Read Northwest Gbaya JEAN 6 Bible Online

JEAN 6 - Northwest Gbaya bible

JEAN 6

¹Ɗoŋ mɔ‘i, ɓɛɛ Jesu ku tɔp Galilee si kur mɛ (nin tɔp'i nɛ́ Tiberiad).

²O gba giiwi nɛɛ ɗoŋ a̧ wen wa zɔka o mɔɔ-usi-mɔ n'aa de kpasi nɛ̀ o wi-zɛɛ.

³Jesu daŋa zu kaya in o ŋgaiwi kɔ‘i, ɓɛɛ wa ya nù.

⁴Ŋgimbi'i ká gbaŋa Paska nɛ̀ duk nɛ́ gbaŋa ko o Juif hɛɗa kaɗi.

⁵Jesu baa yí nɛ̀ ŋgɔn, ɓɛɛ zɔk gba giiwi nɛ̀ tɛ́ pii tɛ̀, ɓɛɛ a̧ tɔ̧ ha̧ Filip: «Ɛɛ tɛ kpa brɛt déè mɛ hi̧fi ha̧ o wi nɔ'ɔ mɛ nyɔŋ ge?»

⁶(Jesu tɔ̧ɔ̧ wen'i bá nɛ̀ wen kɔ̧́ zaŋ Filip, wen a̧ iŋa so kɔ̧-a̧ mɔ n'aa tɛ de kaɗi.)

⁷Ɓɛɛ Filip kifi nú ha̧ a̧: «Kóó ɛ̀ɛ̀ hi̧fi brɛt tɛ kɔya sede gɔmŋmaa-yiitoo, beka nyɛm ha̧ o bíí mɛ kpa be ɓira-a tikiɗi dam wa na.»

⁸Ŋma ŋgaiwi kɔ̧-a̧, Andre nya Simɔŋ-Pierre, tɔ̧ɔ̧ ha̧ a̧:

⁹«Ŋma bem a̧a̧ hɛ̧ɛ̧ nɛ̀ a̧a̧ nɛ̀ brɛt bé-fón[8] mɔɔrɔ in zoro yiitoo, ɓɛɛ mɔ‘i tɛ nyɛm so o gba giiwi nɔ'ɔ?»

¹⁰Nɛ́ mɔ'ɔ nɛ̀ Jesu tɔ̧ɔ̧ ha̧ o ŋgaiwi kɔ‘i: «Ɛ̀nɛ̀ tɔ̧́ ha̧ wa mɛ ya nù.» (De mbɔɗi zɔ̧ a̧a̧ so fara'i nɛ̀ dɔka-a.) Wa yaa nù ɓɛɛ dɔka o wiwii lɛŋ duka hee booro-mɔɔrɔ ga.

¹¹Jesu baa brɛt, de osoko ha̧ Sɔ̧, ɓɛɛ kɛ̧ ha̧ o bíí; a̧ kɛ̧ɛ̧ zoro ha̧ wa hegɔ mbɛt. Bíí lɛŋ kpaa mɔ nyɛm see.

¹²O bíí nyɔŋa mɔ zaŋ sur kaɗi, ɓɛɛ Jesu tɔ̧ ha̧ o ŋgaiwi kɔ‘i: «Ɛ̀nɛ̀ ndɛ́m oi nyɔŋmɔ nɛ̀ ɓɔna lɛŋ, k’ɛ́nɛ́ e ŋma mɔ tikiɗi dúk ha̧ mɛ yɔ na.»

¹³Wa ndɛma oi brɛt-fón mɔɔrɔ nɛ̀ o bíí nyɔŋa so'i, ɓɛɛ dun gɛsɛ ɓu-zua-yiitoo.

¹⁴O bíí zɔka mɔɔ-usi-mɔ nɛ̀ Jesu dea'i kaɗi, ɓɛɛ tɔ̧: «Nɛ̀ mbetɛ, wi’ɛ nɛ́ Wi-tɔ̧-wen oi nú Sɔ̧ nɛ̀ tɛ̀ɛ́ tɛ so zaŋnu.»

¹⁵Jesu iŋa'e wa kɔ̧ɔ̧ mɛ tɛ̀ɛ́ ba wi nɛ̀ ŋgai mɛ de wan ha'i wó, ɓɛɛ a̧ yu kɔ̧-a̧ mɔ yak si zu kaya mɛ.

