hɔ zu wi; nɛ́ mɔ'ɔ n'aa nɛ̀ɛ̀ siti, ɓɛɛ tɔ̧ ha̧ wa: «Ɛ́nɛ́ kíí nɛ́ o?»

⁵Wa kifa nú ha̧ a̧: «Ɛ́ɛ́ kíí nɛ́ Jesu be Nazarɛt.» Ɓɛɛ Jesu tɔ̧ ha̧ wa: «Mí nɛ́ mɔ'ɔ.» Ŋgimbi'i, Judas, wi-e-ɗɔra tɛ-a a̧a̧ so mgbara wa mbɛt.

⁶Tɔ̧a̧-a̧ nɛ̀ Jesu tɔ̧ɔ̧ ha̧ wa: «Mí nɛ́ mɔ'ɔ,» wó, wa pɛɛ si ɗoŋ, ɓɛɛ wa yo nù gbéyéŋ.

⁷Jesu aka wa woyo: «Ɛ́nɛ́ kíí nɛ́ o?» Wa tɔ̧a̧: «Ɛ́ɛ́ kíí nɛ́ Jesu be Nazarɛt.»

⁸Ɓɛɛ Jesu kifi nú ha̧ wa: «Bó nɛ́ mi tɔ̧ɔ̧ h’ɛ́nɛ́‘e, mí nɛ́ mɔ'ɔ na? Hegɔ, kà bó nɛ́ mi ɛ̀nɛ̀ kii, ɓɛɛ ɛ̀nɛ̀ é o wi nɔ'ɔ ha̧ wa yak kɔ-wa.»

⁹Hegɔ, wen nɛ Jesu tɔ̧ɔ̧ so'e: «Bíí kpɔk mgbara o bíí n’ɛnɛ ha̧a̧ ha̧‘m yɔ na,» wó‘i, hɔɔ gba̧a̧.

¹⁰Simɔŋ Pierre nɛ̀ a̧a̧ so nɛ̀ gba-paa, daka, ɓɛɛ gɔm nɛ̀ wi-de-tom ko gasa wan-ɗafi-sɔ̧, ɓɛɛ mɛ̧ zer-aa mɛ wiiko pi̧ nù. Nin wi’ɛi nɛ́ Malkus.

¹¹Ɓɛɛ Jesu tɔ̧ ha̧ Pierre: «Mɛ̀ zú gba-paa kɔ-mɛ kɔ̧́ koɓo-a. Mɛ́ ta kɔ-mɛ‘e mi beka nɔ́ be-ɗele-bɔnɛ nɛ̀ Dáà ha̧a̧ ha̧‘m'i na?»

¹²O wi-biro in gasawi kɔ‘i ká bá nɛ̀ o dogari ko o Juif baa Jesu, ɓɛɛ wa hɛr a̧.

¹³Wa mgbɔɔ a̧ nɛnɛ ti Ha̧n nɛti; Ha̧n nɛ́ for Kaif nɛ̀ duka gasa wan-ɗafi-sɔ̧ tɛ pɛ‘i.

¹⁴Nɛ́ Kaif'i a̧ tɔ̧ɔ̧ so ha̧ o Juif'e ndé: «Dèè so gan ha̧ bíí kpɔk mɛ fe wen gɔna zu dukbíí.»

¹⁵Simɔŋ Pierre in ŋma ŋgaiwi nɛ̀ɛ̀ so ɗoŋ Jesu. Hee mɔ'ɔ nɛ̀ gasa wan-ɗafi-sɔ̧ iŋa ti ŋgaiwi'i nɛti ga, ŋgaiwi yee si kɔ̧́ tua ko gasa wan-ɗafi-sɔ̧ kpɔk in Jesu.

¹⁶Ɓɛɛ Pierre duk kɔ‘i ká̧ nú tua nɛ̀ zan. Ɓii ŋgaiwi nɛ̀ gasa wan-ɗafi-sɔ̧ iŋa'i gboo zan, ɓɛɛ tɔ̧ wen in ko-pɛm-nú tua, ɓɛɛ a̧ e ha̧ Pierre mɛ ye mɔ.

