Read Northwest Gbaya JEAN 19 Bible Online

JEAN 19 - Northwest Gbaya bible

JEAN 19

¹Ɓɛɛ Pilat tɔ̧ ha̧ o wi-biro mɛ ba Jesu nɛ́ɛ̀ gusi.

²Nɛ́ mɔ'ɔ nɛ̀ o wi-biro kara tɛnmɔ gu zu-a; ɓɛɛ wa pi̧ gasa gbɛ̧ laa tɛ-a.

³Wa ɗɔŋa sitɛ a̧, ɓɛɛ tɔ̧: «Ɛ̀nɛ̀ wór mɔ, wannu ko o Juif!» Ɓɛɛ wa ye tɛ mbɛra a̧.

⁴Pilat gboo woyo tɔ̧ ha̧ o Juif: «A̧i̧yoo! Mi tɛ mgbɔ a̧ gbonɛ h’ɛ́nɛ́ mɛ iŋ‘e, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.»

⁵Nɛ́ mɔ'ɔ nɛ̀ Jesu gboo pii tɛ wa nɛ̀ oi tɛnmɔ zu in gbɛ̧ laa. Ɓɛɛ Pilat tɔ̧ ha̧ wa: «Zɔ́k, wi’ɛ nɛ́ mɔ'ɔ!»

⁶Zɔka Jesu nɛ o gasa wan-ɗafi-sɔ̧ in o bíí kɔ-wa zɔka hegɔ, ɓɛɛ wa gai mɔ: «Ɛ̀nɛ̀ mgbóí a̧ zu te-diŋa! Ɛ̀nɛ̀ mgbóí a̧ zu te-diŋa!» Pilat tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́, ɛ̀nɛ̀ bá a̧, ɓɛɛ ɛ̀nɛ̀ mgbóí a̧ zu te-diŋa. Kɔ‘m, mi kpa ŋma yoŋgo nɛ̀ nyɛma mɛ de ha̧ kita mɛ tik a̧ na.»

⁷O Juif kifa nú ha̧ a̧: «Ɛ́ɛ́ a̧a̧ nɛ̀ ŋma heembea k’ɛɛ, ɓɛɛ heembea'i usa'e a̧ tɛ fe kànà wen n'aa tɔ̧a̧‘e a̧ nɛ́ Bem ko Sɔ̧.»

⁸Ŋgimbi nɛ̀ Pilat zia wen'i, kíì dee a̧ gan kuti-a.

⁹A̧ yee tua woyo, ɓɛɛ a̧ ak Jesu: «Mɛ́ tɛ́ nɛ̀ de?» Jesu kifi ŋma nú ha̧ a̧ na.

¹⁰Ɓɛɛ Pilat tɔ̧ ha̧ a̧: «Nɛ́ mi a̧ mɛ bɛ̧ kifa nú ha̧ a̧'ɛ? Mɛ́ iŋ‘e mi a̧a̧ nɛ̀ ŋgai mɛ gbo mɛ yinɛ, kóó mɛ mgboi mɛ zu te-diŋa mbɛt na nde?»

¹¹Jesu kifa nú ha̧ a̧: «Kà Sɔ̧ ha̧ so ŋgai ha̧ mɛ nɛ̀ ŋgɔn mɛ na, ɓɛɛ bó nɛ́ mɛ́ tɛ̀ɛ́ kpa ŋma ŋgai zu'm na; mɛ̀ nɛ́ hegɔ, nɛ́ wi nɛ̀ ea'm er-mɛ‘i a̧ dee gasa ɗaŋmɔ ɛ̧.»

¹²Tɛ́ ŋgimbi'i, Pilat ku̧u̧ naŋ kia war mɛ gbo Jesu pi̧ nù, ɓɛɛ o Juif ye tɛ gaiamɔ tɔ̧ nɛnɛ‘e: «Kà mɛ̀ gbo a̧ pi̧ nù, ɓɛɛ mɛ bó nɛ́ sɛm ko Sezar na, wen kóó o ndé nɛ̀ tɔ̧‘e wi nɛ́ wannu bá nɛ́ zù wé nɛ̀ Sezar.»

¹³Zia wen'i nɛ̀ Pilat zia hegɔ, a̧ mgbɔɔ Jesu si zan, ɓɛɛ duk nù fara-gɔn-kita kɔ̧-a̧ nɛ̀ wa mboo nɛ̀ ta (nɛ̀‘i sa nɛ̀ nú hébreu'e «Gabata»).

¹⁴Wese'i duka nɛ́ wese-ɗafi-mɔ wen gbaŋa Paska, ká wese hɛɗa see-zu kaɗi. Pilat tɔ̧ɔ̧ ha̧ o Juif: «Zɔ́k, wannu k’ɛ́nɛ́ nɛ́ mɔ'ɔ.»