¹⁶Mɛ ga̧a̧mɔ o ŋgaiwi ko Jesu zira si ká̧ tɔp,

¹⁷ɓɛɛ wa daŋ ŋma kombon mɛ ku tɔp si Kafarnaum mɛ. Tɛ́ ŋgimbi'i ká tum baa nù kaɗi, ɓɛɛ Jesu tɛ kpa wa hɔ̧ɔ̧ na.

¹⁸Búk yuu nɛ̀ ŋgaya-a, ɓɛɛ yì pɛŋi nyɛmna.

¹⁹Wa baa kombon hɔ si see yì hee kilomɛtrɛ mɔɔrɔ kóó mɔɔrɔ-ɗoŋ-kpɔk ga, ɓɛɛ wa zɔk Jesu tɛ̀ tɛa-a nɛ̀ zu yì pii tɛ wa. Kíì dee wa,

²⁰ɓɛɛ Jesu tɔ̧ ha̧ wa: «Nɛ́ mí, k’ɛ́nɛ́ de kíì na.»

²¹Wa kɔ̧ɔ̧ so ha̧ a̧ mɛ ye kombon in wa, ɓɛɛ ká kombon hɔɔ so kɔ‘i nú ŋgere sɛn fara nɛ̀ wa nɛ́‘i kaɗi.

²²Nɛ̀ mɔ sa̧a̧, o giiwi nɛ̀ ɓɔna nɛ̀ kur tɔp iŋa'e ndé, Jesu daŋ kombon'i in o ŋgaiwi kɔ‘i na, wen kombon kpɔk nɛ̀ duka so nɛ́ mɔ‘i nɛ̀ o ŋgaiwi kɔ̧-a̧ baa'i.

²³Ɓɛɛ o ŋma kombon tɛɛ so nɛ̀ Tiberiad duk ká̧ fara nɛ̀ wa nyɔŋa so brɛt sɛnɛ ɓɛɛ ká Jesu de nɛ osoko ha̧ Sɔ̧ zu brɛt'i.

²⁴Ŋgimbi nɛ̀ giiwi zɔka'e Jesu in o ŋgaiwi kɔ‘i bo hi̧i̧ na, wa daŋa o ŋma geɗek kombon, ɓɛɛ wa yak si Kafarnaum mɛ kii a̧.

²⁵Wa kpaa Jesu sɛn kur yì, ɓɛɛ wa ak a̧: «Wan-usi-mɔ, ɛ́nɛ́ hɔɔ bɔɔ hɛ̧ɛ̧ mɛ gese ge?»

²⁶Jesu kifa nú ha̧ wa: «Nɛ́ kpasawen a̧‘m tɔ̧ h’ɛ́nɛ́; bó nɛ́ ɛ́nɛ́ kii am wen mɔɔ-usi-mɔ n’ɛnɛ zɔka na, ɓɛɛ ɛnɛ kii am wen nyɔŋmɔ n’ɛnɛ nyɔŋa zaŋ‘nɛ́ sur.

²⁷K’ɛ́nɛ́ de tom wen nyɔŋmɔ nɛ̀ ɗaŋ ɗaŋ na, ɓɛɛ ɛ̀nɛ̀ dé tom wen nyɔŋmɔ nɛ̀ duk hegɔ yaknɛ in nɛ̀ ha̧ duka-kpasa kpoo nɛ kpoo; mɛ̀ nɛ́ wan nɛ̀ Bem ko bíí tɛ ha̧ h’ɛ́nɛ́‘i, wen nɛ́ a̧ a̧ Dáà nɛ̀ dúk nɛ́ Sɔ̧ ee tumbal kɔ‘i tɛ-a.»

²⁸Wa aka a̧: «Mɔ n’ɛɛ tɛ de h’ɛ́ɛ́ mɛ de nɛ̀ o tom ko Sɔ̧ nɛ́ ge?»

²⁹Jesu kifa nú ha̧ wa: «Déé tom ko Sɔ̧ nɛ́ kɔ̧ɔ̧ ɗɔaa ha̧ wi n'aa toma tɛnɛ.»

³⁰Ɓɛɛ wa tɔ̧ ha̧ a̧: «Nɛ́ ge mɔɔ-usi-mɔ ge a̧ mɛ tɛ de h’ɛ́ɛ́ mɛ zɔk sɛk’ɛɛ kɔ̧ɔ̧ ɗɔaa ha̧ mɛ ge? Tom kɔ-mɛ nɛ́ ge tom ge?