¹⁷Ɓɛɛ boko-be-pɛm nú tua tɔ̧ ha̧ Pierre: «Bó nɛ́ mɛ́ mbɛt, nɛ́ ŋma ŋgaiwi ko wi’ɛ na?» Ɓɛɛ Pierre kifi: «Bó nɛ́ mí na.»

¹⁸O wi-de-tom in o dogari yee so wee ɔ nɛnɛ wen gɛ̧ɛ̧ de so nɛ́ mɔ; Pierre mbɛt nɛ̀ɛ̀ yor fara'i ɔ nɛ̀ wee in wa.

¹⁹Ɓɛɛ gasa wan-ɗafi-sɔ̧ ku̧ naŋ aka Jesu zu o ŋgaiwi in zu usamɔ kɔ̧-a̧.

²⁰Jesu kifa nú ha̧ a̧: «Mi tɔ̧ɔ̧ wen nɛ̀ gbaayí o bíí lɛŋ. Mi usa mɔ ɓɔnsɛnɛ kɔ̧̀ o tua-mɔi̧a-a, in kɔ̧́ Tua ko Sɔ̧ fara nɛ̀ o Juif mɔi̧ ŋmaa sɛnɛ, ɓɛɛ mi tɔ̧ ŋma wen nɛ̀ hu̧sa̧-a̧ na.

²¹Wen ge sa mɛ ak nɛ‘m ge? Mɔ n'am tɔ̧a̧‘i, mɛ̀ ák nɛ́ o wi-zia-a ɛ̧, wen wa iŋa mɔ n'am tɔ̧a̧ nɛ̀ de-a.»

²²Ŋma dogari nɛ̀ yora so hi̧i̧, mbɛra yí Jesu tɛ wen'i ɓɛɛ tɔ̧: «Nɛ́ hegɔ a̧ mɛ tɛ̀ɛ́ kifi nɛ̀ nú ha̧ gasa wan-ɗafi-sɔ̧?»

²³Jesu kifa nú ha̧ a̧: «Kà‘m nɛ́ tɔ̧ɔ̧ ɗaŋ wen, ɓɛɛ mɛ̀ tɔ̧̀. Ɓɛɛ kà‘m nɛ́ tɔ̧ɔ̧ wen nɛ̀ de-a, mɛ́ mbɛr yí‘m wen ge?»

²⁴Ɓɛɛ Ha̧n tom Jesu nɛ̀ oi hɛra-a sitɛ gasa wan-ɗafi-sɔ̧, Kaif.

²⁵Tɛ́ ŋgimbi'i, Simɔŋ Pierre duka so hi̧i̧ ɔ nɛ̀ wee. Ɓɛɛ wa tɔ̧ ha̧ a̧: «Bó nɛ́ mɛ́ mbɛt nɛ́ ŋma ŋgaiwi ko wi’ɛ na?» Pierre kafa ɓɛɛ tɔ̧: «Bó nɛ́ mí na.»

²⁶Ŋma wi-de-tom ko gasa wan-ɗafi-sɔ̧, nàm ko wi nɛ̀ Pierre ɓira so zer-aa, tɔ̧a̧: «Bó nɛ́ mí zɔka mɛ in a̧ kpɛɛfɔ mɛ‘i na?»

²⁷Pierre kafa woyo, ɓɛɛ tɛ́ kale ŋgimbi'i, gata-kɔra hèé mɔ.

²⁸Mɔ gɔna kaɗi, ɓɛɛ wa mgbɔ Jesu nɛ̀ tɛ̀ ko Kaif nɛnɛ si tɛ̀ ko Pilat mɛ; wa kɔ̧ yee tua'i na, wen ká war-tɛ-wa tɛɛ ɗaŋ, kà bé dè ká wa nyɔŋa gbaŋa Paska.

²⁹Nɛ́ mɔ'ɔ nɛ̀ Pilat gboo kpa wa zan ɓɛɛ tɔ̧: «Ɛ̀nɛ̀ tɔ̧́ gba̧a̧ mɔ n’ɛnɛ wuli nɛ̀ wi’ɛ, ɛ̀ɛ̀ zìì.»

