Read Northwest Gbaya TOM 14 Bible Online

TOM 14 - Northwest Gbaya bible

TOM 14

¹Wa dee kale mɔ‘i sɛn Ikonium mbɛt. O Paul in Barnabas nɛ̀ɛ̀ ye kɔ̧́ tua-mɔi̧a-a ko o Juif tɔ̧ nɛ̀ wen ko Sɔ̧, ɓɛɛ o Juif in o Grɛk nɛ̀ dɔka-a kɔ̧ ɗɔaa.

²Ɓɛɛ o ŋma Juif nɛ̀ kɔ̧ ɗɔaa na a wen ha̧ o gɔni-dùk mɛ de ŋmaa in o nya-ɛɛ.

³O Paul in Barnabas duka sɛn hi̧i̧ ɗoŋ-aa nyɛi̧ benaŋ; wa tɔ̧ɔ̧ wen nɛ̀ nɔɔ-ŋgiɗi, wen Gasa Wan ha̧a̧ ŋgai ha̧ wa mɛ de o mɔɔ-usi-mɔ in o mɔɔ-gɔn-ɗɛɗɛ usi nɛnɛ‘e wen nɛ̀ wa tɔ̧ zu deemɔ nɛ̀ ta-tɛ kɔ̧-a̧ nɛ́ kpasawen.

⁴Ɓɛɛ o bíí saaye'i kɛ̧ yiitoo: o ŋma yee ɗoŋ o Juif, ɓɛɛ o ŋma ye kɔ‘i nɛ́ ɗoŋ o betom ko Jesu.

⁵Nɛ́ mɔ'ɔ nɛ̀ o gɔni-dùk in o Juif, ká bá nɛ̀ o wan kɔ-wa ee nú in o ŋmaa mɛ de ŋgamɔ in o betom ko Jesu, mɛ yo wa nɛ̀ ta gbɛ.

⁶Wen'i aa zer o Paul in Barnabas, ɓɛɛ wa yu mɔ yak si Listrɛ in Dɛrbɛ nú Likaonii, in o be ye nɛ̀ ya zik fara'i.

⁷Wa tɔ̧ɔ̧ De Mbe Wen sɛn o fara nɔ‘i mbɛt.

⁸Ŋma bíí nɛ̀‘i koo so pi̧ nù nɛ̀ oi kara-a a̧a̧ so sɛn Listrɛ; a̧ nyɛm géé nyɛma-a mɛ yor kà a̧ nɛ́ nɛ̀ nɔ̀ na.

⁹Ŋma wese kara-wi'i duka zii nɛ̀ usamɔ ko Paul; Paul mbaɗa a̧ féé, ɓɛɛ iŋ‘e kɔ̧ɔ̧ɗɔɔwen ko wi’ɛi nyɛma ha̧ a̧ mɛ kpasi tɛ zɛɛ‘i.

¹⁰Ɓɛɛ Paul sa a̧ nɛ̀ ŋgaya-a'e: «Mɛ̀ kúr, mɛ̀ yór zééŋ zu naŋ-mɛ.» A̧ kpiɗa katak yor ŋgɔn, ɓɛɛ nɛ́ nɔ̀.

¹¹O giiwi zɔka mɔ nɛ̀ Paul dea, ɓɛɛ wa gai mɔ nɛ̀ nú Likaonii'e: «O sɔ̧ kpaia tɛ̀ duk nɛ́ bíí, ɓɛɛ wa zir pii tɛ-ɛɛ wó!»

¹²Wa aa nin Barnabas'e: «Zeus», ɓɛɛ ko Paul nɛ́ «Hɛrmɛs», wen Paul nɛ́ wi-we-ɗoŋ wen.

¹³Tua-ɗafi-sɔ̧ Zeus duka so nú ye, ɓɛɛ nɛ́ mɔ'ɔ nɛ̀ wan-ɗafi-sɔ̧ ee nú in o dɔka bíí, ɓɛɛ wa ɗɛk o wa̧a̧-te a tɛ o wiwii-ndai, kai nɛnɛ mɛ ɗafi nɛ̀ o Paul in Barnabas.

¹⁴O betom Paul in Barnabas zia nyɛrɛ mɔ‘i, wa gbaa laa tɛ-wa a nù, ɓɛɛ wa ma yì hiɗi nɛ̀ mɔ sitɛ o giiwi tɔ̧ nɛnɛ‘e:

¹⁵«O wi nɔ'ɔ, ɛ̧ɛ̧ nɛ́ ge n’ɛnɛ de’ɛ ge? Ɛ́ɛ́ nɛ́ o bíí hee ɛ́nɛ́ ga mbɛt! Ɛ́ɛ́ tɔ̧ k’ɛ́ɛ́ nɛ́ De Mbe Wen ko Sɔ̧ h’ɛ́nɛ́, wen h’ɛ́nɛ́ mɛ́ e o géé tum-mɔ hegɔ‘i duk, ɓɛɛ h’ɛ́nɛ́ mɛ́ zik tɛ‘nɛ́ sitɛ kpasa Sɔ̧ nɛ̀ dee yiwese, nù, in gba-tɔp, ká bá nɛ̀ o mɔ lɛŋ nɛ̀ ya sɛnɛ.

