Read Northwest Gbaya TOM 10 Bible Online

TOM 10 - Northwest Gbaya bible

TOM 10

¹Ŋma bíí duka so Sezaree, nin-a nɛ́ Kɔrnɛi; a̧ nɛ́ gasa wi-duk-zu o wi-biro gɔmŋmaa nɛ̀‘i sa'e: «Italii.»

²A̧ nɛ́ wi-yu Sɔ̧ in wi-yu-kíí Sɔ̧ gú nɛ̀ o bíí kɔ̧̀ kira kɔ̧-a̧ lɛŋ. A̧ ha̧ mɔ nɛ̀ dɔka-a gbak nɛ̀ o wisan mgbara o Juif, kɔfi nɛ̀ Sɔ̧ ɓɔnsɛnɛ.

³Ŋma wese mɛ́ gira-wese, Kɔrnɛi zɔka ŋma betom ko Sɔ̧ nɛ̀ sa̧a̧-a̧ nɛ̀ tɛ̀ɛ́ tɛ̀ kɔ̧-a̧ tɛ̀ hɔɔ-zu, ɓɛɛ betom'i sa a̧: «Kɔrnɛi!»

⁴Kɔrnɛi hu̧i̧a̧ yí zɔk a̧, gba kíì baa a̧, ɓɛɛ a̧ tɔ̧: «Nɛ́ ge, Gasa Wan?» Ɓɛɛ betom ko Sɔ̧ kifi nú ha̧ a̧: «O kɔfa-sɔ̧ in o gbakamɔ kɔ-mɛ ha̧ o wisan hɔɔ ti Sɔ̧, ɓɛɛ nɛ́ mɔ'ɔ nɛ̀ tɛ Sɔ̧ mbaŋa ɗoŋ mɛ.

⁵Kinii mɛ̀ tóm ŋma bíí yaknɛ si Jope mɛ, ha̧ wa nɛ́ɛ̀ sa Simɔŋ nɛ̀ ŋma nin-a nɛ́ Pierre tɛnɛ.

⁶A̧ ɔ tɛ̀ ko Simɔŋ wi-gbɛ̧-ndàrá nɛ̀ tua kɔ̧-a̧ duk ká̧ tɔp.»

⁷Betom ko Sɔ̧ tɔ̧ɔ̧ wen'i, ɓɛɛ yak kɔ‘i; nɛ́ mɔ'ɔ nɛ̀ Kɔrnɛi saa o ŋma wi-de-tom kɔ‘i yiitoo, in ŋma wi-biro kpɔk nɛ̀ yu Sɔ̧ nyɛmna mgbara o wi-biro n'aa duk zu wa.

⁸A̧ wee ɗoŋ mɔ lɛŋ ha̧ wa, ɓɛɛ a̧ tom wa si Jope mɛ.

⁹Mɛ sa̧a̧mɔ, hee mɔ'ɔ nɛ̀ wa a̧a̧ yuwar ga, ŋgimbi nɛ̀ wa hɛɗa nɛ̀ Jope, Pierre daŋa so kɔ‘i duk zu tua mɛ kɔfi Sɔ̧. Ŋgimbi'i ká wese hɛɗa so see zu kaɗi.

¹⁰Wɔ gbɛɛ a̧, nɛ́ mɔ'ɔ n'aa kɔ̧ɔ̧ mɛ nyɔŋ mɔ; ɓɛɛ ŋgimbi nɛ̀ wa biti gii nyɔŋmɔ ha̧ a̧‘i a̧ Sɔ̧ hɔɔ nɛ̀ zu ha̧ a̧.

¹¹A̧ zɔka yiwese hu̧i̧a̧, ɓɛɛ ŋma zɔm mɔ nɛ̀ nú-wí nyɛm mɛ tɔ̧ na hee pɛsa goe nɛ̀ mgbii-aa naar ga zira pii mbɔɗɔnu.

¹²O saɗi nɛ̀ a̧a̧ nɛ̀ naŋ naar in o wan mɛ gbur zaŋ nɛ̀ nù, ká bá nɛ̀ o nɔ̧́í̧ nɛtɛ nɛtɛ nɛ̀ bu̧i̧ ɗɔɔ yiwese’ɛ a̧a̧ zaŋ mɔ‘i.

