Read Northwest Gbaya TOM 15 Bible Online

TOM 15 - Northwest Gbaya bible

TOM 15

¹O ŋma bíí zira nɛ̀ Judee, ɓɛɛ usi mɔ ha̧ o nya-wa'e: «K’ɛ̀nɛ̀ gɔn bɔr'nɛ́ hee mɔ'ɔ nɛ̀ heembea ko Moisɛ tɔ̧ɔ̧ ga na, ɛ́nɛ́ beka kpasi na.»

²Ŋma ŋga sii-kafɛ tika mgbara wa, ɓɛɛ Paul in Barnabas kpɛr in o wi nɔ‘i nɛ̀ ŋgaya-a. Nɛ́ mɔ'ɔ nɛ̀ wa ee zu-a'e o Paul in Barnabas ká bá nɛ̀ o ŋma bíí mgbara wa a̧ nɛ́ Jerusalɛm wen wee ɗoŋ wen'i ha̧ o betom ko Jesu in o kuti-wi.

³Zuduk bíí ko Krist sɛn Antiok gbaka Paul in Barnabas nɛ̀ mɔɔ-yuwar tɛ nɔ̀‘i. Ɓɛɛ wa ɓir nɛ̀ nú Fenisii in nú Samarii, tɔ̧ nɛ̀ nyɛrɛ kpaa-mbe-ta ko o gɔni-dùk ha̧ o nya-wa, ɓɛɛ o wi nɔ‘i kpa desee nyɛmna.

⁴Wa hɔɔ Jerusalɛm, ɓɛɛ zuduk bíí ko Krist in o betom ká bá nɛ̀ o kuti-wi kpɛk wa nɛ̀ de-a; nɛ́ mɔ'ɔ nɛ̀ wa wee ɗoŋ mɔ lɛŋ nɛ̀ Sɔ̧ dee in wa ha̧ o wi nɔ‘i.

⁵O ŋma Fariziɛn nɛ̀ kɔ̧ɔ̧ ɗɔaa tɔ̧ɔ̧ nɛ̀ ŋgaya-a'e: o gɔni-dùk tɛ gɔn kana bɔr, in wa a̧ kásí heembea ko Moisɛ sɛ́.

⁶Nɛ́ mɔ'ɔ nɛ̀ o betom in o kuti-wi mɔi̧a ŋmaa mɛ zɔk mgbara mɔ‘i.

⁷Wa sii kafɛ in o ŋmaa ɗoŋ-aa nyɛi̧; nɛ́ mɔ'ɔ nɛ̀ Pierre kura ɓɛɛ tɔ̧: «O nya'm, ɛ́nɛ́ iŋa'e Sɔ̧ hoka'm mgbara'nɛ́ nɛ̀ ku̧u̧naŋ-a mɛ tɔ̧ De Mbe Wen ha̧ o gɔni-dùk, ɓɛɛ wa kpɛk wen'i.

⁸Ɓɛɛ Sɔ̧ nɛ̀ iŋa mɔ nɛ̀ a̧a̧ kɔ̧́ see bíí, dee sedaako ha̧ wa, ha̧ nɛ̀ Sa̧a̧ Ɔmi ha̧ wa hee mɔ'ɔ n'aa ha̧a̧ so h’ɛ́ɛ́ ga.

⁹Sɔ̧ kɛ̧ mgbara yɛ in wa na, wen a̧ fɔra see-wa nɛ̀ sa̧a̧-a̧ wen zu kɔ̧ɔ̧ɗɔɔwen kɔ-wa.

¹⁰Ɓɛɛ kinii, wen ge s’ɛnɛ tu̧ see Sɔ̧ tɛ ee dita tui nɛ̀ o zɔmdáa k’ɛ́ɛ́, kóó ɛ́ɛ́ nɛ̀ tɛ-ɛɛ nyɛm mɛ tui na zu o ŋgaiwi ko Jesu ge?

¹¹Ɛ́ɛ́ kɔ̧ɔ̧ ɗɔaa'e nɛ́ deemɔ nɛ̀ ta-tɛ ko Gasa Wan Jesu a̧ kpasa ɛ́ɛ́ hee wa ga mbɛt.»

