Read Northwest Gbaya TOM 13 Bible Online

TOM 13 - Northwest Gbaya bible

TOM 13

¹O wi-tɔ̧-wen oi nú Sɔ̧ in o wi-usi-wen ko Sɔ̧ duka so mgbara zuduk bíí ko Krist sɛn Antiok, nin-wa nɛ́ mɔ'ɔ: Barnabas, Simɔŋ (nɛ̀ wa sa'e Tu̧-wi), Lusius (be Sirɛn), Manaɛn (gbama-ŋgai ko wannu Herod), in Saul.

²Ŋma wese o bíí ko Gasa Wan mɔi̧a ŋmaa, zim yì, gasi nɛ̀ Sɔ̧, ɓɛɛ Sa̧a̧ Ɔmi tɔ̧ ha̧ wa: «Ɛ̀nɛ̀ é o Barnabas in Saul nɛtɛ ha̧‘m wen tom n'am saa wa wen-aa.»

³Ɗoŋ nɛ̀ wa zima yì gasi nɛ̀ Sɔ̧ kaɗi, wa ee er zu o Saul in Barnabas, ɓɛɛ e wa yak.

⁴Sa̧a̧ Ɔmi toma Barnabas in Saul yaknɛ mɛ de tom; hegɔ, wa zira si Selesii, ɓɛɛ wa ba kombon hi̧i̧ yak si Siprɛ mɛ.

⁵Wa hɔɔ Salaminɛ, ɓɛɛ wa tɔ̧ wen ko Sɔ̧ sɛn kɔ̧́ tua-mɔi̧a-a ko o Juif. Jean-Mark duka in wa, gbak nɛ̀ wa mbɛt.

⁶Ɗoŋ nɛ̀ wa ɓira nɛ̀ see-kisi hɔ Pafos kaɗi, wa kpaa ŋma wi-de-mɔɔ-kifi hi̧i̧ nɛ̀ tɔ̧‘e wi nɛ́ wi-tɔ̧-wen oi nú Sɔ̧. Wi’ɛi nɛ́ ŋma be Juif, nin-a nɛ́ Bar-Jesu.

⁷A̧ duka so in Sergius Paulus, haya wi-duk-zu see-kisi'i; nɛ́ mɔ'ɔ nɛ̀ wi-duk-zu see-kisii'i saa Barnabas in Saul tɛnɛ tɛ̀ kɔ‘i, wen a̧ kɔ̧ɔ̧ mɛ zii wen ko Sɔ̧.

⁸Elimas, wi-de-mɔɔ-kifi'i kɔ̧ kɔ‘i mɛ zii wen kɔ-wa na, ɓɛɛ a̧ kii war mɛ ɔr wi-duk-zu see-kisi ha̧ a̧ mɛ bɛ̧ kɔ̧ɔ̧ɗɔɔwen mbɛt. (Elimas'i nɛ́ wen nɛ̀ tɔ̧‘e «wi-de-mɔɔ-kifi».)

⁹Ɓɛɛ Saul nɛ̀ wa sa'e Paul, duna nɛ̀ Sa̧a̧ Ɔmi; nɛ́ mɔ'ɔ n'aa mbaɗa wi-de-mɔɔ-kifi'i féé,

¹⁰ɓɛɛ tɔ̧: «Ɗaŋ mɛ́ nɛ̀ see-mɛ duna nɛ̀ ɔramɔ in gɔn-ta, mɛ́ bem ko Wan-ɗaŋmɔ'ɛ, mgbák wi-sɛn-deemɔ nɛ̀ yuwar-a nɛ́ mɛ́; mɛ́ tɛ kaɗi bɔɔ ɗaŋa tana yuwar ko Gasa Wan mɛ́ gese ge?

¹¹Kinii, er Gasa Wan baa mɛ́ kaɗi, mɛ́ tɛ kifi wi-boma-yí, mɛ́ beka zɔk wese ɓɔna hɔ tɛ ŋma ŋgimbi.» Ɓɛɛ tɛ kale ŋgimbi'i, tum in gba-tum kpee yí-a hirip, ɓɛɛ a̧ zik ɓɔn oi-aa kir-kir kii nɛ̀ ŋma bíí mɛ́ kasi er-a mgbɔ nɛ̀ a̧.

¹²Wannu zɔka mɔ nɛ̀ yaka'i, ɓɛɛ kɔ̧ ɗɔaa, wen usamɔ ko Gasa Wan gɔna ɗɛɗɛ-a nyɛmna.

