Read Northwest Gbaya JEAN 5 Bible Online

JEAN 5 - Northwest Gbaya bible

JEAN 5

¹Ɗoŋ mɔ‘i, ɓɛɛ Jesu daŋ si Jerusalɛm tɛ ŋma gbaŋa ko o Juif.

²Ŋma gɔna-yì nɛ̀‘i sa nɛ̀ nú hébreu'e Bezata duka so ká̧ nú garo ko o Sami sɛn Jerusalɛm, fara'i a̧a̧ so nɛ̀ nú-zala mɔɔrɔ.

³Ɓɛɛ nɛ́ sɛn ti o zala nɔ‘i a̧ o gii wi-zɛɛ, o wi-boma-yí, o wi-kum in o kara-wi duka so ɔ nù sɛnɛ [pɛm nɛ̀ foomɔ ko yì.

⁴Wen betom ko Sɔ̧ duka so mɛ zir ɗɔɔ yì‘i tɛ ŋma ŋgimbi, mɛ fo yì. Ɗoŋ nɛ̀ yì foo mɔ kaɗi, ɓɛɛ kuti wi-zɛɛ nɛ̀ tɛ tik ɗɔɔ-aa, tɛ kpasi tɛ zɛɛ kɔ‘i, kóó nɛ́ ge zɛɛ ge.]

⁵Ŋma wi-kum nɛ̀ ɔɔ so zɛɛ pɛ ɓu-taar-zua-mɔɔrɔ-ɗoŋ-taar duka so hi̧i̧ mbɛt.

⁶Jesu zɔka a̧ fara ɔɔ nù, ɓɛɛ a̧ iŋ‘e wi’ɛi duka nɛ̀ oi zɛɛ tɛ dɔka zɛ kaɗi, ɓɛɛ Jesu ak a̧: «Mɛ kɔ̧ɔ̧ mɛ kpasi?»

⁷Wi’ɛi kifa nú: «Nyaa, ŋgimbi nɛ̀ yì fo mɔ, mi kpa bíí mɛ ba'm pi̧ ɗɔɔ-aa na; ka'm biti hai kɔ‘m nɛnɛ, ɓɛɛ ŋma bíí zira tik ɗɔɔ-aa ti ha̧‘m kaɗi.»

⁸Ɓɛɛ Jesu tɔ̧ ha̧ a̧: «Mɛ̀ kúr, mɛ̀ bá mɔɔ-ɔ-nɛnɛ kɔ-mɛ, mɛ̀ nɛ́ nɔ̀.»

⁹Soɓee wi’ɛi kura ba mɔɔ-ɔ-nɛnɛ kɔ‘i, ɓɛɛ nɛ́ nɔ̀. Wese'i duka nɛ́ wese-ɔm-tɛ.

¹⁰Ɓɛɛ nɛ́ mɔ'ɔ nɛ̀ o Juif tɔ̧ɔ̧ ha̧ wi nɛ̀ kpasa'i: «Sɔsɔɔ'ɛ nɛ́ wese-ɔm-tɛ. Heembea k’ɛɛ e ha̧ mɛ mɛ tui mɔɔ-ɔ-nɛnɛ kɔ-mɛ yar nɛnɛ na.»

¹¹Ɓɛɛ sa a̧ kifi nú ha̧ wa: «Wi nɛ̀ kpasa'm'i tɔ̧ɔ̧ ha̧‘m'e, a̧‘m bá mɔɔ-ɔ-nɛnɛ kɔ‘m a̧‘m nɛ́ nɔ̀.»

¹²Ɓɛɛ wa ak a̧: «Wi nɛ̀ tɔ̧ɔ̧ ha̧ mɛ‘e, mɛ̀ bá mɔɔ-ɔ-nɛnɛ kɔ-mɛ, mɛ̀ nɛ́ nɔ̀‘i, nɛ́ o?»

¹³Ɓɛɛ wi’ɛi iŋ wi nɛ̀ kpasa a̧ na, wen Jesu gboo mgbara giiwi nɛ̀ yaa so fara'i yak kɔ‘i kaɗi.

¹⁴Nɛ̀ ɗoŋ, Jesu kpaa wi’ɛi kɔ̧́ Tua ko Sɔ̧, ɓɛɛ tɔ̧ ha̧ a̧: «Mɛ́ kpasa kaɗi, ká mɛ de ɗaŋmɔ ɓɔna, wen ká ŋma ŋgamɔ tɛɛ kpa mɛ woyo gan kuti-a.»

¹⁵Ɓɛɛ nɛ́ mɔ'ɔ nɛ̀ wi’ɛi nɛɛ tɔ̧ ha̧ o Juif'e, nɛ́ Jesu a̧ kpasa wi.