³¹O zɔmdáa k’ɛɛ nyɔŋa so man ŋga-gbárà mɛ hee mɔ'ɔ nɛ̀ yɔra so ga: ‹A̧ ha̧a̧ brɛt nɛ̀ tɛ̀ɛ́ nɛ̀ yiwese ha̧ wa mɛ nyɔŋ.› »

³²Ɓɛɛ Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́; bó nɛ́ Moisɛ a̧ ha̧a̧ brɛt mɛ yiwese h’ɛ́nɛ́ na, ɓɛɛ nɛ́ Dáà kɔ‘m a̧ ha̧ kpasa brɛt mɛ yiwese h’ɛ́nɛ́;

³³wen brɛt ko Sɔ̧, nɛ́ brɛt nɛ̀ zir nɛ̀ yiwese, ɓɛɛ nɛ̀ de ha̧ o bíí zaŋnu mɛ duk kpasa.»

³⁴Wa tɔ̧ɔ̧ ha̧ a̧: «Nyaa, ɛ̀nɛ̀ há̧ nɛ́ i̧i̧ brɛt'i h’ɛ́ɛ́ ɓɔnsɛnɛ.»

³⁵Jesu tɔ̧ɔ̧ ha̧ wa: «Mí nɛ́ brɛt duka-kpasa; wi nɛ̀ tɛ́ tɛ‘m, wɔ beka gbɛ a̧ na; wi nɛ̀ kɔ̧ɔ̧ ɗɔaa ha̧‘m, wɔ-yí beka gbɛ a̧ na.

³⁶Mi bàá tɔ̧ so h’ɛ́nɛ́: ɛ́nɛ́ zɔka'm, nɛ́ mɔ'ɔ n’ɛ̀nɛ̀ kɔ̧ ɗɔaa ha̧‘m na mbɛt.

³⁷Bíí lɛŋ nɛ̀ Dáà ha̧ ha̧‘m tɛ́ tɛ̀ tɛ‘m, ɓɛɛ wi nɛ̀ tɛ́ tɛ‘m, mi beka bɛ̧ a̧ na,

³⁸wen bó nɛ́ mi zira nɛ̀ yiwese mɛ de mɔ n'am kɔ̧a̧ na, ɓɛɛ ha̧‘m mɛ de mɔ nɛ̀ wan nɛ toma'm tɛnɛ kɔ̧a̧.

³⁹Ɓɛɛ mɔ nɛ̀ wan nɛ toma'm tɛnɛ kɔ̧a̧ nɛ́ mɔ'ɔ: wen ká‘m tɛ̀ɛ́ de ha̧ ŋma bíí kpɔk mgbara o wi n'aa ha̧a̧ ha̧‘m mɛ yɔ, ɓɛɛ ha̧‘m mɛ kpasi nɛ̀ wa tɛ fio sɔŋkur wese.

⁴⁰Mɔ nɛ̀ Dáà kɔ‘m kɔ̧a̧ nɛ́ mɔ'ɔ: wen ha̧ kóó o ndé nɛ̀ zɔk Bem in nɛ̀ kɔ̧ɔ̧ ɗɔaa ha̧ a̧ mɛ duk kpasa kpoo nɛ kpoo, ɓɛɛ kɔ‘m, mi tɛ kpas'a tɛ fio sɔŋkur wese.»

⁴¹Nɛ́ mɔ'ɔ nɛ̀ o Juif ku̧i̧a mɔ zu a̧ zu wen n'aa tɔ̧ɔ̧‘e: «Wi nɛ́ brɛt nɛ̀ zira nɛ̀ yiwese» wó‘i.

⁴²Wa tɔ̧a̧: «Wi’ɛ, bó nɛ́ Jesu bem ko Jozɛf na? Bó nɛ́ ɛ́ɛ́ iŋa dáà in nàà kɔ̧-a̧ na? A̧ tɛ tɔ̧‘e, wi zira nɛ̀ yiwese héé ge?»

⁴³Jesu tɔ̧ɔ̧ ha̧ wa: «K’ɛ́nɛ́ ku̧i̧ mɔ mgbara ŋmaa géè na.

