Read Northwest Gbaya JEAN 3 Bible Online

JEAN 3 - Northwest Gbaya bible

JEAN 3

¹Ŋma bíí a̧a̧ so mgbara o Fariziɛn, nin-a nɛ́ Nikodɛm, ŋma gasawi ko o Juif.

²A̧ tɛ̀ɛ́ tɛ Jesu mɛ zɛ, ɓɛɛ ak a̧: «Wan-usi-mɔ, ɛ́ɛ́ iŋa'e nɛ́ Sɔ̧'ɔ̧ toma'nɛ́ tɛnɛ mɛ usi mɔ h’ɛ́ɛ́, wen kà Sɔ̧ duk in bíí na, wi’ɛi nyɛm mɛ de mɔɔ-usi-mɔ hee mɔ'ɔ n’ɛnɛ de’ɛ ga na.»

³Ɓɛɛ Jesu kifi nú ha̧ a̧: «Nɛ́ kpasawen a̧‘m tɔ̧ ha̧ mɛ, kà bíí kó nɛ̀ mbe-a na, wi’ɛi nyɛm mɛ zɔk Wan ko Sɔ̧ na.»

⁴Ɓɛɛ Nikodɛm tɔ̧ ha̧ a̧: «Wi tɛ ko sɔkawi nɛ̀ sɔka kaɗi nɛ̀ mbe-a hee ge? A̧ tɛ ye kɔ̧́ zaŋ nàà kɔ̧-a̧ ha'i mɛ ko a̧ woyo nde?»

⁵Jesu kifa nú ha̧ a̧: «Nɛ́ kpasawen a̧‘m tɔ̧ ha̧ mɛ: kà wa ko bíí nɛ̀ yì in nɛ̀ Sa̧a̧ Ɔmi na, wi’ɛi beka ye tɛ Wan ko Sɔ̧ na.

⁶Bíí nɛ̀‘i ko nɛ̀ war koa-a ko bíí, kànà nɛ́ mur-tɛ, ɓɛɛ bíí nɛ̀‘i ko nɛ̀ war ko Sa̧a̧ Ɔmi nɛ́ ɔmi.

⁷Ká ɗɛɗɛ-mɛ gɔn tɛ wen n'am tɔ̧a̧‘e: ‹Wa tɛ ko kànà ɛ́nɛ́ nɛ̀ mbe-a sɛ́,› wó‘i na.

⁸Búk[4] yu dam fara lɛŋ; mɛ́ zii gítí-a zii, ɓɛɛ mɛ́ iŋ fara n'aa tɛ nɛnɛ, kóó fara n'aa yu si sɛnɛ na mbɛt. Nɛ́ kale kpɔk mɔ wen kóó o ndé nɛ̀‘i ko nɛ̀ war ko Sa̧a̧ Ɔmi.»

⁹Nikodɛm aka mɔ: «Mɔ‘i nyɛma mɛ de dea-a hee ge?»

¹⁰Ɓɛɛ Jesu kifi nú ha̧ a̧: «Mɛ́ nɛ́ wan-usi-mɔ sɛn Israɛl, ɓɛɛ mɛ iŋ mgbara mɔ‘i na?

¹¹Nɛ́ kpasawen a̧‘m tɔ̧ ha̧ mɛ, ɛ́ɛ́ tɔ̧ nɛ́ wen mɔ n’ɛɛ iŋa, de nɛ̀ sedaako mɔ n’ɛ̀ɛ́ zɔka, ɓɛɛ ɛ́nɛ́ kpɛk sedaako k’ɛɛ na.

¹²Mɔ mɛ zaŋnu n'am tɔ̧ wen-aa h’ɛ́nɛ́, ɓɛɛ k’ɛ́nɛ́ kpɛk na’ɛ, kà bó nɛ̀ mɔ mɛ yiwese?

¹³Ŋma bíí daŋ si yiwese na, kànà nɛ́ Bem ko bíí nɛ̀ zira nɛ̀ yiwese mɛ tɛnɛ'ɛ ɓɛɛ!

¹⁴«Hee mɔ'ɔ nɛ̀ Moisɛ baa so te, ɓɛɛ ga̧i̧ gɔk-ndɛrɛ sɛnɛ ba e ŋgɔn sɛn ŋga-gbárà ga, mɔ‘i tɛ de kànà hegɔ in Bem ko bíí mbɛt,

¹⁵wen ha̧ kóó o ndé nɛ̀ kɔ̧ɔ̧ ɗɔaa ha̧ a̧ mɛ kpa duka-kpasa kpoo nɛ kpoo.

¹⁶Wen Sɔ̧ kɔ̧ɔ̧ o bíí zaŋnu nyɛmna, ɓɛɛ ha̧ kpɔk Bem kɔ‘i, wen ha̧ kóó o ndé nɛ̀ kɔ̧ɔ̧ ɗɔaa ha̧ a̧, wi’ɛi beka fe na, ɓɛɛ wi’ɛi tɛ kpa duka-kpasa kpoo nɛ kpoo.

¹⁷Wen bó nɛ́ Sɔ̧ toma Bem kɔ‘i tɛnɛ zaŋnu mɛ gɔn kita zu bíí na, ɓɛɛ mɛ̀ nɛ́ wen ha̧ o bíí mɛ kpasi wen zu a̧.