¹³Nɛ́ mɔ'ɔ n'aa zia ŋma tiger nɛ tɔ̧a̧: «Pierre, mɛ̀ nɛ́ɛ̀ gbɛ́ mɔɔ nɔ'ɔ, mɛ̀ nyɔ̀ŋ.»

¹⁴Ɓɛɛ Pierre kifi nú: «Ndó-ndó-ndó, Gasa Wan; wen tɛ̀ duka-a kɔ‘m mi tɛ nyɔŋ kɔ‘m ŋma ɗaŋ mɔɔ-ndiŋ nɛti na.»

¹⁵Ɓɛɛ tiger'i tɔ̧ ha̧ a̧ woyo: «Mɔ nɛ̀ Sɔ̧ dea nɛ̀ sa̧a̧-a̧ kaɗi, ká mɛ́ sa'e mɔɔ-ndiŋ na.»

¹⁶Mɔ‘i tɛ̀ɛ̀ hegɔ war taar, ɓɛɛ daŋ si ɗoŋ yiwese mɛ.

¹⁷Pierre sakala tɛ mɔ n'aa zɔka'i, ɓɛɛ a̧ kii gba̧a̧-a̧ takaɗi. Nɛ́ tɛ ŋgimbi'i a̧ o wi nɛ̀ Kɔrnɛi toma tɛnɛ, ak nɛ̀ tua ko Simɔŋ nɛnɛ‘i, hɔɔ kpa tua kɔ̧-a̧, ɓɛɛ nɛ́ɛ̀ yor mgbák dadaa-nú tua'i.

¹⁸Ɓɛɛ wa sa mɔ ak nɛ̀ mɔ‘e: «Simɔŋ nɛ̀‘i sa'e Pierre ɔ hɛ̧ɛ̧?»

¹⁹Ŋgimbi'i Pierre biti sakali tɛ mɔ n'aa zɔka, ɓɛɛ Sa̧a̧ Ɔmi tɔ̧ ha̧ a̧: «Ó ŋma bíí yiitoo[6], kii nɛ́ mɛ́.

²⁰Mɛ̀ zír kinii, mɛ̀ nɛ́ɛ̀ kpa wa, ɛ̀nɛ̀ yák, ká mɛ ta mɔ na, wen nɛ́ mi'i toma wa.»

²¹Pierre zira kpa o wi nɔ‘i, ɓɛɛ tɔ̧: «Wi n’ɛnɛ kii’ɛ nɛ́ mi, ɓɛɛ ɛ́nɛ́ kii am wen ge?»

²²Wa kifa nú ha̧ a̧: «Nɛ́ Kɔrnɛi wi nɛ̀ duk zu o wi-biro gɔmŋmaa a̧ toma yɛ. A̧ nɛ́ wi-yu-kíí Sɔ̧ nɛ̀ de mɔ nɛ̀ yuwar-a nɛ̀ o Juif lɛŋ zɔn. Ŋma sa̧a̧ betom tɔ̧ɔ̧ ha̧ a̧ mɛ sa mɛ nɛnɛ tɛ̀ kɔ̧-a̧ ha̧ a̧ mɛ zii mɔ nɛ̀ mɛ tɛ tɔ̧.»

²³Pierre mgbɔɔ wa si kɔ̧́ tua, ɓɛɛ ɗafi fara ha̧ wa. Mɔ sa̧a̧, ɓɛɛ a̧ yak in wa; o ŋma nya-wi sɛn Jope nɛ̀ɛ̀ in Pierre mbɛt.

²⁴Mɔ sa̧a̧ woyo, ɓɛɛ wa hɔ Sezaree; ŋgimbi'i, ɓɛɛ ká Kɔrnɛi mɔi̧a so o nàm in o gba de sɛm kɔ‘i lɛŋ pɛm nɛ̀ wa ti mɛ kaɗi.

²⁵Ŋgimbi hɔa-a ko Pierre, Kɔrnɛi wee ti a̧, ɓɛɛ hɔ̧fi̧ tik nù ti-bee-a mɛ gas'a.

