Read Northwest Gbaya JEAN 20 Bible Online

JEAN 20 - Northwest Gbaya bible

JEAN 20

¹Wese alat mɛ tutuyɛ sut, ká mɔ tɛ gɔn hɔ̧ɔ̧ na, Marii Magdala nɛ̀ɛ̀ si zu pɛsi mɛ, ɓɛɛ zɔk'e wa kina ta yinɛ nú pɛsi-fio.

²A̧ maa yì si ɗoŋ nɛ́ɛ̀ kpa Simɔŋ Pierre in ɓii ŋgaiwi nɛ̀ Jesu kɔ̧ɔ̧ nyɛmna, ɓɛɛ tɔ̧ ha̧ wa: «Wa baa Gasa Wan kɔ̧́ pɛsi yinɛ, ɓɛɛ ɛ́ɛ́ iŋ fara nɛ̀ wa ee a̧ sɛnɛ na.»

³Pierre kura in ɓii ŋgaiwi'i yak si nú pɛsi-fio mɛ.

⁴Wa maa yì in ŋmaa nɛnɛ, ɓɛɛ ɓii ŋgaiwi ma yì gan Pierre, ɓɛɛ hɔ nú pɛsi ti ha̧ a̧.

⁵A̧ oŋga si ɗɔɔ, ɓɛɛ a̧ zɔk o laa-kar-fio nɛ̀‘i mɔi̧a a hi̧i̧; ɓɛɛ a̧ ye si kɔ̧́ pɛsi-fio mɛ na.

⁶Simɔŋ Pierre hɔɔ kɔ‘i nɛ̀ ɗoŋ, ɓɛɛ gɔm ye kɔ̧́ pɛsi; a̧ zɔka o laa-kar-fio nɛ̀‘i mɔi̧a a hi̧i̧,

⁷ɓɛɛ zɔ̧-laa nɛ̀ wa kara so nɛ̀ zu Jesu bo in o laa-kar-fio na; zɔ̧-laa'i duka kɔ‘i nɛ̀ oi kara-a ŋma fara nɛtɛ.

⁸Ɓii ŋgaiwi nɛ̀ hɔɔ so ti'i yee kɔ̧́ pɛsi mbɛt, a̧ zɔka mɔ‘i, ɓɛɛ a̧ kɔ̧ ɗɔaa.

⁹(Wen hɔ tɛ ŋgimbi'i, o ŋgaiwi ko Jesu tɛ iŋ mgbara Yɔramɔ nɛ̀ tɔ̧a̧‘e, Jesu tɛ kur tɛ fio, na.)

¹⁰Ɓɛɛ o ngaiwi nɔ‘i kai ŋmaa si ɗoŋ tɛ̀ kɔ‘i.

¹¹Marii duka so kɔ‘i zan ká̧ nú pɛsi-fio mɛ, hí̧í̧ nɛ̀ kɔ̧a̧; nɛ́ mɔ'ɔ n'aa oŋga zɔk mɔ si kɔ̧́ pɛsi-fio mɛ,

¹²ɓɛɛ a̧ zɔk o betom mɛ yiwese yiitoo nɛ̀ pi̧i̧ bu laa, nɛ̀ ya nù fara nɛ wa ee so Jesu sɛnɛ; ŋma kpɔk duka nɛ̀ war zu-a, ɓɛɛ ɓii wi duk kɔ‘i nɛ̀ war naŋ-a.

¹³Wa tɔ̧ɔ̧ ha̧ a̧: «Kóò'ɛ, mɛ hi̧i̧ kɔ̧a̧ wen ge?» A̧ kifa nú ha̧ wa. «Nɛ́ Gasa Wan kɔ‘m a̧ wa baa yinɛ, ɓɛɛ mi iŋ fara nɛ̀ wa ea a̧ sɛnɛ na.»

¹⁴A̧ biti tɔ̧ɔ̧ wen, kà a̧ tɛ zik tɛ, Jesu nɛ́ mɔ'ɔ nɛ̀ yor’ɛ, ɓɛɛ a̧ iŋ so'e nɛ́ Jesu na.

¹⁵Jesu aka a̧: «Kóò'ɛ, mɛ́ hi̧i̧ kɔ̧a̧ wen ge? Mɛ́ kii nɛ́ o?» Marii ta kɔ‘i'e wi’ɛi nɛ́ wan-pɛm-fɔ, ɓɛɛ tɔ̧ ha̧ a̧: «Nyaa, kà nɛ́ bòò nɛ́ ɛ́nɛ́'ɛ baa a̧ yinɛ, ɓɛɛ n’ɛ̀nɛ̀ úsí fara n’ɛnɛ ea a̧ sɛnɛ, ha̧‘m nɛ́ɛ̀ ba a̧.»

¹⁶Ɓɛɛ Jesu sa a̧: «Marii!» Marii zika tɛ, ɓɛɛ kɔ̧ sara: «Rabuni!» (mɛ̀ nɛ́ wen nɛ̀ tɔ̧ nɛ̀ nú hébreu'e «Wan-usi-mɔ».)

¹⁷Jesu tɔ̧ɔ̧ ha̧ a̧: «Ká mɛ́ fó tɛ̀‘m ná,[19] wen mi tɛ daŋ sitɛ Dáà kɔ‘m hɔ̧ɔ̧ na. War kɔ-mɛ, mɛ̀ nɛ́ɛ̀ kpá o nya'm, ɓɛɛ mɛ̀ tɔ̧́ ha̧ wa'e, mi tɛ daŋ sitɛ Dáà kɔ‘m nɛ̀ duk nɛ́ Dáà k’ɛ́nɛ́, sitɛ Sɔ̧ kɔ‘m nɛ̀ duk nɛ́ Sɔ̧ k’ɛ́nɛ́.»

