Read Northwest Gbaya JEAN 21 Bible Online

JEAN 21 - Northwest Gbaya bible

JEAN 21

¹Ɗoŋ mɔ‘i, o ŋgaiwi ko Jesu zɔka a̧ woyo sɛn ká̧ tɔp Tiberiad hee mɔ'ɔ ga:

²Simɔŋ Pierre, in Tomas (nɛ wa sa'e Be-dan), ká bá nɛ̀ Natanaɛl (be Kana, nú Galilee), o bem ko Zebedee in o ŋma ŋgaiwi ko Jesu yiitoo mɔi̧a so ya kpɔk fara in o ŋmaa.

³Simɔŋ Pierre tɔ̧ɔ̧ ha̧ wa: «Mí kɔ̧ɔ̧ mɛ́ nɛ̀ɛ́ pi̧ yɔk.» Wa kifa nú ha̧ a̧: «Ɛ́ɛ́ tɛ́ nɛ in mɛɛ.» Nɛ́ mɔ'ɔ nɛ̀ wa gboo yak, ye kombon pi̧ nɛ̀ yɔk nɛ̀ zɛ nɛnɛ, ɓɛɛ wa ba ŋma mɔ na.

⁴Mɛ́ gɔna mɔ, Jesu tɛ̀ɛ̀ yor ká̧ ŋgere tɔp, ɓɛɛ o ŋgaiwi kɔ̧-a̧ iŋ‘e mɛ̀ nɛ́ a̧ na.

⁵Ɓɛɛ Jesu ak wa: «O bem nɔ'ɔ, ɛ́nɛ́ ba be zoro na?» Wa kifa nú ha̧ a̧: «Íì, ɛ́ɛ́ ba na.»

⁶A̧ tɔ̧ɔ̧ ha̧ wa: «Ɛ̀nɛ̀ pí̧ yɔk nɛ̀ ká̧ kombon nɛ̀ war wii-er'nɛ́, ɓɛɛ ɛ́nɛ́ tɛ́ bà zoro.» Wa pi̧i̧ yɔk hee mɔ'ɔ n'aa tɔ̧ɔ̧ ga; ɓɛɛ wa ba zoro dun yɔk, nyɛm ha̧ wa mɛ dak pi̧ zan na.

⁷Ŋgaiwi nɛ̀ Jesu kɔ̧ɔ̧ nyɛmna tɔ̧ɔ̧ ha̧ Pierre: «Wi’ɛ nɛ́ Gasa Wan!» Zia-a nɛ̀ Simɔŋ Pierre zia'e nɛ́ Gasa Wan wó, a̧ gaɓa tɛ-a nɛ̀ laa wen a̧ duka so nɛ̀ géé tɛ, ɓɛɛ gɔm zu ɗɔɔ yì.

⁸O oi ŋgaiwi nɛ̀ɛ̀ kɔ‘i nɛ̀ kombon, gbur nɛ̀ yɔk nɛ̀ duna nɛ̀ zoro daŋnɛ si zan mɛ. Fara-pi̧-yɔk'i nyɛi̧ nɛ̀ nú-ŋgéré na, duka hee naŋ gɔmŋmaa ga.

⁹Nɛ̀ wa zira si mbɔɗɔnu, wa kpaa zoro in brɛt nɛ̀ duk zu kɛ̧i̧-wee.

¹⁰Ɓɛɛ Jesu tɔ̧ ha̧ wa: «Ɛ̀nɛ̀ káí o ŋma zoro n’ɛnɛ baa kinii'i tɛnɛ.»

¹¹Simɔŋ Pierre daŋa kombon, ɓɛɛ dak yɔk nɛ̀ duna nɛ̀ o zɔm gasa zoro pi̧ zan. O zoro nɔ‘i lɛŋ nɛ́ gɔmŋmaa-nɛ-ɓu-mɔɔrɔ-zua-taar, ɓɛɛ yɔk a̧k na mbɛt.

¹²Jesu tɔ̧ɔ̧ ha̧ wa: «Ɛ̀nɛ̀ tɛ́ɛ̀ nyɔ́ŋ mɔ.» Ɓɛɛ ŋma ŋgaiwi mɛ́ ak a̧‘e: «A̧ nɛ́ o ndé,» wó, bo na, wen wa iŋa nɛ̀ de-a'e mɛ̀ nɛ́ Gasa Wan.

¹³Jesu ɗɔŋa siti, ba brɛt ha̧ ha̧ wa, ɓɛɛ ba zoro ha̧ ha̧ wa mbɛt.

¹⁴War taar usa-tɛ ko Jesu ha̧ o ŋgaiwi kɔ‘i ɗoŋ n'aa kura nɛ ŋgɔn tɛ fio nɛ́ mɔ‘i.

¹⁵Ɗoŋ nyɔŋmɔ, Jesu aka Simɔŋ Pierre: «Simɔŋ, bem ko Jean, mɛ́ kɔ̧a̧‘m gan o wi nɔ'ɔ nde?» Simɔŋ kifa nú ha̧ a̧: «Íì, Gasa Wan, ɛ́nɛ́ iŋa mi kɔ̧ɔ̧‘nɛ́.» Ɓɛɛ Jesu tɔ̧ ha̧ a̧: «Mɛ̀ dáí o be-sami kɔ‘m.»