¹⁵Ɓɛɛ wa tɔ̧: «A̧ a̧ fé fee! A̧ a̧ fé fee ɛ̧! Ɛ̀nɛ̀ mgbóí a̧ zu te-diŋa!» Pilat aka wa: «A̧‘m mgboi wannu k’ɛ́nɛ́ zu te-diŋa nde?» O gasa wan-ɗafi-sɔ̧ kifa nú: «Ɛ́ɛ́ bó nɛ̀ ŋma wannu gan zu Sezar na!»

¹⁶Ɓɛɛ Pilat e Jesu er-wa ha̧ wa mɛ mgboi a̧ zu te-diŋa. Ɓɛɛ wa ba Jesu.

¹⁷Hegɔ ɓɛɛ wa ba Jesu. Nɛ́ mɔ'ɔ nɛ̀ Jesu tuia te-diŋa kɔ‘i nɛ̀ saaye yak si fara nɛ̀‘i sa'e: «Fara Koŋgoi-zu» (nɛ̀ nú hébreu nɛ́ «Gɔlgɔta»),

¹⁸ɓɛɛ wa mgboi a̧ zu te-diŋa in o ŋma bíí yiitoo, kpɔk nɛ̀ war wii-er-a, ɓii-aa nɛ̀ war gale, e Jesu see-a.

¹⁹Ɓɛɛ Pilat yɔr mɔ e zu te-diŋa nɛ̀ tɔ̧a̧‘e: «Jesu be Nazarɛt, wannu ko o Juif.»

²⁰O Juif nɛ̀ dɔka-a tɔra yɔramɔ‘i, wen fara nɛ̀ wa mgboia Jesu zu te-diŋa sɛnɛ‘i nyɛi̧ nɛ̀ ye na. Wa yɔra mɔ‘i nɛ̀ nú hébreu, in nú latin ká bá nɛ̀ nú grɛk.

²¹O gasa wan-ɗafi-sɔ̧ ko o Juif tɔ̧ɔ̧ ha̧ Pilat: «Bó nɛ́ ɛ́nɛ́ tɛ̀ɛ́ yɔr'e: ‹Wannu ko o Juif na,› ɓɛɛ ɛ́nɛ́ tɛ̀ɛ́ yɔr so'e: ‹Wi’ɛ tɔ̧a̧‘e: wi nɛ́ wannu ko o Juif.› »

²²Pilat kifa nú: «Mɔ n'am yɔra, mi yɔra kaɗi.»

²³Ɗoŋ nɛ̀ o wi-biro mgboia Jesu zu te-diŋa kaɗi, wa kaia o laa kɔ̧-a̧ kɛ̧ tɛ fara naar, ha̧ ha̧ o ŋmaa; ɓɛɛ nɛ̀ war ko be laa-pi̧-nɛ̀-ɗɔɔ, i̧i̧ ɓɔna wen bó nɛ́ wa fura fur na. Kɔ̧́ laa'i kpɔk, ɓɛɛ wa toka so tok nɛ̀ ger-a mɛ pii ɗɔɔ.

²⁴Nɛ́ mɔ'ɔ nɛ̀ wa tɔ̧ɔ̧ sitɛ o ŋmaa: «K’ɛ́ɛ́ a̧k be laa’ɛ na, ɛ̀ɛ̀ bí nɛ̀ mbaɗi; wi nɛ̀ nyɔŋa, gbɛa.» Hegɔ mɔ nɛ̀ Yɔramɔ tɔ̧a̧ so'e: «Wa kɛ̧ɛ̧ laa kɔ‘m nɛ̀ ŋmaa, wa bìì be laa kɔ‘m nɛ̀ mbaɗi,» hɔɔ gba̧a̧. Mɔ nɛ̀ o wi-biro dee nɛ́ mɔ‘i.

²⁵Nàà ko Jesu yora ká̧ te-diŋa ko Jesu in nya-wi, seka Marii kóò ko Kleopas, ká bá nɛ̀ Marii Magdala.

²⁶Jesu zɔka nàà kɔ‘i in ŋgaiwi n'aa kɔ̧ɔ̧ nyɛmna nɛ̀ yor katɛ a̧, ɓɛɛ a̧ tɔ̧ ha̧ nàà kɔ̧-a̧: «Kóò'ɛ, zɔ́k bem kɔ-mɛ hɛ̧ɛ̧.»

²⁷Ɓɛɛ a̧ tɔ̧ ha̧ ŋgaiwi'i: «Mɛ̀ zɔ́k nàà kɔ-mɛ hɛ̧ɛ̧.» Nɛ́ tɛ ŋgimbi'i a̧ ŋgaiwi'i mgbɔɔ nɛ̀ nàà ko Jesu si tɛ̀ kɔ‘i.