¹³Paul in o gbama-nɔ̀ kɔ‘i kura Pafos nɛ̀ kombon yak si Pɛrgɛ sɛn nú Pamfilii. Jean ee wa duk ɓɔn hi̧i̧, ɓɛɛ si kɔ‘i ɗoŋ si Jerusalɛm mɛ.

¹⁴Wa kura Pɛrgɛ, ɓɛɛ wa ba war si Antiok nú Pisidii. Wese'i duka nɛ́ wese-ɔm-tɛ, nɛ́ mɔ'ɔ nɛ̀ wa yee kɔ̧́ tua-mɔi̧a-a, ɓɛɛ wa ya nù.

¹⁵Ɗoŋ nɛ̀ wa tɔra kalata heembea in ko o wi-tɔ̧-wen oi nú Sɔ̧ kaɗi, o wan-zɔk-tua-mɔi̧a-a toma tɔ̧ ha̧ wa'e: «O nya-ɛɛ, k’ɛ̀nɛ̀ nɛ́ bòó nɛ̀ ŋma mbɔrɔ mɛ tɔ̧ ha̧ o bíí, ɓɛɛ ɛ̀nɛ̀ tɔ̧̀.»

¹⁶Nɛ́ mɔ'ɔ nɛ̀ Paul kura ŋgɔn, e er ha̧ wa, ɓɛɛ tɔ̧: «Ɛ́nɛ́ o be Israɛl, in ɛ́nɛ́ o wi-yu-kíí Sɔ̧, ɛ̀nɛ̀ zíí wen n'am tɛ tɔ̧‘i.

¹⁷Sɔ̧ ko dukbíí k’ɛɛ Israɛl hoka o zɔmdáa k’ɛɛ, a̧ dee ha̧ dukbíí k’ɛɛ‘i mɛ dɔk ŋgimbi nɛ̀ wa yaa so nɛnɛ nú Egiptɛ, ɓɛɛ a̧ kai wa gbonɛ hi̧i̧ nɛ̀ ŋgai mɛ te-er-a.

¹⁸Dee hee pɛ ɓu-naar ga n'aa daia nɛ̀ wa sɛn ŋga-gbárà.

¹⁹Ɗoŋ nɛ̀ Sɔ̧ kuma o tugun bíí mɔɔrɔ-ɗoŋ-yiitoo sɛn nú Kanaŋ kaɗi, a̧ kɛ̧ɛ̧ nù‘i ha̧ o zɔmdáa k’ɛɛ nɛ̀ mɔɔ-oi.

²⁰Mɔ‘i lɛŋ dee hee pɛ gɔmŋmaa-naar-nɛ-ɓu-mɔɔrɔ ga. «Ɓɛɛ ɗoŋ-aa'i Sɔ̧ ha̧ o wi-gɔn-kita ha̧ wa hɔ nɛnɛ ŋgimbi ko Samuɛl wi-tɔ̧-wen oi nú Sɔ̧.

²¹Wa aka Sɔ̧ mɛ ha̧ ŋma wannu ha̧ wa, ɓɛɛ a̧ ha̧ Saul bem ko Kis, be nutua ko Bɛnjamin ha̧ wa; a̧ ɔɔ wan tɛ pɛ ɓu-naar.

²²Sɔ̧ foo Saul yinɛ, ɓɛɛ de wan ha̧ David, ɓɛɛ Sɔ̧ de sedaako wen-aa'e: ‹Mi kpaa David bem ko Jɛse; wi nɛ̀ see-am baa nɛ́ a̧, nɛ́ a̧‘i a̧ tɛ de mɔ lɛŋ n'am kɔ̧a̧.›

²³Ŋma bezaŋ David nɛ́ Jesu nɛ̀ Sɔ̧ toma wen kpasa dukbíí Israɛl nyɛm nɛ̀ ɗoŋ ha̧a̧nú ko Sɔ̧.

²⁴Nɛti ha̧ Jesu mɛ tɛ, Jean yaka ti tɔ̧ nɛ̀ wen ha̧ o be Israɛl lɛŋ wen kpaia-duka-a ha̧ wa mɛ zui wa.

²⁵Jean hɛɗa kaɗa tom kɔ‘i kaɗi, ɓɛɛ a̧ tɔ̧ ha̧ o bíí: ‹Ɛ́nɛ́ ta k’ɛ́nɛ́‘e mi nɛ́ o? Weyaa, bó nɛ́ mi na! Ŋma bíí a̧ tɛ nɛ̀ ɗoŋ-am'i n'am nyɛm mɛ bur nyak ndárà naŋ-a na.›

²⁶«O nya'm, kóó ɛ́nɛ́ nɛ́ o bezaŋ Abraham, kóó ɛ́nɛ́ nɛ́ o wi-yu-kíí Sɔ̧, Sɔ̧ toma wen-kpasi-wi tɛnɛ tɛ yɛ.