⁴⁴Ŋma bíí nɛ̀ nyɛma mɛ tɛ tɛ‘m, kà bó nɛ́ Dáà a̧ fo a̧ pii tɛ‘m na, bo na, ɓɛɛ kɔ‘m mi tɛ kpas'a sɔŋkur wese.

⁴⁵Wen yɔra so zaŋ kalata ko o wi-tɔ̧-wen oi nú Sɔ̧‘e: ‹Sɔ̧ tɛ usi mɔ ha̧ o bíí lɛŋ.› Ɓɛɛ kóó o ndé nɛ̀ zii usamɔ ko Dáà, ɓɛɛ nɛ̀ kpɛk mbɛt tɛ́ tɛ̀ tɛ‘m.

⁴⁶Ŋma bíí tɛ zɔk Dáà na, kànà nɛ́ wi nɛ̀ tɛ̀ɛ́ nɛ̀ tɛ́ Sɔ̧ a̧ zɔka Dáà ɓɛɛ.

⁴⁷«Nɛ́ kpasawen a̧‘m tɔ̧ h’ɛ́nɛ́; wi nɛ̀ kɔ̧ ɗɔaa ha̧‘m kpaa duka-kpasa kpoo nɛ kpoo.

⁴⁸Mí nɛ́ brɛt nɛ̀ de ha̧ bíí mɛ duk kpasa.

⁴⁹O zɔmdáa k’ɛ́nɛ́ nyɔŋa so man sɛn ŋga-gbárà mɛ, ɓɛɛ wa fea.

⁵⁰Ɓɛɛ nɛ̀ ko brɛt nɛ̀ zira nɛ̀ yiwese'i, bíí nɛ̀ tɛ nyɔŋ beka fe na.

⁵¹Mi nɛ́ brɛt nɛ̀ duk kpasa nɛ̀ zira nɛ̀ yiwese. Wi nɛ̀ nyɔŋ brɛt'i tɛ duk kpasa kpoo nɛ kpoo. Brɛt n'am tɛ ha̧‘i nɛ́ mur-tɛ‘m nɛ̀‘i ha̧a̧ wen kpasa-a ko o bíí nù lɛŋ.»

⁵²Ɓɛɛ o Juif ku̧ naŋ zaŋa wen nɛ̀ ŋgai in o ŋmaa, tɔ̧ nɛnɛ‘e: «Héé ge wi’ɛ nyɛma mɛ ha̧ murtɛ-wi h’ɛ́ɛ́ mɛ nyɔŋ ge?»

⁵³Ɓɛɛ Jesu tɔ̧ ha̧ wa: «Nɛ́ kpasawen a̧‘m tɔ̧ h’ɛ́nɛ́, k’ɛ̀nɛ̀ nyɔŋ mur-tɛ Bem ko bíí na, in k’ɛ̀nɛ̀ nɔ tɔk-tɛ-a na mbɛt, duka-kpasa beka duk in'nɛ̀ɛ̀ na.

⁵⁴Wi nɛ̀ nyɔŋ mur-tɛ‘m in nɛ̀ nɔ tɔk-tɛ‘m mbɛt kpaa duka-kpasa kpoo nɛ kpoo, ɓɛɛ mi tɛ kpas'a tɛ fio sɔŋkur wese.

⁵⁵Wen mur-tɛ‘m nɛ́ kpasa nyɔŋmɔ in tɔk-tɛ‘m nɛ́ kpasa mɔɔ-nɔ.

⁵⁶Wi nɛ̀ nyɔŋ mur-tɛ‘m, nɛ̀ nɔ tɔk-tɛ‘m duk sɛn tɛ‘m, ɓɛɛ mi duk tɛ wi’ɛi mbɛt.

⁵⁷Hee mɔ'ɔ nɛ̀ Dáà nɛ̀ toma'm tɛnɛ duk kpasa, ɓɛɛ mi duk kpasa nɛ̀ ɗoŋ Dáà ga, hegɔ mbɛt, wi nɛ̀ nyɔŋ mur-tɛ‘m tɛ duk kpasa nɛ̀ ɗoŋ-am.

⁵⁸Brɛt nɛ̀ zira nɛ̀ yiwese duk nɛtɛ in wan nɛ̀ o zɔmdáa k’ɛ́nɛ́ nyɔŋa so, wen wa fea; ɓɛɛ wi nɛ̀ nyɔŋ brɛt’ɛ tɛ duk kpasa kpoo nɛ kpoo.»