¹⁶Mgbara o bíí mɛ ti, Sɔ̧ ee ha̧ o tugun bíí lɛŋ mɛ ba nɛ́ yuwar deemɔ kɔ‘i.

¹⁷Ɓɛɛ a̧ kaɗi dee sedaako zu dee demɔ kɔ̧-a̧ na. Wen nɛ́ a̧ a̧ tom kórò nɛ̀ yiwese a zu o nyɔnɔ k’ɛ́nɛ́ mɛ dɛm, nɛ́ a̧ a̧ ha̧ nyɔŋmɔ h’ɛ́nɛ́, in nɛ́ a̧ a̧ ha̧ desee h’ɛ́nɛ́ mbɛt.»

¹⁸Tɛ́ wen nɛ̀ o betom ko Jesu tɔ̧a̧‘i, nɛ́ bɔnɛ bɔnɛ a̧ tɛ o giiwi gbina nɛnɛ, ɓɛɛ wa ɗafi o betom ɓɔna.

¹⁹O ŋma Juif tɛ̀ɛ́ nɛ̀ Antiok in Ikonium, a wen ha̧ o giiwi mɛ yo Paul nɛ̀ ta gbɛ; wa yoo a̧, ɓɛɛ wa ta kɔ-wa'e a̧ fee kaɗi, nɛ́ mɔ'ɔ nɛ̀ wa gbura a̧ pi̧ ɗoŋ ye wɔgbɔk.

²⁰O ŋgaiwi ko Jesu mɔi̧a ŋmaa zik a̧ e see-a, ɓɛɛ a̧ kur, si ɗoŋ saaye. Mɔ sa̧a̧, ɓɛɛ Paul yak in Barnabas si saaye Dɛrbɛ mɛ.

²¹Wa tɔ̧ɔ̧ De Mbe Wen sɛn Dɛrbɛ, de nɛnɛ ha̧ o bíí nɛ̀ dɔka-a mɛ́ duk ŋgaiwi ko Jesu. Nɛ́ mɔ'ɔ nɛ̀ wa sii ɗoŋ nɛ̀ war Listrɛ, Ikonium in Antiok.

²²Wa ha̧a̧ nɔɔ-ŋgiɗi ha̧ o ŋgaiwi ko Jesu, tɔ̧ nɛ̀ mbɔrɔ ha̧ wa mɛ yor nɛ̀ nɔa-a tɛ kɔ̧ɔ̧ɗɔɔwen tɔ̧ nɛnɛ‘e: «Ɛ́ɛ́ tɛ zɔk kànà bɔnɛ nɛ̀ dɔka-a sɛk’ɛɛ yee tɛ Wan ko Sɔ̧.»

²³O Paul in Barnabas hoka o kuti-wi mgbara o zuduk bíí ko Krist tɛ ye kpɔk kpɔk, wa kɔfa Sɔ̧ zim nɛ̀ yì, ɓɛɛ wa e o wi nɔ‘i er Gasa Wan nɛ̀ wa kɔ̧ɔ̧ ɗɔaa ha̧ a̧‘i.

²⁴Wa ɓira nɛ̀ nú Pisidii yak nɛnɛ si Pamfilii,

²⁵ɓɛɛ wa tɔ̧ De Mbe Wen sɛn Pɛrgɛ zir nɛnɛ si Atalii.

²⁶Wa yee kombon hi̧i̧ si nɛ̀ ɗoŋ si Antiok mɛ; mɛ̀ nɛ́ sɛn fara'i tɛ deemɔ nɛ̀ ta-tɛ ko Sɔ̧ a̧ wa ee so nɛ̀ wa tɛ tom nɛ̀ ku̧u̧naŋ-a tɛ tom ‘i nɛ wa dea'i.

²⁷Ɗoŋ nɛ̀ wa hɔɔ Antiok, wa mɔi̧a zuduk bíí ko Krist, ɓɛɛ wa we ɗoŋ mɔ lɛŋ nɛ̀ Sɔ̧ dee in wa tɛ naŋanɔ‘i; géé mɔ na, yuwar kɔ̧ɔ̧ ɗɔaa ha̧ Sɔ̧ nɛ̀ Sɔ̧ hu̧i̧a̧ ha̧ o gɔni-dùk,

²⁸ɓɛɛ wa duk hi̧i̧ ɗoŋ-aa nyɛi̧ benaŋ in o ŋgaiwi ko Jesu.