¹⁸Ɓɛɛ Marii Magdala nɛ́ɛ̀ we ɗoŋ wen'i ha̧ o ŋgaiwi'e wi zɔka Gasa Wan, ɓɛɛ wen n'aa tɔ̧ɔ̧ ha'i nɛ́ mɔ‘i.

¹⁹Mɛ́ ga̧a̧mɔ wese alat'i, o ŋgaiwi kɔ̧-a̧ mɔi̧a so ŋmaa kɔ̧́ ŋma tua, ɓɛɛ man nú tua e zu wa wen kíì o Juif. Jesu yee tua yor mgbara wa; ɓɛɛ tɔ̧: «Ga̧a̧mɔ a̧ dúk in'nɛ̀ɛ́!»

²⁰Ŋgimbi n'aa tɔ̧ nɛ̀ wen'i, a̧ usa kɔ̧̀ er-a in ká̧ ɔm-a ha̧ wa. O ŋgaiwi zɔka Gasa Wan, ɓɛɛ wa kpa desee nyɛmna.

²¹A̧ tɔ̧ɔ̧ ha̧ wa woyo: «Ga̧a̧mɔ a̧ dúk in'nɛ̀ɛ́! Hee mɔ'ɔ nɛ̀ Dáà toma'm ga, mi tom ɛnɛ mbɛt.»

²²Ɗoŋ n'aa tɔ̧ɔ̧ wen'i kaɗi, a̧ ɔma si zu wa, ɓɛɛ tɔ̧: «Ɛ̀nɛ̀ kpá Sa̧a̧ Ɔmi.

²³O wi n’ɛnɛ tɛ́ e ɗaŋmɔ kɔ-wa ha̧ wa, ɗaŋmɔ‘i tɛ yu zu wa, ɓɛɛ o wi n’ɛnɛ e ɗaŋmɔ ha̧ wa na, ɗaŋmɔ tɛ́ ɓɔn zu wa.»

²⁴Ɓɛɛ Tomas (nɛ̀‘i sa'e Be-dan), ŋma kpɔk mgbara o ŋgaiwi ɓu-zua-yiitoo, bo so kɔ‘i in wa ŋgimbi nɛ̀ Jesu tɛ̀ɛ́ nɛnɛ‘i na.

²⁵Oi ŋgaiwi ko Jesu tɔ̧ɔ̧ ha̧ a̧: «Ɛ́ɛ́ zɔka Gasa Wan.» Tomas kifa nú ha̧ wa: «Kà‘m zɔk oi da̧i̧ pɔndi kɔ̧̀ er-a na, ɓɛɛ kà‘m tam oi da̧i̧ pɔndi kɔ̧̀ er-a nɛ̀ bekete-er-am na, in kà‘m tam ká̧ ɔm-a nɛ̀ er-am na, mi beka kɔ̧ ɗɔaa na.»

²⁶Dee zɛ mɔɔrɔ-ɗoŋ-taar ɗoŋ mɔ‘i, ɓɛɛ o ŋgaiwi ko Jesu mɔi̧ ŋmaa kɔ̧́ tua'i woyo, ɓɛɛ ká Tomas a̧a̧ so mgbara wa. Wa mana nú tua e zu wa, ɓɛɛ Jesu tɛ́ɛ̀ yor mgbara wa, ɓɛɛ tɔ̧: «Ga̧a̧mɔ a̧ dúk in'nɛ̀ɛ́!»

²⁷Nɛ́ mɔ'ɔ n'aa tɔ̧ɔ̧ ha̧ Tomas: «Mɛ̀ nyɛ́í̧ bekete-er-mɛ, ɓɛɛ mɛ̀ zɔ́k er-am; mɛ̀ nyɛ́í̧ er-mɛ, ɓɛɛ mɛ̀ tám ká̧ ɔm-am; mɛ̀ káɗí sii káfɛ́, ɓɛɛ mɛ̀ kɔ̧́ ɗɔaa ha̧ Sɔ̧.»

²⁸Tomas kifa nú ha̧ a̧: «Ɛ́nɛ́ nɛ́ Gasa Wan kɔ‘m in Sɔ̧ kɔ‘m!»

²⁹Jesu tɔ̧ɔ̧ ha̧ a̧: «Mɛ̀ nɛ́ wen nɛ̀ mɛ zɔka'm sa mɛ kɔ̧ ɗɔaa; ɓɛɛ o wi nɛ̀ zɔk am na, kɔ̧ nɛ̀ ɗɔaa, ya nɛ̀ desee.»

³⁰Jesu dee o ŋma dɔka mɔɔ-usi-mɔ nɛ̀ yí o ŋgaiwi kɔ‘i nɛ̀ yɔr zaŋ kalata’ɛ na.

³¹Ɓɛɛ o wen nɔ'ɔ yɔra, wen h’ɛ́nɛ́ mɛ́ kɔ̧ ɗɔaa'e Jesu nɛ́ Mɛsii, Bem ko Sɔ̧, ɓɛɛ tɛ kɔ̧ɔ̧ ɗɔaa ha̧ a̧, ɛ́nɛ́ tɛ duk kpasa wen zu nin-a.