²⁷O wi Jerusalɛm in o wan kɔ‘i bɛ̧ɛ̧ Jesu, ɓɛɛ gɔn kita-fio zu a̧ de nɛnɛ ha̧ wen ko o wi-tɔ̧-wen oi nú Sɔ̧ nɛ‘i tɔr wese-ɔm-tɛ ɓɔnsɛnɛ mɛ hɔ gba̧a̧.

²⁸Wa kpá yoŋgo mɔ n'aa tɛ fe wen-aa na, ɓɛɛ nɛ́ mɔ'ɔ nɛ̀ wa tɔ̧ɔ̧ ha̧ Pilat mɛ gbɛ a̧.

²⁹Ɓɛɛ ŋgimbi nɛ̀ wa dee mɔ lɛŋ nɛ̀ yɔra so wen-aa kaɗi, wa baa a̧ zir nɛ̀ zu te mɛ gun a̧.

³⁰Ɓɛɛ Sɔ̧ de ha̧ a̧ mɛ kur ŋgɔn tɛ fio.

³¹Nɛ́ mɔ'ɔ n'aa usa tɛ zɛ nɛ̀ dɔka-a ha̧ o wi nɛ̀ daŋa so in a̧ nɛ̀ Galilee si Jerusalɛm. Nɛ́ o wi nɔ‘i a̧ ya o wi-sedaako kɔ̧-a̧ ti o bíí sɔsɔɔ‘i.

³²Mɛ̀ nɛ́ hegɔ s’ɛɛ tɔ̧ De Mbe Wen’ɛ h’ɛ́nɛ́ mbɛt; wen ha̧a̧nú nɛ̀ Sɔ̧ ha̧a̧ so ha̧ o zɔmdáa k’ɛɛ,

³³hɔɔ gba̧a̧ wen ɛ́ɛ́ o bezaŋ, tɛ dea-a nɛ̀ Sɔ̧ dee ha̧ Jesu mɛ kur ŋgɔn tɛ fio, hee mɔ'ɔ nɛ̀ yɔra so zaŋ yiitoo Gima ko David'e: ‹Mɛ́ nɛ́ Bem kɔ‘m, mi koo mɛ sɔsɔɔ›, ga.

³⁴Sɔ̧ dee ha̧ a̧ mɛ kur ŋgɔn tɛ fio, n'aa beka mbɔr ɓɔna, wen Sɔ̧ tɔ̧ɔ̧ so'e: ‹Mi tɛ tok gba de sa̧a̧ yoŋgo n'am ha̧a̧ so nú mɛ tok zu David'i zu'nɛ́.›

³⁵A̧ tɔ̧ɔ̧ zaŋ ŋma kalata woyo'e: ‹Ɛ́nɛ́ beka e ha̧ sa̧a̧-wi k’ɛ́nɛ́ mɛ mbɔr na.›

³⁶Ɓɛɛ nɛ̀ David dee tom tɛ ŋgimbi kɔ‘i nyɛm nɛ̀ ɗoŋ ɗafamɔ ko Sɔ̧ kaɗi, a̧ fea, wa guna a̧ katɛ o zɔmdáa kɔ̧-a̧, ɓɛɛ a̧ mbɔr.

³⁷Ɓɛɛ wan nɛ̀ Sɔ̧ kpasa tɛ fio mbɔr na.

³⁸O nya'm, ɛ̀nɛ̀ íŋ‘e mɛ̀ nɛ́ wen zu a̧, ɛ́nɛ́ zia nɛ̀ wen ea-ɗaŋmɔ; bó nɛ́ ɛ́nɛ́ nyɛma so mɛ kpa deemɔ nɛ̀ yuwar-a zaŋ kalata heembea ko Moisɛ na.

³⁹Ɓɛɛ nɛ́ Jesu a̧ de ha̧ o bíí lɛŋ nɛ̀ kɔ̧ɔ̧ ɗɔaa ha̧ a̧ mɛ duk o kpasa wi-de-mɔ nɛ̀ yuwar-a.