²⁸Nɛ̀ Jesu iŋa'e mɔ lɛŋ kaɗa kaɗi, a̧ tɔ̧a̧: «Wɔ-yì gbɛ‘m gbɛɛ,» wen ha̧ mɔ nɛ̀ yɔra so mɛ hɔ gba̧a̧ lɛŋ.

²⁹Ŋma kpánà duka so hi̧i̧ nɛ̀ duna nɛ̀ kpa̧i̧a̧-dɔ̧ɔ̧. Wa pi̧i̧ saala ɗɔɔ-aa sɔk nú bé tè[17], ɓɛɛ wa nyɛi̧ e nú Jesu.

³⁰Nɛ̀ Jesu nɔɔ kpa̧i̧a̧ dɔ̧ɔ̧ kaɗi, a̧ tɔ̧a̧: «Mɔ lɛŋ kaɗa kaɗi.» A̧ zuma zu-a, ɓɛɛ a̧ fe.

³¹Wese'i duka nɛ́ ŋgimbi ɗafa mɔ wen gbaŋa Paska. Nɛ́ mɔ'ɔ nɛ̀ o Juif tɔ̧ɔ̧ ha̧ Pilat mɛ gbin ku o wi nɛ̀ wa hɛra zu te-diŋa mɛ kai wɔ̀r-wà yínɛ́,[18] wen ká tɛɛ ɓɔn zu te-diŋa wese-ɔm-tɛ, wen wese-ɔm-tɛ‘i tɛ̀ɛ́ duk nɛ́ gasa wese nyɛmna.

³²Hegɔ, o wi-biro nɛ̀ɛ̀ gbin ku o wi nɔ‘i yiitoo nɛ̀ wa hɛra zu te-diŋa in Jesu'i.

³³Kà wa tɛ hɔ tɛ Jesu, wa zɔka a̧ fee kaɗi, ɓɛɛ wa gbin ku-a na;

³⁴ɓɛɛ ŋma wi-biro tok ɔm-a nɛ̀ labo, ɓɛɛ tɔk in yì gbo a nù.

³⁵Mɛ̀ nɛ́ wi nɛ̀ zɔka mɔ‘i a̧ dee sedaako-a, ɓɛɛ sedaako kɔ̧-a̧‘i nɛ́ kpasa sedaako; wi’ɛi iŋa'e wen n'aa tɔ̧‘i nɛ́ kpasawen, wen h’ɛ́nɛ́ mbɛt mɛ́ kɔ̧ ɗɔaa.

³⁶Mɔ‘i dee ha̧ Yɔramɔ nɛ̀ tɔ̧ɔ̧ so'e: «Wa gbin gba̧a̧-tɛ‘m na,» mɛ hɔ gba̧a̧.

³⁷Ŋma Yɔramɔ tɔ̧ɔ̧ mbɛt'e: «Wa tɛ zɔk wi nɛ̀ wa toka so nɛ̀ gbaayí-wa.»

³⁸Ɗoŋ mɔ‘i, Jozɛf be Arimatee, nɛ̀ duka so nɛ́ ŋma ŋgaiwi ko Jesu nɛ̀ ti fui, wen a̧ dee so kíì o Juif, nɛ̀ɛ̀ ak Pilat mɛ ba wɔr Jesu. Pilat ha̧a̧ war ha̧ a̧, ɓɛɛ a̧ nɛ́ɛ̀ ba wɔr Jesu.

³⁹Nikodɛm nɛ̀ nɛ̀ɛ̀ so tɛ Jesu mɛ zɛ nɛ̀ɛ̀ mbɛt. A̧ baa nɔ̧́-nyama zaŋ nɛ̀ ŋmaa in fuu-nyama, dita-a dee hee kilo ɓu-taar ga.

⁴⁰Wa baa wɔr Jesu, ɓɛɛ wa ye a̧ nɛ̀ laa, wa aa fuu-nyama tɛ-a mbɛt hee mɔ'ɔ nɛ̀ o Juif de ɓɔnsɛnɛ tɛ guna fio kɔ-wa ga.

⁴¹Ŋma fɔ duka so ká̧ fara nɛ̀ wa mgboia Jesu zu te-diŋa sɛnɛ‘i, ɓɛɛ ŋma kɔ̧́ fio nɛ̀‘i tɛ gun bíí sɛnɛ nɛti na duka so hi̧i̧ mbɛt.

⁴²Hee mɔ'ɔ nɛ̀ o Juif a̧a̧ tɛ ɗafa mɔ wen gbaŋa kɔ‘i ga, wa guna Jesu ɓɔn hi̧i̧, wen kɔ̧́ fio nyɛi̧ nɛ̀ fara'i na.