¹⁶Jesu aka a̧ woyo: «Simɔŋ, bem ko Jean, mɛ́ kɔ̧a̧‘m nde?» A̧ kifa nú ha̧ a̧: «Íì, Gasa Wan, ɛ́nɛ́ iŋa'e mi kɔ̧ɔ̧‘nɛ́.» Jesu tɔ̧ɔ̧ ha̧ a̧: «Mɛ̀ dáí o sami kɔ‘m.»

¹⁷War taar-a, Jesu aka a̧: «Simɔŋ, bem ko Jean, mɛ́ kɔ̧a̧‘m nde?» See Pierre ɗaŋa tɛ kpɔk akamɔ n'aa aka war taar'e: «Mɛ́ kɔ̧a̧‘m ndé‘i?» ɓɛɛ Pierre tɔ̧ ha̧ a̧: «Gasa Wan, ɛ́nɛ́ iŋa mɔ lɛŋ, ɛ́nɛ́ iŋa'e mi kɔ̧ɔ̧‘nɛ́!» Jesu tɔ̧ɔ̧ ha̧ a̧: «Mɛ̀ dáí o sami kɔ‘m.

¹⁸Nɛ́ kpasawen a̧‘m tɔ̧ ha̧ mɛ; ŋgimbi nɛ̀ mɛ́ duka so nɛ̀ ŋgaiwi, nɛ́ mɛ́'ɛ hɛr so kanda kɔ-mɛ nɛ̀ tɛ-mɛ, ɓɛɛ mɛ́ nɛ̀ɛ́ fara lɛŋ nɛ̀ mɛ́ kɔ̧a̧; ɓɛɛ ŋgimbi nɛ̀ mɛ bé tɛ̀ɛ́ sɔk kaɗi, mɛ́ tɛ kai er-mɛ nɛ̀ ŋgɔn ha̧ ŋma bíí mɛ́ hɛr kanda ha̧ mɛ́, ɓɛɛ wi’ɛi mgbɔɔ mɛ́ si fara nɛ̀ mɛ kɔ̧ na.»

¹⁹(Jesu tɔ̧ɔ̧ wen'i mɛ́ usi yuwar fea-a nɛ̀ Pierre tɛ fe, ha̧ Sɔ̧ mɛ kpa zɔnamɔ.) Ɓɛɛ a̧ tɔ̧ ha̧ Pierre: «Mɛ̀ tɛ́ ɗoŋ-am!»

²⁰Pierre zika tɛ, ɓɛɛ zɔk ŋgaiwi nɛ̀ Jesu kɔ̧ɔ̧ nyɛmna fara nɛ́ɛ́ ɗoŋ wa (nɛ́ wi’ɛi a̧ oŋga so si yí-ŋguɗi Jesu ŋgimbi nyɔŋmɔ-kɛndao, ɓɛɛ ká a̧ ak Jesu'e: «Gasa Wan, nɛ́ o'o tɛ e ɗɔra tɛ‘nɛ́ o?» wó'ɛ.)

²¹Pierre zɔka a̧, ɓɛɛ ak Jesu: «Gasa Wan, ɓɛɛ ko wi’ɛ, nɛ́ ge a̧ tɛ hɔ zu a̧ ge?»

²²Jesu kifa nú ha̧ Pierre: «Kà‘m nɛ́ kɔ̧ɔ̧ ha̧ a̧ mɛ duk hɔ ŋgimbi n'am tɛ pii ɗoŋ, wen kɔ-mɛ so sɛnɛ? Kɔ-mɛ, mɛ̀ tɛ́ kɔ-mɛ nɛ́ ɗoŋ-am ɓɛɛ.»

²³Ɓɛɛ nɛ́ zu wen'i a̧ nyɛrɛmɔ‘i pɛsa nɛnɛ yaknɛ mgbara o nya-wi'e, ŋgaiwi'i beka fe kɔ‘i na. Ɓɛɛ bó nɛ́ Jesu tɔ̧ɔ̧ ha̧ Pierre'e: «Wi’ɛi beka fe na,» na. A̧ tɔ̧ɔ̧ kɔ̧-a̧‘e ndé: «Kà‘m nɛ́ kɔ̧ɔ̧ ha̧ a̧ mɛ́ duk hɔ ŋgimbi n'am tɛ pii ɗoŋ, wen kɔ-mɛ so sɛnɛ nde,» ɛ̧.

²⁴Mɛ̀ nɛ́ ŋgaiwi'i a̧ de sedaako mɔɔ nɔ‘i yɔr nɛnɛ, ɓɛɛ ɛ́ɛ́ iŋa'e sedaako kɔ̧-a̧ duk nɛ́ kpasawen.

²⁵Jesu dee o ŋma mɔ nɛ̀ dɔka-a mbɛt. Kà‘i yɔr so o mɔɔ nɔ‘i yɔr kpɔk kpɔk lɛŋ gáà, mi taa bó nɛ́ wi tɛ̀ɛ́ kpa so fara zaŋnu’ɛ mɛ a o kalata-wen nɔ‘i sɛnɛ na.