⁴⁰Ɛ̀nɛ̀ zɔ́k tɛ̀‘nɛ́, wen ká mɔ nɛ̀ o wi-tɔ̧-wen oi nú Sɔ̧ tɔ̧ɔ̧ so tɛ́ɛ̀ tik zu'nɛ́, wen wa tɔ̧ɔ̧ so'e:

⁴¹‹Ɛ̀nɛ̀ zɔ́k, ɛ́nɛ́ o yàà-ŋgazu, ɗɛɗɛ‘nɛ́ a̧ gɔ́n, ɓɛɛ ɛ̀nɛ̀ yámbálí ɓɔn. Mi tɛ de ŋma tom tɛ ŋgimbi n’ɛnɛ biti nɛ̀ kpasa, ɓɛɛ koo ŋma bíí wee so ɗoŋ-aa h’ɛ́nɛ́, ɛ́nɛ́ beka kɔ̧ ɗɔaa na.› »

⁴²Ŋgimbi nɛ̀ Paul in Barnabas gboo mɛ yak, wa aia nú ha̧ wa mɛ́ tɛ̀ɛ́ tɔ̧ kale kpɔk wen'i ha̧ wa wese-ɔm-tɛ mɛ ɗoŋ.

⁴³O bíí nɛ̀ mɔi̧a'i pɛsa kaɗi, ɓɛɛ o ŋma Juif in o ŋma gɔni-dùk nɛ̀ ba yuwar ko o Juif nɛ̀ dɔka-a nɛ̀ɛ́ ɗoŋ o Paul in Barnabas; ɓɛɛ o Paul in Barnabas tɔ̧ mbɔrɔ ha̧ o wi nɔ‘i'e, wa a̧ é see-wa tɛ deemɔ nɛ̀ ta-tɛ ko Sɔ̧.

⁴⁴Wese-ɔm-tɛ‘i hɔa, ɓɛɛ o dɔka bíí saaye lɛŋ mɔi̧ mɛ zii wen ko Gasa Wan.

⁴⁵O Juif zɔka gba giiwi nɛ̀ mɔi̧a, see-wa kura, ɓɛɛ wa da̧ Paul a̧r nɛ̀ ndaa wen kɔ̧-a̧.

⁴⁶O Paul in Barnabas nɔɔ ŋgiɗi, ɓɛɛ tɔ̧ ha̧ wa: «Wen ko Sɔ̧'ɛ, wi tɛ̀ɛ́ tɔ̧ so tɔ̧a̧-a̧ h’ɛ́nɛ́ nɛti ɛ̧! Hee mɔ'ɔ n’ɛnɛ kɔ̧ mɛ kpɛk na, gɔn nɛ̀ kita zu'nɛ́ tɔ̧ nɛnɛ‘e, wi nyɛm mɛ duk kpasa kpoo nɛ kpoo na, ga, nɛ́ mɔ‘i s’ɛɛ zik k’ɛɛ tɛ-ɛɛ sitɛ o gɔni-dùk.

⁴⁷Wen nɛ̀ Gasa Wan tɔ̧ɔ̧ so h’ɛ́ɛ́ nɛ́ mɔ‘i; a̧ tɔ̧ɔ̧ so'e: ‹Mi ee mɛ nɛ̀ sa̧a̧mɔ ko o tugun bíí lɛŋ, wen ha̧ mɛ mɛ ba yuwar-kpasa-a nɛnɛ hegɔ hɔ nduti-nù mɛ.› »

⁴⁸Tɛ wen'i, o gɔni-dùk kpaa desee nyɛmna, wa dee nyɛŋɛ zɔn nɛ̀ wen ko Gasa Wan. Ɓɛɛ o ndé lɛŋ nɛ̀ Sɔ̧ hoka mɛ duk kpoo nɛ kpoo kɔ̧ ɗɔɔ wen ko Sɔ̧.

⁴⁹Ɓɛɛ wen ko Gasa Wan pɛsi dam fara'i lɛŋ.

⁵⁰Nɛ́ mɔ'ɔ nɛ̀ o Juif aa wen ha̧ o dita okoo in o gasawi saaye'i nɛ̀ gasa Sɔ̧, wen ha̧ wa mɛ usi bɔnɛ ha̧ o Paul in Barnabas, ɓɛɛ wa ndak wa yinɛ tɛ nù kɔ-wa.

⁵¹O Paul in Barnabas mgbɔɔ fuunu naŋ a nù ha̧ wa, ɓɛɛ yak mɔ kɔ-wa si Ikonium mɛ;

⁵²ɓɛɛ see o ŋgaiwi duna nɛ̀ desee in Sa̧a̧ Ɔmi mbɛt.