¹²O bíí lɛŋ nɛ̀ mɔi̧a yaa nɛ̀ oi nú sélélé, ɓɛɛ wa zii wen ko Barnabas in Paul tɛ wee ɗoŋ o mɔɔ-usi-mɔ in o mɔɔ-gɔn-ɗɛɗɛ nɛ̀ Sɔ̧ dee nɛ̀ er-wa mgbara o gɔni-dùk.

¹³Ɗoŋ nɛ wa kaɗa tɔ̧ɔ̧ wen'i kaɗi, Jak baa wen, ɓɛɛ tɔ̧: «O nya'm, ɛ̀nɛ̀ zíí wen n'am tɛ tɔ̧‘i.

¹⁴Simɔŋ wee ɗoŋ mɔ h’ɛ́ɛ́ kinii'e, nɛ̀ ku̧u̧naŋ-a mɛ Sɔ̧ kia mɛ hok ŋma dukbíí wen nin-a sɛn mgbara o gɔni-dùk.

¹⁵Mɔ‘i nɛ̀ dea'i yee ŋmaa in wen ko o wi-tɔ̧-wen oi nú Sɔ̧; wen Yɔramɔ tɔ̧ɔ̧ so'e:

¹⁶‹Ɗoŋ mɔ‘i, mi tɛ pii ɗoŋ mɛ ɗafi gbɔsa tua-ŋgui ko David; oi gbina-a nɛ̀ ɓɔna'i, mi tɛ mbo woyo, ɓɛɛ mi baa a̧ e ŋgɔn.

¹⁷Ŋgimbi'i o oi bíí tɛ kii Gasa Wan, in o tugun bíí lɛŋ nɛ̀‘i saa nin-am ha̧ wa. Mɔ nɛ̀ Gasa Wan tɔ̧a̧‘i nɛ́ mɔ‘i; hegɔ, a̧ dee ha̧ o ee-zu mɔ kɔ̧-a̧ n'aa ee so ɓeemɛ mɛ hɔ gba̧a̧.›

¹⁹«Mi taa bó nɛ́ ɔ dee h’ɛ́ɛ́ mɛ e dita tui zu o gɔni-dùk nɛ̀ zika tɛ sitɛ Sɔ̧ na.

²⁰Ɛ̀ɛ̀ yɔ́r nɛ́ kalata ha̧ wa'e, ká wa nyɔŋ kpoo-ɗafi géé-sɔ̧, in fio-saɗi,[8] ká bá nɛ̀ tɔk saɗi na, in wa a̧ é ɗaŋ duka-a dúk.

²¹Wen nɛti ɓeemɛ hɔ kinii o wi-usi-heembea ko Moisɛ dama ye kpɔk kpɔk, ɓɛɛ wa tɔr kalata heembea'i kɔ̧́ tua-mɔi̧a-a wese-ɔm-tɛ lɛŋ.»

²²Nɛ́ mɔ'ɔ nɛ̀ o betom ko Jesu in o kuti-wi ee zu-a in o zuduk bíí ko Krist mɛ hok o ŋma bíí mgbara wa a zu o Paul in Barnabas wen toma wa si Antiok mɛ. O wi nɛ̀ wa hoka nɛ́ Judɛ, nɛ̀‘i sa'e Barsabas, in Silas. O wi nɔ‘i duka so nɛ́ o kpasa bíí mgbara wa.

²³Wen nɛ̀ wa yɔra zaŋ kalata'i nɛ́ mɔ'ɔ: «Ɛ́ɛ́ o nya'nɛ́, o betom ko Jesu in o kuti-wi fana ɛ́nɛ́ o nya-ɛɛ, gɔni-dùk nɛ̀ a̧a̧ Antiok, Sirii in nú Silisii nɛ̀ de-a.

²⁴Ɛ́ɛ́ zia'e o ŋma bíí k’ɛ́ɛ́ nɛ̀ɛ̀ sakali'nɛ́, zik nɛ̀ zu'nɛ́ nɛ̀ taamɔ kɔ-wa, ɓɛɛ bó nɛ́ ŋma bíí a̧ toma wa na.

²⁵Mɛ̀ nɛ́ hegɔ n’ɛɛ ee nú in o ŋmaa mɛ́ hok o ŋma bíí mgbara yɛ a zu o Paul in Barnabas n’ɛɛ kɔ̧ɔ̧ nyɛmna, mɛ́ tom wa nɛnɛ tɛ‘nɛ́.