³⁰Wa kifa nú ha̧ a̧: «Kà wi’ɛ de so ŋma ɗaŋmɔ na, bék’ɛ̀ɛ̀ ba so a̧ tɛnɛ h’ɛ́nɛ́ na.»

³¹Pilat tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́, ɛ̀nɛ̀ bá a̧, ɓɛɛ ɛ̀nɛ̀ gɔ́n kita zu a̧ nyɛm nɛ̀ ɗoŋ heembea k’ɛ́nɛ́.» O Juif kifa nú ha̧ Pilat: «Ɛ́ɛ́ bó nɛ̀ ŋgai mɛ gbɛ bíí na.»

³²Mɔ‘i dee hegɔ wen ha̧ wen nɛ̀ Jesu tɔ̧ɔ̧ so zu fio n'aa tɛ̀ɛ́ fe, mɛ hɔ gba̧a̧.

³³Pilat yee kɔ̧́ tua kɔ‘i, sa Jesu, ɓɛɛ tɔ̧: «Mɛ́ nɛ́ wannu ko o Juif?»

³⁴Jesu kifa nú: «Nɛ́ mɛ́'ɛ tɔ̧ wen'i nɛ̀ tɛ-mɛ náà, kóó nɛ́ o ŋma bíí a̧ tɔ̧ɔ̧ wen kɔ‘m ha̧ mɛ nde?»

³⁵Pilat kifa nú ha̧ a̧: «Mɛ́ zɔka mi nɛ́ Juif in mɛɛ? Nɛ́ mgbák tugun bíí kɔ-mɛ in o gasa wan-ɗafi-sɔ̧ a̧ baa mɛ tɛnɛ ha̧‘m; ɓɛɛ mɛ́ dee nɛ́ ge mɔ ge?» Jesu kifa nú: «Wan kɔ‘m bó nɛ́ wan zaŋnu’ɛ na.

³⁶Kà wan kɔ‘m a̧ bó só nɛ́ wan mɛ zaŋnu’ɛ, ɓɛɛ o dogari kɔ‘m tɛɛ ye biro zu'm, wen ká wa tɛɛ e'm er o Juif. Mɔ kpɔk, wan kɔ‘m bó nɛ́ wan mɛ zaŋnu’ɛ na.»

³⁷Pilat aka a̧: «Hegɔ mɛ́ nɛ́ wannu?» Jesu kifa nú ha̧ a̧: «Nɛ́ mɛ́'ɛ tɔ̧a̧‘e mí nɛ́ wannu. Mi tɛa, ɓɛɛ wa ko'm zaŋnu’ɛ mɛ de sedaako wen kpasawen; kóó o ndé nɛ̀ duk tɛ kpasawen zii nɛ́ wen kɔ‘m.»

³⁸Pilat aka a̧: «Kpasawen nɛ́ ge?» Tɛ́ wen'i, Pilat gboo kpa o Juif zan woyo, ɓɛɛ tɔ̧ ha̧ wa: «War kɔ‘m, mi kpa ŋma yoŋgo nɛ̀ nyɛma ha̧ kita mɛ tik wi’ɛ na.

³⁹Ɓɛɛ ta-oi-mɔ k’ɛ́nɛ́, mɛ̀ nɛ́ ha̧‘m mɛ gbo ŋma wi-zɔɓɔ h’ɛ́nɛ́ tɛ gbaŋa Paska. Ɛ́nɛ́ kɔ̧ɔ̧ a̧‘m gbó nɛ́ wannu ko o Juif h’ɛ́nɛ́ nde?»

⁴⁰Ɓɛɛ wa ku̧ naŋ hiɗa mɔ: «Bó nɛ́ a̧ ɛ́ɛ́ kɔ̧ɔ̧ na, ɛ̀nɛ̀ gbó nɛ́ Barabas ɛ̧!» Barabas duka so nɛ́ kpɔ̧i̧-gba̧a̧-nin.