¹⁶Nɛ́ tɛ ŋgimbi'i a̧ o Juif kia wen in Jesu wen n'aa dee pɛrti mɔ‘i wese-ɔm-tɛ.

¹⁷Ɓɛɛ Jesu kifi nú ha̧ wa: «Dáà kɔ‘m de nɛ tom hɔ kinii, ɓɛɛ sa'm de tom mbɛt.»

¹⁸Zu wen'i, o Juif kia nɛ̀ ŋgaya-a mɛ gbɛ Jesu, bó nɛ́ wen gbina heembea wese-ɔm-tɛ ɓɛɛ na, ɓɛɛ mɛ̀ nɛ́ wen a̧ wee zu nɛ̀ Sɔ̧, tɛ tɔ̧a̧-a̧‘e ndé, Sɔ̧ nɛ́ mgbák Dáà kɔ‘i.

¹⁹Jesu tɔ̧ɔ̧ siti woyo: «Nɛ́ kpasawen a̧‘m tɔ̧ h’ɛ́nɛ́; Bem nyɛm mɛ de mɔ nɛ̀ zu-wi na. Kànà nɛ́ mɔ n'aa zɔk tɛ̀ Dáà a̧ a̧ de; mɔ nɛ̀ Dáà de, a̧ Bem de mbɛt.

²⁰Wen Dáà kɔ̧ɔ̧ Bem, ɓɛɛ sa a̧ usi mɔ lɛŋ n'aa de ha̧ Bem. A̧ tɛ usi mbe gasa tom ha̧ Bem gan kuti-a, ɓɛɛ ɗɛɗɛ‘nɛ́ tɛ gɔn.

²¹Hee mɔ'ɔ nɛ̀ Dáà kpasi nɛ́ o bíí tɛ fio, ɓɛɛ dee ha̧ wa mɛ duk kpasa ga, mɛ̀ nɛ́ hegɔ a̧ Bem kpasi nɛ̀ o wi n'aa kɔ̧a̧ mbɛt.

²²Wen Dáà gɔn kita zu ŋma bíí na, ɓɛɛ a̧ ee gɔna-kita lɛŋ er Bem,

²³ha̧ o bíí lɛŋ mɛ gasi Bem hee mɔ'ɔ nɛ̀ wa gasi nɛ̀ Dáà ga. Wi nɛ̀ gasi Bem na, gasi Dáà nɛ̀ toma a̧ tɛnɛ na mbɛt.

²⁴«Nɛ́ kpasawen a̧‘m tɔ̧ h’ɛ́nɛ́; wi nɛ̀ zii wen kɔ‘m, nɛ̀ kɔ̧ɔ̧ ɗɔaa ha̧ wi nɛ̀ toma'm tɛnɛ‘i kpaa duka-kpasa kpoo nɛ kpoo, ɓɛɛ kita beka tik a̧ na, a̧ gboo tɛ́ fio mɛ duk kpasa.

²⁵Nɛ́ kpasawen a̧‘m tɔ̧ h’ɛ́nɛ́; ŋgimbi tɛ hɔ, ɓɛɛ ŋgimbi'i nɛ́ mɔ'ɔ n’ɛɛ ya sɛnɛ kinii’ɛ, nɛ̀ o bíí nɛ̀ fea tɛ zii ger Bem ko Sɔ̧, ɓɛɛ o wi nɛ̀ zia tiger-a tɛ kpasi.

²⁶Hee mɔ'ɔ nɛ̀ Dáà a̧a̧ nɛ̀ ŋgai mɛ de ha̧ bíí mɛ duk kpasa ga, hegɔ, a̧ ha̧a̧ ŋgai ha̧ Bem mɛ de ha̧ bíí mɛ duk kpasa mbɛt,[7]

²⁷ɓɛɛ a̧ ha̧ ŋgai gɔna-kita ha̧ Bem, wen a̧ nɛ́ Bem ko bíí.

²⁸Ká mɔ'ɔ lɛŋ gɔn ɗɛɗɛ‘nɛ́ na, wen ŋgimbi tɛ hɔ nɛ̀ o bíí lɛŋ nɛ̀ a̧a̧ kɔ̧́ fio tɛ zii tiger-a,

²⁹ɓɛɛ wa tɛ kur kɔ̧́ fio mɛ gbo. O wi nɛ̀ dee so demɔ, tɛ kur mɛ duk kpasa; ɓɛɛ o wi nɛ̀ dee so ɗaŋmɔ, tɛ kur wen kita.»

³⁰«Mí nyɛm mɛ de mɔ nɛ zu'm na. Mí gɔn kita nyɛm nɛ̀ ɗoŋ mɔ n'am zii nú Dáà, ɓɛɛ mi gɔn kita nɛ̀ yuwar-a, wen bó nɛ́ mi kii mɛ de mɔ n'am kɔ̧a̧ na, ɓɛɛ mi kii mɛ de nɛ́ mɔ nɛ̀ Wan nɛ̀ toma'm tɛnɛ kɔ̧a̧.