²⁶Nɛ́ mɔ'ɔ nɛ̀ Pierre baa a̧ e ŋgɔn, ɓɛɛ tɔ̧: «Mɛ̀ kúr, mi nɛ́ bíí hee mɛ ga mbɛt.»

²⁷Wa tɔ̧ɔ̧ nyɛrɛ nɛnɛ in ŋmaa ye nɛ̀ tua; nɛ́ mɔ'ɔ nɛ̀ Pierre zɔka gba giiwi nɛ̀ mɔi̧a hi̧i̧,

²⁸ɓɛɛ tɔ̧: «Ɛ́nɛ́ iŋa'e nɛ́ ŋgayamɔ ha̧ ŋma be Juif mɛ gbam in ŋma gɔni-dùk, kóó yea-a tɛ ko wi’ɛi mbɛt na. Ɓɛɛ kinii Sɔ̧ usa mgbara-a ha̧‘m'e ndé, ká‘m tɔ̧‘e ŋma bíí nɛ́ ɗaŋ mɔɔ-ndiŋ na.

²⁹Mɛ̀ nɛ́ mɔ‘i s'am ta mɔ tɛ sara nɛ mɛ saa nɛ‘m'i na. Ɓɛɛ kinii mɛ̀ tɔ̧́ gba̧a̧ mɔ nɛ̀ mɛ sa'm wen-aa'i ha̧‘m zii.»

³⁰Kɔrnɛi kifa nú ha̧ a̧: «Kinii dee zɛ taar n'am duka so kɔfi nɛ̀ Sɔ̧ kɔ̧́ tua kɔ‘m mɛ gira-wese. Kà‘m tɛ zɔk mɔ, ɓɛɛ ŋma bíí nɛ̀ pi̧i̧ laa nɛ̀ tok tok nɛ̀ mɔ'ɔ nɛ̀ yor’ɛ.

³¹Wi’ɛi tɔ̧ɔ̧ ha̧‘m: ‹Kɔrnɛi, Sɔ̧ zia kɔfa-sɔ̧ kɔ-mɛ, ɓɛɛ tɛ-a mbaŋ ɗoŋ o ha̧a̧mɔ kɔ-mɛ gbak nɛ̀ o wisan.

³²Mɛ̀ tóm ŋma bíí si Jope mɛ nɛ̀ɛ́ sa Simɔŋ, ŋma nin-a nɛ́ Pierre, tɛnɛ. A̧ ɔ tɛ ko Simɔŋ wi-gbɛ̧-ndàrá nɛ̀ tua kɔ̧-a̧ duk ká̧ tɔp.›

³³Ɓɛɛ nɛ́ kale ŋgimbi'i a̧‘m toma nɛ̀ o bíí ɓɔn ŋgɔn mɛ́ nɛ̀ɛ́ sa'nɛ́ tɛnɛ. Ɛ́nɛ́ dee mɔ ɔ de wen n’ɛnɛ tɛa. Kinii ɛ́ɛ́ lɛŋ a̧a̧ ti'nɛ́, h’ɛ́ɛ́ mɛ zii mɔ lɛŋ nɛ̀ Gasa Wan tɔ̧ɔ̧ h’ɛ́nɛ́ mɛ tɔ̧ h’ɛ́ɛ́.»

³⁴Nɛ́ mɔ'ɔ nɛ̀ Pierre baa wen, ɓɛɛ tɔ̧ ha̧ wa: «Mi iŋa nɛ̀ mbetɛ, nɛ̀ Sɔ̧ kɛ̧ mgbara bíí na.

³⁵Mgbara o tugun bíí lɛŋ, kóó o ndé nɛ̀ yu kíí Sɔ̧, de nɛ̀ mɔ nɛ̀ yuwar-a, Sɔ̧ tɛ kpɛk wi’ɛi.

³⁶Sɔ̧ ha̧a̧ wen kɔ‘i ha̧ o be Israɛl, tɔ̧ nɛ̀ De Mbe Wen ga̧a̧mɔ nɛ̀‘i kpa nɛ̀ ɗoŋ Jesu Krist ha̧ wa; a̧ nɛ́ Gasa Wan ko o bíí lɛŋ.