¹⁸«Wi nɛ̀ kɔ̧ɔ̧ ɗɔaa ha̧ a̧, kita tik a̧ na, ɓɛɛ wi nɛ̀ kɔ̧ ɗɔaa ha̧ a̧ na, kita tika a̧ kaɗi wen n'aa kɔ̧ ɗɔaa ha̧ kpɔk Bem ko Sɔ̧ na.

¹⁹Yoŋgo kita'i nɛ́ mɔ'ɔ: sa̧a̧mɔ hɔɔ zaŋnu, ɓɛɛ o bíí kɔ̧ɔ̧ nɛ́ tum gan sa̧a̧mɔ, wen tom kɔ-wa nɛ́ ɗaŋ tom.

²⁰Wen kóó o ndé nɛ̀ de ɗaŋmɔ sɛn nɛ́ sa̧a̧mɔ; kíì nɛa-a tɛ sa̧a̧mɔ de nɛ́ a̧ wen ká ndaa tom kɔ̧-a̧ tɛ̀ɛ́ gbo zan.

²¹Ɓɛɛ wí nɛ̀ dé mɔ tɛ́ kpasawen[5] tɛ́ tɛ̀ɛ̀ pii tɛ sa̧a̧mɔ, wen ha'i mɛ zɔk nɛ̀ sa̧a̧-a̧‘e, deemɔ kɔ̧-a̧, a̧ de tɛ yuu kíí Sɔ̧.»

²²Ɗoŋ mɔ‘i, Jesu yaka in o ŋgaiwi kɔ‘i si nú Judee; ɓɛɛ a̧ duk hi̧i̧ in wa zui nɛ̀ o bíí.

²³Jean mbɛt duka zui o bíí sɛn Ainɔŋ, nɛ̀ duk nyɛi̧ nɛ̀ Salim na, wen yì a̧a̧ so hi̧i̧ nɛ̀ dɔka-a, ɓɛɛ o bíí nɛ́ tɛ a̧, ha̧ a̧ mɛ zui wa.

²⁴Ŋgimbi'i, ká wa tɛ pi̧ so Jean zɔɓɔ hɔ̧ɔ̧ na.

²⁵Ŋma wese, ɓɛɛ ŋma Juif kpɛr in o ŋgaiwi ko Jean wen zu yuwar ɗafa-war-tɛ.

²⁶Nɛ́ mɔ'ɔ nɛ̀ wa nɛ̀ɛ̀ kpa Jean, ɓɛɛ wa tɔ̧ ha̧ a̧: «Wan-usi-mɔ, wi n’ɛ̀nɛ́ yaa so in ŋmaa kur Jurdɛn mɛ‘i, ɓɛɛ k’ɛ́nɛ́ de sedaako wen a̧'ɛ, zui nɛ́ o bíí kinii, ɓɛɛ o bíí gbin lɛŋ si ɗoŋ-aa!»

²⁷Jean kifa nú hee mɔ'ɔ ga: «Ŋma bíí nyɛm mɛ de ŋma mɔ gan zu mɔ n'aa kpaa nɛ̀ yiwese na.

²⁸Ɛ́nɛ́ nɛ̀ tɛ‘nɛ́, nɛ́ o wi-sedaako-wen n'am tɔ̧ɔ̧ so'e: ‹Mí bó nɛ́ Krist na, ɓɛɛ mí nɛ́ wi nɛ̀ wa toma yak ti ha̧ a̧.›

²⁹Wi nɛ̀ ba kóò nɛ́ wan-kóò; ɓɛɛ sɛm ko wan-kóò nɛ̀ duk katɛ a̧ zíí nɛ̀ tiger-a'i duk nɛ̀ desee. Desee n'am kpa kinii'i nɛ́ pɛrti mɔ hegɔ, ɓɛɛ desee kɔ‘m'i nɛ́ kpasa desee.

³⁰Nɛ́ a̧ a̧ tɛ gasi gasa-a, ɓɛɛ war kɔ‘m, mi duka si ɗɔɔ.»

³¹Wi nɛ̀ tɛ́ nɛ̀ yiwese duk zu mɔ lɛŋ; wi-zaŋnu kànà nɛ́ bíí zaŋnu nɛ̀ tɔ̧ kɔ‘i wen hee bíí zaŋnu ga. Wi nɛ̀ tɛ́ nɛ̀ yiwese[6]

³²de nɛ́ sedaako mɔ n'aa zɔka in mɔ n'aa zia, ɓɛɛ ŋma bíí kpɛk sedaako kɔ̧-a̧ na.

³³Bíí nɛ̀ kpɛka sedaako kɔ̧-a̧, iŋa'e Sɔ̧ nɛ́ wi-tɔ̧-kpasawen.

³⁴Wi nɛ̀ Sɔ̧ toma tɔ̧́ nɛ́ wen ko Sɔ̧, wen Sɔ̧ duna a̧ nɛ̀ Sa̧a̧ Ɔmi.

³⁵Dáà kɔ̧ɔ̧ Bem, ɓɛɛ e mɔ lɛŋ er-a.

³⁶Wi nɛ̀ kɔ̧ɔ̧ ɗɔaa ha̧ Bem kpaa duka-kpasa kpoo nɛ kpoo, ɓɛɛ wi nɛ̀ kɔ̧ ɗɔaa ha̧ Bem na beka kpa duka-kpasa'i na; ɓɛɛ nyimsea ko Sɔ̧ a̧a̧ zu a̧.