²⁶Wa nɛ̀ o bíí nɛ̀ tɛ̀ɛ́ fe wen nin Gasa Wan k’ɛɛ Jesu Krist.

²⁷Ɛ́ɛ́ tóm o Judɛ in Silas sitɛ‘nɛ́ mɛ we ɗoŋ wen'i h’ɛ́nɛ́ nɛ̀ tɛ-wa.

²⁸Sa̧a̧ Ɔmi in yɛɛ kpɛka'e bó nɛ́ ɔ dee h’ɛ́ɛ́ mɛ́ e ŋma tui zu'nɛ́ gan, yak zu o mɔɔ nɔ'ɔ nɛ̀ duk nɛ́ mɔ mɛ́ zim kànà'ɛ, na:

²⁹Ɛ̀nɛ̀ bɛ̧́ nyɔŋa kpoo-ɗafi o géé-sɔ̧, tɔk saɗi in fio-saɗi, ɓɛɛ ɛ̀nɛ̀ é ɗaŋ duka-a duk mbɛt. K’ɛ̀nɛ̀ nɛ́ dee o mɔɔ nɔ‘i lɛŋ nɛ̀ yuwar-a ɓɛɛ ɔ dee. Ɛ̀nɛ̀ wór mɔ nɛ̀ de-a!»

³⁰Wa wara wa, ɓɛɛ o betom nɔ‘i kur yak si Antiok, mɔi̧ zuduk bíí ko Krist, ɓɛɛ ha̧ kalata'i ha̧ wa.

³¹Wa tɔra kalata'i, ɓɛɛ wa kpa desee nyɛmna tɛ wen nɔɔ-ŋgiɗi nɛ̀ wa zia zaŋ-aa'i.

³²O Judɛ in Silas duka so nɛ́ o wi-tɔ̧-wen oi nú Sɔ̧, wa tɔ̧ɔ̧ mbɔrɔ ɗoŋ-aa nyɛi̧ ha̧ nɛ̀ nɔɔ-ŋgiɗi, yor nɛnɛ ɗoŋ wa.

³³Wa duka hi̧i̧ ɗoŋ-aa nyɛi̧ benaŋ, ɓɛɛ o nya-wa war wa nɛ̀ desee wen ha̧ wa mɛ si ɗoŋ nɛ̀ de-a sitɛ o wi nɛ̀ toma wa nɛnɛ. [

³⁴Ɓɛɛ Silas hok mɛ ɓɔn kɔ‘i hi̧i̧.]

³⁵O Paul in Barnabas duka kɔ‘i ɓɔn Antiok usi nɛ̀ mɔ, tɔ̧ nɛ̀ De Mbe Wen ko Gasa Wan in o ŋma dɔka bíí mbɛt.

³⁶Ɗoŋ zɛ tikiɗi, Paul tɔ̧ɔ̧ ha̧ Barnabas: «Ɛ̀ɛ̀ sí ɗoŋ, ɛ̀ɛ̀ zɔ́k o nya-ɛɛ tɛ ye lɛŋ n’ɛɛ tɔ̧ɔ̧ so wen ko Gasa Wan sɛnɛ, ɛ̀ɛ̀ zɔ́k duka-a kɔ-wa.»

³⁷Barnabas kɔ̧ɔ̧ mɛ mgbɔ Jean nɛ̀‘i sa'e Mark nɛnɛ in wa,

³⁸ɓɛɛ Paul kɔ̧ na, wen a̧ ee so wa duk sɛn Pamfilii, ɓɛɛ a̧ bɛ̧ dee tom in wa mbɛt.

³⁹Sii-kafɛ kɔ-wa ŋgaia siti, ɓɛɛ wa kɛ̧ tɛ nɛ̀ ŋmaa. Barnabas mgbɔɔ Mark ɓɛɛ ye kombon yak kɔ‘i si Siprɛ mɛ.

⁴⁰Ɓɛɛ Paul hok kɔ‘i Silas mɛ nɛ̀ in a̧. Ɗoŋ nɛ̀ zuduk bíí ko Krist ee wa ɗɔɔ deemɔ nɛ̀ ta-tɛ ko Gasa Wan kaɗi, wa yaka kɔ-wa in ŋmaa.

⁴¹Paul yara nú Sirii in Silas ha̧ nɛ̀ nɔɔ-ŋgiɗi ha̧ o zuduk bíí ko Krist nɛnɛ.