³⁷Ɛ́nɛ́ iŋa mɔ nɛ̀ dee so nú Judee lɛŋ; Jesu be Nazarɛt ku̧u̧ naŋ tom kɔ‘i sɛn Galilee, ɗoŋ nɛ̀ Jean tɔ̧ɔ̧ nɛ́ wen zuia-bíí.

³⁸Ɓɛɛ Sɔ̧ ha̧ Sa̧a̧ Ɔmi in ŋgai kɔ‘i ha̧ a̧; nɛ́ mɔ'ɔ n'aa yara dam fara lɛŋ de nɛ̀ demɔ kpasi nɛ̀ o bíí lɛŋ nɛ̀ duk bara ko Wan-ɗaŋmɔ, wen Sɔ̧ duka so in a̧.

³⁹Ɓɛɛ ɛ́ɛ́ nɛ́ o wi-sedaako mɔ n'aa dea sɛn tɛ nù ko o Juif in Jerusalɛm mbɛt. Mɛ̀ nɛ́ a̧‘i a̧ wa ga̧i̧a̧ zu te-diŋa gbɛ nɛ̀ a̧.

⁴⁰Sɔ̧ dee ha̧ a̧ mɛ kur ŋgɔn tɛ fio ɗoŋ taar zɛ, ɓɛɛ e ha̧ a̧ mɛ usi tɛ̀,

⁴¹bó nɛ́ ha̧ dukbíí nɛ̀ oi-aa lɛŋ na, ɓɛɛ h’ɛ́ɛ́ o wi-sedaako nɛ̀ Sɔ̧ baa hok nɛti. Ɛɛ nyɔŋa mɔ, ɓɛɛ ɛɛ nɔ mɔ in a̧ ɗoŋ kura-ŋgɔn kɔ̧-a̧ tɛ fio.

⁴²Ɓɛɛ nɛ́ mɔ'ɔ n'aa tɔ̧ɔ̧ h’ɛ́ɛ́ mɛ de sedaako, tɔ̧ nɛnɛ ha̧ dukbíí‘e, Sɔ̧ ee wi nɛ̀ wan-gɔn-kita zu o bíí nɛ̀ ya kpasa in wan nɛ fea mbɛt.

⁴³Mɛ̀ nɛ́ a̧ nɛ́ mɔ'ɔ nɛ̀ o wi-tɔ̧-wen oi nú Sɔ̧ lɛŋ dee nɛ̀ sedaako'e: ‹Kóó o ndé nɛ̀ kɔ̧ɔ̧ ɗɔaa ha̧ a̧, tɛ kpa ea-ɗaŋmɔ nɛ̀ ɗoŋ nin-a.› »

⁴⁴Ŋgimbi nɛ̀ Pierre ɓɔna fara tɔ̧ɔ̧ wen'i, ɓɛɛ Sa̧a̧ Ɔmi zir pii zu o bíí lɛŋ nɛ̀ zia wen kɔ̧-a̧.

⁴⁵Ɗɛɗɛ o be Juif nɛ̀ kɔ̧ɔ̧ ɗɔaa ha̧ Jesu, ɓɛɛ e Pierre nɛnɛ tɛ naŋanɔ‘i, gɔna, wen nɛ̀ wa zɔka Sa̧a̧ Ɔmi zira pii zu o gɔni-dùk mbɛt.

⁴⁶Wa zia o wi nɔ‘i tɛ tɔ̧ɔ̧ o gɔni-nú nɛtɛ nɛtɛ gasi nɛ̀ Sɔ̧. Nɛ́ mɔ'ɔ nɛ̀ Pierre baa wen, ɓɛɛ tɔ̧:

⁴⁷«Ŋma bíí nɛ̀ tɛ dor zuia o wi nɔ'ɔ nɛ̀ yì, nɛ̀ wa kpaa Sa̧a̧ Ɔmi hee ɛɛ ga’ɛ, nɛ́ o?»

⁴⁸A̧ tɔ̧ɔ̧ ha̧ wa mɛ zui o wi nɔ‘i nɛ̀ nin Jesu Krist, ɓɛɛ wa ak a̧ mɛ duk benaŋ in wa zɛ tikiɗi sɛ́.