³¹Kà‘m de sedaako zu'm nɛ̀ tɛ‘m, ɓɛɛ sedaako'i bó nɛ́ kpasa mɔ na.

³²Mɛ̀ nɛ́ ŋma bíí a̧ de sedaako wen am, ɓɛɛ mi iŋa'e mɔ n'aa tɔ̧ wen am'i nɛ́ kpasawen.

³³Ɛ́nɛ́ toma so bíí nɛnɛ tɛ Jean, ɓɛɛ a̧ de sedaako wen kpasawen.

³⁴Bó nɛ́ ŋma bíí a̧ tɛ de sedaako wen am sɛ na, ɓɛɛ wen n'am tɔ̧‘i mɛ̀ nɛ́ wen h’ɛ́nɛ́ mɛ kpasi.

³⁵Jean duka so hee lamba nɛ̀‘i e wee sɛnɛ nɛ̀ nyɛk ga, ɓɛɛ nɛ́ mɔ'ɔ n’ɛnɛ kpaa desee mɛ ya benaŋ zaŋ sa̧a̧mɔ kɔ̧-a̧.

³⁶Ɓɛɛ sedaako kɔ‘m gana ko Jean nyɛmna; sedaako'i nɛ́ o tom nɛ̀ Dáà ha̧a̧ ha̧‘m mɛ de. Mí dé nɛ́ dea-a, ɓɛɛ nɛ́ o tom nɔ‘i a̧ de sedaako wen am'e, nɛ́ Dáà a̧ toma'm tɛnɛ.

³⁷Ɓɛɛ Dáà nɛ̀ toma'm tɛnɛ, de nɛ́ sedaako wen am. Ɛ́nɛ́ tɛ zii tiger-a na, ɛ́nɛ́ tɛ zɔk a̧ na mbɛt,

³⁸ɓɛɛ wen kɔ̧-a̧ bo kɔ̧́ see'nɛ́ na, wen ɛnɛ kɔ̧ ɗɔaa ha̧ wi n'aa toma tɛnɛ na.

³⁹Ɛ́nɛ́ tɔr nɛ́ Yɔramɔ kii nɛ̀ mɔ zaŋ-aa, wen taamɔ k’ɛ́nɛ́‘e ɛ́nɛ́ tɛ kpa duka-kpasa kpoo nɛ kpoo wen-aa, ɓɛɛ mɛ̀ nɛ́ Yɔramɔ‘i a̧ de sedaako wen am;

⁴⁰zu-a'i, ɛ́nɛ́ kɔ̧ mɛ́ tɛ tɛ‘m h’ɛ́nɛ́ mɛ kpa duka-kpasa kpoo nɛ kpoo na!

⁴¹«Mí kii kɔ‘m war zɔnamɔ ko bíí na.

⁴²Mí iŋa'nɛ́: ɛ́nɛ́ bó nɛ̀ kɔ̧ɔ̧mɔ wen Sɔ̧ na.

⁴³Mí tɛ̀ɛ́ nɛ̀ nin Dáà kɔ‘m, ɓɛɛ ɛ́nɛ́ kpɛk am na. Kà ŋma bíí tɛ so nɛ̀ zu wi, ɓɛɛ ɛ́nɛ́ tɛ̀ɛ́ kpɛk a̧.

⁴⁴Ɛ́nɛ́ kii k’ɛ́nɛ́ nɛ́ zɔnamɔ ko ŋmaa, ɛ́nɛ́ kii zɔnamɔ nɛ̀ tɛ́ nɛ̀ tɛ Sɔ̧ kpɔk ɓɛɛ na; tɛ mɔ‘i, ɛ́nɛ́ tɛ́ kɔ̧ ɗɔaa hee ge?

⁴⁵K’ɛ́nɛ́ ta'e nɛ́ mi'i tɛ wuli'nɛ ha̧ Dáà na; nɛ́ Moisɛ n’ɛnɛ e nɛ̀ ta’ɛ a̧ tɛ wuli'nɛ ɛ̧.

⁴⁶Wen k’ɛ̀nɛ̀ kɔ̧́ so ɗɔaa ha̧ Moisɛ, ɓɛɛ ɛ́nɛ́ tɛ̀ɛ́ kɔ̧ so ɗɔaa ha̧‘m mbɛt, wen yɔramɔ kɔ̧-a̧ tɔ̧ nɛ wen zu'm.

⁴⁷Ɓɛɛ k’ɛ̀nɛ̀ kɔ̧́ ɗɔɔ mɔ n'aa yɔra na, ɛ́nɛ́ tɛ kɔ̧ ɗɔɔ wen kɔ‘m hee ge?»