⁵⁹O mɔɔ nɔ‘i nɛ́ usamɔ ko Jesu kɔ̧́ tua-mɔi̧a-a sɛn Kafarnaum.

⁶⁰Ɗoŋ nɛ̀ wa zia wen'i kaɗi, o ŋma ŋgaiwi kɔ̧-a̧ nɛ̀ dɔka-a tɔ̧a̧: «Wen’ɛ ŋgaia; nɛ́ o'o tɛ zii so wen'i ɓɔ o?»

⁶¹Jesu iŋa'e o ŋgaiwi kɔ‘i ku̧i̧ nɛ́ mɔ zu mɔ n'aa tɔ̧a̧, ɓɛɛ tɔ̧ ha̧ wa: «Wen’ɛ sakali nɛ́ ɛ́nɛ́ nde?

⁶²Kà bo so h’ɛ́nɛ́ mɛ zɔk Bem ko bíí tɛ daŋa-a si fara n'aa duka so sɛnɛ nɛti, ɓɛɛ ɛ́nɛ́ tɛ̀ɛ́ de hee ge?

⁶³Nɛ́ Sa̧a̧ Ɔmi a̧ de ha̧ bíí mɛ duk kpasa, mur-tɛ-wi de ŋma mɔ na. O wen n'am tɔ̧ɔ̧ h’ɛ́nɛ́‘i, nɛ́ ɔmi in duka-kpasa.

⁶⁴Ɓɛɛ o ŋma bíí a̧a̧ mgbara'nɛ́ nɛ̀ kɔ̧ ɗɔaa ha̧‘m na.» (Wen nɛ̀ ku̧u̧naŋ-a mɛ Jesu iŋa kɔ‘i o wi nɛ̀ beka kɔ̧ ɗɔaa na in wi nɛ̀ tɛ e ɗɔra tɛ-a.)

⁶⁵A̧ tɔ̧ɔ̧ woyo: «Mɛ̀ nɛ́ wen mɔ‘i a̧‘m tɔ̧ɔ̧ nɛnɛ h’ɛ́nɛ́‘e ndé, ŋma bíí nɛ̀ nyɛma mɛ tɛ tɛ‘m, kà bó nɛ́ Dáà a̧ fo a̧ pii tɛ‘m na, bo na.»

⁶⁶Ɓɛɛ nɛ́ tɛ́ ŋgimbi'i a̧ o ŋma ŋgaiwi kɔ̧-a̧ nɛ̀ dɔka-a daka nɛ̀ zu si ɗoŋ, ɓɛɛ wa bɛ̧ baa yuwar in a̧.

⁶⁷Ɓɛɛ Jesu ak o ŋgaiwi kɔ‘i ɓu-zua-yiitoo: «Ɓɛɛ k’ɛ́nɛ́, ɛ́nɛ́ yak k’ɛ́nɛ́ na?»

⁶⁸Simɔŋ-Pierre kifa nú ha̧ a̧: «Gasa Wan, ɛ́ɛ́ tɛ́ nɛ̀ bɔɔ sitɛ o? Nɛ́ ɛ́nɛ́'ɛ a̧a̧ nɛ̀ o wen nɛ̀ de ha'i mɛ kpa duka-kpasa kpoo nɛ kpoo.

⁶⁹K’ɛ́ɛ́, ɛ́ɛ́ kɔ̧ɔ̧ ɗɔaa ɓɛɛ ɛ́ɛ́ iŋa'e ɛ́nɛ́ nɛ́ Sa̧a̧ Wi ko Sɔ̧.»

⁷⁰Ɓɛɛ Jesu tɔ̧: «Mɛ̀ nɛ́ mi'i hoka'nɛ́ ɓu-zua-yiitoo. Ɓɛɛ ŋma bíí kpɔk mgbara'nɛ́, nɛ́ ŋma satan.»[9]

⁷¹A̧ tɔ̧ɔ̧ wen'i zu Judas, bem ko Simɔŋ Iskariot; wen mɛ̀ nɛ́ a̧‘i a̧ tɛ́ e ɗɔra tɛ Jesu, a̧ nɛ́ ŋma kpɔk mgbara o ŋgaiwi ko Jesu ɓu-zua-yiitoo'i.